The Latest
وحدت نیوز(ایبٹ آباد) مجلس وحد ت مسلمین ضلع ایبٹ آباد کے زیر اہتمام علامہ جہازیب حسین جعفری کی قیادت میں شجر کاری مہم کا آغاز کیا گیا۔ مہم کا آغاز تحصیل حویلیاں سے کیا گیا۔ حویلیاں شہر کے بعد دورہ چھچھہ میرا، یونین کونسل جھنگڑہ اور دیوال منال گاوں میں شجرکاری کی گئی۔ ایم ڈبلیو ایم کے صوبائی سیکرٹری تنظیم سازی علامہ سید وحید عباس کاظمی، سیکرٹری جنرل ضلع ایبٹ آباد سید مدثر علی کاظمی، ضلعی سیکرٹری تنظیم سازی سید اظہر حسین شاہ، سیکرٹری جنرل تحصیل حویلیاں سید سبطین حسین شاہ، سیکرٹری یونین کونسل سید فراست حسین شاہ، سیکرٹری تحفظ عزادری ضلع ایبٹ آباد سید شجر علی کاظمی نے شجرکاری مہم میں بھرپور حصہ لیا۔
وحدت نیوز(کراچی) مجلس وحدت مسلمین پاکستان کے مرکزی سیکریٹری امورخارجہ علامہ شفقت حسین شیرازی نے کہا ہے کہ پاکستان کی حکومت مشرق وسطیٰ کے حالات کے بارے میں اپنی ماضی کی خارجہ پالیسی پر کاربند رہے اور امریکہ سمیت اسرائیلی ایجنڈے پر کاربند سعودی قیادت کی ایماء پر شام سمیت کسی بھی ملک میں مداخلت کی کوشش نہ کی جائے کیونکہ اس طرح کی مداخلت پاکستان کے لئے سنگین ثابت ہو گی۔سعودی عرب نے اپنی خیانتوں کے ذریعے امت مسلمہ کو تقسیم کرنے کی کوشش کی ہے،پاکستانی فوج ملک بچانے کیلئے طالبان کے خلاف فی الفور آپریشن کرے، ان خیالات کا اظہار انہوں نے کراچی آمد پر منعقدہ کارکنوں کی ایک تنظیمی و فکری نشست سے خطاب کرتے ہوئے کیا۔نشست کا انعقاد وحدت ہاؤس کراچی میں کیا گیا تھا جس میں شہر بھر سے سیکڑوں کارکنوں سمیت علمائے کرام کی بڑی تعداد موجود تھی۔
مجلس وحدت مسلمین پاکستان کے مرکزی رہنما علامہ شفقت حسین شیرازی کا کہنا تھا کہ امریکہ سمیت عرب حکمران چاہتے ہیں کہ پاکستان کو اندرونی اور بیرونی محاذوں پر الجھا دیں اور پاکستان کو غیر مستحکم کر دیا جائے تا کہ پاکستان ہمیشہ ہمیشہ کے لئے عالمی استعماری قوتوں کا محتاج بن کر رہ جائے ، تاہم انہی ناپاک سازشوں کو عملی جامہ پہنانے کے لئے امریکی و صیہونی ایماء پر سعودی اور بحرینی بادشاہتیں سر گرم عمل ہیں اور چاہتی ہیں کہ پاکستان کو مشرق وسطیٰ میں لگائی جانے والی آگ میں دھکیل دیا جائے ۔ ان کاکہنا تھا کہ پاکستان کی جانب سے شام سمیت مشرق وسطیٰ کے کسی بھی ملک میں مداخلت کو برداشت نہیں کیا جائے گا اور حکومت کو واضح کرتے ہیں کہ امریکی و صیہونی اور عرب حکمرانوں کی ایماء پر ملک کو آگ میں جھونکنے کی کوششوں سے اجتناب کیا جائے ورنہ سنگین نتائج برآمد ہوں گے۔
