The Latest
وحدت نیوز(لاہور)مجلس وحدت مسلمین پاکستان کے سیکرٹری اطلاعات سید مہدی عابدی نے پریس کلب لاہور کے نومنتخب صدر ارشد انصاری اور نائب صدر افضال طالب اسلام آباد پریس کلب صدر شہریار اور نائب صدر باقر سجاد اور دیگر منتخب اراکین کو ان کی کامیابی پر مبارک باد دیتے ہوئے کہا کہ نومنتخب صدور اور ان کے اراکین کابینہ ملک میں آزاد صحافت اور صحافت کے مقدس پیشہ سے وابسطہ افراد کی فلاح بہبود اور اُن کے حقوق کے لئے اپنی جدوجہد جاری رکھتے ہوئے مظلوموں کی آواز کی حقیقی ترجمانی کریں گے۔ مجلس وحدت مسلمین پاکستان حق اور سچ کی سفر میں صحافی برادری کے شانہ بشانہ کھڑی ہے خداوند کریم ان تمام نومنتخب دوستوں کو پاکستان میں حقیقی آزادی صحافت کی ترجمانی اور معاشرے میں سے ظلم و ناانصافی کے خاتمے میں اپنا کردار ادا کرنے کی توفیق دیں۔
وحدت نیوز(گلگت) مجلس وحدت مسلمین گلگت ڈویژن کی جانب سے یتیم، مسکین اور ضرورت مند مستحق بچوں کیلئے خصوصی وظائف کا اجراء کیا گیا ہے۔ اس سلسلے میں ایم ڈبلیو ایم کے صوبائی سیکرٹریٹ گلگت میں ایک تقریب منعقد ہوئی جس میں علاقہ بھر سے منتخب شدہ مستحقین اور یتیم بچوں نے شرکت کی۔ اس موقع پر ایم ڈبلیوایم کے صوبائی سیکرٹری جنرل شیخ نیئرعباس مصطفوی، شیخ بلال سمائری اور شیخ احمد نوری نے مستحقین میں خصوصی وظائف تقسیم کئے۔ اس موقع پر اپنے مختصر خطاب میں شیخ نیئرعباس مصطفوی کا کہنا تھا کہ ایم ڈبلیوایم عوامی فلاح و بہبود کے مزید منصوبوں پر کام شروع کریگی اور عوام کی خدمت ہمارا شعار ہے۔
وحدت نیوز(ملتان) مجلس وحدت مسلمین کے یوتھ ونگ کے شعبہ وحدت اسکاوٹس کے ضلعی اسکاوٹ لیڈرز کی کانفرنس ملتان میں منعقد ہوئی۔ کانفرنس میں پنجاب بھر سے اکثر اضلاع کے اسکاوٹ لیڈرز اور انکے معاونین نے شرکت کی۔ وحدت اسکاوٹس کے ضلعی لیڈرز کی کانفرنس، وحدت یوتھ ونگ کے مرکزی سیکریٹریٹ، ملتان میں منعقد ہوئی۔ پنجاب کے اسکاوٹ لیڈرز کے اجلاس میں ایم ڈبلیو ایم پنجاب کے سیکرٹری جنرل علامہ عبدالخالق اسدی نے خصوصی طور پر شرکت کی اور رضاکاروں سے خطاب کیا۔ لیڈرز کانفرنس کے منتظم اور وحدت اسکاوٹس پنجاب کے چیف جناب تنصیر حیدر کے علاوہ مجلس وحدت مسلمین پاکستان کے یوتھ ونگ کے مسئول سید فضل عباس ایڈووکیٹ نے اسکاوٹنگ کے کردار اور امت مسلمہ کے لیے نوجوانوں کی بیداری کے حوالے سے گفتگو کی۔ کانفرنس کا آغاز ترانے سے ہوا اور اختتام دعائے امامؑ زمانہ سے۔
