The Latest
وحدت نیوز(اسلام آباد) ملک کے دیگر شہروں کی طرح اسلام آباد میں مجلس وحدت مسلمین کے کے زیراہتمام غزہ میں مظلوم فلسطینیوں پر اسرائیل کی طرف سے مسلط کردہ جنگ اور عراق میں داعش دہشتگرد گروہ کی طرف سے مقدس مقامات کی بیحرمتی اور معصوم انسانوں کے قتل کے خلاف امام بارہ جی سکس ٹو کے باہر احتجاجی مظاہرہ کیا گیا جس میں لوگوں کی بڑی تعداد نے شرکت کی۔ مظاہرین نے فلسطین کی حمایت اور اسرائیل مخالف بینرز اٹھا رکھے تھے جن پر نعرے درج تھے۔ مظاہرے کی قیادت ایم ڈبلیو ایم پنجاب کے ترجمان علامہ اصغر عسکری نے کی۔ مظاہرین سے خطاب میں علامہ اصغر عسکری کا کہنا تھا کہ کتنے افسوس کی بات ہے کہ ماہ صیام میں غاصب اسرائیلی ریاست کی طرف معصوم فلسطینوں کا قتل عام کیا جارہا ہے لیکن امت مسلمہ خاموش تماشائی بنی ہوئی ہے۔ او آئی سی چپ ہے تو عرب لیگ فقط نام کی لیگ رہ گئی ہے۔ انہوں نے کہا کہ ایک طرف شام و عراق میں دہشتگردوں کو سپورٹ کرکے وہاں کی حکومتوں کو کمزور اور عوام پر بربریت کرائی جارہی ہے تو دوسری جانب اسرائیل کو کھلی چھٹی دیدی گئی ہے۔ایم ڈبلیوایم کے مرکزی رہنما ملک اقرار حسین کا مظاہرین سے خطاب کرتے ہوئے کہنا تھا کہ داعش جیسے گروہوں کا جہاد فقط امت مسلمہ کے خلاف ہوتا ہے، یہ حقیقت اب سب کے سامنے آچکی ہے کہ شام، عراق اور دیگر اسلامی ممالکوں میں دہشتگردوں کو اصل سپورٹ اسرائیلی مفادات کے تحفظ کیلئے فراہم کی گئی ہے۔ جس کا مقصد اسرائیل مخالف ملکوں کو کمزاور کرنا ہے۔انہوں نے حکومت پاکستان سے مطالبہ کیا کہ وہ اسرائیل مظالم رکوانے میں اپنا بھرپور کردار ادا کرے۔ اس موقع پر اسرائیل مخالف نعرے بھی لگائے گئے۔
وحدت نیوز(کراچی) مجلس وحدت مسلمین کراچی ضلع ملیر کے زیر اہتمام قائد وحدت علامہ ناصر عباس جعفری کی اپیل پر یوم حمایت مظلومین فلسطین وعراق منایا گیا، اس حوالے سے حسینی جامع مسجد برف خانہ ملیر کے باہر بعد نماز جمعہ احتجاجی مظاہرہ کیاگیا جس میں بڑی تعداد میں مظاہرین نے شرکت کی مظاہرین نے ہاتھوں میں بینرز اور پلے کارڈ اٹھا رکھے تھے، جن پر امریکہ ، اسرائیل ، سعودیہ، داعش، کے خلاف نعرے درج تھے، احتجاجی مظاہرے سے علامہ ذوالفقار جعفری ، ایم ڈبلیوایم ضلع ملیر کے ڈپٹی سیکریٹری جنرل ثمر زیدی اور مولانا ع غ کراروی نے خطاب کیا۔بعد ازاں امریکہ اور اسرائیل کے پرچم نذر آتش کیئے گئے۔