علامہ شفقت حسین شیرازی نے واضح کیا کہ شام ایک ایسا ملک ہے کہ جس کے ساتھ پاکستان کے دوستانہ تعلقات رہے ہیں تاہم پاکستان حکومت کو کسی بھی دوسرے ملک کی ایماء پر شام اور بحرین کے معاملات میں دخل اندازی سے گریز کرنا چاہیئے،مجلس وحدت مسلمین پاکستان کے مرکزی سیکرٹری امور خارجہ علامہ شفقت حسین شیرازی کاکہنا تھا کہ شام کے مسئلے میں صیہونی قوتیں امریکہ اور اسرائیل پاکستان کو جنگ و جدل کی دلدل میں پھنسانا چاہتے ہیں ، ایک طرف ملک کے اندرون خانہ عرب ممالک کے پروردہ اور صیہونی اسرائیل کے حامی طالبان دہشت گردو ں نے پاکستان کو عدم استحکام کا شکار کرنے کی سازشوں کا سلسلہ شروع کر رکھا ہے تو دوسری جانب سعودی عرب اور دیگر عرب ممالک صہیونی غاصب ریاست اسرائیل کی ایماء پر پاکستا ن کو شام کی جنگ میں دھکیلنا چاہتے ہیں اور پاکستان کے کردار کو داغ دار کرنے کی گھناؤنی سازشیں کرر ہے ہیں۔
وحدت نیوز(کوئٹہ) علامہ مقصود علی ڈومکی نے کہا ہے کہ بلوچستان اور سندھ کے مختلف علاقوں میں کاروکاری کے پر قتل نہایت افسوسناک امر ہے۔ بغیر غسل و کفن کے خواتین کی تدفین انتہائی افسوسناک فعل ہے۔ کاروکاری، ونی اور سوارا کے نام پر سندھ اور بلوچستان کے مختلف علاقوں میں بے گناہ خواتین کا قتل ایک انسانی المیہ ہے۔ انہوں نے ایک خاتون کو اسی الزام میں زندہ دفن کرنے کو غیر انسانی فعل قرار دیتے ہوئے تمام سیاسی و مذہبی رہنماوں سے اس منحوس رسم کی اصلاح کے لئے اپنا کردار ادا کرنے کی اپیل کی۔ایم ڈبلیوایم بلوچستان کے سیکرٹری جنرل علامہ مقصود علی ڈومکی نے کہا کہ بلدیاتی انتخابات جمہوریت کا حسن اور آئینی ضرورت ہیں۔ لہذا وفاقی و صوبائی حکومتوں کو بہانہ بازی سے کام لینے کی بجائے فی الفور بلدیاتی انتخابات کے انعقاد کو یقینی بنایا جائے۔ اس سلسلہ میں سپریم کورٹ کے واضح احکامات قابل ستائش ہیں۔
وحدت نیوز(ایبٹ آباد) یوم پاکستان کی مناسبت سے مجلس وحدت مسلمین ضلع ایبٹ آباد کے زیر اہتمام تقریب کا انعقاد کیا گیا۔ جس میں ایم ڈبلیوایم خیبر پختونخوا کی شوریٰ عالی کے رکن علامہ جہازیب حسین جعفری، علامہ نظر علی روحانی، صوبائی سیکرٹری تنظیم سازی علامہ سید وحید عباس کاظمی، ضلعی سیکرٹری جنرل ایبٹ آباد سید مدثر علی کاظمی، سیکرٹری تنظیم سازی ضلع ایبٹ آباد سید اظہر حسین شاہ، تحصیل حویلیاں کے سیکرٹری جنرل سید سبطین حسین شاہ، یونین کونسل جھنگڑہ کے سیکرٹری جنرل سید فراست حسین شاہ اور دیگر معززین علاقہ نے شرکت کی۔ اور آخر میں وطن عزیز کے استحکام کے لئے دعا کی گئی۔
وحدت نیوز(کراچی) مجلس وحدت مسلمین پاکستان کے مرکزی ڈپٹی سیکریٹری جنرل علامہ محمد امین شہیدی نے جمعیت علمائے پاکستان (نورانی) کے مرکزی جنرل سیکریٹری اور سپریم کرنسل کے چیئرمین شاہ اویس نورانی سے ان کی رہائش گاہ پر ملاقات کی۔ اس موقع پر ان کے ہمراہ علامہ باقر عباس زیدی، وحدت یوتھ سندھ کے سیکریٹری مہدی کربلائی، سیکریٹری تنظیم سازی کراچی میثم عابدی، جے یو پی کراچی کے رہنما مستقیم نورانی سمیت دیگر رہنما بھی موجود تھے۔ ملاقات میں ملک میں جاری دہشت گردی، طالبان سے مذاکرات، عرب ممالک کی مداخلت، ملت پاکستان میں اتحاد سمیت دیگر امور پر تفصیلی تبادلہ خیال کیا گیا۔
