وحدت نیوز (کوئٹہ) علامہ راجہ ناصرعباس جعفری کے دورہ تفتان کے بعد حکومت بلوچستان اور ایف سی کی جانب سے زائرین کی مشکلات کے حل کیلئے کیئے گئے وعدے کافی حد تک پورے ہوئے ہیں، گذشتہ دس روز میں زائرین کربلا ومشہد کے سات کانوائے تفتان سے کوئٹہ باحفاظت پہنچائے گئے، چہلم امام حسین ؑ پر بھی اضافی کانوائے کوئٹہ سے تفتان روانہ کرنے کی تیاریاں جاری ہیں، زائرین کیلئےاضافی سہولیات اور  انتظامات پر وزیر اعلیٰ بلوچستان نواب ثناء اللہ زہری ، ڈی جی ایف سی، آئی جی پولیس  اور کمانڈرسدرن کمانڈ میجرجنرل عامر ریاض کے شکر گذارہیں ان خیالات کا اظہارمجلس وحدت مسلمین بلوچستان کے رہنما اور رکن بلوچستان اسمبلی سید محمد رضا رضوی (آغارضا)نے ’’وحدت نیوز‘‘کے نمائندے سے ٹیلی فونک گفتگو کرتے ہوئے کیا۔

آغا رضا کاکہنا تھا کہ مجلس وحدت مسلمین کے سربراہ علامہ راجہ ناصرعباس جعفری کا دورہ کوئٹہ تا تفتان روٹ اور اعلیٰ سول وملٹری حکام کے ملاقاتیں ثمر آور ثابت ہوئیں ، صوبائی حکومت اور ایف سی نے محرم الحرام میں وعدے کے مطابق اضافی کانوائے زائرین کی سہولت کے لئے کوئٹہ تا تفتان اور تفتان تا کوئٹہ روانہ کیئے ہیں  اور یہ سلسلہ چہلم شہدائے کربلاؑ تک جاری رکھنے کی یقین دہانی کروائی ہے، انہوں نے مزید کہا کہ عاشورہ محرم کے بعدتفتان بارڈر پر زائرین کے قافلوں کو کوئٹہ روانگی میں طویل انتظار حکومت اور بس مالکان کے درمیان جھگڑے کے باعث برداشت کرنا پڑا جب کے سکیورٹی اداروں کی جانب کانوائے کی روانگی کے انتظامات مکمل تھے ، بعض بے خبر افراد نے سیاسی پوائنٹ اسکورنگ کے چکرمیں قافلوں پر پابندی اوایف سی کی جانب سے زائرین کو بارڈر پر بلاجواز روکے رکھنے کی خبریں عام کیں جوکہ انتہائی غیر ذمہ دارانہ اور افسوس ناک اقدام ہے، انہوں نے کہاکہ مجلس وحدت مسلمین کی گزارش پر زائرین کے قیام وطعام کیلئے تفتان بارڈرپر چھ ایکٹر پر محیط زیر تعمیر پاکستان ہاؤس کے تعمیراتی کام کی جلد تکمیل کے لئے وزیر اعلیٰ بلوچستان نے خصوصی احکامات جاری کیئے ہیں امید ہے کہ تفتان بارڈر پر اس ریسٹ ہاؤس کے قیام کے بعد زائرین کو قیام وطعام کی بہترین سہولیات میسر آئیں گی۔

وحدت نیوز(کوئٹہ) مجلس وحدت مسلمین کے مرکزی سیکریٹری جنرل علامہ راجہ ناصر عباس جعفری دورہ تفتان کے بعد باحفاظت کوئٹہ واپس پہنچ گئے۔ دورہ تفتان بارڈر میں مجلس وحدت مسلمین کے رکن بلوچستان اسمبلی آغا محمد رضا، رکن شوری عالی مولانا سید ہاشم موسوی، مولانا ولایت جعفری اور دیگر رہنما و مسئولین بھی انکے ہمراہ تھے۔ علامہ راجہ ناصر عباس جعفری نے حکومتی دباو اور سیکیورٹی کلیئرنس نہ ملنے کہ باوجود دو روز قبل کوئٹہ سے براستہ دالبندین اور تفتان بارڈر کا سفر کیا تھا تاکہ وہاں پر زائرین امام حسین (ع) و امام رضا (ع) کو درپیش مسائل کا بذات خودجائزہ لے سکیں اور انکے حل کیلئے وفاقی وزیر داخلہ چوہدری نثار علی خان اور بلوچستان کی صوبائی حکومت کے ساتھ ملکر کوششیں کرسکیں۔ علامہ راجہ ناصر عباس نے ایک شب تفتان بارڈر پر زائرین کے ہمراہ بھی  گزاری۔

