The Latest
وحدت نیوز (ہنزہ نگر) مجلس وحدت مسلمین پاکستان میں غریب ،مظلوم اور مستضعفین کی امید ہے یہی وجہ ہے کہ خطے کے غریب عوام مجلس وحدت مسلمین کے ساتھ کھڑے ہیں۔ سابقہ کرپٹ حکمرانوں کے جھوٹے وعدوں اور ناانصافی کے شکار علاقے کے عوام کو ایم۔ڈبلیو ۔ایم کی شکل میں ایک نئی امید ملی ہے ۔ایم۔ڈبلیو۔ایم اقتدار میں آکر حقیقی معنوں میں عوام کی ترجمانی کرے گی اورعوام کے حقوق کے تحفظ کیلئے جماعت کے نمائندے دن رات محنت کرینگے۔ان خیالات کا اظہار مجلس وحدت مسلمین کے نامزد امیدوار برائے حلقہ ۔جی۔بی۔ایل 5 ہنزہ نگر I کے امیدوار حاجی رضوان علی نے عوامی رابطہ مہم کے سلسلے میں عمائدین ساس ویلی کے ساتھ گفتگو کرتے ہوئے کیا۔ انہوں نے کہا کہ نگر کے عوام نے مجلس وحدت مسلمین کے حق میں میں فیصلہ دیدیا ہے اور علاقے کے عوام اس مرتبہ کسی کے جھوٹے وعدوں کا شکار نہیں ہونگے۔گزشتہ 35سالوں میں عوامی مینڈیٹ کی توہین کی گئی اور ترقیاتی منصوبوں میں حد درجہ کرپشن کی گئی ۔اب وقت آگیا ہے کہ ان کرپٹ اور عوام دشمن سیاستدانوں کے شر سے آئندہ آنے والی نسلوں کو نجات دلائی جائے ۔8جون کو عوام ایم۔ڈبلیو۔ایم کے ساتھ دے کرثابت کر دے گی کہ ایم۔ڈبلیو۔ایم ہی وہ واحد جماعت ہے جو حقیقی معنوں میں عوام کی ترجمانی کر سکتی ہے اور ہر میدان میں گلگت بلتستان کے مفادات کاتحفظ کرسکتی ہے ۔ساس ویلی کے دورے کے دوران ۳ مقامات میں الیکشن کمپین آفسز کاافتتاح کیا جن میں اسقرداس ،شایار اور سمائر شامل ہیں۔ساس ویلی کی عوام نے ایم ۔ڈبلیو ۔ایم کی کاوشوں کو سراہتے ہوئے بھر پور ساتھ دینے کا عہد کیا اور حاجی رضوان علی پر مکمل اعتماد کا اظہار کیا۔
وحدت نیوز (لاہور) مجلس وحدت مسلمین پاکستان صوبہ پنجاب کی صوبائی کابینہ کا اجلاس صوبائی سیکرٹری جنرل علامہ عبدالخالق اسدی کی زیر صدارت وحدت ہاؤس میں منعقد ہوا جس میں صوبائی کابینہ کے اراکین نے شرکت کی اجلاس میں اضلاع میں جاری ضلعی شوریٰ کے اجلاسوں کی صورتحال کا جائزہ لیا گیا اور مختلف اضلاع میں کمزور تنظیمی صوتحال کا کھل کر جائزہ لیا گیا اور 2رکنی کمیٹی برادر علی رضا طوری اور ظفر چشتی صاحب پر مشتمل قائم کی گی گئی جو کہ اضلاع کے عہدداران خصوصاً سیکرٹری جنرل صاحبان سے تنظیمی صورتحال کا جائزہ لے کر رپور ٹ صوبائی سیکرٹری جنرل کو پیش کریں گے اور غیر فعال سیکرٹری جنرلز کو ان کی ذمہ داری سے الگ کر دیا جائے گا۔اس کے علاوہ اجلاس میں صوبے بھر فورتھ شیڈول کے تحت ہونے والی ناجائز پکڑ دھکڑ ، مالیاتی صوتحال کا بھی تفصیلی جائزہ لیا گیا ۔ اجلاس میں قانونی امور کے حوالے سے برادر سجاد بیگ ایڈووکیٹ( سیکرٹری شعبہ تحفظِ عزادری کی زیرنگرانی ہاٹ لائن قائم کرنے کا فیصلہ کیا گیا تاکہ صوبہ میں اس حوالے سے پیش آنے والے تمام واقعات پر فوری ردعمل ظاہر کیا جاسکے اور متاثرہ عہددار ان اور ملت کے افراد کی دار رسی کی جا سکے ۔ اجلاس میں نامزد سیکرٹری وحدت یوتھ برادر علی عمران نے اپنے عہدہ کا حلف اُٹھایا علامہ عبدالخالق اسدی نے عہدہ کا حلف لیا۔