بعدازاں پریس بریفنگ میں صحافیوں سے گفتگو کرتے ہوئے علامہ امین شہیدی کا کہنا تھا کہ وقت کا تقاضہ ہے کہ ہم ایک دوسرے کے درمیان وحدت پیدا کریں اور چھوٹے چھوٹے اختلافات کو پس پشت ڈال کر پاکستان کی حفاظت اور اس کو درپیش چیلنجز کو مدنظر رکھتے ہوئے اپنا کردار ادا کریں۔ ان کا کہنا تھا کہ اس وقت پاکستان کو دہشت گردی کا سامنا ہے، پاکستان کو بیرونی ثقافتی یلغار کا سامنا ہے، دشمنوں کی طرف سے مختلف قسم کی دھمکیوں کا سامنا ہے، پاکستان کی کوئی سرحد اس وقت محفوظ نہیں ہے، دشمن ہمیں ایک دوسرے کے خلاف ٹکڑوں میں بانٹ کر صف آراء کرنے کی کوششوں میں مصروف ہے، ایسے میں تمام محب وطن جماعتوں اور گروہوں کی ذمہ داری بنتی ہے کہ وہ پاکستان کی سلامتی کیلئے میدان میں وارد ہوں۔
ایک سوال کے جواب میں علامہ امین شہیدی کا کہنا تھا کہ پاکستان میں 60 ہزار سے بھی زائد لوگ طالبان کی دہشت گردی میں شہید ہوچکے ہیں، طالبان سے مذاکرات ملک میں امن کا باعث نہیں بلکہ مزید خرابیوں کا باعث بنیں گے، اگر ہماری حکومت اور فوج نے کوئی اقدام نہیں کیا تو آئندہ آنے والے دنوں میں پاکستان کی سالمیت مزید خطرے میں پڑ جائے گی۔ انہوں نے کہا کہ ان ہی شدت پسندوں کی وجہ سے ہماری ریاست کو خطرہ ہے جن کو بیرونی آشیرباد بھی حاصل ہے، بیرونی امداد بھی حاصل ہے اور بیرونی طاقتوں کی سرپرستی بھی حاصل ہے، ان مذاکرات کا کوئی مؤثر اور پاکستان کے نفع میں کوئی نتیجہ نہیں نکلنے والا، آخرکار ریاست کو ایک قدم اٹھانا پڑے گا، وہ ہے شدت پسندوں کیخلاف ملک گیر آپریشن، اس کے علاوہ ملک بچانے کا کوئی اور راستہ نہیں ہے۔
جے یو پی کے مرکزی رہنما شاہ اویس نورانی نے اس موقع پر علامہ امین شہیدی کی آمد پر ان کا شکریہ ادا کیا اور کہا کہ طالبان سے مذاکرات کو مسلکی پیرائے میں نہیں دیکھنا چاہیئے، کیونکہ اس وقت ہمارا دین ہی خطرے میں اور ہمیں اپنے دین اور ریاست کو بچانے کے لئے اب مؤثر اقدامات کرنے ہونگے۔ ان کا کہنا تھا کہ طالبان سے مذاکرات کے حوالے سے ان کی دہشت گردی کا شکار ہونے والے افراد کو بھی مرتبہ اعتماد میں لیا جاتا تو ا ن کا مؤقف بھی سامنے آجاتا۔
