وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے المجلس ڈیزاسٹر مینجمنٹ سیل کو امدادی سرگرمیوں میں تیزی لانے کی ہدایات جاری کیں ہیں ۔انہوں نے کہا کہ یہ وقت پوری لگن اور جانفشانی کے ساتھ قوم کی خدمت کرنے کا ہے ۔اسے غیر ضروری سرگرمیوں میں ضائع کرنے کی بجائے نیک مقاصد کی تکمیل کے لیے استعمال کیا جائے۔انہوں نے کہ نوجوان ہماری قوم کا سب سے قیمتی سرمایہ ہیں۔ ملک و قوم کو درپیش کسی بھی مشکل حالات میں ہمارے نوجوانوں کی صف اول میں موجودگی ہمارے لیے تقویت کا باعث ہے۔
انہوں نے کہا کہ کہ یہ وقت پوائنٹ سکورنگ کی بجائے ایک قوم بن کر عالمی وبا کا مقابلہ کرنے کا ہے۔سیاست دانوں کو چاہیے کہ وہ حالات کی سنگینی کا سنجیدگی سے درک کریں اورکورونا وائرس کو شکست دینے کے لیے ایک قوت بن کراپنے اپنے حصے کا کردار اداکریں۔نادار افراد کی کفالت ریاست کی ذمہ داری ہے۔ جو طبقہ اس وقت مالی مشکلات کا شکار ہے اس کے مسائل حل کرنے کے لیے مناسب اور فوری ریلیف کااعلان کیا جائے۔متوسط طبقے کے لیے یوٹیلٹی بلز کی معافی اور کرایہ داروں کو ان کی رہائش کا تحفظ اور کرایے کی ادائیگی میں سہولیات کی فراہمی کر کے حکومت انہیں بہت بڑی مشکل سے نجات دلا سکتی ہے ۔ایسے آڑے وقت میں اہل ثروت کو بھی میدان میں نکل کر مخلصانہ تگ ودو کرنا ہو گی۔انہوں نے کہا کہ طبی ماہرین کی طرف سے جاری ہدایات پر عمل موجودہ حالات کے لحاظ سے واجب ہے۔ہر مذہب و مسلک کے افراد کو چاہیے کہ وہ اپنے مذہبی اجتماعات کا انداز حکومتی تدابیر کے مطابق اپنائیں۔
وحدت نیوز(لاہور)مجلس وحدت مسلمین پنجاب کے سیکرٹری جنرل علامہ عبدالخالق اسدی نے آزاد کشمیر سمیت ملک بھر کے دیگر علاقوں میں آنیوالے زلزلے سے ہونیوالی تباہی پر افسوس کا اظہار کیا ہے۔ لاہور میں صوبائی کابینہ کے اجلاس کی صدارت کرتے ہوئے علامہ عبدالخالق اسدی کا کہنا تھا کہ حکومت زلزلہ متاثرین کی ہر ممکن امداد کرے۔
انہوں نے پاک فوج، انتظامیہ اور ریسکیو اہلکاروں کی جانب سے متاثرین کی فوری امداد کو بھی سراہا۔ علامہ اسدی کا کہنا تھا کہ جانی و مالی نقصان پر متاثرہ خاندانوں سے اظہار ہمدردی کرتے ہیں، زلزلہ سے قیمتی جانوں کے نقصان پر متاثرہ خاندانوں سے اظہار تعزیت کرتے ہیں اور مرحومین کی بلندی درجات کیلئے دعاگو ہیں۔
علامہ اسدی نے کہا کہ ہر پاکستانی کا فرض ہے کہ اپنے متاثرہ بھائیوں کیلئے جوکچھ کر سکتے ہیں کریں، زلزلہ ایک قدرتی آفت ہے اور اس حوالے سے متاثرین کو تنہا نہیں چھوڑنا چاہیے۔ انہوں نے بتایا کہ ایم ڈبلیو ایم کے کارکنان بھی متاثرہ علاقوں میں پہنچ چکے ہیں جہاں وہ امدادی کارروائیوں میں مصروف ہیں۔
وحدت نیوز (تہران) پاکستان کی جانب سے ایران کے سیلاب متاثرین کے لیے مزید 10 لاکھ روپے کا عطیہ گذشتہ روز ایم ڈبلیوایم کے ڈپٹی سیکرٹری امور خارجہ ڈاکٹر سید ابن حسن نے ایران کے سیلاب متاثرین کے لیے ایم ڈبلیو ایم کی جاری سرگرمیوں کے سلسلے میں تہران میں کمیتہ امداد امام خمینی کے بین الاقوامی امور کے سربراہ انجینئرعباس فارسی نژاد سے ملاقات کی. ملاقات میں ایران کے سیلاب متاثرین کی امداد کے مختلف امور پر گفتگو ہوئی۔
