وحدت نیوز (اسلام آباد) پاکستان عوامی تحریک نے ایم ڈبلیو ایم کے کارکنوں کی گرفتاریوں کیخلاف احتجاجاً حکومت سے مذاکرات معطل کردیئے، خرم نواز گنڈا پور کہتے ہیں کہ حکومت ایک طرف مذاکرات دوسری جانب کارکنوں کو گرفتار کر رہی ہے، اسد نقوی اور ان کے ساتھیوں کی رہائی تک مذاکرات نہیں ہونگے۔ اسلام آباد میں میڈیا سے گفتگو میں پاکستان عوامی تحریک کے رہنما خرم نواز گنڈا پور کا کہنا تھا کہ پولیس نے مذاکراتی کمیٹی کے رکن اسد نقوی اور ان کے ساتھیوں کو گرفتار کرلیا ہے، انہوں نے کہا کہ حکومت ہمارے کارکنوں کی گرفتاریوں سے لاعلمی کا اظہار کر رہی  ہے، اگر پولیس نے گرفتاریاں نہیں کیں تو اسد نقوی اور ان کے ساتھیوں کے اغوا کا مقدمہ درج کیا جائے، خرم نواز گنڈا پور کا کہنا تھا کہ جرگے کے ارکان کو بھی کارکنوں کی گرفتاریوں سے آگاہ کرینگے، حکومت سے ہونیوالے مذاکرات میں احتجاجاً شریک نہیں ہوں گے۔

وحدت نیوز(اسلام آباد) مجلس وحدت مسلمین پنجاب کے صوبائی سیکرٹری سیاسیات اور مذاکراتی کمیٹی کے رکن اسد عباس نقوی سمیت ایم ڈبلیو ایم کے40 کارکنوں کو اسلام آباد کے سیکٹر جی سکس فور سے گرفتار کرلیا گیا ہے۔ تفصیلات کے مطابق حکومت کے ساتھ مذاکرات کرنے والی کمیٹی کے رکن و ایم ڈبلیو ایم پنجاب کے سیکرٹری سیاسیات اسد عباس نقوی سمیت 40 افراد کو مجلس وحدت مسلمین کے مرکزی دفتر پر چھاپا مار کر گرفتار کرلیا گیا ہے۔اسد عباس نقوی کے علاوہ ایم ڈبلیوایم آزاد کشمیر کے صوبائی سیکریٹری سیاسیات تصور موسوی، سیکریٹری روابط مولانا حمید نقوی ، سیکریٹری اطلاعات زیشان حیدر سمیت دیگر شامل ہیں ،  اسلام آباد پولیس، پنجاب پولیس اور رینجر زکی مشترکہ کارروائی میں یہ گرفتاریاں عمل میں لائی گئی ہیں۔تمام گرفتار شدگان کو پولیس اور رینجرز کے اہلکار نامعلوم مقام پر لے گئے ہیں ،  مجلس وحدت مسلمین کے سربراہ علامہ ناصرعباس جعفری، مرکزی ڈپٹی سیکرٹری جنرل علامہ امین شہیدی اور مرکزی سیکرٹری سیاسیات ناصر عباس شیرازی کی جانب سے ان گرفتاریوں کی شدید مذمت کی گئی ہے اور مطالبہ کیا گیا ہے کہ حکومت فی الفور کارکنوں کو رہا کرے۔

وحدت نیوز (اسلام آباد) نواز شریف کی طالبان نواز حکومت نے شیعہ سنی اتحاد سے خوفزدہ ہوکر ’’  قومی امن کنونشن‘‘ کا اجازت نامہ منسوخ کردیا۔ سنی اتحاد کونسل، مجلس وحدت مسلمین اور وائس آف شہداء کے زیراہتمام ہونے والا کنونشن اب ڈی چوک پارلیمنٹ ہاؤس کے سامنے منعقد ہوگا۔ راولپنڈی اسلام آباد کے شیعہ سنی عوام کو اس کنونشن میں بھرپور شرکت کی دعوت دی جاتی ہے۔ کنونشن میں انٹری کیلئے کسی دعوت نامہ کی ضرورت نہیں ہے۔ قومی امن کنونشن کے چیئرمین کنونشن اسد عباس نقوی  نے میڈیا سیل سے جاری ایک بیان میں کہا ہے کہ نواز شریف کی حکومت نے طالبان کی سرپرستی کا ثبوت دیدیا ہے، وارثان شہداء اور پاکستان کے بانیان کی جانب سے ملکی سلامتی کیلئے منعقدہ کانفرنس کا اجازت نامہ منسوخ کرنا وطن عزیز سے غداری ہے، سپریم کورٹ فی الفور اس معاملے کا نوٹس لے اور نواز شریف کی جانب سے دہشت گردوں کی سرپرستی کے اس اقدام کا نوٹس لے۔

