وحدت نیوز(حیدرآباد) مجلس وحدت مسلمین پاکستان صوبہ سندہ کے صوبائی سیکریٹری جنرل علامہ مقصودعلی ڈومکی نے کہا ہے کہ اب وقت آچکا ہے کہ پاکستان امریکی غلامی کو خیر باد کہ دے، کیونکہ ظالم استکباری قوتوں سے تعلق نے اس قوم کو بہت زیادہ نقصان دیا ہے۔ ہم کرائے کے قاتل نہیں کہ امریکی ہمیں ڈالر دیں اور ہم امریکی مفادات کی تکمیل کریں۔ امریکہ دوستی ، امریکی دشمنی سے زیادہ خطرناک ہے، جس دن امریکی سفیر کو ناپسندیدہ شخصیت قرار دے کر پاکستان سے نکالا گیا ہم اس دن جشن منائیں گے۔ پاکستان میں امریکی سفارتخانے دھشت گردی میں ملوث ہیں۔انہوں نے کہا کہ امریکہ ، اسرائیل اور انڈیا تین شیطان ہیں جس سے وطن عزیز کو خطرہ ہے، اس اہم اشو پر پوری قوم متحد ہے۔ نواز شریف سمیت بہت سارے عناصر نے اس حساس موقع پر خاموشی اختیار کرکے امریکی غلام ہونے کا تاثر دیا ہے۔

در ایں اثناء علامہ مقصودعلی ڈومکی نے ضلع مٹیاری کے شہید کارکن محمد خان لغاری کے والد اور ورثاء سے ملاقات کی۔ اس موقع پر گفتگو کرتے ہوئے علامہ مقصودعلی ڈومکی نے کہا کہ پیپلزپارٹی کے وڈیرے رئیس علی احمد نظامانی کی انتقامی کاروائیاں قابل مذمت ہیں، شہید محمد خان، مجلس وحدت مسلمین کے شہید ہیں، جسے سیاسی انتقام کا نشانہ بنایا گیا۔ مجلس وحدت مسلمین اس ملک کی ایک سیاسی قوت ہے جسے انتقامی کاروائیوں سے شکست نہیں دی جاسکتی۔ وڈیروں کے ظلم و جبر کے باوجود مجلس وحدت ، آئندہ الیکشن میں، صوبہ سندہ کی سیاسی قوت بن کر ابھرے گی، اور فتح و نصرت ہمیشہ حق کا مقدر ہوتی ہے۔

وحدت نیوز(کراچی) مجلس وحدت مسلمین پاکستان کے مرکزی ترجمان علامہ مختار احمد امامی نے کراچی میں آئی ایس او کی پُر امن امریکا مردہ باد ریلی پر پولیس کی شیلنگ اور فائرنگ کی شدید الفاظ میں مذمت کرتے ہوئے کہا ہے کہ سندھ حکومت اور اسکی ماتحت پولیس نے امریکا نوازی کی انتہا کر دی ہے، امریکا مخالف پرامن احتجاج کو سبوتاژ کرنا اچھی روش نہیں ہے، امریکا و پاکستان مخالف قوتوں کے خلاف محب وطن پاکستانی نوجوان، خواتین اور بچے احتجاج کیلئے نکلے تھے، جن پر پولیس کی شدید لاٹھی چارج، شیلنگ اور فائرنگ انتہائی افسوس ناک ہے، وزیر اعلیٰ و گورنر سندھ ریلی پر لاٹھی چارج، شیلنگ اور فائرنگ کا فی الفور نوٹس لیں اور ذمہ دار عناصر کے خلاف کارروائی عمل میں لائیں۔ علامہ مختار امامی نے کہا کہ ملکی سلامتی کا تقاضا ہے کہ امریکن بلاک کو ہمیشہ کے لئے خیر باد کہہ دیا جائے،امریکہ نے 70 ہزار پاکستانی شہداءکی قربانیوں اور 20 کروڑ عوام کی توہین کی ہے،وقت آگیا ہے انسانیت دشمن امریکہ کو منہ توڑ جواب دیا جائے۔ انہوں نے کہا کہ امریکہ اور انڈیا پاکستان کی اقتصادی راہداری کے دشمن ہیں،امریکی دھمکی پر 34 ملکی اتحاد کی خاموش لمحہ فکریہ ہے،ن لیگی حکومت قوم کو بتائے راحیل شریف کی سربراہی میں بننے والے اتحاد نے اس مشکل گھڑی میں پاکستان کو نظر انداز کیوں کیا؟اللہ نے وقت سے پہلے اس 34 ملکی اتحاد کو عوام کے سامنے بے نقاب کیا ،اب بھی وقت ہے کہ مشرق وسطیٰ کے پراکسی وار سے پاکستان کو دور رکھا جائے۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے آئی ایس او کی امریکہ مردہ باد ریلی پر پولیس کی شیلنگ،لاٹھی چارج اور گرفتاریوں کی شدید مذمت کی ہے ۔انہوں نے کہا کہ کراچی نمائش چورنگی سے نکالی جانے والی پُرامن ریلی پر پولیس کا بہیمانہ لاٹھی چارج اور شیلنگ  ریاستی دہشت گردی ہے۔وزیر اعلی اور آئی جی سندھ واقعہ کا سخت نوٹس لیں اور ذمہ داران کے خلاف فوری کاروائی کی جائے۔امامیہ سٹوڈنٹس آرگنائزیشن کی جانب سے نکالی جانے والی ریلی نوجوانان ملت کی حب الوطنی کا اظہار ہے۔امریکہ نے وطن عزیز پر حملے کی دھمکی دے کر ملت کے ہر فرد کی غیرت و حمیت کو للکارا ہے۔احتجاجی ریلی نکالنا کسی بھی جماعت کا آئینی حق ہے۔جسے کوئی نہیں چھین سکتا۔ کراچی پولیس کا محب وطن افراد پر لاٹھی چارج ملک دشمن قوتوں کی خوشنودی حاصل کرنے کے لیے ہے۔پولیس میں موجود ایسی کالی بھیڑوں کی نشاندہی ہونی چاہیے کہ نوجوانوں کی حب الوطنی کے جذبات کو نشانہ بنا رہی ہیں۔