وحدت نیوز(بلتستان) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری کا اسکردوایئر پورٹ پہنچنے پر ایم ڈبلیو ایم بلتستان ڈویژن کے سیکریٹری جنرل علامہ آغا علی رضوی ،صوبائی رہنما آغا مظاہر موسوی اور دیگر رہنمائوں نےان کا پرتپاک استقبال کیا،علامہ راجہ ناصرعباس چار روزہ ہنگامی دورے پر اسکردوپہنچے ہیں جہاں وہ قانون سازاسمبلی کے آئندہ انتخابات میں ایم ڈبلیو ایم کی شمولیت کے حوالے سے مقامی قیادت کے ساتھ مشاورت کریں گے، جب کے مستقبل قریب میں بلتستان میں عظیم الشان جلسہ عام کی تیاریوں کا جائزہ بھی لیں گے، اس دورے میں مجلس وحدت مسلمین پنجاب کے سیکریٹری اطلاعات مظاہر شگری بھی ان کے ہمراہ موجود ہیں ، علامہ راجہ ناصر عباس جعفری اسکردوایئر پورٹ سے براہ راست شہید عارف حسین کے گھر تعزیت کے لئے پہنچے ، جنہیں گذشتہ دنوں کراچی میں تکفیری دہشت گردوں نے فائرنگ کر کے شہید کر دیا تھا ، عارف حسین کا تعلق امامیہ اسٹوڈنٹس آرگنائزیشن سے تھا۔ بعد ازاں علامہ راجہ ناصر عباس جعفری نے شہداءکی قبور پرحاضری دی اور فاتحہ خوانی بھی کی ۔واضح رہے کہ ایم ڈبلیو ایم کے مرکزی سیکریٹری جنرل بلتستان میں اپنے تنظیمی دورہ جات کے علاوہ بزرگ علمائے کرام، عمائدین علاقہ، مختلف مکاتب فکر کے علماء و زعماء اور سیاسی و سماجی شخصیات سے ملاقاتیں بھی کرینگے
وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل علامہ امین شہیدی نے کہا ہے کہ جو قومیں اپنی مذہبی اقدار اور ملی حمیت فراموش کر دیں، ان کا وجود باقی نہیں رہتا۔ اس وقت اقوام عالم میں اسلام کی پہچان ایک ایسے مذہب کے طور پر کرائی جا رہی ہے، جس کی حقیقت بربریت و حیوانیت ہے۔ انہوں نے کہا کہ پاکستان کے قیام کا بنیادی مقصد ایک ایسی ریاست کا حصول تھا، جہاں اسلام کے سنہری اصولوں کے مطابق زندگی گزاری جاسکے، لیکن مفاد پرست حکمرانوں نے اقبال کے خوابوں کی تعبیر کو وہ بھیانک رنگ دیا کہ ان کی روح بھی آج ماتم کر رہی ہوگی۔ اس وقت دنیا بھر کے فرعون اپنی فرعونیت کا جھنٖڈا گاڑنے کے لیے کرائے کے قاتل پاکستان سے حاصل کرتے ہیں۔ الجزیرہ ٹی وی نے اس حقیقت کو آشکار کر دیا ہے کہ چار ہزار طالبان پاکستان سے شام منتقل کئے جاچکے ہیں۔
انکا کہنا تھا کہ اب سعودیہ اور بحرین جو سودا بازی کرنے آئے ہیں، وہ بھی کسی سے ٖڈھکی چھپی نہیں۔ ان خیالات کا اظہار انہوں نے 23 مارچ کے سلسلہ میں ایم ڈبلیو ایم اسلام آباد کے زیراہتمام منعقدہ ’’استحکام پاکستان سمینار‘‘ سے خطاب کے دوران کیا۔ علامہ امین شہیدی نے کہا کہ کیا ہماری افواج نے ساری دنیا کا ٹھیکہ لے رکھا ہے۔ صومالیہ، فلسطین، سعودیہ جہاں بھی عسکری قوت ضرورت ہو، ہماری افواج کو وہاں بھیج دیا جانا نہ عقلمندی کا تقاضا ہے اور نہ ہی ضرورت۔ انہوں نے کہا نجدی و امریکی مفادات کے حصول کے لیے طالبان نے بےگناہ انسانی جانوں کے خون سے ہاتھ رنگنے کی جو مشق شروع کر رکھی ہے، اس کا شریعت سے کوئی تعلق نہیں۔ یہ لوگ یہود و کفار سے بھی بدتر ہیں۔ ان مٹھی بھر افراد سے ایک ایٹمی طاقت کے برابری کی بنیادوں پر مذاکرات حکومت کی بزدلی کا بین ثبوت ہے۔
