وحدت نیوز(پشاور)مجلس وحدت مسلمین خیبر پختونخوا کے آرگنائزر علامہ سید سبطین حسینی نے بجلی قیمتوں میں ایک مرتبہ پھر اضافہ کو عوام دشمنی قرار دیتے ہوئے کہا ہے کہ نواز حکومت عوام کش پالیسیاں ترک کرے، بصورت دیگر مہنگائی کے ستائے عوام کے صبر کا پیمانہ لبریز ہوسکتا ہے۔ جاری کردہ ایک بیان میں انہوں نے کہا کہ حکومت نے بجلی اور پٹرولیم مصنوعات کی قیمتوں میں اضافہ کرنا معمول بنالیا ہے۔ جبکہ آئے روز اشیائے خوردو نوش سمیت ضروریات زندگی کی تمام اشیا کے نرخ بڑھائے جارہے ہیں، اور کوئی پوچھنے والا نہیں۔ ان کا کہنا تھا کہ ملک میں غریب طبقہ روز بروز غریب تر ہورہا ہے جبکہ جاگیردار اور سرمایہ داروں سمیت حکمرانوں کی تجوریاں بھر رہی ہیں۔ حکومت نے الیکشن سے قبل عوام سے کئے تمام وعدے نہ صرف بھلا دیئے ہیں، بلکہ ایسا لگتا ہے کہ ملک کو آئی ایم ایف اور ورلڈ بنک کے پاس گروی رکھ کر عوام دشمنی پر مبنی پالیسیاں ترتیب دے لی ہیں۔ ان کا کہنا تھا کہ ملک کو آئی ایم ایف اور عالمی بنک کے قرضوں سے آزاد کرانا ہوگا اور روپے کی قدر میں اضافہ سمیت مہنگائی پر قابو پانے کیلئے قلیل مدتی اور طویل مدتی پالیسیاں بنانا ہوں گی بصورت دیگر عوام کے صبر کا پیمانہ لبریز ہوکر حکمرانوں کیلئے مسائل پیدا کرسکتا ہے۔