دوران قیام ایم ڈبلیو ایم کے سیکرٹری جنر ل علامہ راجہ ناصرعباس جعفری نے بلوچستان اسمبلی کے دالبندین تفتان سے منتخب رکن امان اللہ شادیزئی، کمشنر دالبندین، ڈپٹی کمشنر اور ونگ کمانڈر ایف سی کرنل قمر رشید سمیت ایف آئی اے اور امیگریشن آفس کے حکام سے اہم ملاقاتیں کیں۔ اس موقع پر علامہ راجہ ناصر عباس نے زائرین سے بھی ملاقات کی اور خطاب کیا۔ علامہ ناصر عباس نے دوران سفر مجلس وحدت مسلمین کے رکن اسمبلی آغا محمد رضا کی تجویز پر زائرین کے قیام وطعام کیلئےحکومت بلوچستان کی جانب سے زیر تعمیر "پاکستان ہاوس" کا بھی دورہ کیا۔ اس موقع پر انتظامیہ نے پاکستان ہاوس کو چند ماہ میں مکمل کرنے کی بھی یقین دہانی کروائی۔ ایف سی و ایف آئی اے کے حکام نے بھی علامہ راجہ ناصر عباس کو درپیش مسائل اورموجودسہولیات کے بارے میں آگاہ کیا۔ انتظامیہ نے علامہ ناصر عباس جعفری کوزائرین کو درپیش مسائل کے حل کے حوالے سے اپنے بھرپور تعاون کا یقین دلایا۔

وحدت نیوز(کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں ایم ڈبلیو ایم کوئٹہ کے رہنما جعفر علی جعفری نے کہا گیا ہے کہ بعض شر پسند عناصر شہر میں وارداتوں سے فرقہ واریت کو فروغ دے رہے ہیں اور دوسری طرف ان کے ہم خیال مختلف ذرائع ابلاغ کے توسط سے تقسیم بندی میں مصروف ہیں ۔ بد امنی کو ایک بار پھر پروان چھڑانے کی کوشش کی جارہی ہے دہشتگردوں اور دہشتگردانہ سوچ رکھنے والے کبھی بھی اپنے عزائم میں کامیاب نہیں ہو سکتے۔ بیان میں کہا گیا کہ دن دہاڑے بازاروں میں ٹارگیٹ کلنگ سے قتل ہونا لمحہ فکریہ ہے سینکڑوں اہلکاروں کی موجودگی میں دہشتگرد اپنے وارداتوں اور فرار ہونے میں کامیاب ہو رہے ہیں اور انہیں پکڑنے میں دشواریوں کا سامنا ہورہا ہے، شہری اپنے جان و مال کو محفوظ نہیں سمجھتے ایسے حالات میں گھر سے باہر نکلنا بھی مشکل ہو گیا ہے۔

انہوں نے کہا کہ ہر روز دہشتگردی، چوری اور اس طرح کے دیگر معاملات کی خبریں ملتی ہیں جہاں ملک کی ترقی کی باتیں ہونی چاہئے وہی ہمیں قتل و غارت گری کی خبریں ملتی ہے۔ بہت افسوس کی بات ہے کہ آج کے جدید دور میں جگہ جگہ کیمروں کے موجودگی اور جدید آلات کے باوجود یہ کہا جاتا ہے کہ واردات کے بعد نامعلوم افراد فرار ہونے میں کامیاب ہوگئے۔ انکا کہنا تھا کہ صوبے میں امن حکومت کی اولین ترجیحات میں سے ایک ہونی چاہئے ۔ ہم ہر قسم کی دہشتگردی اور انتہا پسندی کو صوبے میں امن و امان اور بھائی چارگی کے لئے زہر قاتل قرار دیتے ہوئے مطالبہ کرتے ہیں اور حکومت اس طرح کے واقعات کی روک تھام کیلئے اپنی ذمہ داریاں پوری کرے تاکہ حکومتی اداروں سمیت مزید بے گناہ اور نہتے عوام کا قتل عام نہ ہو،بیان کے آخر میں سریاب روڈ میں تکفیری دہشتگردوں کی فائرنگ سے شہید ہونے والے غلام نبی اور محمد نبی کی شہادت پر افسوس کا اظہار کیا گیا اور پسماندگان سے دلی تعزیت کا اظہار کیا گیا۔

وحدت نیوز (کوئٹہ) مجلس وحدت مسلمین کوئٹہ ڈویژن کی جانب سے جاری ایک بیان میں کہاگیاہے کہ بلوچستان میں پولیو مہم جاری ہے اور پولیو مہم کے دوران سیکورٹی فورسز کی ایک کثیر تعداد پولیو مہم سے وابستہ اسٹاف کی سیکورٹی کے لیے تعینات کی جاتی ہے  اس وجہ سے زائرین کی موومنٹ میں 3 دن کی تاخیر ہوئی ہے، بلوچستان انتظامیہ نے مجلس وحدت مسلمین کہ رکن بلوچستان آغا رضا کو بتایا کہ سیکورٹی کہ سبب ۳ دن کی تاخیر کی گئی ہے تاکہ زائرین کو کسی بھی ممکنہ دہشت گردی کہ واقعہ سے بچایا جاسکے ، انشاءاللہ اٹھارہ مارچ کو کوئٹہ سے زائرین کے قافلے سکیورٹی حصارمیں کوئٹہ سے تفتان اور تفتان سے کوئٹہ کیلئے روانہ کردیئے جائیں گے۔