وحدت نیوز(ملتان)مجلس وحدت مسلمین پاکستان کے ڈپٹی سیکرٹری جنرل و ممبر اسلامی نظریاتی کونسل علامہ محمد امین شہیدی نے کہا کہ پی پی 196کے ضمنی الیکشن میں حکومتی اُمیدوار الیکشن کمیشن کے ضابطہ اخلاق کی دھجیاں بکھیررہا ہے، حکومتی تمام تروسائل لیگی اُمیدوار کو کامیاب کرانے کے لیے پی پی 196میں استعمال کیے جارہے ہیں۔ ان خیالات کااظہار اُنہوں نے ملتان پریس کلب میں پریس کانفرنس سے خطاب کرتے ہوئے کیا۔ اس موقع پر مجلس وحدت مسلمین پی پی196کے اُمیدوار مہر سخاوت علی، علامہ اقتدار حسین نقوی، اخلاق الحسن بخاری، سید ناصر عباس زیدی، قربان محسن نقوی،مرید حسین خان ودیگر موجودتھے۔
علامہ امین شہیدی نے مزید کہا کہ پی پی 196میں انجینئر مہر سخاوت علی مجلس وحدت مسلمین کے اُمیدوار ہیں اور اُن کی کامیابی حلقے کی غیورعوام کی خواہش ہے،اس پریس کانفرنس کے بعد ہمارے خلاف کیے جانے والے تمام پروپیگنڈے دم توڑ گئے ہیں کہ جو کل تک ہمارے اُمیدوار کے دستبردار ہونے کی افواہیں پھیلارہے تھے۔ مسلم لیگ نواز اس حلقے میں پری پلان دھاندلی کررہی ہے جس کے باوجود الیکشن کمیشن نے کوئی نوٹس نہیں لیا۔ پریس کانفرنس سے خطاب کرتے ہوئے مہر سخاوت علی نے کہا کہ انتظامیہ ہمارے خلاف اوچھے ہتھکنڈے استعمال کررہی ہے ہمارے بینرز، سائن بورڈز اور پرچم اُتارے جارہے ہیں۔ ہم الیکشن کمیشن سے مطالبہ کرتے ہیں کہ وہ فوری اس کا نوٹس لے۔
وحدت نیوز (لاہور) مجلس وحدت مسلمین کے مرکزی جنرل سیکریٹری علامہ راجہ ناصر عباس جعفری نے مصر کے معزول صدر محمد مرسی اور اخوان المسلمین کے سو سے زائد افرادکو سزائے موت سنائے جانے کے فیصلے کو کڑی تنقید کا نشانہ بناتے ہوئے اسے انسانی حقوق کی کھلم کھلا خلاف ورزی قراد دیا ہے۔انہوں نے کہ امریکہ ،سعودیہ اور ایک فوجی آمر مصری عدالت کے ذریعے محمد مرسی اور ان کے ساتھیوں کو موت کا نشانہ بنانا چاہتے ہیں۔ اس خطے میں سعودیہ اور امریکہ اسلامی سیاسی قوت کو دبانے کے لیے اپنے تمام وسائل بروئے کا ر لا رہے ہیں۔ سعودیہ ایک طرف یمن میں مظلوم نہتے لوگوں پرننگی جارحیت کا مرتکب ہو رہا ہے جب کہ دوسری جانب مصر میں ایک آمر کی حمایت میں عدل و انصاف کے تقاضوں کو اپنی شہنشاہیت اور سامراجی مقاصد پر قربان کرنے میں مصروف ہے اس سے سعودیہ کا دوہرا معیار اور منافقانہ طرز عمل کھل کر سامنے آ چکا ہے۔انہوں نے کہا کہ سعودی حکومت مسلمانوں کی سیاسی قوت کو اپنے مفادات کا دشمن سمجھتی ہے اس لیے وہ مسلمان ممالک میں ابھرنے والی سیاسی عوامی تحاریک کے خلاف کاروائی میں پیش پیش ہے ۔ دنیا بھر میں امت مسلمہ کے زوال کا باعث سعودی و امریکی گٹھ جوڑ ہے۔ امریکی ایما پر صدر مرسی کو سنائی جانے والی سزائے موت مسلمان حکمرانوں کی آنکھیں کھولنے کے لیے کافی ہیں۔