وحدت نیوز(کوئٹہ) مجلس وحدت مسلمین کوئٹہ ڈویژن کے سیکریٹری جنرل سید عباس علی موسوی اور کونسلر حلقہ نمبر 12 کربلائی رجب علی، کونسلر حلقہ نمبر 10 کربلائی عباس علی اور کونسلر حلقہ نمبر 9 سید مہدی نے ایس ایس جی سی کے اعلٰی حکام سے علاقے میں گیس پریشر کے کمی کی وجہ سے ملاقات کی اور مسائل سے آگاہ کیا۔ ایس ایس جی سی کے نمائندوں نے 3 بجے اپنے وعدے کے مطابق دورہ کیا اور جہاں گیس پریشر کی کمی تھی، وہاں گیس پریشر کو 2.5 تک بڑھا دیا۔ علاوہ ازیں ایس ایس جی سی کے حکام کا کہنا تھا کہ گیس پریشر سوئی سے کم آرہی ہیں۔ جسکی وجہ سے نہ صرف پی بی 2 بلکہ پورے بلوچستان کو گیس کی کمی کا سامنا کرنا پڑ رہا ہے۔ ایس ایس جی سی کے حکام محمد انور ناز اور میجر آصف علی نے مجلس وحدت مسلمین کے نمائندوں کو یقین دلایا کہ انشاءاللہ ہم سے جتنا ہوسکا تعاون کرینگے۔
وحدت نیوز(مظفر آباد) اربعین نواسہ رسول صلی اللہ علیہ وآلہ وسلم پر جس عشق وولا ء کا اظہار کیا گیا وہ تاریخ پاکستان میں ایک انمٹ نقش رہے گا۔حسینیت کے پروانوں نے یہ ثابت کر دیا استعمار وطاغوت کے ایجنٹ جتنے حربے مرضی استعمال کر لیں عزادار ی رکی ہے نہ رکے گی بلکہ عشق ومعرفت کا یہ کارواں بڑھتا ہی رہے گا ظلم وجبر کی آندھیاں اور طوفان اس شجرہ طیبہ کو جنبش نہیں دے سکتے جبکہ یزیدیت کا شجرہ ملعونہ ہمیشہ تنزلی کا شکار رہا ہے اور رہے گا ،جس طرح عزاء وماتم معرفت سے مشروط ہیں اسی طرح جشن میلاد کا تعلق بھی عشق ومعرفت سے ہے جو لوگ عقل ودانش سے عاری ہیں وہ کبھی عزاداری کی مجالس وجلوسوں پہ فتوے لگاتے ہیں کبھی جشن وجلوس میلاد پہ لیکن اس ملک کے باشعور شیعہ وسنی مسلمان عزاداری میں نواسہ رسول کا غم منانے اورایام ولادت میں جشن میلاد منانے میں ہمیشہ اکٹھے تھے ہیں اور رہیں گے ان خیالات کا اظہارMWMآزادکشمیر کے سیکرٹری جنرل مولانا سید تصور حسین جوادی النقوی نے ایک ویب سائیٹ سے انٹرویو میں کیا ،انہوں نے کہا کہ پاکستان کے چاروں صوبوں ریاست جموں وکشمیر ،گلگت بلتستان میں کہیں بھی شیعہ سنی کی کوئی جنگ ہے نہ کوئی مسئلہ ہے اصل مسئلہ ان لوگوں کا پیدا کردہ ہے جو اہل تشیع اور اہل تسنن کے مشترکہ دشمن اور صیہونی طاقتوں کے آلہ کار ہیں پاکستان شیعہ سنی بزرگان کی مشترکہ کاوشوں کا ثمر شیریں ہے لیکن تاریخ اس بات کی گواہ ہے کہ قیام پاکستان کی مخالفت کرنے والا ایک ایسا گروہ تھا جو نہ صرف پاکستان کو کفرستان کہتا تھا بلکہ بانی پاکستان بابائے قوم حضرت قائد اعظم محمد علی جناح کو کافر اعظم کہتا تھا آج وہی گروہ نام بدل کر کام کو جاری رکھے ہوئے شیعہ وسنی اختلافات کے نام پر ملک دشمنی میں طاغوت واستعمار کے لئے کام کر رہا ہے ۔
