وحدت نیوز(حیدرآباد) مجلس وحدت مسلمین پاکستان صوبہ سندہ کے صوبائی سیکریٹری جنرل علامہ مقصودعلی ڈومکی نے کہا ہے کہ اب وقت آچکا ہے کہ پاکستان امریکی غلامی کو خیر باد کہ دے، کیونکہ ظالم استکباری قوتوں سے تعلق نے اس قوم کو بہت زیادہ نقصان دیا ہے۔ ہم کرائے کے قاتل نہیں کہ امریکی ہمیں ڈالر دیں اور ہم امریکی مفادات کی تکمیل کریں۔ امریکہ دوستی ، امریکی دشمنی سے زیادہ خطرناک ہے، جس دن امریکی سفیر کو ناپسندیدہ شخصیت قرار دے کر پاکستان سے نکالا گیا ہم اس دن جشن منائیں گے۔ پاکستان میں امریکی سفارتخانے دھشت گردی میں ملوث ہیں۔انہوں نے کہا کہ امریکہ ، اسرائیل اور انڈیا تین شیطان ہیں جس سے وطن عزیز کو خطرہ ہے، اس اہم اشو پر پوری قوم متحد ہے۔ نواز شریف سمیت بہت سارے عناصر نے اس حساس موقع پر خاموشی اختیار کرکے امریکی غلام ہونے کا تاثر دیا ہے۔

در ایں اثناء علامہ مقصودعلی ڈومکی نے ضلع مٹیاری کے شہید کارکن محمد خان لغاری کے والد اور ورثاء سے ملاقات کی۔ اس موقع پر گفتگو کرتے ہوئے علامہ مقصودعلی ڈومکی نے کہا کہ پیپلزپارٹی کے وڈیرے رئیس علی احمد نظامانی کی انتقامی کاروائیاں قابل مذمت ہیں، شہید محمد خان، مجلس وحدت مسلمین کے شہید ہیں، جسے سیاسی انتقام کا نشانہ بنایا گیا۔ مجلس وحدت مسلمین اس ملک کی ایک سیاسی قوت ہے جسے انتقامی کاروائیوں سے شکست نہیں دی جاسکتی۔ وڈیروں کے ظلم و جبر کے باوجود مجلس وحدت ، آئندہ الیکشن میں، صوبہ سندہ کی سیاسی قوت بن کر ابھرے گی، اور فتح و نصرت ہمیشہ حق کا مقدر ہوتی ہے۔

وحدت نیوز(بلتستان)  مجلس وحدت مسلمین پاکستان بلتستان ڈویژن کا ایک ہنگامی اجلاس ڈویژنل سیکرٹریٹ میں منعقد ہوا، جس میں ڈویژنل کابینہ نے شرکت کی۔ ہنگامی اجلاس کی صدارت ڈویژنل سیکرٹری جنرل علامہ آغا علی رضوی نے کی۔ انہوں نے اجلاس سے خطاب کرتے ہوئے بلتستان کی سیکیورٹی صورتحال پر تشویش کا اظہار کرتے ہوئے کہا کہ نہایت افسوس کا مقام ہے کہ امریکی تنظیمیں باالخصوص سی آئی اے، بلیک واٹر اور دیگر امریکی جاسوسی تنظیمیں دفاعی اہمیت کے حامل حساس علاقہ بلتستان میں سرگرم عمل ہیں، جبکہ بلتستان کی انتظامیہ خاموش تماشائی بنی بیٹھی ہے۔ بلتستان انتظامیہ سیاسی بکھیڑوں میں الجھی ہوئی ہے انہیں عالمی سازش کی فکر ہے اور نہ بلتستان کے امن و امان کی۔

انہوں نے مزید کہا کہ امریکی تنظیمیں بلتستان کو بلوچستان کی طرف دھکیلنے کی کوششوں میں مصروف ہیں۔ لیکن مقام افسوس ہے کہ بلتستان انتظامیہ کے ساتھ ساتھ حساس اور سیکیورٹی ادارے بھی بچگانہ سرگرمیاں سر انجام دے رہے ہیں۔ حساس اداروں کو بلتستان کے خلاف ہونے والی سازشوں کی بھرپور اطلاع ہونے کے باوجود چشم پوشی لمحہ فکریہ ہے۔ انہوں نے کہا کہ حساس ادارے بلتستان میں امریکی سفیر کی آمد کو روکیں، امریکی سفیر کا بلتستان میں آنا اس خطہ کے لئے خطرہ کی گھنٹی ہے۔ دشمن اسلام، دشمن قرآن اور دشمن پاکستان امریکہ کے سفیر کی اسکردو آمد کے موقع پر عوام کا کوئی ردعمل سامنے آئے اور کسی قسم کا ناخوشگوار واقعہ پیش آیا تو تمام تر ذمہ داری سیکیورٹی اداروں پر عائد ہوگی۔

وحدت نیوز (بلتستان ) بدنام زمانہ تنظیم یو ایس ایڈ اور آغا خان فاونڈیشن کے تعاون سے امریکہ کے پاکستان میں سفیر رچرڈ جی اولسن کا بلتستان کا دورہ متوقع ہے۔ تفصیلات کے مطابق امریکی سفیر بلتستان کے دو دوزہ دورہ (20 تا 22 اگست) کیلئے 20 اگست کو اسکردو پہنچ رہا ہے۔ اپنے اس دورہ بلتستان میں رچرڈ اولسن یو ایس ایڈ کے زیراہتمام جاری منصوبوں کے جائزہ کے علاوہ بلتستان کی اہم سیاسی اور بااثر شخصیات سے بھی ملاقات کرے گا۔

واضح رہے کہ چین کے بارڈر سے متصل شیعہ اکثریتی علاقہ ہو نے کے ناطے امریکہ گلگت بلتستان کے  علاقے میں اپنے نفوز کو بڑھانے کے لئے کافی عرصے سے کوشاں ہے ، امریکی سفیر کا دورہ بھی اسی حکمت عملی کا نتیجہ ہے ،ذرائع کے مطابق امریکی سفیر کی بلتستان آمد کے موقع پر اس کے استقبال کے لیے سرکاری افسران کو بھی انتظامیہ کی طرف سے مدعو کیا گیا ہے۔ ذرائع کا یہ بھی دعویٰ ہے کہ اس سلسلے میں ایک مقامی ہوٹل میں امریکی سفیر کے اعزاز میں ایک عظیم الشان عشائیہ کا بھی اہتمام کیا گیا ہے جس میں وزیراعلٰی گلگت بلتستان سید مہدی شاہ کے علاوہ دیگر سرکاری عہدیداران شرکت کریں گے۔ اگرچہ بلتستان میں امریکی سفیر کی آمد کو نہایت خفیہ رکھا گیا ہے لیکن اس کے باوجود امریکہ مخالف تنظیموں نے بلتستان کے در و دیوار کو یو ایس ایڈ اور امریکہ کے خلاف وال چاکنگ سے بھر دیا ہے اور 20 اگست کو شدید تر ردعمل سامنے آنے کا امکان بھی ہے۔