وحدت نیوز (اسلام آباد) مجلس وحدت مسلمین پاکستان کے مرکزی ڈپٹی سیکریٹری جنرل علامہ محمد امین شہیدی نے کہا کہ ایم ڈبلیوایم گلگت بلتستان کے عوام کی دل کی آواز بن چکی ہے، مظلوموں کے حقوق کی جنگ لڑنے کا حوصلہ و ہمت فقط ایم ڈبلیوایم کو حاصل ہے، خدا کی مدد ونصرت سے آٹھ جون کو گلگت بلتستان میں ایک نئی صبح کا آغاز ہوگا، کامیابی انشاءاللہ مظلوموں اور محروموں کے نمائندگان کی ہوگی، مرکزی سیکریٹریٹ سے جاری اپنے بیان میں انہوں نے کہا کہ ن لیگ پنجاب کی طرز پر گلگت بلتستان انتخابات کو بھی ہائی جیک کرنے کیلئے کوشاں ہے، غیر مقامی نگراں گورنر ن لیگ کی الیکشن مہم کی نگرانی وپشت پناہی کررہے ہیں ، سرکاری وسائل وامکانات کا بے دریغ استعمال کیا جارہا ہے، ن لیگ بعض حلقوں میں پیسے کے بل بوتے پر شناختی کارڈ خریدنے کی کوششوں میں بھی مصروف ہے تاکہ کسی صورت ایم ڈبلیوایم کیلئے مشکلات کھڑی کرسکے، انہوں نے کہا کہ گلگت بلتستان کے غیور اور با شعور عوام اب کسی دھوکے میں نہیں آئیں گے، سڑسٹھ سالہ محرومیوں اور ناانصافیوں کا بدلہ وفاقی جماعتوں کو چکانا ہوگا،
پاک چین اقتصادی راہداری کا گیٹ وے گلگت بلتستان ہے رائیلٹی پر سب سے زیادہ حق بھی یہاں کے عوام کا ہے،بعض سیاسی جماعتیں روٹ کے معاملے پر سیاست چمکانے میں مصروف ہیں، یہ منصوبہ پاکستان بھر کے عوام کی ترقی وخوشحالی کا ضامن ہے، نواز لیگ نے راہداری روٹ کی تبدیلی سے باز رہے ورنہ شدید احتجاج ہوگا۔
وحدت نیوز(اسلام آباد)مجلس وحدت مسلمین کے مرکزی رہنما علامہ اصغر عسکری نے پنجاب کی صوبائی کابینہ کے اجلاس خطاب کرتے ہوئے کہا کہ عقیدے و نظریات کی بنیاد پرفکری ہم آہنگی رکھنے والے منظم افراد کے گروہ کو تنظیم کہا جاتا ہے۔تنظیم کی فعالیت کے لیے عوامی رابطہ شرط اول ہے تاکہ افرادکی فکری تربیت کر کے انہیں اس نظام کا حصہ بننے میں مدد دی جائے جو دور عصر میں نسلوں کے تحفظ و بقا اور انفرادی تشخص کے لیے ضروری ہے۔مجلس وحدت مسلمین میں ذمہ دار حیثیت سے اپنا مذہبی فریضہ پورا کرتے ہوئے ہماری یہ ذمہ داری بنتی ہے کہ ہم اس تنظیم کو افرادی، سیاسی، معاشی اور معاشرتی اعتبار سے مضبوط کریں۔شعبہ تنظیم سازی کو چاہیے کہ وہ یونٹ سازی کے عمل کو موثر بنانے کے لیے اپنے اہداف کا ازسر نو تعین کرے۔