وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے جیکب آباد میں نہتے عزاداران نواسہ رسول ۖپر درندہ صف دہشت گردوں کے بزدلانہ حملے کے خلاف جی نائن امام بارگاہ میں ہنگامی پریس کانفرنس سے خطاب کرتے ہوئے کہا کہ یزیدی پیروکاروں نے ایک بار پھر سندھ کی سرزمین کو خاک و خون میں نہلا کر اپنی سفاکیت اور بربریت کا ثبوت دیا ہے،ہم اعلان کرتے ہیں کہ ہم ان دہشت گردوں کو شکست دینگے،اور ان کے ناپاک عزائم کو خاک میں ملاکر دم لیں گے،ہم ان کے اس بزدلانہ کاروائیوں سے مرعوب ہونے والے نہیں عزاداران امام مظلوم عاشور کے دن گھروں سے نکلیں دہشت گردوں کے ناپاک ارادوں کو خاک مین ملا دیں،ہمیں نہایت افسوس کہنا پڑتا ہے کہ وفاق،چاروں صوبوں سمیت گلگت بلتستان کے حکمران دہشت گردوں پر قابو پانے کے بجائے ان کی توجہ عزاداران اور عزاداری سید شہداء کو محدو کرنے پر مرکوز ہیں،حکومت اور انتظامیہ دہشت گردوں کو پکڑنے کے بجائے بے جان لاوڈسپیکرز کو پکڑ کر بند کرنے میں مصروف ہیں۔

انہوں نے کہا کہ سندھ حکومت کی بد انتظامی نے آج دہشت گردوں کو اس خونی کھیل کو کھیلنے کا موقع ملا،ملک بھر میں نیشنل ایکشن پلان کو دہشت گرد مخالف قوتوں کیخلاف حکمران استعمال کر رہے ہیں،جیکب آباد میں شہداء کے وارثین اور عزاداروں پر پولیس گردی ریاستی دہشت گردی اور ایک سوچی سمجھی سازش کا حصہ ہے،سندھ کے ضعیف العمر اور نااہل وزیر اعلیٰ اور انتظامیہ اس واقعے کے ذمہ دار ہیں،ہسپتالوں میں زخمیوں کو بروقت علاج معالجہ کے سہولیات نہ ملنے کے سبب شہادتوں میں اضافہ ہوا،موجودہ حکمران ملک سے دہشت گردی کے خاتمے میں مخلص نہیں،انشااللہ ہمارے ان پاکیزہ شہیدوں کے لہو کو ہم رائیگاں نہیں جانے دینگے،سانحہ شکار پور کے دہشت گردوں کو منطقی انجام تک پہنچایا جاتا تو آج یہ دن دیکھنا نہ پڑتا،سندھ حکومت نے سانحہ شکارپور کے شہدا کے لواحقین کو بھی دھوکا دیا،پیپلز پارٹی پر تکفیری قابض ہو چکے ہیں،ان کے مفادات اب دہشت گردوں سے وابسطہ ہیں،اس حکومت کے ہوتے ہوئے ہمارے شہداء کے قاتلوں کو منطقی انجام تک پہنچانا ناممکن ہے،سندھ میں ہمارے ہزاروں شہداء کے قاتل اب بھی آزاد  دندھاناتے پھر رہے ہیں،نام نہاد سیاسی مافیا آپریشن ضرب عضب کو متنازعہ بنانے کی کو شش کر رہا ہے،لیکن ہم ان سازشوں کو کامیاب نہیں ہونے دینگے۔

