وحدت نیوز(پشاور) مجلس وحدت مسلمین پاکستان کے سربراہ علامہ ناصرعباس جعفری سانحہ آرمی پبلک اسکول کے زخمی طلباء کی عیادت کیلئے پشاور پہنچ گئے ہیں ،ان کے ہمراہ مرکزی رہنما علامہ شیخ اعجاز بہشتی، صوبائی رہنما ارشاد بنگش اور عدیل عباس بھی موجود ہیں ، علامہ ناصر عباس جعفری نے وفد کے ہمراہ لیڈی ریڈنگ اسپتال میں زخمی طلباء کی عیادت کی اور ان کی خدمت میں پھولوں کے گلدستے پیش کیئے، علامہ ناصرعباس جعفری نے سانحہ میں زخمی طلباء کے بلند حوصلوں ،جواں امنگوں اور مضبو ط ارادوں کو خراج تحسین پیش کیا، اس موقع پر زخمیوں سے گفتگو کرتے ہوئے انکا کہنا تھا کہ تعلیم یافتہ معاشرہ ہی جہالت اور مذہبی انتہاپسندی کا تدارک کر سکتا ہے، تعلیم دشمن طالبان نے علم کے چراغ کو بجھانے کی کوشش کی لیکن آپ کے شہید ساتھیوں نے اپنے پاکیزہ لہوسے ا س چراغ کی لو کو مذید روشن کر دیا ہے۔بعد ازاں علامہ ناصر عباس جعفری نے ورسک روڈ پر واقع آرمی پبلک اسکول کا دورہ بھی کیا جہاں سفا ک طالبان دہشت گردوں نے 142بے گناہ طلباء اور اساتذہ کو بے دردی سے گولیوں کا نشانہ بنایا ۔

پشاور (وحدت نیوز) مجلس وحدت مسلمین خیبر پختونخوا کے آفس مسئول ارشاد حسین بنگش نے کہا ہے کہ منور حسن شہداء وطن کیخلاف جاری بیان واپس لیتے ہوئے قوم سے معافی مانگیں، ان خیالات کا اظہار انہوں نے وحدت ہاوس پشاور  میںمحرم الحرام کی مناسبت سے منعقدہ ایک اجلاس سے خطاب کرتے ہوئے کیا۔ اس موقع پر وحدت اسکاوٹس کی جانب سے محرم الحرام کے آغاز سے اب تک کئے جانے والے سیکورٹی انتظامات کے حوالے سے اجلاس کے شرکاء کو بریفنگ دی گئی۔ صوبائی رہنماء ارشاد حسین بنگش کا کہنا تھا کہ ہم پاک فوج اور ہزاروں محب وطن شہداء کے سفاک قاتلوں کو شہید قرار دینے کے منور حسن کے بیان کی پرزور مذمت کرتے ہیں، جو لوگ قیام پاکستان سے ہی ریاست کے مخالف اور بابائے قوم قائداعظم محمد علی جناح (رح)پر کفر کے فتوے لگاتے تھے، آج وہی لوگ ہمارے بہادر اور شجاع افواج اور پاکستانی عوام کے قاتل دہشت گردوں کی حمایت اور ریاست کی مخالفت کر کے ثابت کر رہے ہیں کہ ان کا پاکستان کے وجود کے ساتھ کوئی تعلق نہیں، پاکستان کے شہدا ہمارے قومی ہیرو ہیں۔
 

انہوں نے کہا کہ ہمارے عظیم شہدا کو ان کٹھ پتلی ملاوں کے سرٹیفیکیٹ کی ضرورت نہیں اور ہم مطالبہ کرتے ہیں کہ جماعت اسلامی کی قیادت پاک فوج اور ہزاروں شہدا کے خانوادگان سے اس شرمناک بیان پر غیر مشروط معافی مانگے۔ انہوں نے کہا کہ سانحہ گوجرانوالہ کی پرزور انداز میں مذمت کرتے ہیں اور پنجاب حکومت کی جانب سے ملت تشیع کیساتھ روا رکھا جانیوالا امتیازی سلوک بھی افسوسناک ہے۔ انہوں نے ڈیرہ اسماعیل خان کی سیکورٹی پاک فوج کے حوالے کرنے کے اقدام کو احسن قرار دیتے ہوئے کہا کہ پشاور، کوہاٹ ، ہنگو اور ٹانک میں 9 اور 10 محرم الحرام کو سیکورٹی کے سخت ترین انتظامات کرنے کی ضرورت ہے۔ تاہم شیعہ، سنی عزاداروں کو اس حوالے سے کوئی مشکل درپیش نہیں آنی چاہئے۔