تمام اضلاع کو یونٹ سازی کے حوالے سے ٹاسک سونپا جائے اور مقررہ وقت میں بہترین اور مثبت نتائج کے حصول کو یقینی بنانے کے لیے انہیں پابند کیا جائے۔انہوں نے کہا یونٹ سازی کے حوالے سے اضلاع کی طرف سے کسی بھی پیش رفت کا اظہار مصدقہ معلومات پر مبنی ہوناچاہیے اور اس میں کسی بھی قسم کی بد دیانتی کا عنصر شامل نہیں ہو۔ضلعی جنرل سیکریٹری صاحبان کو چاہیے کہ وہ ضلعی انتظامیہ، صحافی ، وکلا، تاجر برادری،علماء اور علاقے کی موثر شخصیات کے ساتھ ملاقاتوں کا سلسلہ شروع کریں تاکہ افہام و تفہیم کی سازگار فضا میں کام جاری رہ سکے اور باہمی رواداری و یگانگت کو فروغ حاصل ہو۔انہوں نے پولیس کے ذریعے مجلس وحدت مسلمین کے کچھ عہدیدران کو ہراساں کرنے کی سخت مذمت کرتے ہوئے اسے حکومت کا روایتی حربہ قرار دیا ہے۔انہوں نے کہا کہ ہماری تاریخ شاید ہے کہ مذہب اہل بیت ؑ کے پرستاروں نے حق پرستی کے دامن کو ہمیشہ مضبوطی سے تھامے رکھا اور باطل طاقتوں کے سامنے کبھی سرنگوں نہیں ہوئی۔
وحدت نیوز (اسکردو) گلگت بلتستان کے عوام بیدار ہیں ،8 جون ملت کی سرفرازی کا دن ثابت ہوگا،جی بی کی محرومی کا سبب مرکز میں بیٹھی قوتیں ہیں،مجلس وحدت مسلمین مظلوموں کی زبان ہے،ہم گلگت بلتستان میں قانون کی حکمرانی کو نافذ کریں گے،کرپشن کا خاتمہ اور میرٹ کی بحالی ہماری اولین ترجیحات میں شامل ہے،عوامی خدمت کو ہمارے نمائندے عبادت سمجھ کر کریں گے،ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے سکردو پریس کلب میں عمائدین پاری کھرمنگ کے مجلس وحدت مسلمین میں شمولیت کے موقع پر پریس کانفرنس سے خطاب کرتے ہوئے کیا انہوں نے کہاگلگت بلتستان میں پری پول ریگنگ جاری ہے،بے نظیر انکم سپورٹس کے نام پر شناختی کارڈ جمع کرنا شروع کر دیے ہیں،الیکشن پر قدغن کو ہرگز برداشت نہیں کرینگے،الیکشن فوج کی نگرانی میں کرائی جائے بصورت دیگر دھاندلی کے سپیشلسٹ اس خطے کو عدم استحکام سے دوچار کردینگے،ہم ہر جماعت کی مینڈیٹ کا احترام کرتے ہیں ،یہی جمہوریت کا تقاضہ بھی ہے،پنجاب کی طرح آر اوز کے الیکشن کو ہم قبول نہیں کریں،الیکشن کا رزلٹ موقع پر ملنا چاہیئے،علامہ راجہ ناصر عباس جعفری کا کہنا تھا کہ گلگت بلتستان کے پرامن اور محب وطن عوام کے حقوق کے حصول کے لئے ہم کسی بھی قربانی سے دریغ نہیں کریں گے۔
وحدت نیوز (اسکردو) استاد العلماء علامہ یوسف کریمی ،آزاد امید وار کھرمنگ حلقہ 5 کاظم سیلم پاروی،ایم کیو ایم گلگت بلتستان کے صوبائی ترجمان وزیر غلام محمد کلیم،پیپلز یویھ آرگنائزیشن کے نائب صدر جی ایم پاروی،سیدمحمد علی رضوی گروپ کے چیئرمین کا مجلس وحدت مسلمین میں شمولیت کا اعلان ،آزاد امیدوار کاظم سیلم مجلس وحدت مسلمین کے امیدوار ڈاکٹر شجاعت میثم کے