وحدت نیوز (ملتان) مجلس وحدت مسلمین جنوبی پنجاب کے سیکرٹری جنرل علامہ سید اقتدار حسین نقوی نے مہر سخاوت علی کو ایم ڈبلیو ایم جنوبی پنجاب کا سیکرٹری سیاسیات نامزد کردیا ہے۔ ’’وحدت نیوز‘‘ کیساتھ بات چیت کرتے ہوئے علامہ اقتدار نقوی نے کہا ہے کہ ملک کے دیگر صوبوں کی طرح جنوبی پنجاب میں بھی مجلس وحدت مسلمین ایک سیاسی میدان میں وارد ہورہی ہے، ہم نے اس حوالے سے ملاقاتوں کا سلسلہ بھی شروع کردیا ہے۔ جلد سابق وزیراعظم سید یوسف رضا گیلانی سمیت دیگر سیاسی رہنماء ہمارے ساتھ ملاقاتیں کریں گے۔ سیاسی فعالیت کیلئے مہر سخاوت علی کو ایم ڈبلیو ایم جنوبی پنجاب کا سیکرٹری سیاسیات اور احسان اللہ خان بلوچ کو معاون سیکرٹری سیاسیات نامزد کیا گیا ہے۔

وحدت نیوز (ملتان) مجلس وحدت مسلمین پاکستان ملتان کی سیاسی کونسل کا اجلاس ضلعی سیکرٹری سیاسیات انجینیئر مہر سخاوت علی کی صدارت میں منعقد ہوا، اجلاس میں ملتان کی تمام تحصیلوں، ٹائونز اور یونٹس کے سیکرٹری جنرل اور اراکین نے شرکت کی۔ اجلاس کے مہمان خصوصی مجلس وحدت مسلمین پنجاب کے ڈپٹی سیکرٹری جنرل علامہ اقتدار حسین نقوی اور ضلعی سیکرٹری جنرل علامہ قاضی نادر حسین علوی تھے۔ اجلاس میں متفقہ طور پر فیصلہ کیا گیا کہ مجلس وحدت مسلمین ملتان میں بلدیاتی الیکشن میں بھرپور حصہ لے گی، اس حوالے سے اُمیدواروں کے نام بہت جلد فائنل کر لیے جائیں گے۔ اجلاس سے خطاب کرتے ہوئے مہر سخاوت کا کہنا تھا کہ ضلع بھر کی تمام یونین کونسلز میں بلدیاتی الیکشن کی تیاریاں شروع کر دیں، مہر سخاوت نے مزید کہا کہ مجلس وحدت مسلمین انشاء اللہ بلدیاتی الیکشن میں اپنی طاقت کا بھرپور مظاہرے کرے گی اور الیکشن میں کامیابی حاصل کرے، مہر سخاوت نے مزید کہا کہ مجلس وحدت مسلمین ایک سیاسی جماعت ہے اسے کالعدم قرار دینے والے احمقوں کی جنت میں رہتے ہیں۔ اجلاس سے خطاب کرتے ہوئے علامہ اقتدار حسین نقوی نے کہا کہ ضلع بھر کے کارکنان الیکشن کی تیاریاں کریں اور ایم ڈبلیو ایم کے اُمیدواروں کو کامیاب کرانے کے لیے کوشش کریں۔

وحدت نیوز ( ملتان) حلقہ پی پی196 ملتان میں ضمنی الیکشن کی تیاریاں عروج پر ہیں، مختلف جماعتوں کے اُمیدوار اپنی الیکشن میں آئے روز جلسے، جلوس اور کارنر میٹنگز میں مصروف ہیں۔ اسی طرح مجلس وحدت مسلمین کے اُمیدوار مہر سخاوت علی بھی اپنی الیکشن مہم میں مگن ہیں اور اُنہیں مختلف علاقوں اور برادریوں کی حمایت حاصل ہو رہی ہے۔ مہر سخاوت علی نوجوان اور نو وارد ہیں۔ محلہ طوطل میں سادات برادری نے مجلس وحدت مسلمین کے اُمیدوار کی مکمل حمایت کا اعلان کیا ہے۔ قبل ازیں اُنہوں نے چوک شاہ عباس میں کارنر میٹنگ سے خطاب کرتے ہوئے کہا کہ مسلم لیگ ن حلقے میں دھاندلی کا منصوبہ رکھتی ہے لیکن ملتان کی عوام 21 مئی کو اسے مسترد کردے گی۔ حکمران جماعت کی جانب سے الیکشن کمیشن کی جانب سے تیارکردہ ضابطہ اخلاق کی دھجیاں اُڑائی جا رہی ہیں۔