انہوں نے کہا کہ آئی ایس اوملت کے نوجوانوں کی ایک فعال اور فرض شناس تنظیم ہے جو استحکام پاکستان کے لیے بہترین،بے لوث اور مخلصانہ کردار ادا کر رہی ہے۔اس کے کارکنوں گرفتاری کراچی پولیس کا اختیارات سے تجاوز اور ملت تشیع کو مشتعل کرنے کی کوشش ہے۔غیر قانونی ہتکھنڈوں سے ہمیں ڈرایا یا دھمکایا نہیں جا سکتا۔حکومت سندھ امریکہ کی خوشنودی حاصل کرنے کا خیال دل سے نکال دے۔ حکومت حاصل کرنے کے لیے امریکی آشیر باد کی بجائے عوامی طاقت کی ضرورت ہے۔اگر عوامی حقوق کو اسی طرح پامال کیا جاتا رہا تو پھرپیپلز پارٹی کا سندھ میں نام لینے والا کوئی نہیں رہے گا۔انہوں نے مطالبہ کیا کہ آئی ایس اور کے گرفتار افراد کو فوری رہا کیا جائے اور واقعہ کے ذمہ داران پولیس افسران کے خلاف کاروائی کی جائے۔

وحدت نیوز(سجاول) مجلس وحدت مسلمین ضلع ٹھٹھہ اور سجاول کی پولیٹیکل کونسل کااہم اجلاس، مسجد حسینی سجاول میں منعقد ہوا، اجلاس میں خصوصی شرکت مرکزی سیکریٹری امور سیاسیات سید اسد عباس نقوی اور مرکزی ڈپٹی پولیٹیکل سیکریٹری سید محسن شہریارنے کی ، جبکہ ضلع سجاول کے سیکریٹری جنرل مظفر علی لغاری، ضلع ٹھٹھہ کے سیکریٹری جنرل سید اسد اللہ شاہ کاظمی  اور ضلع سجاول کی کابینہ اور یونٹس بھی اجلاس میں شریک تھے، مقامی عہدیداران نے مرکزی رہنماوں کو علاقائی سیاسی صورتحال پر تفصیلی بریفنگ دی اور آئندہ قومی انتخابات میں ایم ڈبلیوایم کی انتخابی حکمت اور ترجیحات کے تعین کے حوالے سے تفصیلی تبادلہ خیال کیا گیا، اجلاس سے خطاب کرتے ہوئے اسدعباس نقوی نے کہا کہ ایم ڈبلیوایم مظلوم اور محروم عوام کی نمائندہ جماعت ہے، جس نے ہمیشہ ہر مظلوم کی حمایت اور ہر ظالم کی مخالفت میں آواز بلند کی ہے، انشاء اللہ آئندہ انتخابات میں بھی اسی فلسفے کی روشنی میں اہل اور باکردار امیداروں کو پارٹی ٹکٹ جاری کیئے جائیں گے، انہوں نے مقامی عہدیداران کو ہدایت کی کے وہ آئندہ کے انتخابات کے حوالے سے ابھی سے تیاریوں کا آغاز کردیں ۔

