وحدت نیوز(بلتستان) ذکر وفکر بغیرعزم و قیام و جذبہ شہادت کے طفلی تسلی اورعملا تحریف حقیقت کربلا ہے۔ زمانہ مادیت اور خود خواہی کے جس شیطانی دلدل میں گرفتار ہے اس دلدل سے نکالنا ہی مقصد پیغام کربلا ہے۔ ان خیالات کا اظہار مجلس وحدت مسلمین پاکستان صوبہ گلگت بلتستان کے ڈپٹی سیکرٹری جنرل حجتہ الاسلام آغا مظاہر حسین الموسوی نے حسین آبا د کے مرکزی امام بارگاہ میں مجلس عزاء سے خطاب کرتے ہوئے کیا۔ انہوں نے کہاکہ اگر قیام اور جذبہ شہادت نہ ہوتو ذکر و فکر کربلا عملا تحریف کربلا ہے۔ ذکر و فکر اسلام خانقاہی ہے ۔ اقبال کی فکر پر عمل کرتے ہوئے خانقاہوں سے نکل کر رسم شبیری ادا کرنے کا وقت آچکا ہے۔ یزیدت سے مقابلہ کا وقت آچکاہے۔ انہوں نے کہا کہ قیام کربلا اور پیغام کربلا ہی یہی ہے کہ انسان مادیت کی دنیا سے نکل کر ، خود خواہی کے شیطانی دلدل سے نکل کر خدا کی مرضی کے مطابق زندگی کی جہتیں متعین کریں اوراپنی توانائیاں صرف کریں۔ بصورت دیگر ظاہری اورسرسری ذکر وفکر بنا عمل کے تحریف حقیقت کربلاہے۔