حق میں دستبردار،سکردو پریس کلب میں شمولیت کے موقع پر پریس کانفرنس سے خطاب کرتے ہوئے آزاد امیدوار کاظم سلیم کا کہنا تھا کہ مجلس وحدت مسلمین مظلوموں کی حامی جماعت ہے علامہ راجہ ناصر عباس جعفری امید مظلومین پاکستان ہیں ہم مجلس وحدت کے پرچم تلے جمع ہو کر اس پسماندہ اور محروم علاقے کے عوام کی ترقی کے لئے جدو جہد کریں گے،پیپلز یوتھ کے نائب صدر جی ایم پاروی کا کہنا تھا کہ گلگت بلتستان کے عوام کے جو دو سے تین سالوں کام مجلس وحدت مسلمین نے کیا ہے باقی جماعتوں نے 35 سالوں میں نہیں کیا ،یہی وجہ ہے کہ خطے کے مظلوم عوام مجلس وحدت مسلمین کو اپنے لئے نجات دہندہ سمجھتے ہیں،یہ ایک قومی جماعت ہے،میں آج کے بعد ایم ڈبلیوایم کا ادانیٰ ورکر اور علامہ راجہ ناصر کا سپاہی بن کر کام کرونگا اور اسے اپنے لئے عظیم سعادت سمجھوں گا۔
وحدت نیوز (لاہور) مجلس وحدت مسلمین کے مرکزی جنرل سیکریٹری علامہ راجہ ناصر عباس جعفری نے کہا ہے اگر حکومت ملک سے دہشت گردی کے خاتمے میں سنجیدہ ہے تو پھربیرونی مداخلت کے خاتمے کو اپنی اولین ترجیح قرار دے ملک میں حقیقی امن آ جائے گا۔ملک میں جاری دہشت گردی میں بھارتی ایجنسی را کے ملوث ہونے کے شواہد بھارت سے سفارتی تعلقات کی نوعیت پر نظرثانی کا مطالبہ کر رہے ہیں۔ملک دشمن طاقتوں سے انہی کے لہجے میں بات کرناقومی غیرت کا تقاضہ ہے۔ پاکستان کی ایٹمی طاقت سے خائف ملک دشمن خفیہ ایجنسیاں دہشت گردی کی کاروائیوں کے ذریعے وطن عزیز کو عدم استحکام کا شکاربنا کر پاکستان کو دنیا بھر کے سامنے ایک غیر محفوظ ریاست ثابت کرنا چاہتی ہیں۔ تاکہ بین الاقوامی سرمایہ کار وں کا اس ملک میں راستہ روکا جا سکے اور پاکستان اقتصادی و معاشی بدحالی کا شکار رہے ۔علامہ ناصرعباس ملاقات کے لیے آئے ہوئے سیاسی و مذہبی وفود سے گفتگو کر رہے تھے ۔انہوں نے کہا کہ پڑوسی ملک بھارت اپنی خفیہ ایجنسی را کے ذریعے ملک میں دہشت گردی کی کاروائیوں میں مصروف ہے۔ان ملک دشمن خفیہ ایجنسیوں کے آلہ کاروں کی نشاندہی کر کے بے نقاب کرنا ہو گا جو وطن عزیز کے خلاف سرگرمیوں میں مصروف ہیں۔ یہ ملک ہمارا مادر وطن ہے اس کی عزت و حرمت ہم پر واجب ہے۔جو شخص ذاتی مفادات کے حصول کے لیے ملکی سلامتی کو نقصان پہنچانا چاہتا ہے وہ غدار وطن ہے اور اس کی سزاتختہ دار ہے۔ پاکستا ن میں ہونے والے دہشت گردی کے واقعات میں بیرونی عناصر ملوث ہیں جو اپنے مقاصد حاصل کرنے کے لیے پاکستان میں موجود ان تنظیموں کو استعمال کر رہے ہیں جو مذہب اور قومیت کے نام پر واویلا کر کے حکومتوں کو بلیک میل اور دہشت گردی کو پروموٹ کرتی آئی ہیں۔ان عناصر کا تعلق نہ مذہب سے ہے اور نہ قوم سے بلکہ انہوں نے ذاتی مفادات کے حصول کے لیے ملکی سلامتی کو داو پر لگا رکھا ہے۔