وحدت نیوز (لاہور) مجلس وحدت مسلمین کے زیراہتمام اسیر ویلفیئر موومنٹ کا آغاز کر دیا گیا، اس مہم کے حوالے سے پہلا مشاورتی اجلاس ڈپٹی سیکرٹری جنرل پنجاب سید اسد عباس نقوی کی زیرصدارت صوبائی سیکرٹریٹ مسلم ٹاؤن لاہور میں منعقد ہوا, جس میں پنجاب کے سات اضلاع فیصل آباد، شیخوپورہ، لاہور، قصور، سیالکوٹ، گوجرانوالہ، ساہیوال، پاکپتن کے سیکرٹری جنرلز و ڈپٹی سیکرٹر جنرلز نے شرکت کی۔ اجلاس سے خطاب کرتے ہوئے سید اسد عباس نقوی نے کہا کہ ناصر ملت علامہ ناصر عباس جعفری نے گذشتہ دورہ لاہور پر اسیران ملت جعفریہ اور ان کے اہل خانہ کیلئے ہر ممکن مدد کرنے کیلئے باقاعدہ موومنٹ کے آغاز کا حکم صادر فرمایا تھا، اسی سلسلے میں آج کا یہ اجلاس بلایا گیا ہے۔ اجلاس میں اس بات پر اتفاق کیا گیا کہ اسیران ملت جعفریہ اور ان کے اہل خانہ کی فلاح و بہبود کیلئے ہرممکن مدد کی کوشش کریں گے۔ خصوصی طور پر اسیران کے بچوں کی تعلیم، گھریلو ضروریات، خود اسیران کے مقدمات کی پیروی کیلئے بھرپور جدوجہد کرنے کے عزم پر اتفاق کیا گیا۔ اجلاس میں یہ بھی فیصلہ کیا گیا کہ اس ماہ رمضان المبارک کو ماہ پیروان امام سجاد (ع) اسیران ملت جعفریہ پاکستان کے نام پر منانے کا اعلان کیا گیا۔

یاد رہے کہ اسیران ملت جعفریہ کو جتنی توجہ دینے کی ضرورت ہے قوم کی جانب سے ان مظلوموں کیلئے کوئی خاطر خواہ ادارے کا نہ ہونا ایک المیہ سے کم نہیں، اسی ضرورت کو مدنظر رکھتے ہوئے مجلس وحدت مسلمین نے جو کہ پہلے دن سے ہی امام سجاد فاؤنڈیشن کے ذریعے ان قومی ہیروز کی ہر ممکن امداد کر رہے ہیں، اس کیساتھ اس مہم کا بھی بیڑا اٹھانے کا اعلان کیا ہے، ضرورت اس امر کی ہے کہ قوم کے مخیر حضرات ان گمنام قومی ہیروز کی مدد میں بڑھ چڑھ کر حصہ لیں اور اسیران ملت جعفریہ اور ان کے لواحقین کو یہ احساس دلائیں کہ یہ کوئی مجرم نہیں بلکہ قومی ہیروز ہیں۔

وحدت نیوز (لاہور) مجلس وحدت مسلمین پاکستان کے زیرِاہتمام پشاور میں مدرسہ شہید عارف حسینی پر درندہ صفت دہشت گردوں کے معصوم پرامن اور محب وطن نمازیوں پر حملے اور ملک بھر میں جاری دہشت گردی کیخلاف آج پریس کلب لاہور کے سامنے علامتی دھرنا و احتجاجی مظاھرہ کیا گیا۔ مظاہرے میں علماء، خواتین، بچوں سمیت نوجوانوں کی کثیر تعداد نے شرکت کی۔ یاد رہے مجلس وحدت مسلمین پنجاب کے سیکرٹری جنرل نے صوبے بھر میں مظاہروں کی کال گزشتہ روز ہونے والے اجلاس میں دی تھی۔ احتجاجی مظاہرے سے خطاب کرتے ہوئے ڈپٹی سیکرٹری جنرل پنجاب سید اسد عباس نقوی نے کہا کہ ملک میں منظم سازش کے تحت جاری شیعہ نسل کشی میں پھر سے شدت آگئی ہے، پُرامن رہنے کا یہ مطلب نہیں کہ محب وطن لوگوں کو دہشت گردوں کے رحم وکرم پر چھوڑ دیا جائے۔