علامہ تصور نقوی نے کہا کہ آج پوری قوم علامہ راجہ ناصر عباس جعفری کی ولولہ انگیز قیادت پر فخر کر رہی ہے کہ انہوں نے شبانہ روز محنت سے پاکستان میں جہاں ملت تشیع کی عزت وسرفرازی کے لئے کام کیا وہیں شیعہ سنی مسلمانوں کے وحدت کے قیام کے لئے بھرپور اور مثالی کردار ادا کر کے تکفیریوں کو تنہا کردیا ہے انشاء اللہ اس اتحاد ووحدت کا تسلسل ہر سطح پر قائم رہے گا ۔انہوں نے ایک سوال کے جواب میں کہا کہ نہ تو محرم اور صفر المظفر کی مجالس وعزاداری صرف شیعہ سے مخصوص ہے اور نہ ہی ربیع الاول میں جشن میلاد اور جلوس وریلیاں اہل تسنن کے ساتھ مخصوص ہیں جس طرح رسول معظم سب کے رسول اور بانی اسلام ومحسن انسانیت ہیں اسی طرح فرزند رسول حضرت امام حسین علیہ السلام بھی امام کائنات اور محسن اسلام ہیں لہذا یہ غم بھی مشترک ہے اور میلاد کی خوشی بھی مشترک ہے ،مجلس وحدت مسلمین نے فیصلہ کیا ہے کہ پورے ملک اور آزادکشمیر بھر میں میلاد کے جلسے جلوس مشترکہ طور پر منائے جائیں گے اہل تشیع ماضی کی روایات کے عین مطابق بلکہ پہلے سے بڑھ چڑھ کر ان جلوسوں میں شریک ہوں گے ۔آزادکشمیر کے تمام اضلاع کو اس اسلسلہ میں باضابطہ ہدایات جاری کردی گئی ہیں کہیں چھوٹی سے چھوٹی سطح پر منعقدہ محفل نعت وجشن میلاد سے لیکر بارہ ربیع الاول کی ریلیوں تک ہر سطح پر اہل تشیع بھی اہل تسنن کے ساتھ نہ صرف شریک رہیں گے بلکہ مجلس وحدت مسلمین کے کارکنان ہر سطح پر رجاکارانہ خدمات بھی سر انجام دیں گے اور انشاء اللہ ان جلوسوں کے ذریعے ہم تکفیری ٹولے کو یہ میسج دیں گے کہ شیعہ سنی مسلمان متحد ہیں اور کوئی طاقت ان میں اختلاف وتفرقہ ایجاد کرنے میں کامیاب نہیں ہوسکتی ہے ۔ علامہ تصور نقوی نے مزید کہا کہ اس صدی کے مجدد اور بانی انقلاب اسلامی حضرت آیت اللہ خمینی قدس سرہ کے حکم کے مطابق ۱۲تا ۱۷ ربیع الاول ہفتہ وحدت نہایت عقیدت واحترام سے منایا جائے گا اس سلسلہ میں تمام مساجد امام بارگاہوں اور دینی مراکز پر اجتماعات منعقد کئیے جائیں گے جن میں شیعہ وسنی علامء کے خطابات ومواعظ اور نعت وقصیدہ خوانی کی محفلوں کا انعقاد ہوگا اس سلسلہ میں مرکزی پروگرام مظفرآباد میں منعقد ہوگا جس میں انشاء اللہ نامور علماء خطاب فرمائیں گے ۔
