وحدت نیوز (کراچی) مجلس وحدت مسلمین صوبہ سندھ کے سیکرٹری جنرل علامہ مقصود علی ڈومکی نے کہا ہے کہ عزاداری کے خلاف کسی بھی قسم کی سازش کا ڈٹ کر مقابلہ کیا جائے گا۔ محرم الحرام کے دوران عزاداری اور عزاداروں کو مکمل سیکورٹی کی فراہمی کے لئے تمام تر انتظامات مکمل کرائے جائے گئے۔ ان خیالات کا اظہار انہوں نے وحدت ہاو¿س کراچی میں اپنی زیر صدارت منعقدہ اجلاس سے خطاب کرتے ہوئے کیا۔ اجلاس میںمحرم الحرام کے دوران کراچی میں منعقد ہونے والے عزاداری، مجالس اور جلوسوں کے پروگرامز کو حتمی شکل دے دی گئی اور ایک عزاداری سیل بھی قائم کردیا گیا ہے، جس کے انچارج علی حسین نقوی کو نامزد کیا گیا ہے۔ اجلاس سے خطاب کرتے ہوئے علامہ مقصود علی ڈومکی نے کہا کہ اس سال کراچی میں ہونے والی تمام مجالس، عزاداری اور جلوسوں کو مکمل سیکورٹی کی فراہمی کے لئے مجلس وحدت المسلمین نے انتظامات کو حتمی شکل دے دی ہے اس کے علاوہ محرم الحرام کے دوران صفائی ستھرائی اور دیگر تمام انتطامات کو بھی مکمل کریا جائے گا۔ انہوں نے عزاداری سیل کے قیام کا اعلان کرتے ہوئے کہا کہ علی حسین نقوی کی قیادت میں بننے والے سیل میں میر تقی ظفر ،علامہ مبشر حسن میثم عابدی ،زین رضا کو بحثیت ارکان شامل کیا گیا ہے۔ یہ سیل محرم الحرام کے دوران شہر میں ہونے والی تمام مجالس، جلوس اور عزاداریوں کی سیکورٹی کے ساتھ ساتھ ان علاقوں کی صفائی اور دیگر انتطامات کو مکمل کریں گے اور درپیش مشکلات کا ازالہ کریں گے۔ انہوں نے کہا کہ عزاداری کے خلاف کسی بھی سازش کو اب اس شہر کے شیعہ اور سنی بھائی مل کر ناکام بنائیں گے ۔

  وحدت نیوز (جیکب آباد) مجلس وحدت مسلمین پاکستان ضلع جیکب آباد کے زیر اہتمام مرکزی امام بارگاہ جیکب آباد میں استقبال ماہ محرم کے حوالے عزاداری کانفرنس کا اہتمام کیا گیا۔ کانفرنس کی صدارت مجلس وحدت مسلمین صوبہ سندہ کے صوبائی سیکریٹری جنرل علامہ مقصودعلی ڈومکی نے کی۔ جبکہ کانفرنس میں ضلعی سیکریٹری جنرل مولانا سیف علی ڈومکی نے سات رکنی ضلعی عزاداری سیل کا اعلان کیا ، اور ماہ محرم کی اہمیت اور مسائل پر روشنی ڈالی۔ کانفرنس میں ضلع جیکب آباد کی ماتمی انجمنیں، بانی مجالس اور جلوسہای عزا کے منتظمین ، تعلقہ اور سٹی کے ذمہ داران شریک ہوئے۔ کانفرنس میں ابتدائی مرحلے میں ایس ایس پی جیکب آباد سرفراز نواز شیخ اور ایس پی منصور مغل خصوصی طور پر شریک ہوئے۔ کانفرنس سے خطاب کرتے ہوئے علامہ مقصودعلی ڈومکی نے کہا کہ سانحہ شب عاشور کے شہداء کو ہم کبھی نہیں بھلا سکتے جنہیں عشق اہل بیت ؑ کے جرم میں مارا گیا،ان شہداء کے خون سے انصاف نہیں کیا گیا۔ ہم اٹھائیس مظلوم شہداء کے خون کا انصاف طلب کرتے ہیں۔شہداء کے وارثوں کو انصاف نہ ملنے تک جدوجہد جاری رکھیں گے۔ انہوں نے کہا جیکب آباد، شکارپور سمیت سندہ بھر میں دھشت گردی کے اڈے، اور سہولت کار خطرے کی علامت ہیں۔ جبکہ بلوچستان کے علاقے وڈہ، مستونگ اور سریاب روڈ کے دھشت گرد سندہ ، بلوچستان کے امن کے لئے خطرہ ہیں۔ انہوں نے کہا کہ ایام عزا میں بجلی کی بندش خصوصا رات کے وقت انتہائی افسوس ناک ہے، جبکہ راستوں کی صفائی، اور جلوس کے روٹ کی لائٹنگ بھی ضروری ہے۔ ہمارے رضاکار اور اسکاؤٹس ہر سطح پر قیام امن میں معاون ہوں گے۔

وحدت نیوز(اندرون سندھ) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس کے اعلان پر جمعہ کے روزملک بھر کی طرح کراچی ،حیدر آباد ،ٹھٹہ ،سجاول ،جامشورو،ماتلی ،بدین ،ٹنڈوالہیار ،نواب شاہ ،قاضی احمد ،سکھر ،خیرپور،جیک آباد ،شکار پور ،عمر کورٹ دادو ،بھان سعیدآباد ،ھالہ ،مٹیاری، قنبرشہدادکوٹ دیگر علاقوں سمیت ملک کے مختلف شہروں میں روہنگیا مظالم کے خلاف احتجاجی مظاہرے ریلیاں نکالی جائیں گی۔میانمار میں مسلم کشی کے انسانیت سوز واقعات منظر عام پر آنے کے بعد ایم ڈبلیو ایم کی مرکزی قیادت کی طرف سے ’’تحریک حمایت مظلومین‘‘ کا اعلان کیا گیا تھا جس کا مقصد روہنگیا میں مسلم نسل کشی کے واقعات کو روکنے کے لیے عالمی مقتدر اداروں تک اپنی آواز پہچانا ہے۔اس سلسلے میں احتجاجی مظاہرے اور ریلیا ں نکالی گی۔جس کی قیادت ایم ڈبلیو ایم کے مرکزی صوبائی و ڈویژنل رہنماوں نے کی۔ریلی میں مذہبی،سیاسی اور مختلف مکاتب فکر سے تعلق رکھنے والی شخصیات و کارکنان شریک تھے احتجاجی مظاہروں سے خطاب کرتے ہوے علامہ مقصود علی ڈومکی ،علامہ دوست علی سعیدی ،علی حسین نقوی ،مولانا نشان حیدر ،مولانا نقی ،علامہ مبشر حسن ،عالم کربلائی ،شفقت لانگا ،منور علی جعفری ،اکبر شاہ حیدر زیدی ودیگر نے خطاب کرتے ہوئے کہا کہ میانمر میں جاری مسلم نسل کشی پراقوام متحدہ،او آئی سی اور عالمی قوتوں کی خاموشی انسانیت کی تضحیک اور بدترین بے حسی ہے کہ روہنگیا میں مسلمانوں کے قتل عام کا سلسلہ برمی حکومت کی سرپرستی میں گزشتہ کئی سالوں سے جاری ہے۔رواں ماہ میں انسانیت سوز مظالم نے جو شدت اختیار کی ہے اس کے تاریخ میں مثال نہیں ملتی ، زندہ خواتین ،نومولود اور کمسن بچوں کے جسمانی اعضا کاٹنے کی وڈیوز نیٹ پر موجود ہیں۔نوجوانوں کے ہاتھ پاؤں باندھ کر انہیں اذیت ناک انداز میں موت کے گھاٹ اتارا جا رہا ہے۔ روہنگیا میں مسلمانوں کی نسل کشی اور انسانیت سوز سلوک کے روح فرسا مناظر درندگی کی بدترین تاریخ رقم کر رہے ہیں۔عالمی ذرائع ابلاغ کے مطابق ہزاروں مسلمان موت کے گھاٹ اتارے جا چکے ہیں۔برما کی حکومت کی طرف سے مسلمانوں کوکسی قسم کا تحفظ دینے کی بجائے قتل عام میں ملوث مذموم عناصر کی حوصلہ افزائی بڑھتے ہوئے انسانیت سوز واقعات کی بنیادی وجہ ہے۔یورپ کے کسی ملک میں دہشت گردی کے عام سے واقعہ کے بعد پوری دنیا کے امن کو تہس نہس کر دیا جاتا ہے۔