قومی سلامتی کو یقینی بنانے کے لیے ان عناصر کے خلاف بھرپور کاروائی وقت کی اہم ضرورت ہے۔انہوں نے کہا کہ حکومت نیشنل ایکشن پلان کی عمل داری پر تساہل پسندی سے کام لے رہی ہے۔جس کے باعث دہشت گردی کے واقعات پھر شدت پکڑتے جا رہے ہیں۔حکومت کو چاہیے کہ وہ نیشنل ایکشن پلان کو اپنے سیاسی حریفوں کے خلاف انتقامی ہتھیار کے طور پر استعمال کرنے کی بجائے ملک دشمن عناصر کی سرکوبی کے لیے استعمال کرے۔جس تیزی سے اس پلان کی منظوری لی گئی تھی اگر اسی سرعت کے ساتھ دہشت گردی کے خاتمے کے لیے اس پر عمل درآمد بھی کیا جاتا تو آج نتائج مختلف ہوتے۔ انہوں نے کہا کہ افواج پاک ملک میں امن وامان کے قیام کے لیے پورے جذبے،نیک نیتی اور بھرپور عوامی تائید کے ساتھ مصروف عمل ہے اور ہمیں یقین کامل ہے کہ اس پاک سرزمین پر آخری دہشت گر د کے خاتمے تک یہ غیور فوج ایسے ہی جرات مندانہ انداز میں آگے بڑھتی رہے گی۔
وحدت نیوز (گلگت) مجلس وحدت مسلمین کے مرکزی سیکرٹری سیاسیات سید ناصر شیرازی نے کہا کہ مسلم لیگ نون تکفیروی گروہوں سے اپنے تعلقات کی وضاحت کرے۔ نون لیگ حکومت کے وزراء کالعدم تنظیموں کے سربراہان کی سرپرستی آخر کس کی ایما پر کرتے رہے ہیں۔ ان خیالات کا اظہار انہوں نےصوبائی سیکریٹریٹ گلگت میں پولیٹیکل کونسل کے اجلاس سے خطاب کرتے ہوئے کیا۔ انہوں نے کہا کہ مسلم لیگ نون نے منفی سرگرمیوں میں ملوث کالعدم تکفیری گروہوں کو مکمل آزادی دے رکھی ہے، تاکہ وہ اس ملک میں فرقہ واریت کے فروغ کے لئے اپنی آزادنہ سرگرمیاں جاری رکھ سکیں۔ گلگت بلتستان کے باشعور عوام انہیں اس بات کی قطعی اجازت نہیں دیں گے کہ وہ مسلک یا عقیدے کی بات کرکے لوگوں کے مذہبی جذبات کی توہین کریں۔ یہاں کے لوگوں کی صدیوں پرانی روایات ہیں۔ یہ مدتوں سے وحدت و اخوت کے رشتے میں پیوست ہیں۔ مسلک کے نام پر تفریق کی کسی سازش کو یہاں پروان نہیں چڑھنے دیا جائے گا۔
انہوں نے کہا مجلس وحدت مسلمین اتحاد امت کی داعی ہے۔ اس نے اہل علاقہ کی بلاتفریق خدمت کے عزم کو عملی شکل دی ہے۔ یہی وجہ ہے ہماری اتنخابی مہم میں شیعہ سنی مسالک کے لوگ بلاتخصیص پوری لگن اور بھرپور انداز میں مصروف ہیں۔ انہوں نے کہا کہ الیکشن کے دنوں میں عوام کو چہرہ دکھانے والی سیاسی رہنماوں کو چاہیے کہ وہ علامہ راجہ ناصر عباس کے طرز عمل کی پیروی کریں، جو الیکشن سے قبل بھی متعدد بار ان علاقوں کا دورہ کرکے عوام کو بیشتر فلاحی منصوبوں سے نواز چکے ہیں۔ ناصر شیرازی نے کہا کہ اگلے چند دنوں میں علاقے کے بہت اہم اور نامور سیاسی ستون مجلس وحدت مسلمین میں شمولیت کا اعلان کر رہے ہیں جو مخالفین کے لئے سیاسی موت ثابت ہوگی۔