سید اسد عباس نقوی نے گلگت میں چلاس کے مقام پر غیر ملکی سیاحوں کے قتل عام کی بھی شدید مذمت کرتے ہوئے کہا کہ وزیرِداخلہ فلور آف دی ہاؤس بیان دے رہا کہ یہ وہی قاتل ہیں جنہوں نے یہاں کے شیعہ مسلمانوں کا قتل عام کیا، ہماری اطلاع کے مطابق قاتلوں نے غیر ملکی سیاحوں کے قتل عام کے بعد چاکنگ سے اپنی شناخت بھی ظاہر کردی ہے جس میں بدنام زمانہ دہشت گرد ملک اسحاق اور کالعدم دہشت گرد تنظیم کے موجودہ سربراہ کو اپنا امیر قرار دیا ہے۔ انہوں نے کہا کہ گلگت بلتستان کے امن و امان کو خراب کرنے کیلئے تکفیری گروہ پھر سے سر گرم ہے، ہم مسلم لیگ ن کی حکومت کو یہ متنبہ کرتے ہیں کہ اگر گلگت بلتستان کے مسافروں کو کوئی نقصان یا کوئی دہشت گردی کا وا قعہ وہاں پیش آیا تو رئیسانی حکومت کے انجام کو موجودہ حکومت بھی یاد رکھے۔

مرکزی رہنما مجلس وحدت مسلمین پاکستان علامہ ابوذر مہدوی نے کہا کہ پاکستان میں تبدیلی مہنگائی، دہشت گردی کی صور ت میں آ گئی ہے، مسلم لیگ ن کی حکومت کو ابھی مہینہ پورا نہیں ہوا سینکڑوں لاشوں کا تحفہ دے کر عوام پر ثابت کر دیا کہ موجودہ حکومت دہشت گردوں کے سامنے بے بس ہے، کوئٹہ میں خواتین کا قتل عام کرکے دنیا میں پاکستان کی رسوائی کی گئی، آج پھر گلگت بلتستان کی پُر امن سرزمین پر تکفیری ٹولوں نے غیر ملکی مہمانوں کو قتل کرکے پاکستان میں سیاحت کے باب پر ہمیشہ کیلئے تالا لگا دیا۔ علامہ ابو ذر کا کہنا تھا کہ اگر حکومت اور سیکورٹی ادارے اِن معاملات میں اپنی ناکامی کا اعتراف کریں تو محب وطن عوام اِن دہشت گردوں کیخلاف میدان میں آنے کو تیار ہیں لیکن افسوس پاکستانی حکمرا ن اس وقت ملکی مفادات سے زیادہ امریکی و صیہونی مفادات کو تحفظ دے رہے ہیں جو اس دہشت گردی اور لاقانونیت کے اصل سرپرست ہیں۔

انہوں نے کہاکہ پاکستان کے حالات بتارہے ہیں یہاں امریکی شیطانوں اور اسرائیلی و انڈین گماشتوں کے ایجنڈوں کی تکمیل کیلئے طالبان اور تکفیری دن رات ایک کئے ہوئے ملکی سلامتی کے درپے ہیں اور ہم فقط مذمت کے سوا کوئی عملی قدم اٹھانے کو تیار نہیں۔ مظاہرے سے مجلس وحدت مسلمین لاہور کے سیکرٹری جنرل علامہ امتیاز کاظمی نے بھی خطاب کیا ۔ انہوں نے کہا پاکستان کو اب ایک فیصلہ کرنا ہوگا،اسلامی جمہوری پاکستان یا طالبان تکفیری پاکستان کیونکہ جن دہشت گردوں سے ہمارے ملک کے سیاسی و مذہبی قائدین مذاکرات کے خواہاں ہیں وہ اس ملک کواور اس کے آئین کو سرے سے نہیں مانتے ، حکومت کی اسی کمزوری کا نتیجہ جو آج معصوم اور بے قصور محب وطن عوام بھگت رہی ہے، کیا قیام پاکستان اور بانی پاکستان کی اولادوں کا جرم یہ ہے کہ وہ پاکستان سے محبت کرتے ہیں، اگر یہ جرم ہے تو ہم یہ جرم بار بار کرتے رہیں گے،وطن کی محبت اور وطن کے دشمنوں سے نفرت ہمارے ایمان کا حصہ ہے۔

