وحدت نیوز (گلگت) گلگت بلتستان جیسے ہارڈ ایریا میں کام کرنے والے ڈاکٹرز کے جائز مطالبات کو ترجیحی بنیادوں پر پورا کرکے علاقے کے پریشان حال عوام پر رحم کیا جائے۔ حکومت گلگت بلتستان کی طرف سے ڈاکٹرز کے ہڑتال کا نوٹس نہ لینا اور ان کے جائز مطالبات کو تسلیم نہ کرنا اس علاقے کے عوام کے ساتھ انتہائی زیادتی ہے۔ موجودہ حکومت اپنی عیاشیوں پر تو اربوں روپے خرچ کررہی ہے لیکن عوام کے بنیادی مسائل کی طرف کوئی توجہ نہیں دے رہی ہے۔بیورکریٹس پہلے سے ہی 80 فیصد الاؤنسز سے لطف اندوز ہیں جبکہ مقامی ملازمین خاص کر قیمتی انسانوں کی زندگی کو بچانے والوں کو جائز مراعات سے محروم رکھنا سمجھ سے بالاتر ہے۔ان خیالات کا اظہار مجلس وحدت مسلمین پاکستان گلگت بلتستان کے سیکرٹری جنرل علامہ نیئرعباس مصطفوی نے ڈسٹرکٹ ہیڈ کوارٹر ہسپتال میں ہڑتال پر بیٹھے ہوئے ڈاکٹروں سے ملاقات کے دوران کیا۔

انہوں نے مزید کہا کہ گلگت بلتستان میں ڈاکٹرز کو مراعات نہ ملنے کی وجہ سے اپنی تعلیم مکمل کرنے والے ڈاکٹرز اس علاقے میں اپنی خدمات سرانجام دینے سے کترارہے ہیں۔ بیشتر قابل اور ہونہار ڈاکٹرز مراعات کی عدم فراہمی کی وجہ سے علاقہ چھوڑ چکے ہیں۔انہوں نے حکومت سے مطالبہ کیا کہ گلگت بلتستان کے غریب عوام پر رحم کرتے ہوئے ڈاکٹرز اور پیرامیڈیکل سٹاف کے مسائل فوری طور پر حل کئے جائیں۔

وحدت نیوز(آزاد جموں و کشمیر) مجلس وحدت مسلمین ضلع باغ کے زیر اہتمام عظیم الشان سیرت النبی کانفرنس 29ربیع الاول 31جنوری کو مقامی ہوٹل میں منعقد ہوگی ،کانفرنس کے انعقاد کے سلسلہ میں انتظامات اورروابط کا آغاز کر دیا گیا ہے کانفرنس کی صدارت ریاستی سیکریٹری جنرل مجلس وحدت مسلمین آزادجموں وکشمیر علامہ سید تصور حسین نقوی الجوادی کریں گے جب کہ کانفرنس کے مہمان خصوصی سیکریٹری جنرل مجلس وحدت مسلمین پاکستان علامہ راجہ ناصرعباس جعفری ہوں گے،جب کہ ڈپٹی سیکریٹری جنرل علامہ محمد امین شہیدی خصوصی شرکت وخطاب فرمائیں گے جبکہ اس سلسلہ میں ضلع بھر کی مذہبی سیاسی اور سماجی شخصیات کو دعوت دینے کا سلسلہ شروع کر دیا گیا ہے ان خیالات کا اظہار ضلعی سیکرٹری جنرل مجلس وحدت مسلمین ضلع باغ سید عبادت حسین کاظمی نے میڈیا کے نمائندگان سے گفتگو کرتے ہوئے کیا ۔

