وحدت نیوز(لاہور) مجلس وحدت مسلمین پاکستان کے سربراہ علامہ ناصر عباس جعفری نے کہا ہے کہ عزاداری پر کوئی قدغن قبول نہیں کریں گے، ہر صورت میں عزاداری کی حفاظت کریں گے۔ انہوں نے کہا کہ علماء و ذاکرین پر پابندی لگا کر عزاداری کو محدود کرنے کی سازش کی جا رہی ہے جو بالکل برداشت نہیں ہوگی، وہ کربلا گامے شاہ لاہور میں معروف شیعہ سماجی شخصیت الحاج حیدرعلی مرزاکے چہلم کے اجتماع  سے خطاب کر رہے تھے۔ انہوں نے کہا کہ عزاداری سیدالشہداء ہمارا سرمایہ حیات ہے، اس پر کوئی سمجھوتہ نہیں ہوگا، اگر حکمران یہ سمجھتے ہیں کہ وہ عزاداری کو محدود کر دیں گے یا پابندیاں لگا دیں گے تو یہ ان کی بھول ہے، مجلس وحدت مسلمین عزاداری کے تحفظ کے لئے ہر سطح پر اپنا ردعمل دے گی۔ انہوں نے کہا کہ حکمران عام شہریوں کی بجائے دہشت گردوں کے خلاف اقدامات کریں اور اس آڑ میں پرامن شہریوں کو تنگ نہ کیا جائے۔ علامہ ناصر عباس جعفری نے کہا کہ یمن کے حوالے سے پارلیمنٹ سے پاس کی گئی قرارداد کو خراج تحسین پیش کرتے ہیں، حکمران آئیں بائیں شائین کی بجائے واضح موقف اختیار کریں کہ فوج نہیں بھیج سکتے، سعودی حکمرانوں کے سامنے بھیگی بلی بننے والے حکمران جرات کا مظاہرہ نہیں کرسکتے تو اقتدار چھوڑ کر سعودی عرب چلے جائیں۔ اجتماع میں علامہ ناصر عباس جعفری نے الحاج حیدر علی مرزا مرحوم کے بیٹے حاجی امیر عباس مرزا کی دستار بندی کی۔اجتماع سے سید ناصر شیرازی، علامہ عبدالخالق اسدی، سید اسد عباس نقوی، سید اختر عباس بخاری اور دیگر علمائے کرام و ذاکرین نے بھی خطاب کیا۔

وحدت نیوز (لاہور) مجلس وحدت مسلمین پنجاب کی عزاداری کونسل کا اجلاس سیکرٹری جنرل مجلس وحدت مسلمین پنجاب علامہ عبدالخالق اسدی کی صدارت میں صوبائی سیکرٹریٹ مسلم ٹاوُن میں منعقد ہوا،اجلاس میں پنجاب کے مختلف اضلاع سے آئے ہوئے وفود نے شرکت کی اجلاس میں سابق چئیرمین عزاداری سیل مجلس وحدت مسلمین پنجاب الحاج حیدر علی مرزا مرحوم کے لئے فاتحہ خوانی اور اُن کی بے لوث خدمات پر خراج تحسین پیش کیا،اجلاس میں متفقہ طور پر الحاج حیدر علی مرزا موحوم کے فرزند حاجی امیر عباس مرزا کو چیئرمین عزاداری کونسل  منتخب کر لیا گیا ،علامہ عبدالخالق اسدی نے ان سے حلف لیا اور مبارکباد دی،اجلاس سے خطاب کرتے ہوئے نو منتخب چئیرمین عزادای سیل پنجاب حاجی امیر عباس مرزا کا کہنا تھا کہ میں ملت جعفریہ پاکستان کی نمائیندہ قومی جماعت مجلس وحدت مسلمین کے قائدین کو خراج عقیدت پیش کرتا ہوں کہ انہوں نے اس پر آشوب دور میں اتحاد امت کا پرچم بلند کیے ملک و قوم کی ترقی کے لئے کوشاں ہیں،پاکستان کی ترقی میں اہم سنگ میل تمام مکاتب فکر کے آپس میں اتحاد اور وحدت ہے،ہمیں ہر مکتب فکر بلکہ ہمارے اقلیتی بھائیوں کے احترام کو بھی ملحوظ خاطر رکھنا چاہیئے،اور یہ عین اسلام کا بھی اصول ہے،حاجی امیر عباس مرزا نے دہشت گردی کے خلاف پاک افواج کی کوششوں کو بھی مثالی قرار دیتے ہوئے کہا کہ مستحکم پاکستان کے لئے دہشت گردی اور انتہا پسندی کا خاتمہ ضروری ہے۔