وحدت نیوز(اسلام آباد) مجلس وحدت مسلمین پاکستان اور سنی اتحاد کونسل نے پاکستانی عوام کو دہشت گردی کے عفریت کے خوف سے نجات دلانے اور قائداعظم محمد علی جناح کے پاکستان کو اس کی اصلی حالت میں لوٹانے کے کیلئے مشترکہ جدوجہد کا اعلان کر دیا، یہ اعلان ایم ڈبلیو ایم کے مرکزی سیکرٹری جنرل علامہ ناصر عباس جعفری اور پاکستان سنی اتحاد کونسل کے چیئرمین صاحبزادہ حامد رضا نے مجلس وحدت مسلمین کے دفتر میں ایک مشترکہ پریس کانفرنس میں کیا۔ پریس کانفرنس میں ایم ڈبلیو ایم کے مرکزی سیکرٹری امور خارجہ علامہ سید شفقت حسین شیرازی، سیکرٹری سیاسیات سید ناصر عباس شیرازی، معاون سیکرٹری سیاسیات سید اسد عباس نقوی اور سنی اتحاد کونسل کی رابطہ کونسل کے رکن صاحبزادہ عمار سعید بھی موجود تھے۔
پریس کانفرنس سے خطاب کرتے ہوئے علامہ ناصر عباس جعفری نے کہا کہ کسی بھی معاشرے میں ریاست اور نظام کی اس لئے ضرورت ہوتی ہے کہ معاشرے میں امن ہو، انصاف ہو، جنگل کا قانون نہ ہو، انتہائی افسوس کیساتھ کہنا پڑتا ہے کہ ہمارے ہاں ریاست اور نظام نام کی کوئی چیز نہیں، مادر وطن کے باوفا بیٹے ہونے کے ناطے ہماری ذمہ داری ہے کہ محبت اور اخوت کا پیغام دیں، فتنہ و فساد کا سر کچل دیں اور ملکی سالمیت و استحکام کیلئے کام کریں, یہ اجتماعی ذمہ داری ہے انفرادی نہیں، اس لئے ہم نے فیصلہ کیا ہے کہ وہ قوتیں جنہوں نے پاکستان بنایا تھا وہی مل کر پاکستان کو بچانے کی جدوجہد کریں، انشاءاللہ شیعہ اور سنی اس جدوجہد میں ہراول دستے کا کردار ادار کریں گے، ہمارا تعلق فرقہ سے ہے فرقہ واریت سے نہیں، ہم پاکستان میں بسنے والے ہندووں اور عیسائیوں سمیت ہر مکتب فکر کے افراد کو ساتھ لے کر چلیں گے انشاء اللہ 5 جنوری کو ایم ڈبلیو ایم، سنی اتحاد کونسل اور وائس آف شہدائے پاکستان کی جانب سے کنونشن سنٹر اسلام آباد میں منعقد ہونیوالا کنونشن ملکی تاریخ کا ایک اہم سنگ میل ثابت ہوگا۔ انہوں نے کہا کہ ہم سب مل کر دہشت گردوں کا راستہ روکیں گے اور اپنی پرامن جدوجہد کے ذریعے حکمرانوں کو دہشت گردی کے حوالے سے پالیسیاں تبدیل کرنے پر مجبور کر دیں گے۔ انہوں نے چہلم امام حسین (ع) کی طرح ربیع الاول میں جشن عید میلادالنبی (ص) بھی مل کر اجتماعی قوت سے شان و شوکت کے ساتھ منانے کا اعلان کیا۔