انہوں نے کہا کہ ریاستی ومرکزی قائدین کی ہدایت کے مطابق اتحاد بین المسلمین کی کوششوں کو عملی جامہ پہنانے کے لئے یہ کانفرنس اہم سنگ میل ثابت ہوگی جبکہ اسی ضمن میں 17 ربیع الاول کو مسجد وامام بارگاہ امام الصادق ؑ نمب سیداں میں بھی جشن میلاد مصطفی ؐ کا انعقاد کیا جا رہا ہے جس سے مجلس وحدت مسلمین آزادکشمیر کے رہنما علامہ سید یاسر عباس سبزواری خطاب کریں گے ،سید عباد ت کاظمی نے کہا کہ 21ربیع الاول کو مظفرآباد میں منعقدہ مرکزی سیرت ومیلاد کانفرنس میں ضلع باغ کی طرف سے بھر پور شرکت کی جائے گی۔

وحدت نیوز( لاہور) ناصر شیرازی ایڈووکیٹ کا کہنا تھا کہ ذات نبی کریم ؐ تمام مسلم امہ کیلئے مرکز وحدت ہے۔ سیرت طیبہ پر عمل پیرا ہو کر مسلمان دنیا بھر کے انسانوں کیلئے رول ماڈل بن سکتے ہیں۔ ان کا کہنا تھا کہ رحمت للعالمین کے ماننے والے کبھی دہشت گرد اور فسادی نہیں ہوسکتے۔ اسلام امن و سلامتی کا دین ہے اور حضور کی ذات عالمین کیلئے باعثِ رحمت ہے۔ان خیالات کا اظہار مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی ایڈووکیٹ نے ہفتہ وحدت کی مناسبت سے الحمراہ ہال میں خانہ فرہنگ اسلامی جمہوریہ ایران اور امامیہ آرگنائزیشن پاکستان کے زیر اہتمام میلاد البنی ﷺ کے جلسے سے خطاب کر تے ہو ئے کیا۔

ان کا کہنا تھا کہ بے گناہوں کے گلے کاٹنے والوں کا اسلام اور نبی آخر الزمان ؐ کے ساتھ کوئی تعلق نہیں۔ یہ دہشت گرد اور فسادی گروہ ابو جہل اور ابولہب کے پیرو کار ہو سکتے ہیں تاجدارِ مدینہ کے نہیں، سیرت پیغمبر اکرم ﷺ میں کہیں بھی تبلیغ اسلام کے لئے ظلم و جبر کا استعمال نظر نہیں آتا۔ ناصرشیرازی کا کہنا تھا کہ عید میلاد النبیؐ پر شیعہ سنی وحدت اور جلوسوں میں ریکارڈ شرکت نے شر پسندوں کو تنہا کر دیا ہے۔اور وہ اپنا مو قف بدلنے پر مجبور ہیں، پاکستان میں اہل سنت و اہل تشیع مل کر وطن دشمن عنا صر سے پاک کر سکتے ہیں ۔

وحدت نیوز(اسلام آباد) داؤدی بوہری جماعت کے روحانی پیشوا ڈاکٹر سیدنا محمد برہان الدین کی اچانک وفات نا صرف بوہری برادری بلکہ عالم اسلام کا بڑا نقصان ہے ، مرحوم ڈاکٹر سیدنا محمد برہان الدین محب اہل بیت علیہ السلام تھے ، انسانیت کی خدمت ان کا شعار تھا ، ان کی وفات سے پیدا ہو نے والا خلا مشکل سے پر ہو گا ، ڈاکٹر سید نا محمد برہان الدین کی وفات پر داؤدی بوہری جماعت کے نئے روحانی پیشوا اور مرحوم ڈاکٹر سید نا محمد برہان الدین کے فرزند عالی قدرمفضل بھائی صاحب سیف الدین کو تعزیت پیش کرتے ہیں ، مجلس وحدت مسلمین پاکستان ڈاکٹر سیدنا محمد برہان الدین کے انتقال پر ملال پر داؤدی بوہری جماعت کے غم میں شریک ہے۔ ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے مرکزی سیکریٹریٹ سے جاری اپنے تعزیتی بیان میں کیا ۔

