وحدت نیوز (لاہور) مجلس وحدت مسلمین کے مرکزی رہنما علامہ سید مبارک علی موسوی نے شب شہادت مولائے کائنات (ع) کی مناسبت سے منعقدہ مجلس سے خطاب کرتے ہوئے کہا کہ شب بیداری کے ساتھ ساتھ اب وقت اس بات کا متقاضی ہے کہ ہم اپنی بیداری کا بھی ثبوت دیں، جس دور میں آج ہم زندگی گزار رہے ہیں واقعاً یہ ظہور امام زمانہ کا دور ہے، سفیانیوں کا خروج اپنی آنکھوں سے دیکھنے کے بعد ہم غافل رہیں تو ناصرین امام (ع) کے صفوں سے ہم دور ہو جائیں گے۔ انہوں نے کہا کہ قوم کو بیدار ہو کر باہر نکلنا ہوگا، اپنی قیادت کے حکم پر لبیک کہنا ہوگا، میرے مولا کا فرمان ہے کہ ایسی قوم بنو جب پکارا جائے تیار نظر آؤ۔
انہوں نے کہا کہ شب ہائے قدر میں قرآن کو سروں پر رکھنے کی بجائے قرآن کو سینے میں اْتاریں، تاکہ حقیقی معنوں میں قرآن سے ہمارے قلوب روشن ہوں۔ انہوں نے یوم علی (ع) پر مومنین سے اپیل کی کہ وہ جلوس ہائے عزا میں بھرپور شرکت کرکے دشمن اسلام کے مذموم عزائم خاک میں ملا دیں۔ انہوں نے کہا کہ دشمن کی یہ سازش ہے کہ وہ دہشت گردی کے واقعات سے ہماری قوم کو ڈراتا ہے۔ دشمن خبریں چلواتا ہے کہ یوم علی (ع) پر دہشت گردی کا امکان ہے، اتنے دہشت گرد لاہور میں داخل ہوگئے، وغیرہ، یہ دشمن کے ہتھکنڈے ہیں کہ لوگ ڈر جائیں اور جلوس میں نہ جائیں، لیکن ایسا نہیں ہم کربلا کے ماننے والے ہیں، ہم موت سے نہیں ڈرتے بلکہ موت تو ہمارے لئے شہد سے زیادہ شیریں ہے۔