وحدت نیوز(اسلام آباد) مجلس وحدت مسلمین پاکستان کے مرکزی جنرل سیکریٹری علامہ راجہ ناصر عباس جعفری نےاپنی جانب سے راولپنڈی  اسلام آباد کی تمام ماتمی انجمنوں  ، ملی تنظیموں اور شخصیات کے اعزاز میں دی گئی دعوت افطار سے خطاب کرتے ہوئے کہا ہے کہ حکومت نیشنل ایکشن پلان کو دانستہ طور پر ناکام کرنے کی کوشش کر رہی ہے۔ملک میں اسی ہزار بے گناہ انسانی جانوں کے خون سے ہاتھ رنگنے والی کالعدم تنظیموں کے خلاف کاروائی سست روی کا شکار ہے جس سے اس پلان کی افادیت ماند ہوتی ہوئی دکھائی دے رہی ہے۔سانحہ پشاور، راولپنڈی بم دھاکہ،شکارپور اور ملک میں ہونے والے دیگر ان گنت سانحات کے ذمہ داران کی تاحال عدم گرفتاری اس بات کا ثبوت ہے کہ حکومت نے دہشت گردی کی یہ جنگ تنہا فوج پر چھوڑ رکھی ہے اور خود زبانی دعووں سے کام چلایا جا رہا ہے۔ملک کے اٹھارہ کروڑ عوام اس تذبذب میں مبتلا ہیں کہ نون لیگ دہشت گردوں اور ان کے سہولت کاروں پر ہاتھ ڈالے سے آخر کیوں گریزاں ہے۔ہمار ا مطالبہ ہے کہ نیشنل ایکشن پلان کو کھوکھلا نعرہ بنانے کی بجائے دہشت گردی کے خاتمے کے لیے موثر ہتھیار کے طور پر استعمال کیا جائے۔ اس وقت تک دہشت گردی کے خلاف جنگ میں افواج پاک کی لازوال قربانیاں لائق تحسین ہیں۔ ملک میں جاری دہشت گردی کا سب سے زیادہ نقصان ملت تشیع اور پاکستان کی فوج کو اٹھانا پڑا۔ اس نقصان کا ازالہ تبھی ممکن ہے جب ملک میں موجود آخری دہشت گرد کے خاتمے تک یہ جنگ رہے۔انہوں نے کہا نیشنل ایکشن پلان پر حقیقی معنوں میں عمل درآمد کے لیے ضروری ہے تا کہ دہشت گردعناصر کی سرکوبی کے ساتھ ساتھ ان پشت پناہوں پر بھی مضبوط ہاتھ ڈالیں جائیں جو دہشت گردی کی کاروائیوں کو کامیاب بنانے کے لیے ان عناصر کو معاونت فراہم کرتے ہیں۔ملک میں موجود تکفیری گروہوں نے اپنے مفادات کے حصول کے لیے ملک کی سلامتی و بقا کو داو پر لگا رکھا ہے۔اگر فوج طالبان اور دیگر شیطانی قوتوں کے خلاف آپریشن کا فیصلہ نہ کرتی تو آج پاکستان کے گلی کوچے وزیرستان کی تصویر پیش کر رہے ہوتے۔دہشت گردوں کے خلاف کسی حتمی فیصلے کے اظہار میں حکومتی پس و پیش اس حقیقت کو ثابت کرتا رہا کہ اس ملک کے نااہل حکمرانوں میں اتنی ہمت نہیں کی کہ وہ قومی وقار کو پیش نظر رکھ کر کوئی جرات مندانہ فیصلہ کرسکیں۔غاصب حکمرانوں کی ناکارہ پالیسوں نے وطن عزیز کو اقتصادی معاشی طور پر تباہی کے دھانے پر پہنچا دیا ہے جس سے قوم کا ہر فرد مشکلات کا شکار ہے۔اس حکومت نے ہمیشہ عوامی مفادات کے برعکس ایسے فیصلوں کو ترجیح دی جس سے شخصی اور سیاسی فوائد حاصل ہوتے ہوں ۔

وحدت نیوز (اسکردو) مجلس وحدت مسلمین پاکستان کے مرکزی جنرل سیکریٹری علامہ راجہ ناصرعباس جعفری نے کہا ہے کہ گلگت بلتستان معدنی وسائل اور باصلاحیت نوجوانوں سے مالامال ہے۔ہم ان وسائل کو بروئے کار لا کر اس علاقے کے ٹیلنٹ سے استفادہ کریں گے۔یہ نوجوان قوم و ملت کاسرمایہ ہے۔انہیں ماضی میں دانستہ طور پرنظر انداز کیا جاتا رہا ۔مگر اب اس مشق کو دوہرانے کی ہرگز اجازت نہیں دیں گے۔ان خیالات کا اظہار انہوں نے حلقہ ۴ سکردو کے علاقے تلو برق میں ایم ڈبلیوایم کے امیدوار راجہ ناصرعلی خان کی انتخابی مہم کے دوران کارنر میٹنگ سے خطاب کرتے ہوئے کیا۔انہوں نے کہا گلگت بلتستان کے لیے ہم نے جامع پالیسی مرتب کر رکھی ہے علاقے میں آئینی اصلاحات کے نفاذ سمیت یہاں کے معدنی وسائل سے استفادہ اور نوجوانوں کے باوقار روزگار مہیا کرنا ہماری ترجیحات میں سرفہرست ہیں۔گلگت بلتستان کے انتخابات میں ایم ڈبلیو ایم واحد تنظیم ہے جس نے پڑھے لکھے باشعور نوجوانون کو کردار و اہلیت کی بنا پر اپنے پلیٹ فارم سے الیکشن لڑنے کا موقع فراہم کیا ۔انہوں نے کہا کہ اس علاقے میں بے بہا معدنی وسائل ہیں مگر ماضی کے حکمرانوں کی نالائقی اور خودغرضی اس علاقے کی ترقی کی راہ میں ہمیشہ رکاوٹ بنی رہی۔مفاد پرست سیاستدان اس علاقے کے لوگوں کو ہمیشہ پسماندہ دیکھنا چاہتے ہیں تاکہ وہ بنا کسی روک رکاوٹ کے اقتدار کے مزے لوٹتے رہیں۔ لیکن اب ایسا نہیں ہو گا۔اب یہاں پر حکمرانی آپ لوگوں کی ہوگی۔ آٹھ جون کے دن ان کرپٹ مفاد پرست سیاستدانوں کی خوش فہمی جھاگ کی طرح بیٹھ جائے گی۔ نوجوانوں کے وفود نے انتخابی مہم میں بھرپور حصہ لینے کی یقین دہانی کراتے ہوئے کہا کہ علامہ ناصر نے یہاں کے لوگوں کو یکجا کر کے قائد وحدت ہونے کا حقیقی معنوں میں حق ادا کیا ہے۔

