وحدت نیوز(لیہ) مجلس وحدت مسلمین جنوبی پنجاب کے سیکرٹری تنظیم سازی سید عدیل عباس زیدی نے کہا ہے کہ لیہ میں دریائے سندھ کے بڑھتے ہوئے کٹاو پر ضلعی انتظامیہ اور متعلقہ اداروں کی چشم پوشی مجرمانہ غفلت ہے، ہزاروں کی آبادی اس دریائی کٹاو کی وجہ سے متاثر ہورہی ہیں تاہم حکومت نے ابھی تک کوئی ایکشن نہیں لیا۔ ان خیالات کا اظہار انہوں نے ملاقات کیلئے آنے والے دریائی کٹاو سے متاثرہ ایک عوامی وفد سے گفتگو کرتے ہوئے کیا۔ ان کا کہنا تھا کہ دریائی کٹاو روز بڑھ رہا ہے لیکن انتظامیہ کی جانب سے کوئی اقدام نہیں کیا گیا، اب تک 9 یونین کونسلوں پر مشتمل ہزاروں کی آبادی اس کٹاو سے متاثر ہوئی ہے، لوگ اپن گھر بار چھوڑنے پر مجبور ہوگئے ہیں، ہزاروں ایکٹر اراضی زیر آب آچکی ہے لیکن لیہ سے تعلق رکھنے والے صوبائی وزیر نے بھی اب تک متاثرہ عوام کی داد رسی تک نہیں کی۔ انہوں نے وفد کو یقین دلایا کہ مجلس وحدت مسلمین متاثرہ عوام کو ہرگز تنہا نہیں چھوڑے گی اور اس مسئلہ پر متاثرین کے شانہ بشانہ رہے گی۔

وحدت نیوز(رحیم یار خان) مجلس وحدت مسلمین جنوبی پنجاب کے سیکرٹری تنظیم سازی سید عدیل عباس زیدی نے مہدی برحق کانفرنس کی رابطہ مہم کے سلسلہ میں ضلع رحیم یار خان کا دورہ کیا۔ اس موقع پر انہوں نے لیاقت پور، چوک بہادر پور، وائی جمن شاہ، رحیم یار خان سٹی اور تحصیل صادق آباد میں مختلف نشستوں میں خطاب اور کارکنان سے ملاقاتیں کیں۔ ان کا کہنا تھا کہ 6 اگست کا سورج ملت تشیع پاکستان کی عظمت و وحدت کی عظیم الشان علامت ثابت ہوگا۔ پورے پاکستان سے عاشقان امام مہدی عج اسلام آباد میں جمع ہوکر ثابت کریں گے پاکستان میں ملت تشیع بیدار اور اپنے حقوق کی جدوجہد کیلئے میدان میں ہے۔ ان کا کہنا تھا کہ قائد وحدت علامہ راجہ ناصر عباس جعفری نے مظلومین پاکستان کو ایک امید نئی کرن دکھائی ہے، مجلس وحدت مسلمین کی قیادت حقیقی معنوں میں مظلوموں کی ترجمانی کر رہی ہے۔ ان کا کہنا تھا کہ 6 اگست کو ملت تشیع کے ہر نوجوان، مرد،، خواتین اور بزرگ کو کسی نہ کسی طریقہ سے اس جدوجہد کا حصہ بننا ہوگا۔

وحدت نیوز(راجن پور) جام خادم حسین کو مجلس وحدت مسلمین ضلع راجن پور کا آرگنائزر منتخب کرلیا گیا ہے۔ تفصیل کے مطابق ایم ڈبلیو ایم جنوبی پنجاب کے وفد نے ضلر راجن پور کا دورہ کیا۔ وفد میں صوبائی ڈپٹی سیکرٹری جنرل غلام اصغر تقی، سیکرٹری تنظیم سازی سید عدیل عباس زیدی، سیکرٹری روابط سید علی رضا زیدی اور ڈی جی خان کے ڈپٹی سیکرٹری جنرل سید انعام حیدر زیدی شامل تھے۔ نماز جمعہ کے بعد مرکزی جامع مسجد راجن پور میں علاقہ عوام، عمائدین اور اہم شیعہ شخصیات کیساتھ صوبائی وفد کی نشست ہوئی۔ جس میں مشاورت کے بعد جام خادم حسین کو اتفاق رائے سے ضلعی آرگنائزر منتخب کیا گیا، جبکہ 6 رکنی آرگنائزنگ کمیٹی میں ان کے ہمراہ ربنواز حسین، باقر جسکانی، برادر ثقلین، بلال عباسی اور افتخار حسین ایڈووکیٹ شامل تھے۔ صوبائی سیکرٹری تنظیم سازی سید عدیل عباس زیدی نے جام خادم حسین سے حلف لیا، آرگنائزنگ کمیٹی کو ضلع بھر میں تنظیم سازی اور شہید قائد کی برسی میں بھرپور عوامی شرکت یقینی بنانے کا ٹاسک سونپا گیا۔

وحدت نیوز(لیہ) مجلس وحدت مسلمین جنوبی پنجاب کے سیکرٹری تنظیم سازی سید عدیل عباس زیدی نے سانحہ مستونگ اور پنجاب سے اب تک 4 شیعہ علمائے کرام کی بلاجواز گرفتاری کی شدید الفاظ میں مذمت کرتے ہوئے کہا ہے کہ ایک ملت تشیع پاکستان کو تکفیری دہشتگردوں کی جانب سے نشانہ بنایا جارہا ہے تو دوسری جانب پنجاب میں علمائے کرام کو حراست میں لیا جارہا ہے۔ اپنے ایک بیان میں انہوں نے کہا کہ پنجاب مسلم لیگ نون اور پنجاب حکومت اپنے اقتدار کو رخصت ہوتا دیکھ کر بوکھلاہٹ کا شکار ہوگئی ہے، جس کی وجہ سے امن اور علم کا درس دینے والوں کو گرفتار کیا جارہا ہے، ان کا کہنا تھا کہ ایک ماہ کے دوران 4 شیعہ علمائے کرام کی گرفتاریاں اس بات کا ثبوت ہیں کہ پنجاب حکومت اب انتقامی کارروائیوں پر اتر آئی ہے۔ ان کا کہنا تھا کہ مستونگ میں ایک بار پھر شیعہ ہزارہ شہریوں کے خون سے ہولی کھیلی گئی، اگر بلوچستان حکومت عوام کو تحفظ فراہم نہیں کرسکتی تو فوری طور پر مستعفی ہوجائے۔