وحدت نیوز(لاہور) الحاج حیدر علی مرزا کی رسم قل امام بارگاہ گلستان زہرا وحدت روڈ ادا کی گئی،مجلس ترحیم سے خطاب کرتے ہوئے مجلس وحدت مسلمین لاہور کے سیکرٹری جنرل علامہ امتیاز کاظمی کا کہنا تھا کہ الحاج حیدر علی مرزا ایک سچے محب وطن پاکستانی اور اتحاد امت کے علمبردار تھے،انہوں نے ہمیشہ امت کی وحدت اور ملکی سلامتی اور دہشت گردی کے خلاف آواز اُٹھائی،آج تمام مکاتب فکر کے نمائندگان کی یہاں موجودگی اس بات کی دلیل ہے کہ کہ اُن کی شخصیت ایک ہر دل عزیز شخصیت تھی،علامہ امتیاز کاظمی نے لاہور دہشت گردی  کی مذمت کرتے ہوئے کہا کہ انتہا پسندوں کے خلاف اب بھی حکمران خاموش ہیں یہاں دہشت گردی کے نام پر بے گناہوں کو ہراساں کیا جا رہا ہے،پنجاب میں کالعدم تنظیموں کو مکمل آزادی اور پروٹوکول حاصل ہے،وزیر داخلہ موصوف دہشت گردوں کے سہولت کاروں کو صفائیاں پیش کرتے ہیں کہ آپ کے خلاف ہم کچھ نہیں کرینگے،رسم قل میں سیاسی سماجی شخصیات سمیت سینکڑوں لوگ شریک ہوئے۔

وحدت نیوز (لاہور) الحاج حیدر علی مرزا نے اپنی زندگی ملک و قوم کی خدمت کے لئے وقف کئے رکھی،اتحاد بین المسلمین، مذہبی ہم آہنگی اور دہشت گردی کے خلاف ہر فورم پر آواز بلند کرتے رہے،ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے تحفظ عزاداری کونسل کے چیئرمین ، وزیر اعلیٰ پنجاب کے کوآرڈینیٹربرائے مذہبی اموراور معروف شیعہ رہنماالحاج حیدر علی مرزا کی نماز جنازے کے بعد ان کے فرزند حاجی امیر عباس مرزا سے تعزیت کرتے ہوئے کیا انہوں نے کہا کہ الحاج حیدر علی مرزا کی خدمات کو ہمیشہ یاد رکھا جائیگا مجلس وحدت مسلمین ایک شفیق بزرگ سے محروم ہوگئی،ہم مرحوم کے مشن کو آگے بڑھائیں گے معاشرے میں وحدت اور بھائی چارے کے پیغام کو قریہ قریہ تک پہنچائیں گے۔

الحاج حیدر علی مرزا مرحوم کی نمازجنازہ مومن پورہ قبرستان کے باہر میکلوڈ روڈ پر ادا کی گئی،جس میں سربراہ مجلس وحدت مسلمین پاکستان علامہ راجہ ناصر عباس جعفری، سیکریٹری جنرل پنجاب علامہ عبدالخالق اسدی،علامہ حسن ظفر نقوی ،علامہ اعجاز بہشتی،علامہ حسین نجفی،سید اسد عباس نقوی ، علامہ ابوذر مہدوی،علامہ احمد اقبال رضوی،علامہ حسن ھمدانی،علامہ حیدر موسوی،علامہ محمد اقبال کامرانی،علامہ گلفام حسین ہاشمی ،علامہ افتخار حسین نقوی ،علامہ حافظ کاظم رضانقوی،علامہ حافظ ریاض حسین نجفی،علامہ مشتاق حسین جعفری،علامہ وقار الحسنین نقوی،سید خرم نقوی سمیت دیگر رہنماوں نے شرکت کی،رسم قل آج سہ پہر 3 بجے گلستان زہرا بھیکھے وال وحدت روڈ پر ادا کی جائے گی۔

وحدت نیوز(لاہور) مجلس وحدت مسلمین پاکستان کے سربراہ علامہ راجہ ناصر عباس جعفری , مرکزی ڈپٹی سیکرٹری جنرل علامہ امین شہیدی اور سیکرٹری جنرل پنجاب علامہ عبدالخالق اسدی نے جناح ہسپتال لاہور میں معروف شیعہ رہنما الحاج حیدرعلی مرزا کی عیادت کی اور ان کی صحت یابی کے لئے دعا کی الحاج حیدر علی مرزا  گذشتہ کئی دنوں سے جناح ہسپتال میں زیرعلاج ہیں علامہ راجہ ناصر عباس جعفری نے اُن کے قومی خدمات کو سراہتے ہوئے کہا کہ الحاج حیدر علی مرزا صاحب اتحاد بین المسلمین کے داعی اور ملت جعفریہ کا سرمایا ہیں  خدا ان کا سایہ ملت اسلامیہ پر تا دیر قائم رکھے اور انہیں جلد مکمل صحت یابی عنایت کرے۔

وحدت نیوز(راولپنڈی) مجلس وحدت مسلمین پنجاب کے رہنماوں کے سی سی پی او اور آر پی او راولپنڈی سے کامیاب مذاکرات کے نتیجے میں جوہر آباد سے گرفتاربے گناہ باپ بیٹے نظر بلوچ اوراقبال بلوچ سمیت احمد شیخ رہا ہو گئے ہیں، جب کہ خواجہ محمد علی کی اہلیہ ، سالی ، ساس اور دو معصوم بچیاں پہلے ہی رہا کروا لی گئیں تھیں ، تفصیلات کے مطابق معروف سماجی رہنما اور سابق مشیر وزیر اعظم پاکستان الحاج حیدرعلی مرزا، صوبائی سیکریٹری جنرل ایم ڈبلیو ایم پنجاب علامہ عبد الخالق اسدی ، صوبائی ڈپٹی سیکریٹری جنرل اسد عباس نقوی ، صوبائی ترجمان علامہ اصغر عسکری، مسئول مرکزی دفتر علامہ اسرار گیلانی اور ضلعی سیکریٹری جنرل راولپنڈی سعید الحسن رضوی نے سی سی پی اوراولپنڈی اور آر پی او راولپنڈی سے ملاقات کی اور کالعدم جماعت کے رہنما کے قتل کے جھوٹے کیس میں گرفتار افراد کی بلاجواز گرفتاری پر شدیداحتجاج کیا، طویل مذاکرات کے بعد سی سی پی او نے  جوہر آباد سے گرفتاربے گناہ باپ بیٹے نظر بلوچ اور اقبال بلوچ سمیت احمد شیخ کو رہا کر دیا،بعد ازاں رہائی پانے والے مومنین راولپنڈی سے ایم ڈبلیو ایم کے رہنماوں کے ہمراہ جوہر آباد پہنچے جہان علاقہ مکینوں نے لبیک یا حسین ع کے فلک شگاف نعروں میں اسیروں کا استقبال کیا۔ واضح رہے کہ اس کیس میں ابھی خواجہ محمد علی اور ایم ڈبلیو ایم کے رہنما ملک غلام شبیر جویہ تاحال گرفتار ہیں ، جن کی جلدرہائی متوقع ہے۔