پریس کانفرنس سے خطاب کرتے ہوئے سنی اتحاد کونسل کے چیئرمین صاحبزادہ حامد رضا نے کہا کہ پاکستان میں دہشت گردی کے خاتمہ، فرقہ واریت کے تدارک، امن و امان کی بحالی، عوام کو بنیادی سہولیات کی فراہمی اور غریب طبقہ کو انصاف مہیا کرنے میں حکومت کی گذشتہ چھ سات ماہ کی کارکردگی انتہائی مایوس کن ہے، حکومت کی جانب سے معاشرے میں اصلاح کا کوئی بھی پہلو نظر نہیں آتا، ہر قومی و عوامی ایشو پر حکومت کی کمزوریاں عیاں ہو رہی ہیں، وزیر خارجہ اور حادثاتی وزیر داخلہ میں اہم قومی ایشوز کے حوالے سے کوئی مثبت پالیسی دینے کی صلاحیت ہی نہیں، اس لیے قائداعظم محمد علی جناح کے پاکستان کو اس کی اصلی حالت میں لوٹانے کے لئے عوام کو خود ہی میدان میں آنا پڑے گا۔ انہوں نے کہا کہ اب موجودہ ملکی صورتحال پر کوئی بھی محب وطن پاکستانی خاموش نہیں رہ سکتا، حکمرانوں کو دہشت گردوں کے خلاف اپنی رٹ دکھانا ہوگی۔ ان کا کہنا تھا کہ پہلے دہشت گردوں کے ساتھ مذاکرات کا واویلا کیا گیا، مذاکرات کے راستے بند ہونے کے بعد اب ہر طرف گھپ اندھیرا ہے، کسی کے علم میں نہیں کہ حکمران کیا کر رہے ہیں، اس صورتحال نے عوام کو تذبذب میں مبتلا کر رکھا ہے۔
ان کا کہنا تھا کہ انشاءاللہ مجلس وحدت مسلمین، سنی اتحاد کونسل اور وائس آف شہدائے پاکستان عوام کو ایک ایسا پلیٹ فارم مہیا کریں گے جس سے بلند ہونیوالی آواز پر کان دھرنا حکومت کی مجبوری بن جائے گی، انشاءاللہ پانچ جنوری کو اسلام آباد میں منعقد ہونیوالا کنونشن ملکی تاریخ کا رخ موڑ دے گا، جس میں ہم اپنے آئندہ کے لائحہ عمل کا اعلان کریں گے، اس موقع پر ایم ڈبلیو ایم کے سیکرٹری سیاسیات سید ناصر عباس شیرازی کا کہنا تھا کہ اس اہم کنونشن میں پاکستان میں دہشت گردی کا نشانہ بننے والے شیعہ و سنی شہداء کے لواحقین کے علاوہ پاک فوج اور پولیس کے شہداء کے لواحقین اور اقلیتی برادری کے متاثرین کو بھی مدعو کیا جائے گا۔
وحدت نیوز (کراچی) کراچی سےبلدیاتی انتخابات میں بھر پو ر حصہ لیں گے،مختلف یونین کونسلز میں آزاد اور مشترکہ حیثیت سے حصہ لینے کے لئے حکمت عملی مرتب کر لی ہے ، سنی اتحاد کونسل ، پاکستان پیپلز پارٹی ، عوامی نیشنل پارٹی اور دیگر سیاسی جماعتوں سے مسلسل رابطے جاری ہیں، پہلوان گوٹھ کے حلقے سے بھی بلدیاتی انتخابات میں بھر پور
حصہ لیا جائے گا، ان خیالات کا اظہار مجلس وحدت مسلمین کراچی ڈویژن کے سیکریٹری امور سیاسیات علی حسین نقوی نے پہلوان گوٹھ کے دورے کے دوران تنظیمی کارکنان سے خظاب کر تے ہو ئے کیا ۔
ان کا کہنا تھا کہ مجلس وحدت مسلمین پاکستان کر اچی میں اپنی سیاسی شناخت کے ساتھ بلدیاتی انتکابات میں بھر پور حصہ لینے کے لئے تیار ہے ، کراچی کے چھ اضلاع کی مختلف یونین کونسلز میں آزاد اور مشترکہ پینلز کی تشکیل کے حوالے سے مختلف سیاسی جماعتوں کے ساتھ رابطے جاری ہیں انشاء اللہ جلد واضح حکمت عملی کا اعلان کر دیا جائے گا ، پہلوان گوٹھ میں بھی ایم ڈبلیو ایم بلدیاتی الیکشن میں حصہ لے گی۔