علامہ ذوالفقارجعفری کا کہنا تھا کہ اسرائیل کی جانب سے مظلوم فلسطینی بچوں اور خواتین کے بہیمانہ قتل عام کی مذمت کرتے ہیں ، ماہ رمضام المبارک میں انسانیت سوز جرائم نے معاشرتی طبقات کو دھلا کر رکھ دیا ہے، عالمی انسانی حقوق کے اداروں کی خاموشی مظلوم فلسطینیوں اور عراقیوں کے قتل عام کا سبب بن رہی ہے، ثمر زیدی کا کہنا تھا کہ عراق میں داعش اور غزہ میں اسرائیل انسانی جرائم کے مرتکب ہوئے ہیں ، جنہیں ، امریکی ، برطانوی،سعودی پشت پناہی حاصل ہے۔
وحدت نیوز(پشاور) مجلس وحدت مسلمین خیبر پختونخوا کے سیکرٹری جنرل علامہ سید محمد سبطین الحسینی نے غزہ پر اسرائیلی بمباری کی شدید الفاظ میں مذمت کرتے ہوئے کہا ہے کہ عالمی دہشتگرد اسرائیل نے فلسطینی مسلمانوں پر زمین تنگ کردی ہے، اور ماہ مبارک میں اب تک 160 سے زائد بے گناہ فلسطینی بچوں، خواتین، بڑھوں اور جوانوں کا خون ناحق بہایا گیا۔اسرائیلی دہشتگردی کیخلاف بعض عرب ممالک کی خاموشی مسلم امہ کیلئے تکلیف دہ ہے، بے گناہ روزہ دار مسلمانوں پر صہیونی جارحیت مسلم حکمرانوں کی آنکھیں کھول دینے کیلئے کافی ہے، اس اسرائیلی دہشتگردی کیخلاف نہ صرف دنیا بھر کے مسلمانوں بلکہ عالمی برادری کو بھرپور صدائے احتجاج بلند کرنی چاہئے۔ وحدت ہاوس پشاور سے جاری اپنے ایک بیان میں ان کا کہنا تھا کہ عالمی دہشتگرد اسرائیل نے فلسطینی مسلمانوں پر زمین تنگ کردی ہے، اور ماہ مبارک میں اب تک 160 سے زائد بے گناہ فلسطینی بچوں، خواتین، بڑھوں اور جوانوں کا خون ناحق بہایا گیا ہے۔ اس بربریت کیخلاف حکومت پاکستان سفارتی ذرائع استعمال کرتے ہوئے بھرپور آواز بلند کرے اور فوری طور پر اسرائیلی بمباری کو رکوایا جائے۔ انہوں نے مزید کہا کہ اسرائیلی دہشتگردی کیخلاف مسلم ممالک کو متحد ہوکر کوئی ٹھوس لائحہ عمل طے کرنے کی ضرورت ہے، جس کے ذریعے بدمست صہیونی اور غاصب ریاست کیخلاف عالمی سطح پر کارروائی کی جائے۔ انہوں نے کہا کہ انتہائی افسوس کا مقام ہے کہ بعض مسلم بلخصوص بعض عرب ممالک اب بھی اسرائیل سے تعلقات قائم کئے ہوئے ہیں اور انہیں بے گناہ فلسطینی ماوں، بہنوں اور بچوں کا قتل عام نظر نہیں آتا۔
وحدت نیوز(لاہور) مجلس وحدت مسلمین کے سربراہ علامہ راجہ ناصرعباس کی اپیل پر ملک بھر میں مظلوم فلسطینیوں پر صہیونی ناجائز ریاست اسرائیل کی وحشیانہ بربریت اور عراق میں اسلام دشمن طاقتوں کے ایجنٹ داعش کی دہشت گردی کیخلاف مظاہرے کئے گئے لاہور میں جامعہ امامیہ مسجد سمن آباد سے شباب چوک تک ریلی نکالی گئی جس کی قیادت علامہ احمد اقبال رضوی مرکزی رہنما مجلس وحدت مسلمین اور