وحدت نیوز(سکھر) مجلس وحدت مسلمین صوبہ سندھ کی صوبائی شوریٰ کا اجلاس سکھر کے مقامی ہوٹل میں منعقد کیا گیا جس میں سندھ کے اضلاع اور صوبائی کابینہ نے شرکت کی۔تفصیلات کے مطابق مجلس وحدت مسلمین صوبہ سندھ کی صوبائی شوریٰ کا اجلاس علامہ باقر عباس زیدی کی سربراہی میں سکھر کے مقامی ہوٹل میں منعقدکیا گیا جس میں سندھ کے اضلاع اور صوبائی کابینہ نے شرکت کی۔
اجلاس میں محرم الحرام کی آمد سے قبل عزاداری سیل کا قیام عمل میں لایا گیا جس کی سربراہی آغا ندیم جعفری کریں گے۔ عزاداری سیل محرم الحرام میں سندھ بھر میں پیش آنے والے مسائل کو حل کرنے میں اپنا کردار ادا کرے گا۔اجلاس میں صوبائی کابینہ و ضلعی ذمہ داران نے اپنی کارکردگی رپورٹ پیش کی اور اگلے تین ماہ کیلئےپروگرامات کی منظوری بھی لی گئی۔
صوبائی شوریٰ اجلاس میں علی حسین نقوی کی بطور صوبائی سیکریٹری سیاسیات اور صابر کربلائی کی بطور ڈپٹی سیکریٹری جنرل منظوری بھی لی گئی۔اجلاس میں فیصلہ کیا گیا کہ سندھ بھر میں تنظیم سازی کے عمل میں تیزی لائی جائے گی اور اس حوالے سے تمام ضروری اقدامات اٹھائے جائیں گے۔
