وحدت نیوز(کوئٹہ)مجلس وحدت مسلمین بلوچستان کی جانب سے طلباء میں مطالعہ کے فروغ کے لئے کتاب خوانی مقابلے کا اعلان کیا گیا ہے۔ اس حوالے سے ایم ڈبلیو ایم بلوچستان کے میڈیا سیل انچارج کا کہنا ہے کہ ایم ڈبلیو ایم بلوچستان کے شعبہ تربیت کی جانب پہلے کتاب خوانی کے مقابلے کی کامیابی کے بعد اسی سلسلے کی دوئم مقابلہ کتاب خوانی کا انعقاد کیا جارہا ہے۔ جس میں گرانقدر کتاب "ڈھائی سو سالہ انسان" کا انتخاب کیا گیا ہے۔ انہوں نے کہا کہ اس کتاب میں حکومت اسلامی کے قیام کے لئے آئمہ طاہرین (ع) کی سیاسی جدوجہد کا ذکر کیا گیا ہے۔ مقابلے کی تیاری کے لئے قاریئن کو کتاب کی ہارڈ کاپی مہیا کی جائے گی، جبکہ مقابلے میں کامیاب ہونے والے ٹاپ تین قارئین کو قیمتی انعامات اور باقی شرکت کنندگان کو بھی تحائف سے نوازا جائے گا۔ انہوں نے بتایا کہ مقابلے کے اعلان کے بعد رجسٹریشن کا سلسلہ جاری ہے۔