انجینئرعباس فارسی نژاد نے پاکستانی قوم اور خصوصا ایم ڈبلیو ایم پاکستان کی ایرانی سیلاب متاثرین کے لیے امدادی سرگرمیوں اور ہمدردیوں کو سراہا اور ایم ڈبلیو ایم سمیت پوری پاکستانی قوم کا شکریہ ادا کیا. ملاقات کے دوران عباس فارسی نژاد نے کمیتہ امداد امام خمینی کے مختلف رفاعی پراجیکٹس پر بریف کیا اور اپنی طرف سے اس آمادگی کا اظہار کیا کہ وہ ایم ڈبلیو ایم کے ذیلی فلاحی اداروں کو اپنے تجربات منتقل کرسکتے ہیں۔
ڈاکٹر سید ابن حسن نے ان کی اس پیشکش کا خیر مقدم اور اس پر ان کا شکریہ ادا کیا اور کہا کہ ان کی پیشکش متعلقہ تنظیمی اداروں کو مزید غور کے لیے بھجوا دی جائے گی. یاد رہے مجلس وحدت مسلمین مارچ 2019 میں ایران میں آنے والے سیلاب میں اب تک بلاواسطہ و بالواسطہ مختلف انداز میں خطیر مالیت کی اشیائے خوردونوش و اشیائے ضروریات سیلاب متاثرین تک پہنچا چکی ہے۔
ملاقات کے اختتام پر ایم ڈبلیو ایم کے ڈپٹی سیکرٹری امور خارجہ ڈاکٹر سید ابن حسن نے مجلس وحدت مسلمین کی جانب سے ایران کے سیلاب متاثرین کے لیے مزید 10 لاکھ روپے کا امدادی چیک کمیتہ امداد امام خمینی کے بین الاقوامی امور کے سربراہ انجئنیر عباس فارسی نژاد کے حوالے کیا جس پر فارسی نژاد نے مجلس وحدت کی قیادت اور کارکنوں اور پاکستانی قوم کا شکریہ ادا کیا۔ ایم ڈبلیو ایم کی طرف سے ملاقات کرنے والے وفد میں ڈاکٹر سید محدث محبوب نقوی بھی شامل تھے۔
وحدت نیوز(کوئٹہ) مرکزی دفتر مجلس وحدت مسلمین ہزارہ ٹاون نزد پل سفید میں محترم آغا رضا صاحب، سابقہ MPA اور وزیر قانون بلوچستان آف MWM کی طرف سے سانحہ ہزار گنجی کے شدید زخمیوں کے فیملیز کو بعد از تحقیقات مزید مالی امداد کی گئی کیونکہ انکی حالت مزید نازک ہے۔واضح رہے کہ گزشتہ ماہ بھی آغا رضا کی جانب سے سانحہ ہزار گنجی کے متعدد زخمیوں کی مالی امداد کی جاچکی ہے۔خداوند ہمارے دوستوں کی اس قلیل خدمت کو اپنے بارگاہ میں قبول کرے۔ آمین۔
وحدت نیوز(ایران) مجلس وحدت مسلمین کی جانب جشن ولادت باسعادت منجی بشریت امام مہدی عج کے پر مسرت موقع پر ایران کے سیلاب زدگان میں امدادی سامان کی دوسری کھیپ کی تقسیم کا مرحلہ مکمل ہوگیا،تفصیلات کے مطابق گذشتہ 5 دن سےایم ڈبلیوایم شعبہ امور خارجہ کےمرکزی سیکریٹری علامہ ڈاکٹر سید شفقت حسین شیرازی کی قیادت میں ایم ڈبلیو ایم کی ٹیم سیلاب متاثرہ صوبوں خوزستان اور لرستان میں موجود تھی ،دونوں صوبوں کے 5 متاثرہ گاؤں میں مجموعی طور پر 100 متاثرہ گھروں کا وزٹ اور نقصانات و ضروریات کا جائزہ اور نقصانات کا تخمینہ لگایا گیا۔
ان دیہاتوں میں صوبہ لرستان سے معمولان, چم شہران, دمرود افرینہ, زرانتل اور صوبہ خوزستان سے بیت الشیتخر اور صندیہ شامل ہے.ایم ڈبلیوایم کی جانب سے 200 متاثرہ گھروں میں سے 100 گھروں میں بستر کمبل برتن, گدے, چولہے, کولر اور چٹائیاں جبکہ 100 گھروں میں راشن تقسیم کیا گیاجبکہ 4 نئے شادی شدہ سیلاب متاثرہ جوڑروں میں جہیز سے متعلق چند بنیادی اشیاء بھی تقسیم کی گئیں۔