ان کا کہنا تھا پاکستان ، ہندوستان اور دنیا بھر میں بوہری جماعت نے ڈاکٹر سیدنا محمد برہان الدین کی زیر نگرانی تعلیم اور صحت کے بے شمار منصوبوں کا آغاز کیا ،ڈاکٹر سیدنا محمد برہان الدین کی جانب سے بنائے گئے ادارے انسانیت کی فلاح و ترقی میں بہترین کردار ادا کررہے ہیں ، ساتھ ہی حضرت امام حسین علیہ السلام اور دیگر اہل بیت اطہار علیہ السلام کے روضہ ہائے مقدسہ کی توسیع و تزین و آرائش کے لئے ڈاکٹر سیدنا محمد برہان الدین نے خصوصی اقدامات کیئے ، مجلس وحدت مسلمین پاکستان اس عظیم نقصان پر پوری بوہری برادری خصوصاًمرحوم کے جانشین عالی قدرمفضل بھائی صاحب سیف الدین کے غم میں شریک ہے۔ خدا مرحوم کی مغفرت فرمائے اور جنت الفردوس میں جگہ عنایت کرے۔

وحدت نیوز(ملتان) سابق چیئر مین ڈسٹرکٹ کونسل مظفر گڑھ مخدوم الطاف حسین بخاری پر قاتلانہ حملہ انتظامیہ کی نااہلی کی دلیل ہے، پنجاب حکومت حملہ آوروں کے فوری گرفتاری کے لئے اقدامات کرے ، ان خیالات کا اظہار مجلس وحدت مسلمین پاکستان شعبہ وحدت یوتھ وونگ کے مرکزی سیکریٹری سید فضل عباس نقوی ایڈووکیٹ نے وحدت یو تھ پاکستان کے مرکزی سیکریٹریٹ ملتان سے جاری اپنے مذمتی بیان میں کیا ۔

ان کا کہنا تھا کہ مخدوم الطاف حسین بخاری علاقے کے عوام کے لئے خدا کی نعمت ہیں ، انتہائی دینداراور معزز گھرانے سے تعلق رکھتے ہیں ، علی پور کے عوام ان کا انتہائی احترام کر تے ہیں ، علاقے کے تمام مکاتب فکر کے عوام و شخصیات ان کی دلی عزت کر تے ہیں ، اتنی معتبر شخصیت پر قاتلانہ حملہ انتہائی افسوناک اور قابل مذمت فعل ہے، ان کا کہنا تھا کہ اس قاتلانہ حملے میں الطاف حسین بخاری صاحب کے بازو پر دو گولیاں لگی ہیں ، تاہم خدا کے فضل و کرم سے ان کی جان اب خطرے سے باہر ہے ،ہم پنجاب حکومت سے مطالبہ کرتے ہیں کے وہ متعلقہ حکام کوحملہ آوروں کی فوری گرفتاری عمل میں لانے کے لئے احکامات جاری کرے اور حملہ آوروں کو انصاف کے کٹہرے میں لایا جائے ۔

وحدت نیوز( اسلام آباد ) ایم ڈبلیو ایم کے مرکزی ڈپٹی سیکرٹری جنرل علامہ امین شہیدی، ترجمان علامہ حسن ظفر نقوی اور دیگر راہنمائوں نے سانحہ نواب شاہ پر گہرے دکھ اور صدمے کا اظہار کرتے ہوئے سوگوار خاندانوں سے دلی ہمدردی ظاہر کی ہے ، ایم ڈبلیو ایم کے مرکزی سیکرٹریٹ سے جاری ہونیوالے ایک تعزیتی بیان میں انہوں نے کہا کہ ٹریفک کے اس المناک حادثے میں معصوم طلبہ طالبات کی ہلاکت ایک قومی سانحہ ہے، مجلس وحدت مسلمین پاکستان متوفیان کے غم میں برابرکی شریک ہے ، انہوں نے اس المناک سانحہ کی تحقیقات کرنے اورزخمی طلبہ و طالبات کو سرکاری سطح پر علاج کی ہر ممکن سہولیات مہیا کرنے کا مطالبہ کیا ، ایم ڈبلیو ایم کے راہنمائوں نے زخمیوں کی جلد صحت یابی اور متوفیان کے لواحقین کے لئے صبر جمیل کی دعا کی ۔