ایم ڈبلیو ایم پنجاب کے ترجمان علامہ محمد اصغر عسکری نے کہا کہ پاکستان دنیا کا وہ واحد ملک ہے جو نظریہ اسلام کی بنیاد پر وجود میں آیا، مگر ہماری بدقسمتی کہ یہاں پر اسلام نام کی کوئی شے نہیں۔ اسلام کے نام پر جس وحشت و حیوانیت کو متعارف کرایا جا رہا ہے، اس کا اسلام سے کوئی دور کا بھی واسطہ نہیں۔ انہوں نے کہا آج تجدید عہد کا دن ہے اور ہم نے مل کر یہ عہد کرنا ہے کہ پاکستان کو ایک ایسی ریاست بنائیں گے جو حقیقی معنوں میں قائد و اقبال کے خوابوں کی تعبیر ہو۔
سیمینار سے خطاب کرتے ہوئے تحریک منہاج القرآن کے رہنما عمر ریاض عباسی نے کہا کہ اس ملک میں دین، وردی اور سیاست کے نام پر بے دریغ لوٹ مار کی گئی ہے۔ ٹورازم کے نام پر سعودیہ جو پیسہ کماتا ہے اس کا تیس فیصد پاکستان کے مدارس پر لگایا جاتا ہے۔ وفاقی دارالحکومت اسلام آباد میں لال مسجد میں ایک ایسے گروہ کو پروان چڑھایا گیا، جس کا مقصد ایک مخصوص مسلک کی بالادستی تھی۔ وہاں کے مولانا آئین کو غیر شرعی کہہ کر کیا ثابت کرنا چاہتے ہیں۔ انہوں نے کہا جو وحشی انسانی سروں کے ساتھ فٹ بال کھیلیں، ان کے ساتھ مذاکرات کی بات لمحہ فکریہ ہے۔
پاکستان مسلم لیگ قاف کے رہنما سجاد بخاری نے کہا کہ پاکستان میں ہمیشہ موروثی سیاست کو فروغ ملا۔ حکومتیں نسل در نسل منتقل ہوتی رہیں۔ پاکستان کو اس وقت جن مشکلات کا سامنا ہے، اس کا ایک سبب یہ بھی ہے۔ انہوں نے کہا کہ پاکستان کے ہر کونے میں دہشتگردوں کے خلاف بلاتخصیص کارروائی کی جانی چاہیے، تاکہ اس ملک سے انتہا پسندی کا خاتمہ ہوسکے اور ہمارا ملک امن کا گہوارہ بنے۔ سمینار کے اختتام قومی شخصیات اور شہداء کو خراج تحسین پیش کرنے کے لیے شمعیں روشن کی گئیں۔
وحدت نیوز(مظفرآباد) مجلس وحدت مسلمین آزادکشمیر نے ریاست بھر میں شجرکاری مہم کا آغاز کردیا۔ریاستی سیکرٹری جنرل علامہ سیدتصور نقوی الجوادی نے وحدت سیکرٹریٹ کے سبزاہ زار میں پودا لگا کر ریاست گیر شجرکاری مہم کا افتتاح کردیا۔تمام اضلاع میں پارٹی دفاتر، تعلیمی اداروں ، مذہبی اداروں سمیت عوامی سطح پربھرپور شجرکاری کی جائے گا۔ مجلس وحدت مسلمین نے شعبہ ویلفےئر کے سیکرٹری سید محسن رضا سبزواری ایڈوکیٹ کو شجرکاری مہم کا انچارج بنا دیا گیا۔تمام اضلاع میں شجرکاری مہم بھرپورجوش وخروش اور بھرپور ملی جذبے کیساتھ کرنے کا عزم کیا گیا۔مجلس وحدت مسلمین ریاستی سیکرٹری جنرل علامہ سیدتصور نقوی الجوادی نے تمام محب وطن شہریوں سے اپیل کرتے ہوئے کہا کہ موجودہ ماحولیاتی آلودگی کے دور میں کم ازکم ایک پودہ لگانا ہر شہری پر فرض ہے۔لہذاہرشہری اس قومی عبادت میں بھرپور حصہ لے۔