ایم ڈبلیو ایم نے گذشتہ چند ہفتوں میں ایران کے سیلاب زدگان کے لیے دو مختلف مرحلوں میں مجموعی طور پر 253 گھروں تک 10 لاکھ روپے کی مالیت کے راشن بیگز اور گھریلو استعمال کی ضروری اشیاءتقسیم کی ہیں.ایم ڈبلیو ایم شعبہ امور خارجہ کے دفتر سے جاری بیان کے مطابق امدادی ٹیم تیسرے مرحلے میں ماہ رمضان سے پہلے دوبارہ سیلاب زدہ علاقوں کا وزٹ اور امدادی سامان کی تقسیم کا تیسرا مرحلہ شروع کرے گی۔
ایران کے سیلاب متاثرہ مسلمان بھائی بہنوں نے مصیبت کی اس گھڑی میں دل کھول کر امداد دینے پر مجلس وحدت مسلمین اور ملت پاکستان کا دل کی گہرائیوں سے شکریہ ادا کیااور ایم ڈبلیوایم اور پاکستانی عوام کے لئے نیک خواہشات کا اظہار کیا ہے ۔
وحدت نیوز(ایران) مجلس وحدت مسلمین شعبہ امور خارجہ کے مرکزی سیکریٹری علامہ ڈاکٹر شفقت حسین شیرازی کی سربراہی میں ایم ڈبلیوایم کی جانب سے ایران کے سیلاب متاثرہ عوام کی امداد کے دوسرے مرحلے کاآغاز،اس سلسلے میں پر صوبہ خوزستان کے 100 متاثرہ گھروں میںتقریباً 3 لاکھ روپے مالیت کے راشن بیگز کی تقسیم،امدادی سامان بذریعہ وین اور کشی متاثرہ علاقوں تک پہنچایاگیا، سیلاب سے متاثرہ ایرانی مسلمان بھائی بہنوں کی جانب سے مصیبت کی اس گھڑی میں بھرپور امدادپر مجلس وحدت مسلمین اور پاکستانی عوام سے اظہار تشکر اور نیک خواہشات کا اظہارایم ڈبلیوایم کی جانب سے امداد رسانی کا سلسلہ تاحال جاری ہے کل دیگر علاقوں میں امداد فراہم کی جائے گی۔
تفصیلات کے مطابق آج بروز جمعہ ایم ڈبلیو ایم شعبہ امور خارجہ کے سیکرٹری حجت الاسلام والمسلمین ڈاکٹر سید شفقت حسین شیرازی نے صوبہ خوزستان کے شہر سوسنگرد اور حمیدیہ کے مضافاتی علاقوں میں راشن بیگزتقسیم کرکے امدادی سامان کی تقسیم کے دوسرے مرحلے کا آغاز کیا. امدادی سامان کی تقسیم کے اس عمل کا آغاز پاکستان ایران دوستی زندہ باد کے نعرے سے ہوا جس میں ابتدائی طور پر تقریباً 3 لاکھ روپےکی مالیت کے راشن بنڈلز کی ایک بڑی تعداد سوسنگرد کے علاقے بیت الشخیتر اور حمیدیہ کے علاقے صندیہ میں تقسیم کی گئی۔
اس موقع پر موجود لوگوں نے ایم ڈبلیو ایم پاکستان کے مسوولین اور پاکستانی عوام کا شکریہ ادا کیا اور پاکستان ایران تعلقات کی مزید مضبوطی اور دونوں برادر ہمسایہ ممالک کی عوام کی ترقی کی دعا کی. امدادی سامان کی تقسیم کے دوسرے مرحلے میں ایم ڈبلیو ایم کی طرف سے کل بروز ہفتہ صوبہ لرستان کے شہر معمولان کے تین مختلف سیلاب متاثرہ علاقوں میں کثیر مالیت کا گھریلو سامان تقسیم کیا جائے گا. یاد رہے مجلس وحدت مسلمین شعبہ امور خارجہ کے مسؤولین کی ایک ٹیم گذشتہ چند دن سے دوسری بار ایران کے سیلاب متاثرہ علاقوں میں موجود اور متاثرین کی ضروریات و نقصانات کا نزدیک سے جائزہ لے کر امدادی سامان کی تقسیم کا عمل انجام دے رہی ہے۔
