وحدت نیوز(جیکب آباد)مجلس وحدت مسلمین پاکستان کے مرکزی ترجمان مقصود علی ڈومکی نے ڈی سی چوک جیکب آباد پر میلاد مصطفیؐ ریلی سے خطاب کرتے ہوئے کہا ہے کہ حضرت سید الانبیاء سے عشق اور محبت ہمارے ایمان کا حصہ ہے عید میلاد النبی کے موقع پر شیعہ سنی مسلمانوں نے مل کر اتحاد بین المسلمین کا عملی ثبوت دیا ہے۔ فرانسیسی صدر نے سید لولاک کی شان میں جو گستاخی کی ہے وہ ناقابل معافی جرم ہے انبیائے الہی کی توہین مجرمانہ فعل ہے فرانسیسی مصنوعات کا بائیکاٹ کر کے کے امت مسلمہ گستاخ رسول سے اپنی نفرت کا اظہار کر رہی ہے۔
انہوں نے کہا کہ قرآن کریم نے مسلمانوں کو وحدت کا درس دیا ہے اور تفرقے سے روکا ہے اسی لئے رہبر کبیر حضرت امام خمینی رحمت اللہ علیہ کے فرمان کے مطابق ہم ہفتہ وحدت منا رہے ہیں شیعہ سنی دیوبندی بریلوی سب آپس میں بھائی بھائی ہیں جو صدیوں سے آپس میں اسلامی اخوت اور بھائی چارے کے رشتے سے منسلک ہیں۔
اس موقع پر عید میلاد النبیؐ کی ریلی میں سید فضل عباس شاہ بخاری علامہ حاجی سیف علی ڈومکی سید لعل شاہ بخاری سید غلام شبیر شاہ نقوی مجلس وحدت مسلمین کے ضلعی رہنما نذیر حسین جعفری رجب علی حسن رضا لطف علی لاشاری مولانا منور حسین ساجدی مولانا ارشاد علی سولنگی و دیگر شریک ہوئے۔