 آغا رضا کا کہنا تھا کہ زائرین کا تحفظ اولین ترجیح ہے،اس پر سیاست نہ کی جائے ۔ بلوچستان حکومت ہرماہ دو تاریخوں ( ہر مہینہ کی ۱۵ اور ۳۰ تا ریخ ) کوزائرین کےکانوائےکو تحفظ فراہم کرتی ہے قافلہ سالار بھی انہی تاریخوں کی پابندی کریں  تاکہ زائرین کو تحفظ کہ ساتھ مشکلات سے بچایا جاسکے۔

وحدت نیوز (اسلام آباد) مجلس وحدت مسلمین پاکستان کے مرکزی جنرل سیکریٹری علامہ راجہ ناصر عباس جعفری نے کوئٹہ میں ہزارہ شیعہ قبیلے کے تین افراد کوفائرنگ کر کے شہید کرنے کے واقعہ پر شدید غم و غصے کا اظہارکرتے ہوئے کہا ہے کہ کوئٹہ میں ایک بار پھر شیعہ ٹارگٹ کلنگ کے واقعات میں اضافہ ہونا شروع ہو گیا ہے۔حکومت بلوچستان میں شر پسندی کے واقعات کو سنجیدہ نہیں لے رہی یہی وجہ ہے کالعدم تنظیموں نے اس علاقے کو اپنی محفوظ پناہ گاہ بنا رکھا ہے اور جب ان دہشت گرد عناصر کا جی چاہتا ہے بے گناہ انسانی جانوں کے ساتھ خون کی ہولی کھیل کر دندناتے ہوئے روپوش ہو جاتے ہیں جبکہ ایف سی میں موجود کالی بھیڑیں کوئٹہ میں جاری شیعہ نسل میں ملوث ہیں،۔حکومت کی مسلسل بے حسی ملت تشیع کے اضطراب میں اضافے کا باعث بن رہی ہے۔اگر ملت تشیع کے پانچ کروڑ شیعہ سڑکوں پر نکل آئے تو پھر حکومت کا اقتدار میں رہنا ممکن نہیں رہے گا۔ ۔ہم بارہا مطالبہ کر چکے ہیں کہ بلوچستان میں بھرپور فوجی آپریشن کر کے دہشت گردوں کی کمین گاہوں کو ملیا میٹ کیا جائے لیکن حکومت مسلسل پس وپیش سے کام لے رہی ہے۔جو حکومتی کمزوری ہے یا پھر کسی سیاسی مصلحت کا تقاضہ ہے،ریاستی ادارے کوئٹہ میں جاری شیعہ ٹارگٹ کلنگ میں برابر کے ذمہ دار ہیں،ہمیں کسی صورت گوارہ نہیں کہ بے گناہ انسانی جانوں کو سیاسی مقاصد کی بھینٹ چڑھایا جائے۔ہم وفاقی حکومت سے مطالبہ کرتے ہیں کہ بلوچستان میں ضرب عضب کی طرز کو فوجی آپریشن بلاتاخیر شروع کیا جائے جو آخری دہشت گرد کے خاتمے تک جاری رہے۔ علامہ راجہ ناصر نے شہدا کے خاندانوں سے اظہار تعزیت کرتے ہوئے شہدا کی بلندی درجات اور پسماندگان کے لیے صبر جمیل کی دعا کی ہے۔

وحدت نیوز(ملتان) مجلس وحدت مسلمین پاکستان ملتان کے سیکرٹری جنرل علامہ سید اقتدار حسین نقوی نے ملتان میں پاکستان عوامی تحریک کے زیراہتمام بدامنی، دہشتگردی، قومی اداروں کی نجکاری اور مہنگائی کے خلاف نکالی جانیوالی ریلی سے خطاب کرتے ہوئے کہا کہ عوام کے صبر کا پیمانہ لبریز ہوچکا ہے اگر حکومت نے ان دہشتگردوں کے خلاف آپریشن نہ کیا تو حکومت کی بساط لپیٹ دی جائے گی۔ اُنہوں نے مزید کہا کہ ہزاروں شہداء کے قاتلوں سے مذاکرات غیرآئینی اور غیرشرعی ہیں، پاک فوج قدم بڑھائے پوری قوم ساتھ دے گی، پاک فوج، پولیس اور ایف سی کے جوانوں کی شہادت حکومت اور مذاکرات کی حامی جماعتوں کے منہ پر طمانچہ ہے۔ علامہ اقتدارنقوی نے مزید کہا کہ ملک میں حکومت نام کی کوئی چیز نہیں، طالبان ملک میں جب اور جہاں چاہتے ہیں نہتے اور معصوم لوگوں کو لقمہ اجل بناتے ہیں حکومت اور منافق سیاستدان صرف بیانات دے رہے ہیں، اُنہوں نے کہا کہ مجلس وحدت مسلمین پاکستان میں محب وطن قوتوں کے ساتھ مل کر طالبان اور ملک دشمن قوتوں کے ساتھ فوج کے شانہ بشانہ لڑیں گے، دہشتگردوں کے خلاف آپریشن پورے ملک کی عوام کی آواز ہے۔