وحدت نیوز (اسلام آباد) مجلس وحدت مسلمین پاکستان کے مرکزی سیکریٹری امور خارجہ ڈاکٹرسید شفقت شیرازی نے مصر کے معروف روزنامہ النہار میں سعودی وزیر دفاع محمد بن سلمان ال سعود کے پاکستان بارے شائع ہونے والے کلمات کو انتہائی تضحیک آمیزاور قابل مذمت قرار دیتے ہوئے کہ کہ سعودی وزیر دفاع کا یہ بیان انتہائی توہین آمیز ہے کہ پاکستانی قوم اور حکومت سب جھوٹے ہیں اور سعودیہ سے بھیک مانگتے ہیں۔سعودی وزیر نے افواج پاک کو تقسیم کرنے کی سازش کی ہے۔ ہماری حکومت کو چاہیے کہ اس بیان پر سعودی سفیر کو طلب کر کے سخت انداز میں بازپرس کی جائے ۔انہوں نے کہا سعودی حکومت کو یہ بات دماغ میں بٹھا لینی چاہیے کہ پاکستان سعودیہ کی کوئی غلام ریاست نہیں بلکہ ایک آزاد اور خود مختار ملک ہے۔یہ ہمیں آل سعود نے تحفے میں نہیں دیا بلکہ ہمارے اباو اجداد نے قربانیاں دے کر حاصل کیا ہے۔کسی ملک کو یہ حق حاصل نہیں کہ وہ ہماری خود مختاری کو چیلنج کرے۔ڈاکٹر شفقت شیرازی نے حکومت سے مطالبہ کیا ہے کہ قومی وقار کو ذاتی تعلقات کی نذر نہ کیا جائے۔سعودی حکومت کو دوٹوک انداز متنبہ کیا جائے کہ وہ پاکستان کے حوالے سے اپنے بیانات میں احتیاط سے کام لیں اور آئندہ ذرائع ابلاغ کو ایسے بیان سے باز رہے جس میں پاکستانی عظمت و حمیعت پر حرف آتا ہو۔

وحدت نیوز(اسلام آباد) چیئرمین خیرالعمل فاؤنڈیشن نثارعلی فیضی کی زیر صدارت سنٹرل کور کمیٹی کا اجلا س ہوا جس میں گلگت میں ہاؤسنگ سکیم کے تحت مکانات کی تعمیر کو جلد مکمل کرنے کا فیصلہ کیا گیا اور اسکے علاوہ ڈی آئی خان میں بھی تعمیرات کے آخری مرحلے میں موجود ہاؤسنگ کالونی کے فوری تکمیل کے بعد افتتاح کرنیکا فیصلہ بھی ہوا جس میں مرکزی قائدین شرکت کرینگے ۔اجلاس میں خیرالعمل فاؤنڈیشن کے رفاہی منصوبوں کے لیے 2015-16 کے مجوزہ بجٹ کی تیاری جس میں قدرتی آفات وسانحات،تعلیم،صحت، یتیموں کی کفالت ، عمومی رفاہ، تعمیر مساجد و قرآن سنٹرز ،ووکیشنل سنٹرز اور فراہمی آب کے منصوبوں کے لیے فنڈز کی جمع آوری کی حکمت عملی مرتب کی گئی تاکہ تمام شعبہ جات کے لیے علیحدہ علیحدہ بجٹ مختص کر کے منصوبوں کو بر وقت تکمیل تک پہنچایا جا سکے مجوزہ بجٹ کو آئندہ بورڈ آف گورنرز کے اجلاس میں منظوری کے لیے پیش کیا جائیگا بجٹ میں پاکستان کے تمام صوبوں بشمول ریاست کشمیر کے لیے سینکڑوں منصو بوں پر کام کرنے پر غور کیا ۔چیئر مین خیرالعمل فاؤنڈیشن نے تمام شعبہ جات کو اس سلسلے میں اپنی منصوبہ بندی مکمل کرنیکی ہدایات کرتے ہوئے جلد رپورٹس پیش کرنے کا کہا ۔

