وحدت نیوز (اسلام آباد) مجلس وحدت مسلمین پاکستان کے مرکزی ترجمان علامہ مختار امامی نے کہا ہے ایم ڈبلیو ایم جمہوریت پسند جماعت ہے، ارض پاک پر جمہوری نظام کے علاوہ کسی بھی نظام کی قطعاََ حمایت نہیں کی جا سکتی،آئین پاکستان اور جمہوریت کی پاسداری کے ساتھ ساتھ بدعنوانی کی مخالفت ہمارا منشور ہے،وطن عزیز کے استحکام کے لیے ضروری ہے کہ آئین پاکستان کے مطابق نیک اور صالح لوگوں کے ہاتھوں میں اقتدار سونپا جائے،کرپٹ افراد کا اقتدار پر قابض رہنا غیر آئینی ہے،انہوں نے کہا کہ اپوزیشن جماعتوں سمیت ملک کی تمام سیاسی و مذہبی جماعتوں سے ہم  رابطے میں ہیں،ملک سے کرپشن کے خاتمے کے لیے کام کرنے والی جماعتوں کو ہماری بھرپور تائید حاصل رہے گی،موجودہ حکومت نے قوم کو سوائے کرپشن اور دہشت گردی کے کچھ بھی نہیں دیا،کالعدم جماعتوں کے سربراہوں اور حکومتی وزرا کے رابطے نیشنل ایکشن پلان کو ناکام بنانے کی کوشش میں ثابت ہوئے۔

ان کا مزید کہنا تھاکہ نااہل نواز شریف مبہم بیانات کے ذریعے ریاستی اداروں کے خلاف عوام کے دلوں میں شکوک پیدا کرنا چاہتے ہیں،اپنے خلاف سازش کا راگ الاپنے کی بجائے واضح انداز میں قوم کو آگاہ کریں کہ ان کے خلاف کون سازش کر رہا ہے،انہوں نے کہا کہ نواز شریف کے خلاف سازش نہیں ہو رہی بلکہ ان پر عائد الزامات اپنے ثبوتوں کے ساتھ منظر عام پر آچکے تھے جسے وہ سازش قرار دے رہے ہیں،ماضی میں جب بھی کبھی حکمران ٹولے کی کرپشن کے خلاف کسی نے بات کی تو کہا گیا کہ جمہوریت کو خطرہ ہے،اب وزرات عظمی چھیننے جانے پے کہا جا رہا ہے کہ پاکستان کو پیچھے دھکیلا جا رہا ہے،انہوں نے کہا کہ نہ تو حکمران پارٹی جمہوریت ہے اور نہ ہی نواز شریف پاکستان ہیں،قوم باشعور ہو چکی ہے اور سیاسی نعروں کو اچھی طرح سمجھتی ہے،انہوں نے کہا کہ پورے پاکستان کی نظریں سپریم کورٹ کی طرف تھیں جہاں سے پاکستان کو انصاف ملا،اعلی عدلیہ کا فیصلہ یقیناًمنصفانہ ہو تھا۔

وحدت نیوز (لاہور ) پنجاب حکومت کی جانب سے منظور کردہ بلدیاتی ایکٹ کے خلاف مجلس وحدت مسلمین پاکستان کی جانب سے لاہور ہائی کورٹ میں دائر پٹیشن کی  سماعت کے بعد احاطہ عدالت میں مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی ایڈووکیٹ نے میڈیا سے گفتگوکرتے ہوئے کہا کہ موجودہ بلدیاتی ایکٹ ناقابلِ قبول ہے۔ جمہوریت اور آئینِ پاکستان کا تقاضا ہے کہ ا قتدار کو نچلی سطح پر سیاسی بنیادوں پر منتقل ہونا چائیے۔ بلدیاتی ایکٹ صوبہ پنجاب کے بزدلانہ رویے کی عکاسی کرتا ہے جس کے ذریعے یہ چاہا جا رہا ہے کہ عوامی اس ردِ عمل سے بچا جائے جو پہلے 100 دن کی ناکامی سے ہوا ہے۔ انہوں نے کہا کہ بلدیاتی ایکٹ دیگر کئی خامیاں بھی رکھتا ہے۔ جس میں احتساب کا نہ ہونا اور نچلی سطح پر اداروں کو خود مختار نہ بنانا ہے۔مزید کہا کہ اس کے خلاف عدالتی اور عوامی جدوجہد جاری رکھی جائے گی اور اس ضمن میں دیگر سیاسی جماعتوں سے گہری مشاورت ہے۔ سید ناصر شیرازی کا کہنا تھا کہ عدالت کا رویہ مثبت ہے جس سے ہم پرامید ہیں کہ ضرور ریلیف ملے گا اور ہم نچلی سطح پر انتخاب احتساب اور اقتدار کو یقینی بنائیں گے۔ اس موقع پر مجلس وحدت مسلمین کے لیگل ونگ کے اراکین فدا حسین رانا ایڈووکیٹ ، آصف رضا ایڈووکیٹ اور سید اسد عباس نقوی صوبائی ڈپٹی سیکرٹری جنرل پنجاب سمیت دیگر اراکین بھی موجود تھے۔