علامہ امتیاز کاطمی کاکہنا تھا کہ وطن کا دفاع ہم سب پر واجب ہے، اگر پاک فوج آج پکارے تو یہ فرزندانِ پاک وطن اپنی جانوں کو اس دھرتی پر قربان کرنے کو عین شرعی فریضہ سمجھتے ہوئے میدان میں آنے کو تیار ہیں۔ مظاہرے میں خواتین اور بچوں کی بڑی تعداد نے شرکت کی۔ پریس کلب لاہور کے سامنے علامتی دھرنا بھی دیا گیا جو بعد میں پُر امن طور پر منتشر ہوگیا۔مظاہرین نے مطالبہ کیاکہ کھوکھلے نعروں اور جھوٹے وعدوں کی بجائے ملک میں دہشت گر دی کیخلاف موثر حکمت عملی ترتیب دی جائے اور دہشت گردوں کیخلاف فی الفور آپریشن شروع کیا جائے،گلگت چلاس میں غیر ملکی سیاحوں کا قتل عام در اصل وہاں کے سیاحت اور غریب محب وطن عوام کے روز گار کا قتل ہے۔

مظاہرین نے کہاکہ تکفیریوں کیخلاف گلگت بلتستان میں آپریشن نہ کرنے کا نتیجہ آج پاکستان کو بین الاقوامی سطح پر ایک بار پھر بدنامی کا سبب بنا، گلگت بلتستان کی نمائندہ جماعت ہونے کے ناطے مجلس وحدت مسلمین پاکستان مطالبہ کرتی ہے کہ گلگت بلتستان میں دہشت گردوں کیخلاف فوری آپریشن کرے اور گرفتار شرپسندوں کو فوری انصاف کے کٹہرے میں لا کر قرار واقعی سزا دی جائے، سانحہ پشاور میں گرفتار درندوں کو فوری قرار واقعی سزا دی جائے اور اُن کے سرپرستوں کیخلاف موثر کارروائی تک ہم چین سے نہیں بیٹھیں گے، پاکستان تحریک انصاف کے صوبائی حکومت کے وزیرِ اطلاعات کے اُس بیان کی پرزور مذمت کرتے ہیں جس میں مدرسہ شہید عارف حسینی میں خود کش دھماکے پر کہا گیا کہ قیامت تو نہیں آئی بم ہی پھٹا ہے،ہم عمران خان سے مطالبہ کرتے ہیں کہ ایسے بے حس لوگوں کو آگے لاکر تحریک انصاف کی ساکھ کو خراب نہ کریں اور اُن کیخلاف فی الفور کارروائی کی جائے۔

رہنماؤں نے کہا کہ ہماری اطلاعات کے مطابق گلگت بلتستان کے مسافروں کیخلاف شاہراہ قراقرم پر بڑی دہشت گردی کی منصوبہ بندی جاری ہے جس کے آثار بدنام زمانہ دہشت گرد ملک اسحاق کے نام پر چاکنگ کرواکر دکھائے جا رہے ہیں کہ ہم یہ قتل عام کرتے رہیں گے، لہٰذا وفاقی اور گلگت بلتستان حکومت سن لیں کہ اگر شاہراہ قراقرم پر کوئی دہشت گردی ہوئی تو حالات کے ذمہ دار موجودہ حکمران ہوں گے، حب الوطنی اور امن پسندی کو کمزوری سمجھا جارہا ہے، دہشت گردوں کو لگام دینے میں اگر سیکورٹی ادارے ناکام ہیں تو عوام کو کال دی جائے یہ محب وطن قوم پاک فوج کے شانہ بشانہ ملک دشمنوں سے ہر محاذ پر لڑنے کو تیار ہیں کیونکہ وطن کے دفاع کو ہم اپنا عین شرعی وظیفہ سمجھتے ہیں، کوئٹہ میں خواتین کے قتل عام میں ملوث درندوں کیخلاف اب تک کوئی موثر کارروائی نہیں ہو رہی، پاک فوج کے ذریعے ان تکفیری دہشت گردوں کیخلاف بھر پور آپریشن کر کے عوام کو احساس تحفظ دیا جائے۔