وحدت نیوز(لاہور) مجلس وحدت مسلمین پاکستان پنجاب کے صوبائی سیکرٹریٹ میں قائداعظم محمد علی جناح کی یوم پیدائش کے حوالے سے خصوصی تقریب کا اہتمام ہوا۔ تقریب کے مہمان خصوصی علامہ عبدالخالق اسدی جبکہ صدارت علامہ ابوذر مہدوی نے کی۔ تقریب میں ضلع لاہور کے تمام ممبران اور علاقہ کے عمائدین شریک ہوئے۔ تقریب سے خطاب کرتے ہوئے سید اسد عباس نقوی ڈپٹی سیکرٹری جنرل مجلس وحدت مسلمین پنجاب نے کہا کہ پاکستان کو درپیش مشکلات کی اصل وجہ بانی پاکستان بابائے قوم قائداعظم محمد علی جناح کے زریں اصولوں پر عمل پیرا نہ ہونا ہے۔ انہوں نے کہا کہ اس ملک کو قائداعظم اور علامہ اقبال کی امنگوں کے مطابق بنانے کیلئے بہت سے اہم فیصلے کرنے ہوں گے، قائداعظم کے پاکستان میں شدت پسندوں کیلئے کوئی جگہ نہیں، جو کوئی بھی اسلحہ اور بندوق کے زور پر بات کرتے ہیں وہ نہ پاکستان کے خیر خواہ ہیں نہ اسلام کے۔
سید اسد عباس نقوی نے کہا کہ پاکستان مسلمانوں کیلئے بنا تھا اور مسلمان کبھی بھی شدت پسند نہیں ہوتے۔ ان کا کہنا تھا کہ آج قائدِاعظم اور علامہ اقبال کی روح ہم سے سوال کر رہی ہے کیا ہم نے اس لئے پاکستان بنایا تھا کہ یہاں مسلمان مسلمان کے گلے کاٹیں۔ اُن کا کہنا تھا کہ پاکستان کی غیور عوام کو قائداعظم کے اصل پاکستان کا چہرہ سامنے لانے کیلئے ان حیوان صفت درندوں دہشت گردوں کیخلاف اٹھ کھڑا ہونا ہو گا تاکہ پاکستان میں امن کا بول بالا ہو، اس کے ساتھ ان جاگیرداروں اور سرمایہ کاروں کے تسلط سے بھی وطن عزیز کو نکالنا ہو گا جو ملک کی ترقی کیلئے نہیں بلکہ دولت اور سرمایہ بڑھانے کیلئے اقتدار پر قابض ہوتے ہیں۔ تقریب سے ایم ڈبلیو ایم پنجاب کے سربراہ علامہ عبدالخالق اسدی نے خطاب کرتے ہوئے کہا کہ آج کا دن ہماری اقلیتی برادری مسیحی بھائیوں کیلئے بھی خوشی کا دن ہے، حضرت عیسیٰ کی یوم ولادت باسعادت کا دن ہے۔
انہوں نے کہا کہ جو مسلمانوں کے بھی پیغمبر اور نبی تھے اور ساتھ میں پاکستان کے اس عظیم رہنما کی ولادت کا دن بھی ہے جس کی بدولت آج ہم سکھ کا سانس لے رہے ہیں، قائداعظم محمد علی جناح نے برصغیر کے مسلمانوں کیلئے اپنی آخری سانس تک جدوجہد کر کے وطن عزیز پاکستان کو ہمارے لئے حاصل کیا لیکن افسوس کا مقام یہ ہے کہ آج ہم نے قائد کے رہنما اصولوں کو فراموش کر کے ملک کو اغیار کے رحم و کرم پر اس ملک کو چھوڑا ہوا ہے، ہمارے سیاستدان کرپٹ، ہمارے ادارے زبوں حالی کا شکار ہیں، ہمیں آج یہ فیصلہ کرنا ہو گا کہ قائداعظم کا پاکستان چاہئے یا انتہا پسندوں کا؟ تقریب کے اختتام پر وطن عزیز کی سلامتی اور استحکام کیلئے علامہ ابوذر مہدوی نے خصوصی دعا کی۔