وحدت نیوز(فیصل آباد) مجلس وحدت مسلمین پاکستان پنجاب (فیصل آباد) کے زیر اہتمام ڈسٹرکٹ پریس کلب فیصل آباد میں 23مارچ یوم پاکستان کے عنوان سے آزاد پاکستان سیمینارمنعقد کیا گیا . سیمینار سے ایم ڈبلیو ایم کے صوبائی سیکریٹری جنرل حجتہ الاسلام علامہ عبد الخالق اسدی نے خطاب کرتے ہوئے کہاکہ پاکستان شیعہ اور سنی نے مل کر بنایا تها اور آج پھر اس پاک سرزمین کو دهشتگردی سے پاک کرنے کے لیے بھی مل کر کردار ادا کرنا ہوگا، جہاد کے نام پر پوری دنیا میں دہشت گردی کی گئ لیکن اب وه وقت آگیا ہے کہ شیعہ اور سنی کو متحد ہو کر پاکستان کی گلیوں میں امن لانا ہوگا هم پاکستان کے شهدا کو خراج تحسین پیش کرتے ہیں طالبان کے ساتھ مذاکرات شهدا کے خون کے ساتھ دهوکہ ہے، پوری پاکستانی قوم نواز حکومت سے مطالبہ کرتی ہے کہ شہدا کے کے قاتلوں کے خلاف سخت کارروائی کی جائے. سیمینار میں تحریک منہاج القرآن، علماء مشائخ کونسل، متحده امن کمیٹی، قرآن اکیڈمی کے اکابرین نے خطاب کیا. سیمینار کے اختتام پر علامہ عبد الخالق اسدی نے پریس کلب میں پرچم کشائی کی اور شجر کاری مہم کا آغاز کیا۔
وحدت نیوز(ڈیرہ اسماعیل خان) مجلس وحدت مسلمین ڈیرہ اسماعیل خان کے ضلعی جنرل سیکرٹری علامہ زاہد علی جعفری نے کہا ہے کہ ایم ڈبلیوایم خیبر پختونخواہ کے بلدیاتی انتخابات میں بھرپور حصہ لے گی۔ ان خیالات کا اظہار انہوں نے نمائندہ اسلام ٹائمز سے گفتگو کرتے ہوئے کیا۔ انہوں نے کہا کہ خیبر پختونخواہ میں سیاسی میدان خالی چھوڑنے کی وجہ سے ہی ملت تشیع مصائب و آلام کا نشانہ بنتی رہی۔ انہوں نے کہا ہے کہ قومی و صوبائی اسمبلی کے انتخابات میں حصہ لینا دورس نتائج کا حامل فیصلہ تھا۔
انہوں نے کہا کہ بلوٹ، پہاڑ پور میں مخدوم خاندان کے سیاسی طور پر مستحکم ہونے کی وجہ سے وہاں حالات خراب نہیں ہوئے، جبکہ سٹی سمیت وہ علاقے جہاں اہل تشیع سیاسی حوالے سے کمزور تھے، ملت تشیع کی نسل کشی کی گئی۔ انہوں نے کہا کہ بلدیاتی انتخابات میں جمعیت علمائے اسلام، پیپلز پارٹی اور اے این پی پر مشتمل سہ جماعتی اتحاد نے رابطہ کیا، تو ایم ڈبلیو ایم انتخابی حکمت عملی پر غور کرے گی۔ انہوں نے کہا کہ جماعت اسلامی طالبان کی نمائندہ جماعت کا کردار ادا کر رہی ہے۔ عوام، اداروں اور میڈیا کے سامنے عیاں ہے کون دہشت گرد ہیں اور کون امن پسند۔
ایک سوال کے جواب میں انہوں نے کہا کہ ایم ڈبلیو ایم کو ٹلی امام حسین (ع) کے حوالے سے پی ٹی آئی حکومت کے اقدام کی شدید مذمت کرتی ہے اور حکومت سے مطالبہ کرتی ہے کہ کوٹلی امام حسین (ع) جو بنام وقف امام حسین (ع) تھی کی ملکیت کو اسی طرح برقرار رکھا جائے، جبکہ خیبر پختونخواہ کی حکومت نے اسے اپنی ملکیت میں لے لیا ہے۔ انہوں نے کہا کہ ایم ڈبلیو ایم ملت کے حقوق پر کوئی سمجھوتہ نہیں کرے گی۔