علامہ امتیاز کاظمی سیکرٹری جنرل مجلس وحدت مسلمین لاہور نے کی ریلی میں کثیر تعداد میں لوگ شریک تھے شباب چوک سمن آباد میں ریلی کے شرکاء سے خطاب کرتے ہوئے علامہ احمد اقبال رضوی کا کہنا تھا کہ مسلمانوں کی تمام ترمشکلات اور پریشانی کے ذمہ دار صرف اور صرف امریکہ ہے جو اپنے ناجائز اولاد اسرائیل کے ذریعے مسلمانان فلسطین کی نسل کشی میں مصروف ہے آج کے عرب بادشاہ اور حکمران امریکہ و اسرائیل کے پٹھو ہیں جو مسلمان ملکوں میں دہشت گردی کے لئے دہشت گرد بجھوا سکتے ہیں لیکن مظلوم فلسطینی مسلمانوں اور قبلہ اول کی دفاع کے لئے ایک لفظ تک بولنے سے بھی قاصر ہیں عراق شام میں صہیونی ایجنٹ داعش کے دہشت گرد انہی عرب ممالک جو امریکہ اور اسرائیل کے خیر خواہ ہیں کی ایما پر مسلمانوں کا قتل عام اور مقدسات کی توہین کررہے ہیں ان دہشت گردوں کا ہدف وہ ممالک ہیں جو اسرائیل اور امریکہ کے خلاف ہیں اُن کا مزید کہنا تھا کہ مظلوم فلسطینی مسلمانوں کے خون ناحق کا ذمہ دار امریکہ و اسرائیل کے ساتھ عرب ملکوں کے بزدل حکمران بھی ہیں جو مسلم امہ کے دشمن اور اسرائیل و امریکہ کے نمک خوار ہیں علامہ احمد اقبال رضوی کا کہنا تھا کہ پاکستان کے خارجی دہشت گرد جن کے خلاف ہماری بہادر پاک فوج آپریشن کررہی ہے یہ بھی وہی گروہ ہے جو اپنے سوا سب کو کافر قرار دیتے ہیں انشااللہ پاکستان سمیت دنیا بھر سے خارجیوں کا خاتمہ ہوگااور دنیا کے نقشے سے جلد اسرائیل کا وجود بھی مٹ جائے گامظاہرے میں اعلان ہوا کہ مظلوم فلسطینیوں سے اظہار یکجہتی اور قدس کی آزادی کے لئے جمعتہ الوداع کو یوم القدس کے مناسبت سے منایا جائے گا جس میں تمام مکاتب فکر شریک ہونگے۔
وحدت نیوز( کراچی) مجلس وحدت مسلمین پاکستان کے مرکزی سیکرٹری جنرل علامہ ناصرعباس جعفری کی اپیل پر ملک بھر کی طرح کراچی میں بھی’’یوم حمایت مظلومین فلسطین و عراق‘‘ منایا گیا اور غزہ پر صیہونی اسرائیلی حملوں اور عراق میں تکفیری داعش کی دہشت گردی کے خلاف زبردست احتجاجی مظاہرے کئے گئے،ملک بھر کی طرح کراچی میں بھی مجلس وحدت مسلمین کے تحت بعد نماز جمعہ فلسطینیوں کی حمایت میں احتجاجی مظاہروں کا انعقادکیا گیا اور مرکزی احتجاجی مظاہرہ خوجہ اثنا عشری مسجد کھارادر پر کیا گیا، غزہ پر صیہونی اسرائیلی بربریت اور عراق میں تکفیری داعش کی دہشت گردی کے خلاف مجلس وحدت مسلمین کے تحت منعقدہ احتجاجی مظاہروں میں سیکڑوں افراد نے شرکت کی ، مظاہرین نے ہاتھوں میں بینرز اور پلے کارڈز اٹھا رکھے تھے جن پر امریکہ مردہ باد، اسرائیل نا منظور، غزہ پر صیہونی جارحیت کی مذمت، تکفیری داعش کے خلاف ،فلسطین کی آزادی تک جنگ رہے گی، سمیت اقوام متحدہ پر سخت تنقید پر مبنی نعرے آویزاں تھے، احتجاجی مظاہروں میں امریکی اور صیہونی اسرائیلی پرچموں کو بھی نذر آتش کیا گیا۔
