وحدت نیوز(کوئٹہ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں ایم ڈبلیوایم کے ڈویژنل سیکریٹری جنرل سید عباس علی نے کہا ہے کہ عوام کے لیے کمپیوٹرائزڈ شناختی کارڈ اور پاسپورٹ کے حصول کو آسان اور یقینی بنایا جائے۔عوام صبح سے لیکر شام تک نادرا اور پاسپورٹ آفس کا چکر لگاتے ہوئے تھک چکے ہیں۔ لیکن نادرا اور پاسپورٹ آفس کے عملے کو عوام کے تکالیف کا کوئی احساس نہیں ہے۔ بلوچستان کے عوام کے لیے نادرا کے قوانین ملک کے دیگر صوبوں اور شہروں سے الگ ہے۔ عوام کے لیے الگ شرائط رکھی گئی ہے اور اس طرح نادرا کے حکام ہزاروں کی تعداد میں شناختی بلاک کرکے رشوت خوری کے ذریعے عوام کو لوٹ رہے ہیں۔ بھاری رشوت کے عوض نوے فیصد بلاک شناختی کارڈ کو کلیر کیا جاتا ہے۔ نادرا کو ہرگز یہ حق حاصل نہیں ہے کہ وہ ملک میں کمپیوٹرائزڈ شناختی کارڈ کے حصول کے لیے مروجہ قانون کے برخلاف بلوچستان کے عوام کے لیے امتیازی اورخود ساختہ شرائط و قوانین مسلط کرے اور اس کے ذریعے عوام کو شناختی کارڈ اورملک کے بنیادی حق سے محروم کرے۔ بیان میں مزید کہا گیا ہے کہ نادرا اور پاسپورٹ آفس میں عوام کے ساتھ ناروا سلوک بلخصوص ہزارہ قوم کے ساتھ توہین امیز رویے کی شدید مذمت کرتے ہیں۔ صوبائی حکومت اور محکمہ داخلہ بلوچستان وفاقی محکمہ داخلہ سے بات چیت کرکے اس سنگین مسئلے کو حل کریں۔ تاکہ بلوچستان کے عوام سکھ کا سانس لے سکے۔