وحدت نیوز(کراچی) مجلس وحدت مسلمین سندھ کے صوبائی سیکرٹری جنرل علامہ باقر عباس زیدی نے پریس کانفرنس سے خطاب کرتے ہوئے کہا ہے کہ وفاقی حکومت انتظامی معاملات میں بالکل ناکام ہو چکی ہے۔ ریاستی اداروں میں ہم آہنگی کا فقدان ہے۔10 روز قبل صوبہ سندھ سمیت ملک کے دیگر شہروں میں جلوس عزا کے روٹس پلان علاقائی انتظامیہ اور عزاداران کے درمیان طے پایا۔ میڈیا اور جلوس پرمٹ ہولڈرز کو انتظامات کیلئے گاڑیوں کے پرمٹ  اور ایس او پیز کے تحت انتظامات کرنے کے سرکاری لیٹر بھی جاری ہوئے۔یوم علی سے تین روز قبل یک دم کرونا وبا کو جواز بنا کر جلوسوں پر پابندی لگانا مضحکہ خیز ہے۔

ان کا کہنا تھا کہ عزاداری کے حوالے سے شیعہ قوم اپنے اصولی موقف سے ایک قدم بھی پیچھے نہیں ہٹے گی۔ کوئی بھی مذہب و مسلک کسی کواپنی عبادت پر پابندی کی اجازت نہیں دے سکتا۔ ماضی میں دہشت گردی کے ذریعے ہمارے جلوس و مجالس کو روکنے کی کوشش کی گئی۔ ملت تشیع کے ہزاروں افراد کو شہید کرنے کے باوجود عزاداری میں کمی نہیں آئی۔ جور یاستی ادارے اپنے احکامات کے ذریعے عزاداری پر پابندی لگانا چاہتے ہیں وہ حقائق سے بے خبر ہیں۔اگر حکومت اپنے ضمنی الیکشن کی مہم چلا سکتی ہے،انتخابات ہو سکتے ہیں،بازاروں میں بے ہنگم ہجوم ہو سکتاہے تو جلوس کیوں نہیں ہو سکتے۔

علامہ باقرعباس زیدی نے کہا کہ ملت جعفریہ ایک مہذب قوم ہے۔ہمارے مراجع کرام اور علمائے و اکابرین نے اس وباسے نبرد آزما ہونے کے لیے پوری قوم کو حد درجہ محتاط رہنے کی تاکید کر رکھی ہے۔ یوم علی علیہ السلام کی مناسبت سے ہونے والے عزاداری کے پروگراموں میں حکومتی ایس اور پیز پر مکمل طور پر عمل کرنا ہمارا اولین فریضہ ہے۔ ملک کے آئین و قانون کی بالادستی کو ہم مقدم سمجھتے ہیں۔ مجالس و جلوس میں بھی ایس او پیز پر عمل درآمد کو اپنی قانونی، اخلاقی اور شرعی ذمہ داری سمجھ کر ادا کی جائے گی۔

انہوں نے کہا کہ سندھ کے کچھ اضلاع میں انتظامیہ کی جانب سے جلوس عزا کے انعقاد ہر پابندی اور بانیان جلوس کو جلوس عزا نہ نکالنے کیلئے دھمکایا جارہا ہے۔جلوس عزا پر پابندی کے تمام احکامات کی مذمت کرتے ہیں یوم علی علیہ السلام کا جلوس اپنے روایتی انداز سے حسب سابق تمام روٹس پر نکلے گا۔انہوں نے کہا تحریک انصاف کی حکومت نے عوام کو سخت مایوس کیا ہے۔ آئندہ انتخابات میں تحریک انصاف کو عوام مکمل طور پر مسترد کریں گے۔

انہوں نے مزید کہا کہ یوم القدس قریب آ رہا ہے۔ اس موقع پر دنیا بھر کے باشعور افراد فلسطینی عوام سے اظہار یکجہتی کے لیے سڑکوں پر نکلتے ہیں۔24رمضان البارک کو دنیا بھر کی طرح ملک میں عالمی یوم القدس منایا جائے گا۔ حکومت کو چاہئے کہ وہ یوم علی ؑو یوم القدس کے جلوسوں کو سیکورٹی فراہم کرے۔کانفرنس میں علامہ صادق جعفری،علامہ علی انور جعفری،میر تقی ظفر،ناصر الحسینی سمیت دیگر موجود تھے۔