ملک بھر کی طرح کراچی میں مرکزی احتجاجی مظاہرہ خوجہ مسجد کھارادرکے باہر کیا گیا جس میں مجلس وحدت مسلمین پاکستان کراچی ڈویژن کے رہنماؤں مولانا علی انور جعفری،علامہ شیخ محمد علی ، علامہ مبشر حسن ، علی حسین نقوی سمیت کراچی کے سیکرٹری جنرل حسن ہاشمی نے خطاب کیا، مقررین کاکہنا تھا کہ گذشتہ پانچ روز میں غاصب اسرائیل نے غزہ پر سیکڑوں کی تعداد میں بم گرائے ہیں جس کے نتیجے میں ایک سو سے زائد معصوم فلسطینی شہید جبکہ سیکڑوں کی تعداد میں زخمی ہوئے ہیں،جس میں بڑی تعداد میں معصوم بچے اور خواتین ہیں۔
مجلس وحدت مسلمین پاکستان کراچی کے رہنماؤں نے غزہ پر جاری صیہونی جارحیت کی شدید الفاظ میں مذمت کرتے ہوئے کہا کہ اب وقت گزر گیا ہے اور دنیا کو غاصب اسرائیل کی لفاظی مذمت سے آگے نکل کر عملی اقدامات اٹھانے ہوں گے ، انہوں نے حکومت پاکستان سے بھی مطالبہ کیا کہ بیانات کافی نہیں بلکہ عملی اقداما ت کئے جائیں اور پاکستان اسلامی دنیا سمیت اقوام عالم میں مسئلہ فلسطین کے حل کے لئے مثبت کردار ادا کرے، مجلس وحدت مسلمین کے رہنماؤں نے پاکستان کے عوام سے اپیل کی ہے کہ وہ مغربی اور بالخصوص اسرائیلی مصنوعات کا بائیکاٹ کر دیں اور حکومت پاکستان ملک میں موجود اسرائیلی اقتصادی کمپنیوں کے لائسنس معطل کر کے ان کمپنیوں پر پابندی عائد کرے، انہوں نے تمام مسلمان ممالک سے بھی اپیل کی کہ وہ غاصب اسرائیل اور شیطان بزرگ امریکہ کا بائیکاٹ کریں اور مغرب کی مصنوعات استعمال کرنے سے گریز کریں، انہوں نے مزید کہا کہ پاکستان کے عوام فلسطینیوں کے ساتھ ہیں اور مصیبت کی اس گھڑی میں ہم فلسطینیوں کے ساتھ ہیں، اس موقع پر مظاہرین نے مردہ باد امریکہ،ا سرائیل نا منظور سمیت غزہ کے عوام کو تنہا نہیں چھوڑیں گے، فلسطین و القدس کی آزادی تک جد وجہد جاری رکھیں گے سمیت دہشت گردی مردہ باد کے نعرے لگائے اور مظاہرے کے اختتام پر امریکی اور صیہونی اسرائیلی پرچموں کو نذر آتش کیا گیا۔
