وحدت نیوز(پاراچنار) مجلس وحدت مسلمین پاراچنار کے رہنماؤں نے کہا ہے کہ ایم ڈبلیوایم عنقریب تعمیر وطن پروگرام کا آغاز کررہی ہے جسکے تحت عوامی مسائل حل کئے جائیں گے ۔ایم ڈبلیو ایم کی طرف سے دیئے گئے عید ملن پارٹی سے خطاب کرتے ہوئے ایم ڈبلیوایم کرم کے سیکریٹری جنرل اور امیدوار قومی اسمبلی شبیر ساجدی اور صوبائی ممبر شوری علامہ سبطین حسینی نے کہا کہ ماضی میں فرقہ پرستی کی بنیاد پر عوام کو نام نہاد لوگوں نے لڑایا ان کی کارستانیوں کی وجہ سے اسلام اور مسلمانوں کو ناقابل تلافی نقصان پہنچا ۔تنازعات چاہے زمین پر ہو یا جنگلات پر ہو اس کا تصفیہ لڑائی جھگڑے کی بجائے کاغذات مال کے مطابق کیا جائے گا ۔
انہوں نے کہا کہ علامہ عارف حسین الحسینی اتحاد بین المسلمین کے علمبردار تھے ہم ایم ڈبلیوایم کے پلیٹ فارم سے ان کےسیاسی مشن کو آگے بڑھائیں گے ،انہوں نے کہا کہ علامہ راجہ ناصر عباس نے ملت کے لیے بےبہا قربانیاں دی ہیں ۔علماء اور شہداء کی قربانیوں کا ثمر ہے کہ آج ہم سکون سے زندگی بسر کر رہے ہیں ۔کرم ایجنسی کے لئے قربانیاں دینے والے شہداء کے خاندانوں کے لیے ابھی تک کسی امیدوار نے کام نہیں کیا ھم نے شہداء کے خاندانوں کو سپورٹ کیا اور انہیں روزگار فراہم کیا۔
وحدت نیوز(بھکر) مجلس وحدت مسلمین تحصیل دریا خان کے سابق سیکریٹری جنرل اور امیدوار برائے قومی اسمبلی احسان اللہ خان بلوچ سمیت مختلف کیسوں میں گرفتار 39بے گناہ شیعہ اسیروں کو میانوالی جیل سے رہا کر دیا گیا ہے، تفصیلات کے مطابق انسداد دہشت گردی عدالت کے حکم پرتین ماہ قبل دوسری بار گرفتار ہو نے والے احسان اللہ بلوچ کوپہلی مرتبہ گذشتہ 10ماہ قبل قتل کے جھوٹے الزام میں گرفتار کیا گیا تھا جنہیں بعد میں ضمانت پر رہا کر دیا گیا تھا لیکن چند روز بعد ہی انہیں دوبارہ گرفتار کر لیا گیا تھا اور میانوالی جیل منتقل کر دیا گیا تھا جہاں سےانہیں آج بھکرکے 39شیعہ اسیروں کے ہمراہ ضمانت پر رہا کر دیا گیا ہے ، جنہیں مختلف واقعات کے بعد بلاجواز قید میں رکھا گیا تھا ۔