وحدت نیوز(سکردو) مجلس وحدت مسلمین بلتستان کے ترجمان وزیر غلام محمد کلیم نے اپنے اخباری بیان میں کہا کہ گلگت بلتستان تمام تر محرومیوں کے باوجود ابتک ملک کیساتھ وفادار اور جغرافیائی و نظریاتی سرحدوں کی حفاظت میں ہر اول دستے کا کردار ادا کرتے رہے مگر ہمیں نظر انداز کیا جاتا رہا۔ مزید محرومی نئی نسل اور نوجوانوں کو ملک سے متنفر کرنے کا سبب بنے گا جس کے ذمہ دار فیصلہ ساز ادارے، اور وفاقی حکومت اور بڑی جماعتوں کے رہنما ہونگے۔ ضرورت اس امر کی ہے کہ مزید طفل تسلیوں کے ذریعے بہلانے کی کوشش کرنے کی بجائے دیگر صوبوں کے برابر ہر پلیٹ فارم ، قانون ساز و فیصلہ ساز اور مالیاتی اداروں میں شامل کرتے ہوئے مکمل شہری حقوق فراہم کئے جائیں۔

ترجمان ایم ڈبلیو ایم نے علاقہ گلگت بلتستان میں جاری غیر انسانی و غیر آئینی اقدامات کو روکے جائیں، زمینوں پر جبری قبضے، پرامن محب وطن شہریوں پر دہشت گردی کے قوانین کا نفاذ اور عوامی استحصال کا مکمل خاتمہ اور عوام پر اعتماد کی فضا قائم کرنا ضروری ہے۔

انہوں نے مزید کہا کہ شاہراہ بلتستان پر ابتدائی نقشے میں موجود ٹنلز اور نقشے کے مطابق کام کروانا ضروری ہے۔ بصورت دیگر عوام بھرپور احتجاجی تحریک چلانے میں حق بجانب ہیں۔ وہ تمام سیاستدان بالخصوص سابق حکمران جماعت کے رہنما جو سکردو روڈ کے نقشے میں تبدیلی جیسے اہم معاملے میں خاموش تماشائی بنے رہے وہ اس وقت سیاسی پوائنٹ سکورنگ کیلئے جھوٹ پر جھوٹ بول رہے ہیں، مگر عوام انکی مجرمانہ خاموشی کو بخوبی سمجھتے ہیں۔