وحدت نیوز(اسلام آباد)غزہ اور غرب اردن پر صہیونی جارحیت اور عراق میں تکفیری داعش کی دہشت گردی کے خلاف پاکستان بھر میں احتجاج، مختلف شہروں ، قصبوں ، دیہاتوں میں احتجاجی مظاہرے اور ریلیاں نکالی گئیں ، مساجد میں جمعہ کے خطبات میں فلسطینیوں کے حق میں خصوصی دعاؤں کا اہتمام،مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری کی اپیل پر ملک بھر میں ’’یوم حمایت مظلومین فلسطین و عراق ‘‘ منایا گیا اور غزہ پر صیہونی اسرائیلی حملوں کے خلاف زبردست احتجاجی مظاہرے کئے گئے
مجلس وحدت مسلمین کے تحت بعد نماز جمعہ مرکزی مسجد اثنا ء عشری جی سکس ٹو اسلام آباد، خوجہ مسجد کھارادر، حسینی جامع مسجد برفخانہ ملیرکراچی ، شباب چوک ثمن آباد لاہور، یاد چوک اسکردو، علمدار روڈ کوئٹہ ، سمیت حیدر آباد، ٹنڈو محمد خان، جیکب آباد، دادو، لاڑکانہ، کے این شاہ ، خیر پور، میر پور خاص، ٹھٹھہ ، بدین ، ماتلی، نواب شاہ ، نوشہرو فیروز، کشمور، کندھ کوٹ ،جبکہ پنجاب کے شہروں ساہیوال، ڈیرہ غازی خان ، ملتان ، جھنگ، میانوالی، لیہ، شیخوپورہ، گجرانوالہ ، راولپنڈی، ٹیکسلا، خیبر پی کے کے شہروں پشاور، کوہاٹ ، ہنگو، اورکزئی ایجنسی،ہری پور، مانسہرہ، جبکہ گلگت بلتستان کے علاقوں کچورا، کواردو، گمبہ، خپلو، کھوار،گول، اسکردو سمیت ملک کے تمام چھوٹے بڑے شہروں اور گوٹھ دیہاتوں میں فلسطینیوں کی حمایت میں احتجاجی مظاہروں کا انعقادکیا گیا، غزہ پر صیہونی اسرائیلی اور عراق میں تکفیری داعش کی بربریت کے خلاف مجلس وحدت مسلمین کے تحت منعقدہ احتجاجی مظاہروں میں سیکڑوں افراد نے شرکت کی ، مظاہرین نے ہاتھوں میں بینرز اور پلے کارڈز اٹھا رکھے تھے جن پر امریکہ مردہ باد، اسرائیل نا منظور، غزہ پر صیہونی جارحیت کی مذمت، فلسطین کی آزادی تک جنگ رہے گی، داعش کی تکفیری دہشت گردی سمیت اقوام متحدہ پر سخت تنقید پر مبنی نعرے آویزاں تھے، احتجاجی مظاہروں میں امریکی اور صیہونی اسرائیلی پرچموں کو بھی نذر آتش کیا گیا۔
ملک بھرمیں ہونے والے احتجاجی مظاہروں میں مجلس وحدت مسلمین پاکستان کے مرکزی ، صوبائی ، ڈویژنل اور ضلعی عہدیداران نے خطاب کیا، مقررین کاکہنا تھا کہ گذشتہ پانچ روز میں غاصب اسرائیل نے غزہ پر سیکڑوں کی تعداد میں بم گرائے ہیں جس کے نتیجے میں ایک سو سے زائد معصوم فلسطینی شہید جبکہ سیکڑوں کی تعداد میں زخمی ہوئے ہیں،جس میں بڑی تعداد میں معصوم بچے اور خواتین ہیں۔ پاکستان کے عوام فلسطینیوں کے ساتھ ہیں اور مصیبت کی اس گھڑی میں ہم فلسطینیوں کو تنہا نہیں چھوڑیں گے، اس موقع پر مظاہرین نے مردہ باد امریکہ،ا سرائیل نا منظور سمیت غزہ کے عوام کو تنہا نہیں چھوڑیں گے، فلسطین و القدس کی آزادی تک جد وجہد جاری رکھیں گے سمیت دہشت گردی مردہ باد کے نعرے لگائے اور مظاہرے کے اختتام پر امریکی اور صیہونی اسرائیلی پرچموں کو نذر آتش کیا گیا۔
