وحدت نیوز(گلگت)چیئرمین قائمہ کمیٹی گلگت بلتستان کونسل ایوب شاہ،چئیرمین پبلک اکاؤنٹس کمیٹی جی بی کونسل اقبال نصیر اور دیگر ممبران کونسل شیخ احمد علی نوری ،سید شبیہ الحسنین ،عبد الرحمن اور حشمت اللہ نے اپنے ایک بیان میں کہا کہ پاکستان ائیر فورس کے شاہینوں کو بھارتی ائیر فورس کی طرف سے کی جانے والی جارحیت کے مذموم منصوبے کو فوراً ناکام بنانے پر خراج تحسین پیش کرتے ہیں۔پاک فضائیہ کے بہادر جوانوں نے اپنی بہادری سے دشمن کے ناپاک عزائم کو خاک میں ملا دیا۔ ‏پاکستانی ایئر فورس کے شاہینوں کو سلام پیش کرتے ہیں جنہوں نے مودی سرکار کی فاشسٹ ہندوتوا سوچ، جنگی جنونیت اور خطے میں اپنی بدمعاشی قائم کرنے کا منہ توڑ جواب دیا اور بھارتی جارحیت ناکام بنا کر پاک سر زمین کی حفاظت یقینی بنائی، پاکستان ایئر فورس کے شاہینوں نے کبھی بھی پاکستانی عوام  کو مایوس نہیں کیا ہے، پوری پاکستانی قوم اپنے ایئر فورس کے نوجوانوں کو سلام پیش کرتی ہے، وطن کے لیے لڑتے ہر سپاہی اور شہری کے لیے دعا گو  ہیں۔