ملالہ پرگولی چلنے کے درد سے اقوام عالم کے سینے میں ٹھیسیں اٹھنے لگتی ہیں مگر افسوس میانمر میں ہزاروں مسلمانوں کا خاک و خون میں تڑپنا کسی کو دکھائی نہیں دے رہا۔ سامراجی طاقتوں کی یہ دانستہ چشم پوشی امت مسلمہ سے متعصبانہ رویے کا برملا اظہار اور قابل مذمت ہے۔اس مسئلہ پر مسلم ممالک کی طرف سے جس غیر سنجیدگی کا مظاہرہ دیکھنے میں آیا رہا ہے وہ بھی انتہائی افسوسناک ہے۔ برمی سفارت کار کو طلب کر کے محض سرزنش کرنے کو بھی غیر ضروری سمجھاجا رہا ہے۔ امت مسلمہ کے مفادات کے تحفظ کے لیے تشکیل دیے جانے والے اسلامک ملٹری الائنس نے برما کے مسئلہ پر منہ اور آنکھوں پر پٹی باندھ رکھی ہے۔کیا مسلمانوں کے انتالیس ممالک مل کر بھی ان مٹھی بھر اسلام دشمنوں کو ان کے غیر انسانی اقدام سے باز رکھنے کی جرات نہیں رکھتے۔اگر اس اتحاد کا مقصد سعودی حکمرانوں کے مفادات کا تحفظ ہے تو پھر اس کا نام اسلامی فوجی اتحاد کی بجائے اپنے مقصد سے ہم آہنگ ہونا چاہیے۔اقوام متحدہ،انسانی حقوق کی عالمی تنظیمیں اور مسلمانوں کے حقوق کے ٹھکیدار ممالک کی طرف سے روہنگی مسلمانوں کے مسائل سے عدم دلچسپی کا اظہار اس امر کا عکاس ہے کہ ان ممالک کے اہداف اور مقاصد مختلف ہیں۔

 

وحدت نیوز (شکار پور) مجلس وحدت مسلمین پاکستان صوبہ سندہ کے صوبائی سیکریٹری جنرل علامہ مقصودعلی ڈومکی نے ڈکھن پریس کلب میں پریس کانفرنس سے خطاب کرتے ہوئے کہا ہے کہ ماہ محرم الحرام سے قبل دہشت گردی کے مراکز اور سہولت کاروں کے خلاف ملک گیر آپریشن ضروری ہے، بلوچستان کے علاقے وڈہ، مستونگ، سریاب روڈ اور مچھ میں موجود دہشت گردی کے ٹریننگ کیمپس سندھ اور بلوچستان کے امن کے لئے مستقل خطرہ ہیں۔ سندھ بلوچستان بارڈر کی سیکورٹی سخت کی جائے اور دھشت گرد نیٹ ورک کا قلع قمع کیا جائے۔ انہوں نے کہا کہ بعض لوگوں کی نظر میں پیاسوں کو سبیل پلانا جرم ہے جبکہ بم دھماکے جرم نہیں۔ انتظامیہ میں موجود کالی بھیڑیں محرم آتے ہی فروغ عزاداری کے خوف میں مبتلا ہوکر نئی مجالس، جلوس اور سبیلوں پر پابندی اور رکاوٹیں ڈالی جاتی ہیں۔ جبکہ رکاوٹوں کے باوجود ذکر حسین اور عزاداری کے فروغ سے دشمن حیران ہے۔ انہوں نے کہا کہ چھلگری، جیکب آباد ،شکارپورسمیت ملک بھر میں عزاداری کے پر جتنے دھشت گردانہ حملے ہوئے ان کے مجرموں کو سزا نہیں ملی۔ انہوں نے کہا کہ برما کے مسلمانوں پر جاری مظالم کا مستقل سد باب ضروری ہے، اور اس قتل عام کے مجرموں کا محاسبہ بھی از حد لازم ہے۔حقوق انسانی کے نام نہاد دعویداروں کوفلسطین، کشمیر، یمن اور برما میں معصوم انسانوں کا بہتا ہوا لہو نظر نہیں آرہا ۔ انہوں نے کہا کہ مجلس وحدت مسلمین مظلوموں کی حامی جماعت ہے، جس نے ہمیشہ ظلم و بربریت اور دھشت گردی کے خلاف آواز بلند کی ہے۔ہمارا مطالبہ ہے کہ برما اور یمن کے مظلوموں کو امن اور انصاف ملنا چاہئے۔