وحدت نیوز(اسلام آباد) مجلس وحدت مسلمین پاکستان کے سربراہ سینیٹر علامہ راجہ ناصر عباس جعفری نے اپنے ایک مذمتی بیان میںکہا کہ تحریک تحفظ آئین پاکستان کے زیر اہتمام اسلام آباد لیجنڈ ہوٹل میں منعقدہ قومی کانفرنس کو حکومتی دباؤ اور ہینڈلرز کی مداخلت کے باعث منسوخ کروانا جمہوری اقدار اور آئین پاکستان کی کھلی خلاف ورزی ہے۔ یہ عمل ملک میں جاری غیر اعلانیہ مارشل لاء، جمہوری حقوق کی پامالی، اور آزادی اظہار پر قدغن کا واضح ثبوت ہے۔
ریاستی جبر کے ذریعے عوام کی آواز کو دبانے، چادر و چار دیواری کی حرمت کو پامال کرنے اور خوف و ہراس پھیلانے کی ہر کوشش ناکام ہوگی۔ پاکستان میں اس وقت جنگل کا قانون نافذ کیا جا رہا ہے، لیکن تحریک تحفظ آئین پاکستان کے قائدین نے یہ واضح کیا ہے کہ یہ قومی کانفرنس ہر حال میں منعقد ہو گی، چاہے ہمیں سڑکوں پر ہی کیوں نہ کرنا پڑے۔طاقت کے نشے میں مست عناصر ملکی صورتحال کی سنگینی کا ادراک کریں، ورنہ تاریخ ان کے ان جابرانہ اقدامات کو کبھی معاف نہیں کرے گی۔