وحدت نیوز (اسلام آباد) فاٹا کا قومی دھارے میں انضمام خوش آئند ہے فاٹا کی عوام کو مبارک باد پیش کرتے ہیں ۔ ہندوستان وافغانستان کی ایما پر فاٹا ریفارمز بل کی مخالفت کرنے والے وطن عزیز کے ساتھ مخلص نہیں ہیں ۔ گلگت بلتستان کی عوام بھی مقتدر قوتوں کی طرف نگاہیں مرکوز کئے ہوئے ہیں کہ کب انہیں بھی آئینی حقوق اور شاخت دی جائے گی ان خیالات کااظہارسربراہ مجلس وحدت مسلمین علامہ راجہ ناصر عباس جعفری نے فاٹا ریفرمز بل کی ایوان بالا سے منظوری کے بعد میڈیا سیل سے جاری بیان میں کی ان کا کہنا تھا کہ فاٹا کی محب وطن عوام نے ایک طویل عرصہ مشکلات برداشت کی ہیں ایف سی آر جیسے کالے قانون نے عوام کی محرومیوں اور تکالیف میں اضافہ کیا۔فاٹا ریفرمز بل اب کے پی کے اسمبلی میں پیش ہونے جا رہا ہے ۔لیکن کچھ دشمن کے آلہ کار قوتیں فاٹا کے انضمام کی مخالفت کر رہے ہیں اور کے پی کے اسمبلی میں فاٹاریفرمز بل پیش کرنے کے وقت ہنگامہ آرائی کر کے ماحول کو کشیدہ کرناچاہتے ہیں ۔فاٹا کے انٖضمام کے مخالفین ملک کے امن اور ترقی کے مخالف ہیں اور ہندوستان وافغانستان کے اشاروں پر کا م کررہے ہیں ۔
انہوں نے کہا ہے کہ گلگت بلتستان کی عوام بھی مقتدر قوتوں کی طرف نگاہیں مرکوز کئے ہوئے ہیں کہ کب انہیں بھی آئینی حقوق اور شاخت دی جائے گی ۔ گلگت بلتستان کی محب وطن عوام اس وقت ہر شہر میں مطالباتی احتجاجات اور سمینارز کے ذریعے اپنی آواز مقتدر حلقوں تک پہنچانا چاہ رہی ہے ۔پاکستان کی ترقی اور مستقبل گلگت بلتستان سے جڑا ہوا ہے ۔گلگت بلتستان کی عوام کو جلد از جلد آئینی و قانونی حقوق دینا وقت کی سب سے اہم ضرورت اور ملکی امن اورترقی کے لئے ناگزیر ہو چکا ہے ۔
وحدت نیوز(پشاور) مجلس وحدت مسلمین خیبر پختونخواہ کے سیکرٹری جنرل علامہ محمد اقبال بہشتی نے فاٹاکو خیبر پختوانخواہ میں ضم کرنے اور فاٹا اصلاحات بل کی منظوری میں مسلسل تاخیر پر شدید ردعمل کااظہار کیا ہے۔انہوں نے کہا کہ فاٹا پاکستان کے حصہ ہے لیکن وہاں کے عوام قیام پاکستان سے لے کر آج تک ایف سی آر کے کالے قانون کے رحم و کرم پرزندگی گزارنے پر مجبور ہیں۔فاٹا کے عوام کو قومی دھارے میں شامل کرنے میں جوقوتیں رکاوٹ تھیں وہ بے نقاب ہو چکی ہیں۔اب وقت آگیا ہے کہ قبائلی عوام کی خواہشات کے مطابق اس کو خیبر پختونخواہ میں بلاتاخیر ضم کیا جائے ۔ملک میں بسنے والے ہر شخص کو برابری کے حقوق اور ترقی کے یکساں مواقع فراہم کرنا ریاست کی اولین ذمہ داری ہے۔انہوں نے کہا کہ فاٹا اصلاحات بل کی منظوری میں مزید تاخیرفاٹا کے محب وطن افراد کے اضطراب میں اضافہ کا باعث ہو گی۔فاٹا کو خیبرپختونخواہ میں ضم کرنے اور فرنٹیر کرایم ریگولیشن کے خاتمے کے علاوہ کوئی دوسرا آپشن قابل قبول نہیں ہے۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے وفاق کے زیر انتظام قبائلی علاقہ جات میں اصلاحات کی منظوری دینے اوران علاقوں کو صوبہ خیبر پختونخواہ میں ضم کرنے کے فیصلے کو وفاقی کابینہ کا ایک مستحسن اقدام قرار دیا ہے۔
انہوں نے کہا کہ فاٹا کے رہائشیوں کا یہ ایک دیرینہ اور اصولی مطالبہ تھا جسے منظور کیا جانا لاکھوں افراد کی خواہشات کی تکمیل ہے۔انہوں نے کہا فرنٹیر کرائم ریگولیشن (ایف سی آر)ایک کالا قانون ہے جس کے ذریعے فاٹا کے معصوم لوگوں کو دبایا جاتا ہے۔اس قانون کے چنگل سے فاٹا کی عوام کو آزادی دلائی جائے۔ایف سی آر کے خاتمے کے لیے طے شدہ آئینی اصلاحات پر بلاتاخیر عمل درآمد انتہائی ضروری ہے۔فاٹا کے عوام پاکستان کے محب وطن شہری ہیں۔تحریک پاکستان کے دوران اور قیام پاکستان سے لے کر اب تک یہاں کے غیور باسیوں کی ارض پاک کے لیے بے پناہ خدمات ہیں۔پاکستان کے دیگر شہریوں کی طرح انہیں بلاتفریق تمام حقوق دیے جانے چاہیے۔
انہوں نے کہا کہ فاٹا کی تعمیر و ترقی کے لیے جامع منصوبہ بندی کی جائے تاکہ قبائلیوں علاقوں کو خوشحال بنایا جا سکے۔علامہ راجہ ناصر عباس جعفری نے امید ظاہر کی ہے کہ فاٹا کو خیبر پختونخواہ میں ضم کرنے کا فیصلہ علاقے کی تقدیر بدل دے گا۔
