وحدت نیوز(کھرمنگ) رکن گلگت بلتستان اسمبلی و سکریٹری جنرل مجلس وحدت مسلمین کھرمنگ شیخ اکبر رجائی نےسماجی تنظیم شاربہ فاؤنڈیشن رجسٹرڈ کی مرکزی کابینہ سے انکے عہدوں کا حلف لیا۔ پروقار تقریب حلف برداری میں شاربہ فاؤنڈیشن کی جانب سے رکن اسمبلی و متحرک سیاسی و سماجی شخصیت شیخ اکبر رجائی کو بطور مہمان خصوصی مدعو کیا گیا تھا۔
علاقے کے چیدہ چیدہ علمائے کرام اور سماجی شخصیات کی موجودگی میں تقریب سے خطاب کرتے ہوئے شیخ اکبر رجائی نے منتخب عہدیداران کو مبارکبادی عرض کی اور انکے لیے خلوص و دلجمعی کیساتھ اس سماجی فلاحی تنظیم کو آگے بڑھانے کیلئے عرائض پیش کئے اور نیک خواہشات کا اظہار کیا۔
رکن اسمبلی نے اس دوران تنظیم کے اغراض و مقاصد کو پورا کرتے ہوئے علاقے میں اسکی سرگرمیوں کو آگے بڑھانے کیلئے ہر ممکن تعاون کی یقین دہائی کرائی۔ انہوں نے اپنے خیالات کا اظہار کرتے ہوئے کہا کہ شاربہ فاؤنڈیشن کو کھرمنگ کی سماجی و فلاحی کاموں کے حوالے سے ایک منفرد مقام حاصل ہے جو کہ دیگر علاقوں کی تنظیموں کیلئے بھی مشعل راہ کی حیثیت رکھتی ہے۔