وحدت نیوز (گلگت) دہشت گردوں کی بزدلانہ کاروائیاں پاکستانی عوام کے عزم و استقلال کو متزلزل نہیں کرسکتے، راولپنڈی امام بارگاہ میں عید میلاد پر حملہ خدا اور نبی خاتم المرسلین سے اعلان جنگ ہے۔دہشت گردوں کا قلع قمع کرنے میں پاک فوج کے شانہ بشانہ کھڑے ہیں۔ کراچی میں اہل تشیع کی ٹارگٹ کلنگ سندھ حکومت کی ناکامی کا ثبوت ہے۔دہشت گردی کے قوی امکانات کی موجودگی کے محفل میلاد کو فول پروف سیکورٹی فراہم نہ کرنا حکومت پنجاب کی مجرمانہ غفلت ہے۔
ان خیالات کا اظہار مجلس وحدت مسلمین گلگت بلتستان کے سیکرٹری جنرل شیخ نیئرعباس مصطفوی ، صوبائی کابینہ کے اراکین غلام عباس، سعید الحسنین، الیاس صدیقی ودیگرنے اپنے ایک مشترکہ بیان میں کیا ہے۔ انہوں نے کہا کہ مظلوم پاکستانی عوام دہشت گردوں کے رحم و کرم پر ہیں اور حکومت اقتدار کو بچانے کیلئے دہشت گردوں سے سودے بازی کے خواب دیکھ رہے ہیں۔ ملک سے دہشت گردی کے خاتمے کیلئے ضروری ہے کہ دہشت گردوں کو ٹھکانے لگانے کے ساتھ ساتھ ان کے سپورٹر ز کو تختہ دار تک پہنچانا چاہئے ورنہ دہشت گردی کا خاتمہ ممکن نہیں۔انہوں نے کہا کہ دہشت گردوں کی کھلے عام حمایت کرنے والوں سے ہمدردی جتانے کی بجائے ان کے خلاف موثر کاروائی عمل میں لائی جائے۔ حکومت پنجاب کی مجرمانہ غفلت کے باعث بیشتر شہروں کے عوام دہشت گردوں کے نشانے پر ہیں،نااہل اور بددیانت آفیسرز کو معطل کرکے ان کی جگہ دیانت دار آفیسروں کی تعیناتی عمل میں لاکر دہشت گردوں کا گھیرا تنگ کیا جاسکتا ہے۔ انہوں نے مزید کہا کہ ملت تشیع دہشت گردوں کے بزدلانہ کاروائیوں سے کبھی خوفزدہ نہیں ہوگی۔ انہوں گلگت انتظامیہ کو متنبہ کیا کہ دہشت گردی کی افواہیں پھیلانے کی بجائے دہشت گردی کے راستوں کو مسدود کرکے علاقے کے عوام کے تحفظ کو یقینی بنانے کیلئے موثر اقدامات کئے جائیں۔
