وحدت نیوز (پشاور) مجلس وحدت مسلمین خیبر پختونخوا کے صوبائی سیکرٹری جنرل علامہ سید سبطین حسینی نے شہدائے بنگش و اورکزئی کانفرنس سے خطاب کرتے ہوئے کہا ہے کہ ملک سے زیادہ بیرون ملک سرمایہ رکھنے والے حکمران وطن عزیز اور اس میں رہنے والے مہذب و مکرم شیعیان علی ابن ابیطالب کا دفاع کیسے کر سکتے ہیں۔ آج کا یہ پروگرام سالہا سال گزرنے کے باوجود شہداء کی یہ عظیم یاد اس بات کا واضح ثبوت ہے کہ ہم اپنے شہداء کو نہیں بھولے، ان کی یاد کو نہیں بھولے، ان کے مشن کو نہیں بھولے، ان کی عظیم قربانیوں کو نہیں بھولے، عصر حاضر کا تقاضا ہے کہ وطن عزیز کا دفاع اور شیعیان علی ابن ابیطالب کی حفاظت ہم خود کریں۔ ان حکمرانوں کے آقاوں کو شریکۃ الحسین (س) نے دربار شام میں فرمایا تھا کہ میں ان لوگوں سے خیر کی کیا توقع رکھوں جن کے ابدان کا گوشت شہداء کے خون سے بنا ہے۔ تو اس ملک عزیز کا اربوں روپیہ ہڑپ کرنے والے نااہل حکمرانوں سے خیر کی توقع کیسے کی جاسکتی ہے۔