وحدت نیوز(اسلام آباد) مرکزی ڈپٹی سیکرٹری جنرل مجلس وحدت مسلمین پاکستان علامہ سید احمد اقبال رضوی نے تمام مرکزی ،صوبائی اور ضلعی مسئولین اور کارکنان کا شکریہ ادا کرتے ہوئے اپنے پیغام میں کہا ہے کہ قائد وحدت علامہ راجہ ناصر عباس جعفری کے حکم پرلبیک کہتے ہوئے، عالم اسلام اورپاکستان کے ازلی دشمن امریکہ کے خلاف علامہ محمد اقبال ؒ اور قائد اعظم ؒکے غیور فرزندوں نے پاکستان میں 25 اگست کے ملک گیر یوم مردہ باد امریکہ سے یہ ثابت کردیا کہ ملک دشمن قوتوں کے مقابلے میں ہم سب ایک ہیں  اورپنجاب ، سندھ ،خیبرپختونخواہ ، بلوچستان ،آزاد کشمیر ، گلگت بلتستان اور پاراچنارمیں امریکہ کے خلاف صدائے احتجاج کی صورت میں جس نفرت  کا اظہارکیااور وطن عزیز سے جس وفاداری کا ثبوت دیاہے ،وہ قابل تحسین ہے،میں ایک بار پھر آپ تمام برادرا ن اور خصوصاً میڈیا ٹیم کے تمام دوستوں کا جنہوں اپنی بھرپور کاوش سے اس احتجاج کو کامیاب بنانے میں اپنا بہترین رول ادا کیا ہے ،کا تہہ دل سے شکریہ ادا کرتا ہوں۔ اللہ تعالی آپ سب کی توفیقات خیر میں اضافہ فرمائے۔آمین

وحدت نیوز(کراچی) مجلس وحدت مسلمین سندھ کے سیکریٹری سیاسیات سید علی حسین نقوی نے کہا کہ نوجوانوں کے ذریعے ہی ملک میں تبدیلی لائیں گے، نوجوان ایک بڑی قوت ہیں، سازش کے تحت نوجوانوں کو قتل و غارت گری کی سیاست میں دھکیلا گیا، پاکستانی نوجوانوں میں بہت ٹیلنٹ موجود ہے، سیاست دانوں نے نوجوانوں کو اپنی بھٹی کا ایندھن بنایا، ایم ڈبلیو ایم نوجوانوں کی صلاحیتوں کا تعمیری کاموں میں استعمال کرے گی، ان خیالات کا اظہار انہوں نے شہید حسینی ہال ملیر جعفر طیار میں یوتھ کنونشن میں خصوصی خطاب کرتے ہوئے کیا۔ اس موقع پر ایم ڈبلیو ایم کراچی کے سیکرٹری جنرل میثم عابدی، سیکرٹری یوتھ کراچی عباس حیدری، علی عابدی، سید علی نے بھی خطاب کیا، جبکہ اس موقع پر مختار منگی، رضا رضوی، حامد حسین و دیگر موجود تھے۔ علی حسین نقوی نے کہا کہ نوجوانوں نے ہمیشہ تبدیلی کیلئے اہم کردار ادا کیا ہے، پاکستان میں نوجوانوں کی تعداد 50 فیصد سے زیادہ ہے، نوجوانوں کی اتنی بڑی تعداد اور قوت ملکوں میں انقلاب برپا کر دیتی ہے۔ انہوں نے کہا کہ وحدت یوتھ پُرعزم، بہادر اور جرأت مند نوجوانوں کا قافلہ ہے۔ انہوں نے مزید کہا کہ نوجوانان ملت جعفریہ اپنے اور قوم کے حقوق کیلئے متحد ہو جائیں اور ظالم قوتوں ڈٹ کر مقابلہ کریں۔