اجلاس سے خطاب کرتے ہوئے چیئرمین خیرالعمل فاؤنڈیشن نثارعلی فیضی نے کہا کہ خیرالعمل فاؤنڈیشن کی پاکستان میں فعالیت ایم ڈبلیو ایم کے اجتماعی امور میں بے پناہ اہمیت رکھتی ہے ادارے کے اب تک کے کاموں سے کئی علاقوں بلخصوص پسماندہ اور دور افتادہ علاقوں میں جماعت کی تشکیل اور زمینہ سازی میں بھر پور مدد ملی ہے قومی جماعت کی تشکیل کے نتیجے میں عوام کا بنیادی مسائل ومشکلات کے لیے مراجعہ بہت زیادہ ہے اور ان توقعات پر پورا اترنے میں آج اگر ہم کچھ کردار ادا کر رہے ہیں تو اس میں ہمارے مخیر حضرات،اداروں اور ٹیم کی انتھک کاوشوں کا بہت بڑا عمل دخل ہے ایک الہی جماعت کے لیے اندرونی و بیرونی چیلنجز کا مقابلہ کرنے کے لیے ان امور پر خاطر خواہ کام کا ہونا حکمت عملی سے عین مطابقت رکھتا ہے ۔انشاء اللہ خیرالعمل فاؤنڈیشن انسانی خدمت کے جذبے کے تحت رفاہی کاموں کے جال کو مزید وسیع کریگی ۔

وحدت نیوز (اسلام آباد) مجلس وحدت مسلمین نے گلگت بلتستان کی نگران حکومت اور چیف الیکشن کمشنر کو مسترد کرتے ہوئے احتجاجی تحریک شروع کرنے کا فیصلہ کیا ہے۔اسلام آباد میں مجلس وحدت مسلمین کی کور کمیٹی کا اجلاس ہوا جس میں ایم ڈبلیوایم کے مرکزی سیکریٹری امور سیاسیات ناصر عباس شیرازی، اسد عباس نقوی سمیت دیگر کور کمیٹی کے ممبران نے شرکت کی۔ کورکمیٹی کے اجلاس میں گلگت بلتستان کے الیکشن اور آئندہ کے اتحاد پر غور کیا گیا۔ اسلام آباد سے جاری اعلامیے کے مطابق، کورکمیٹی ایم ڈبلیو ایم نے گلگت بلتستان نگران حکومت اور الیکشن کمشنر کو مسترد کرتے ہوئے کہا ہے کہ موجودہ سیٹ اپ میں غیر جانبدار الیکشن ممکن نہیں ہیں۔ ترجمان ایم ڈبلیو ایم کا کہنا ہے کہ اٹھائیس جنوری کو اسلام آباد میں ہم خیال جماعتوں کا اجلاس طلب کرلیا گیا ہے جس میں آئندہ کے لائحہ عمل کا اعلان کیا جائیگا۔ کورکمیٹی کے ا جلاس سے گفتگو کرتے ہوئے سیکرٹری سیاسیات ناصر عباس شیرازی کا کہنا تھا کہ ہمارا مطالبہ ہے کہ نگران حکومت کو ایسے افراد پر مبنی ہونا چاہیے جن کی ساکھ پر کوئی سوال نہ اٹھا سکے اور ان افراد میں شفاف الیکشن کرانے کی اہلیت ہو، الیکشن میں تاخیر کو بھی برداشت نہیں کیا جائیگا۔ انہوں نے کہا کہ نون لیگ کو کسی صورت الیکشن ہائی جیک نہیں کرنے دیں گے۔ اگر ایسا کیا گیا تو گلگت بلتستان کو جام کرکے رکھ دیں گے اور ملک بھر میں احتجاج کریں گے، مجلس وحدت مسلمین اس ساری تحریک کو لیڈ کریگی۔ انہوں نے کورکمیٹی کو بتایا کہ گلگت بلتستان کے الیکشن کے حوالے سے مسلم لیگ ق سمیت تمام اتحادی جماعتیں رابطے میں ہیں۔