وحدت نیوز(اسلام آباد) چیئرمین خیرالعمل فاﺅنڈیشن نثارعلی فیضی نے پنجاب اور کشمیر میں سیلاب کی تباہ کاریوں اور جانوں کے ضیاع پر گہرے غم و افسوس کا اظہار کیا اور اسکے ساتھ ساتھ اپنے رضا کاروں کو ہدایات جاری کی کہ وہ فوری طور پر امدادی سر گرمیوں میں بڑھ چڑھ کر حصہ لیں انہوں نے کہا یہ بات بھی کسی المیے سے کم نہیں کہ یہاں ہر سال سیلاب آتے ہیں لیکن حکمران اپنے خاندانوں اور اشرافیہ کے مفادات کو تحفظ دینے میں ہی تمام وسائل خرچ کر دیتے ہیں اور ایسے سانحات کے بعد صرف تصویر اور تقریر تک ہی کی منصوبہ بندی کرتے ہیں چاہے وہ سند ھ میں قحط سے بچوں کی اموات ہوں یا پنجاب میں ڈیموں کے پانی کے اخراج کو دیہاتوں میں آبادی کی طرف کھولنے کے مجرمانہ اقدامات ہوں جبکہ عوام کے ٹیکس کے پیسوں سے شہروں کی اکھاڑ پچھاڑ کر کے عام آدمی کی زندگی کو اجیرن بنانے کو اپنا فرض اولین سمجھ رہے ہیں نثار علی فیضی نے کہا کہ دنیا میں ترقی یافتہ ممالک میں قدرتی آفات کی مدیریت کر کے اسے عوام کی ضروریات کے لیے فائدہ مند بنایا جاتا ہے لیکن بد قسمتی سے پاکستان میں تمام تر وسائل ہونے کے باوجود بہتر اقدامات نہ ہونے کی وجہ سے بارشوں کے پانی سے فائدہ اٹھانا تو دور کی بات ہے اس پر قابو پانا بھی مشکل ہوتا چلا جا رہا ہے جسکی وجہ سے قوم بڑے بڑے سانحات میں تباہیوں کے دلدل میں ڈوب جاتی ہے انہوں نے کہا کہ خیرالعمل فاﺅنڈیشن نے اس صورت حال پر آج اپنی کور کمیٹی کا ہنگامی اجلاس بلا لیا جس میں امدادی سرگرمیوں کے حوالے سے حکمت عملی مرتب کی جائے گی۔

وحدت نیوز(کراچی) کراچی پاکستان کا معاشی حب ہے، شہر بھرمیں دہشت گرد مراکزقائم ہیں ، شہریوں کی جان ومال کو مذہبی وسیاسی طالبانوں کے رحم و کرم پر چھوڑ دیا گیا ہے، قانون نافذکرنے والے ادارے اپنے گڈول ثابت کریں ، کراچی کا ضلع وسطی اہل تشیع کی مقتل گاہ بن چکا ہے، کراچی سمیت ملک بھر میں ہم پر یک طرفہ حملے ہو رہے ہیں ، پراکسی وار یا فرقہ واریت کا الزام مضحکہ خیز ہے، یوسف پلازہ میں شیعہ دکاندار محسن رضا کے قتل کی پر زور مذمت کرتے ہیں ، سندھ حکومت دہشت گردی کی روک تھام میں یکسر ناکام ہے، ان خیالات کا اظہار مجلس وحدت مسلمین کراچی ڈویژن کے پولیٹیکل سیکریٹری سید علی حسین نقوی نے وحدت ہاوس میں تنظیمی اجلاس سے خطاب کرتے ہوئے کیااس موقع پر حسن ہاشمی، انجینئر رضا نقوی ، مبشر حسن ، علامہ علی انور ،مدثر حسن اور اصغر زیدی بھی موجود تھے۔

ان کاکہنا تھا کہ پاکستان کے سب سے بڑے کاروباری مرکز، معاشی اور دفاعی فرنٹ لائن کراچی کے شہریوں کو دہشت گردوں کے رحم و کرم پر چھوڑ دیا گیا ہے، عوام کو مذہبی وسیاسی دونوں قسم کے طالبانوں کا سامنا ہے، قانون نافذ کرنے والے ادارے تحقیق کے باوجود دہشت گردی کے سد باب میں ناکام نظر آتے ہیں ،گرفتار ٹارگٹ کلرز کو جیلوں میں سرکاری مہمان بنا کر رکھا گیا ہے، کسی مجرم کو آج تک تختہ دار پر لٹکا کر نشان عبرت نہیں بنایا گیا،عدل و انصاف کی قلت دہشت گردی کے پروان چڑھانے کا بڑا زریعہ ہے، کراچی کا ضلع وسطی گذشتہ تین سال سے مسلسل اہل تشیع ڈاکٹر ز، انجینئرز، علماء ، وکلاء اور تاجروں کامقتل گاہ بن چکا ہے، گلبہار، ناظم آباد، حسن کالونی، انچولی،سمیت دیگر علاقوں میں اہل تشیع دکانداروں کو چن چن کر گولیوں کا نشانہ بنایا جارہا ہے،انہوں نے سندھ حکومت خصوصاًوزیر اعلیٰ قائم علی شاہ، ڈی جی رینجرزمیجر جنرل رضوان اختراور ایڈیشنل آئی جی پولیس غلام قادر تہبو سے مطالبہ کیا کہ کراچی میں جاری شیعہ ٹارگٹ کلنگ میں ملوث دہشت گردوں کو جلد از جلد گرفتار کیا جائے اورگرفتار ٹارگٹ کلرز کو عوام کے سامنے پیش کر کے ان کی شناخت ظاہر کی جائے۔