وحدت نیوز(پشاور)مجلس وحدت مسلمین شعبہ راوبط وسٹیپ فارورڈٹرسٹ کے جانب سے ضلع پشاور وڈپگہ میں افطار پارٹی کا انعقاد کیا گیا جس میں بڑی تعداد میں لوگوں نے شرکت کی ۔ اس موقع پر اہلسنت برادران کے لوگ بھی شریک ہوئے انہوں نماز مغرب بھی اہل تشیع کی مسجد میں ادا کی۔ انہوں مجلس وحدت کے اتحاد بین مسلمین کے ان کوششوں کو سراہا۔ اس موقع پر مسجد کے پیش امام علامہ سید ارشد علی کا کہنا تھا مجلس وحدت مسلمین نہ صرف پاکستان میں اہل تشیع کا نمائندہ تنظیم ہے بلکہ دیگر ممالک میں اس کی شاخیں موجود ہیں جو انسانیت کی خدمت کے لئے کوششیں کر رہے ہیں۔ انہوں نے کہا کہ مجلس وحدت مسلمین وہ تنظیم ہے جنہوں نے پر امن احتجاج کے نتیجے میں صوبائی گورنمنٹ کو گرا کر یہ ثابت کر دیا کہ ملت تشیع کا پاکستان میں ایک اہم رول ہے جس کو کوئی بھی نظر انداز نہیں کر سکتا۔ انہوں کا کہنا تھا کہ ہر موقع پر مجلس وحدت مسلمین کی مضبوط موقف نے ملت کا سر فخر سے بلند کیا۔ اس دوران وڈپگہ کے بزرگ محبوب شاہ نے کہا کہ پاکستان میں مجلس وحدت مسلمین ملت تشیع کے دل کی ڈھڑکن بن چکی ہے ملت پر کسی بھی سخت لمحات میں ساری قوم کی نظریں صرف مجلس وحدت کی طرف ہوتی ہے کہ ایم ڈبلیوایم کیا ایکشن لیتی ہے ہم مجلس وحدت مسلمین اور سٹیپ فارورڈ ٹرسٹ کے بے حد شکر گزار ہیں کہ انہوں نے پشاور میں اہل تشیع کے پسماندہ علاقہ میں افطار پارٹی کا انعقاد کیا۔اور تمام عہدار وں کے لئے دعاکی اور شہدائے ملت جعفریہ کے لئے فاتحہ خوانی کی۔
وحدت نیوز(مظفرآباد) غزہ کے مظلوم و نہتے مسلمانوں پر اسرائیل کی جارحیت انسانی درندگی اور انسانی حقوق کی صریحاً خلاف ورزی ہے، دو لوگوں کے قتل کے الزام میں پورے غزہ کو اپنے حملوں کی لپیٹ میں لے لینا کہاں کا انصاف اور کہاں کا قانون ہے ، کہاں ہے عالمی برادری؟ کہاں ہیں انسانی حقوق کی تنظیمیں ، جس ظلم و بربریت کی داستانیں غزہ میں رقم کی جارہی ہیں شاید ہی ان کی مثال کہیں ملتی ہو، اسرائیل اپنے اوچھے ہتھکنڈوں سے مظلوم فلسطینی عوام کے جذبات اور حقوق کو دبا کر نہیں رکھ سکتا، اسرائیل جو کہ خود شیطان بزرگ کی آشیرباد سے ناجائز ہے بوکھلاہٹ کا شکار ہو چکا ہے، ان خیالات کا اظہار مجلس وحدت مسلمین آزاد جموں و کشمیر کے سیکرٹری سیاسیات سید تصور عباس موسوی نے وحدت سیکرٹریٹ مظفرآباد سے جاری ایک بیان میں کیا ۔