وحدت نیوز(راولپنڈی) ڈھوک حسو میں نامعلوم موٹر سائیکل سواروںکی بے حم گولیوںکا نشانہ بناے بننے والے ایم ڈبلیو ایم کے کارکن مظہر علی مبارک شہیدکا جسد خاکی سینکڑوں سوگواروں کی موجودگی میں آہوں اور سسکیوں کی فضا میں ڈھوک حسو کے قبرستان میں سپرد خاک کر دیا گیا ، شہید کی نما ز جنازہ مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری کی اقتداء میں ایم سی گرائونڈ ڈھوک حسو میں ادا کی گئی جس میں ایم ڈبلیو ایم کے دیگر راہنمائوں مولانا سید اسرار حسین گیلانی،علامہ علی شیر انصاری اور مولانا فخر عباس علوی ،سمیت علمائے کرام، ریسکیو گیارہ بائیس کے افسران و ملازمین ، معززین علاقہ اور مختلف مکاتب فکر کی شخصیات نے شرکت کی ، شہید مظہر علی مبارک مجلس وحدت مسلمین پاکستان کے لیگل ایڈوائزر اور سابق امیدوار برائے قومی اسمبلی اصغر علی مبارک کے بھائی اور ریسکیو گیارہ بائیس کے ملازم تھے، ان پر بیس دسمبر کو ڈھوک حسو میں نامعلوم موٹر سائیکل سواروں نے فائرنگ کی ٔجس کے نتیجے میں وہ شدید زخمی ہو گئے تھے ، انہیں علاج معالجے کیلئے ڈسٹرکٹ ہیڈ کوارٹر ہسپتال راولپنڈی داخل کرایا گیا جہاں وہ پانچ روز تک موت و حیات کی کشمکش میں مبتلا رہنے کے بعد اپنے خالق حقیقی سے جا ملے ، مجلس وحدت مسلمین پاکستان سمیت مختلف مذہبی ، سیاسی و سماجی تنظیموں نے مظہر علی مبارک کی ٹارگٹ کلنگ کی پر زور مذمت کرتے ہوئے سفاک قاتلوں کی فوری گرفتاری کا مطالبہ کیا ہے ۔
وحدت نیوز(راولپنڈی) مجلس وحدت مسلمین پاکستان کے مرکزی سیکرٹری جنرل علامہ ناصرعباس جعفری نے کہا ہے کہ راولپنڈی میں اربعین شہدائے کربلا کے تاریخی جلوس عزا میں لاکھوں عاشقان حسین ؑ کی شرکت کربلائے عصر میں یزیدیت کی عبرتناک شکست اور حسینیت کی فتح کا اعلان ہے، جلوس میں مردوخواتین م بزرگوں اور بچوں نے ہزاروں کی تعداد میں شریک ہو کر عزاداری مظلوم کربلاکے خلاف ہونیوالی ناپاک سازش کو ناکام بنایا اور حسینی ؑ و زینبی ؑ کردار ادا کے ثابت کر دیا کہ جب تک اس پاک دھرتی پر ایک بھی حسینی زندہ ہے ، نواسہ رسول کی عزاداری رہے گی ، وہ راولپنڈی کے مرکزی جلوس اربعین کے اختتام پر میڈیا نمائندوں سے بات چیت کر رہے تھے ، انہوں نے کہا کہ راولپنڈی کے اس تاریخی جلوس میں تمام تر خطرات اور شدت پسندوں کی جانب سے ملنے والی دھمکیوں کے باوجود کنیزان زینب و رباب نے اپنے شیر خوار بچوں کے ہمراہ ہزاروں8 کی تعداد میں شریک ہو کر ثابت کیا کہ کہ جب بھی حسینیت پر کوئی آنچ آئی تو وہ گھروں میں نہیں بہ بیٹھیں گی بلکہ ثانی زہرا ؑ کی سنت ادا کرتے ہوئے سیدالشہدا کی عزادری کا تحفظ کریں گی ، ایم ڈبلیو ایم کے مرکزی سیکرٹری جنرل نے کہا کہ دنیا نے دیکھا کہ جو عناصر جو عزادری کے خاتمہ ، اسے محددو کرنے اور جلوسوں کے روٹس تبدیل کرانے کی سازشیں کر رہے تھے آج کی اس عبرتناک شکست کے بعد اپنے زخم چاٹنے پر مجبور ہیں ، عاشقان کربلا نے اس جلوس کو باوقار انداز میں نکال کر بتلا دیا کہ انہیں دنیا کی کوئی طاقت خوفزدہ نہیں کر سکتی،ہماری جان، ہمارا مال ، ہمارا سب کچھ حسین ؑ کا ہے ، غم حسین ؑ ہماری زندگی ہے ، یہ وہ غم ہے جو انسانوں کو انسانیت کا شعور دیتا ہے ، ہم سب کچھ قربان سکتے ہیں لیکن اس غم کو اپنے سینوں سے جدا نہیں کر سکتے۔
انہوں نے کہا کہ ماتم کے لئے اٹھنے والا عزادار کا ہر ہاتھ یزیدیت کے لئے طماچہ ہے ، یہ نوحے یہ ماتم ثانی زہراؑ کی سنت ہے جسے اس معظمہ بی بی نے کربلا سے کوفہ ، کوفہ سے شام ، شام سے کربلا اور کربلا سے مدینے تک جاری رکھا ، آج دنیا پر واضح ہو گیا کہ ایک طرف یزیدی ہیں اور دوسری طرف حسینی ، یزیدی طبقہ خود پر اہلسنت کا لیبل لگا کر اپنے مکروہ عزائم کی تکمیل کے لئے سرزمین پاکستان پر فرقہ واریت کی آگ بھڑکانہ چاہتا ہے، سانحہ عاشورہ کے بعد بردارن اہلسنت نے اپنے عملی کردار سے ثابت کیا کہ وہ حسینی ہیں ، جو عزادری کی مخالفت کرتا ہے وہ یزیدی ہے ، یزید پر کل بھی لعنت تھی ، آج بھی ہے اور قیامت تک لعنت اس کا مقدر رہے گی، علامہ ناصر عباس جعفری نے کہا کہ ہزاروں افراد کا یہ عظیم ا لشان جلوس کتنا پر امن تھا ، کہیں کوئی پتہ نہیں ہلا ، کہیں کسی کا کوئی نقصان نہیں ہوا ، کسی کو نقصان پہنچانا حسینیوں کی فطرت میں ہی نہیں ، یوم عاشور کو فساد برپا کرنے کے لئے اسی یزیدی ٹولے نے دکانیں جلائیں ، اور بے گناہ عزادروں کو جیلوں میں ڈالا گیا ، انشاء اللہ ہم ایک ایک ماتمی اور عزادار کو آزاد کرائیں گے پنجاب اور مرکز کی حکومتیں بھول جائیں کہ وہ انہیں مزید جیلوں میں رکھ سکیں گی ، جس جیل میں عزادروں کو بند رکھا گیا وہ جیل نہیں رہے گی ، یہ بے گناہ اسیر ہمارے سر کا تاج ہیں،انشاء اللہ ان کی با عزت رہائی کے لئے ہر میدان میں یزیدیت سے لڑیں گے ۔