وحدت نیوز (پشاور) مجلس وحدت مسلمین خیبر پختونخوا کی شوریٰ کا اجلاس 14 ستمبر 2014ء بروز اتوار پشاور میں طلب کرلیا گیا ہے، جس میں تمام اضلاع کی کابینہ اور صوبائی کابینہ کے اراکین شریک کریں گے، ایم ڈبلیوایم کے صوبائی سیکرٹری اطلاعات سید عدیل عباس زیدی نے ’’وحدت نیوز‘‘ کو بتایا کہ گذشتہ ماہ کوہاٹ میں منعقد ہونے والے ایم ڈبلیو ایم خیبر پختونخوا کابینہ کے اجلاس کے فیصلہ کی روشنی میں صوبائی سیکرٹری جنرل علامہ سید سبطین الحسینی نے 14 ستمبر بروز اتوار صوبائی شوریٰ کا اجلاس طلب کیا ہے، وحدت ہاوس پشاور میں منعقد ہونے والے اس اجلاس میں صوبائی کابینہ کے اراکین اور تمام اضلاع کے سیکرٹری جنرلز اپنی تمام کابینہ کے ہمراہ شریک ہوں گے، اور کارگردگی رپورٹس پیش کی جائیں گی، انہوں نے بتایا کہ اجلاس میں تنظیمی ڈھانچہ کو صوبہ بھر میں مضبوط اور فعال بنانے، شعبہ جاتی کارکردگی میں بہتری لانے اور ملک و صوبہ کی صورتحال کو مدنظر رکھتے ہوئے اہم فیصلہ جات کئے جائیں گے۔

وحدت نیوز(کوئٹہ) مجلس وحدت مسلمین بلوچستان کے سیکریتری جنرل علامہ مقصود علی ڈومکی نے آپریشن ضرب عضب کی کامیابی کا خیر مقدم کرتے ہوئے کہا ہے کہ دہشت گردی اور انتہا پسندی کے خلاف پاک فوج کے اقدامات کو پوری قوم کی تائید حاصل ہے۔ اس آپریشن سے جہاں پاک فوج کا حوصلہ بڑھا ہے، وہاں قوم کی نظر میں ان کی عزت و توقیر میں اضافہ ہوا ہے۔ انہوں نے کہا کہ پوری قوم ان بہادر جوانوں کو سلام عقیدت پیش کرتی ہے۔ جنہوں نے ملک دشمن، اسلام دشمن اور انسانیت کے دشمن ،دہشت گردوں کے خلاف لڑتے ہوئے جام شہادت نوش کیا۔ انہوں نے کہا کہ دہشت گردی کے مکمل خاتمے تک آپریشن ضرب عضب جاری رہنا چاہیئے۔ بلوچستان میں فرقہ وارانہ دہشت گردوں کے تربیتی مراکز اور محفوظ ٹھکانے موجود ہیں جن کے خلاف آپریشن ناگزیر ہے۔ اس سے قبل ملک گیر دھرنوں کے موقع پرکروڑوں شہریوں نے دہشت گردی کے ان مراکز کے خلاف آپریشن کا مطالبہ کیا تھا۔

انہوں نے کہا کہ ملکی سیاسی قیادت لہجے کی تلخی اور بازاری زبان استعمال کئے بغیر لوگوں کی بہتر رہنمائی کر سکتی ہے۔ کسی کی توہین اور اخلاق سے گرا ہوا لہجہ، کسی قومی سطح کے لیڈر کو زیب نہیں دیتا۔ دلیل اور منطق کی سچائی اہم ہوتی ہے۔ انہوں نے کہا کہ اراکین پارلیمنٹ ہوں یا انقلاب و آزادی کے قائدین، قوم ان سے اعلٰی کردار اور بہتر اخلاق کی توقع رکھتی ہے۔ انہوں نے کہا کہ انقلاب اور تبدیلی کی آواز اب ملک کی قسمت بدل کر رہے گی۔ اب ہمیں سنجیدگی سے اس ملک سے کرپشن، دہشت گردی، مہنگائی، بے روزگاری، غربت و افلاس کا خاتمہ کرکے یہ پیغام دینا ہوگا کہ یہ ملک فقط جاگیرداروں اور سرمایہ داروں کا نہیں بلکہ غریبوں اور مظلوموں کا بھی ہے۔