انہوں نے کہا کہ عرب ممالک کی خاموشی عجیب ہے، عرب ممالک کس خواب غفلت میں ہیں، عرب ممالک جو کہ اسلامی ممالک ہیں، خواب غفلت سے اُٹھ کر اپنے فلسطینی بھائیوں کی مدد کریں، مسلم امہ کب تک سرد مہری کا مظاہرہ کرے گی، کب تک خود کو دوسرے کا محکوم اور آلہ کار بننے میں فخر محسوس کرے گی، کب تک اپنے بھائیوں کے قتل عام پر خاموش تماشائی بنی رہے گی؟ کیا مسلمان اسی طرح دنیا بھر میں بربریت کا نشانہ بنتے رہیں گے؟ اسلامی ممالک کی تنظیم ، عرب لیگ اور انسانی حقوق کی دیگر ٹھیکیدار تنظیمیوں کے کان پر جوں تک نہیں رینگ رہی کہ غزہ میں نہتے مسلمانوں پر اسرائیل کئی روز سے بمباری کر رہا ہے، غزہ میں ہونیوالی بمباری میں نہتے عوام کو نشانہ بنایا جا رہا ہے۔
انہوں نے کہا کہ غزہ میں اسرائیل کی بمباری سے مظلوم فلسطینیوں اور عراق میں اسرائیلی ایجینٹ داعش کے ہاتھوں عراقی مسلمانوں کے قتل عام پر مجلس وحدت مسلمین ریاست بھر میں جمعہ کو’’ یوم احتجاج ‘‘منانے کا اعلان کرتی ہے، اس دن کی مناسبت سے سب سے بڑی ریلی دارالحکومت مظفرآباد میں منعقد ہوگی، جسکی قیادت مجلس وحدت مسلمین کی لیڈر شپ و دیگر مکاتب فکر کے افراد کریں گے۔
اسکردو میں مسجد کو منہدم کرنیکا فیصلہ واپس نہ لیا تو پوری دنیا میں آواز بلند کی جائیگی، آغا علی رضوی
وحدت نیوز(اسکردو) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے اپنے ایک بیان میں کہا ہے کہ گلگت بلتستان کی صوبائی حکومت میں کبھی یہ جرات نہیں ہوئی ہے کہ بسوں سے نہتے مسافرین کو اتار اتار کر گولیوں سے چھلنی کرنے والے، پاکستان کی سکیورٹی اداروں پر حملے کرنے والے اور مسلمانوں کے درمیان تفرقہ پھیلانے والے دہشت گردوں پر دہشت گردی ایکٹ نافذ کرے بلکہ اس کے برعکس مسجد اور علم پاک کو شہید کرنے سے روکنے والے بے گناہ جوانوں پر اے ٹی اے نافذ کرکے اپنی پہچان دنیا کے سامنے واضح کر دی۔ یہ ریاست اسلام کی ریاست ہے کسی خالصہ سرکار، ہندو پنڈت یا سکھ یاتری کی نہیں، عوام اپنی زمینوں پر جہاں چاہیں مسجد بنا سکتے ہیں، چاہے اس مسجد کی تعمیر سے کسی کے ناجائز تجاوزات کی راہ میں رکاوٹ ہو یا نہ ہو اور دنیا کی کوئی طاقت انہیں نہیں روک سکتی۔ ہم نے روز اول سے کوشش کی کہ اسکردو مسجد کا معاملہ مذاکرات اور نرم انداز سے حل ہوجائے لیکن صوبائی شاہی حکومت اپنی گنتی کے چند روز اور اقتدار کے سہارے اپنے عزیزوں کو نوازنے کے لیے سرگرم عمل ہے اور مسجد کو منہدم کرکے دم لینے کی خواہاں ہے، تاکہ وہاں تجاوزات تعمیر کرسکے۔ اگر گلگت بلتستان حکومت نے فوری طوری پر اس مسئلے کو حل نہیں کیا اور گرفتار ہونیوالے بے گناہوں کو رہا نہ کیا تو پاکستان کے کونے کونے اور دنیا کے مختلف مقامات میں بھی اسکردو انتظامیہ اور گلگت بلتستان حکومت کی اس شرمناک سیاہ کاری کو منظر عام پر لایا جائے گا، جس نے بابری مسجد کی یاد تازہ کی تھی۔ اگر گلگت بلتستان حکومت نے ہوش کے ناخون نہ لیے تو ہم پاکستان بھر میں اسے ایسے ذلیل و رسواء کریں گے کہ انہیں منہ چھپانے کو جگہ نہیں ملے گی۔
وحدت نیوز(کوئٹہ) کور کمانڈر سدرن کمانڈ جنرل ناصر جنجوعہ ،برگیڈیئر راحیل و دیگر اعلیٰ سطحی وفد کے ساتھ بہشت زینبؑ ہزارہ قبرستان پہنچے اور شہداء ملت جعفریہ کے مقدس مزارات پر فاتحہ خوانی کی۔اس موقع پر ایم ڈبلیوایم کے رکن صوبائی اسمبلی آغا سید محمد رضا،ایم ڈبلیوایم کے صوبائی سیکریٹری جنرل علامہ مقصود علی ڈومکی ،ممتاز عالم دین علامہ محمد جمعہ اسدی ،حاجی عبدالقیوم چنگیزی،لیاقت علی ہزارہ، رضا وکیل، حاجی طاہر نظری، ڈی آئی جی فقیر حسین (ر)و دیگرموجود تھے۔
اس موقع پر گفتگو کرتے ہوئے کور کمانڈر جنرل ناصر جنجوعہ نے کہا کہ ظلم کی سیاہ رات ختم ہونے کو ہے۔ میں ان شہداء کو سلام عقیدت پیش کرنے اور آپ سے تعزیت کرنے کیلئے حاضر ہوا ہو ں۔ ایک عرصہ پہلے دھشتگردی کے خلاف آپریشن کے ایشو پر بعض حلقوں میں دوسری رائے پائی جاتی تھی،مگر دہشتگردی کے ان المناک سانحات نے جہاں دہشت گردوں کے سیاہ چہرے کو بے نقاب کیا وہاں عوام میں دہشتگردوں کے خلاف آپریشن کیلئے اتفاق رائے پیدا ہوا۔
اس موقع پر گفتگوکرتے ہوئے علامہ مقصود علی ڈومکی نے کہا کہ ملت جعفریہ اور غیور ہزارہ قوم نے ہمیشہ پاک وطن کی سر بلندی اور بقا کیلئے قربانیاں دی ہیں اور رئیسانی گورنمنٹ کے خلاف ملک گیر دھرنے کے موقع پر تمام اداروں سے مایوس ہو کر عوام نے پاک فوج پر اظہار اعتماد کرتے ہوئے دھشت گردوں کے خلاف فوجی آپریشن کا مطالبہ کیا تھااور یہ کہا کہ ہمیں اپنی فوج پر فخر ہے۔اب جبکہ دھشت گردی کے خلاف فوجی آپریشن جاری ہے ملت جعفریہ پاک فوج کی مکمل حمایت اورکرتے ہوئے اپنے بھر پور تعاون کا یقین دلاتی ہے۔
اس موقع پر گفتگو کرتے ہوئے ایم پی اے آغا رضا نے کہا کہ اس ملک میں فر قہ واریت نہیں بلکہ ہمارے خلاف یکطرفہ دہشتگردی ہو رہی ہے۔اس موقع پرعلامہ محمد جمعہ اسدی نے شہداء کے بچوں کی تعلیم اور حاجی عبدالقیوم چنگیزی نے قبرستان کی توسیع کی ضرورت کو بیان کیا۔
