The Latest
وحدت نیوز(کراچی) ملک میں حکومت نام کی کوئی شہ دکھائی نہیں دیتی ، شریف برادران نے دہشت گردوں کے سامنے عملی طور پر ہتھیار ڈال دیئے ہیں ، جو حکمران اپنے صوبے میں قیام امن کے لئے دہشت گردوں کو بھتہ دیتے ہوں وہ عوام الناس کی جان و مال کے تحفظ کی ذمہ داری کس طرح پوری کر سکتے ہیں،علامہ ناصرعباس آف ملتان کی شہادت ملت تشیع کا مشترکہ نقصان ہے ، شہید کے اہل خانہ کے غم میں برابر کے شریک ہیں۔ ان خیالات کا اظہار مجلس وحدت مسلمین پاکستان صونہ سندھ کے سیکرٹری جنرل علامہ مختار امامی نے معروف ذاکر اہل بیت علیہ السلام علامہ ناصر عباس آف ملتان کی لاہور میں المناک شہادت پروحدت ہاوس کراچی سے جاری ایک بیان میں کہا۔
ان کا کہنا تھا کہ وفاقی حکومت مسلسل دہشت گردوں کے ساتھ مذاکرات مذاکرات کا کھیل کھیلنے کی کوشش میں مصروف ہے ، جب کہ دہشت گرد مسلسل ہمیں لاشوں پر لاشوں کے تحفے بھیجے جا رہے ہیں ، اسٹیٹ دہشت گردوں اور دہشت گردوں دونوں پر قابو پانے میں یکسر ناکام ہو چکی ہے ، حالات اس نہج پر پہنچ چکے ہیں کہ عوام اب خود اپنے حقوق کے حصول کے لئے جدوجہد کا آغاز کریں ، ملک کے دیگر شہروں کی طرح اب لاہور جیسے پر امن شہر میں ٹارگٹ کلنگ کی کاروائیاں باعث تشویش ہیں ، اگر شریف برادران وطن عزیز کو اس کا امن نہیں لوٹا سکتے تو مسند اقتدار کو خیر باد کہ دیں ، عوام ان نا اہل حکمرانوں سے مایوس ہو چکے ہیں۔
علامہ ناصر عباس آف ملتان کی المناک شہادت نہ فقط ذاکرین کا بلکہ تمام ملت تشیع کا مشترکہ عظیم نقصان ہے ، جس کی جتنی مذمت کی جائے کم ہے ، غم کی اس گھڑی میں مجلس وحدت مسلمین کے تمام علماء ، اکابرین ، ذمہ داران اور کارکنان علامہ ناصر عباس کے اہل خانہ کے غم میں برابر کے شریک ہیں ان کی جوار آئمہ معصومین علیہ السلام میں جگہ کے حصول کے لیئے دعا گو ہیں۔
وحدت نیوز(لاہور) علامہ راجہ ناصرعباس جعفری سربراہ مجلس وحدت مسلمین پاکستان نے راولپنڈی میں نہتے عزادارں پر خود کش حملے کی شدید مذمت کرتے ہوئے کہا کہ پاکستان میں اس وقت عملاً دہشت گردوں کی حکومت ہے۔ جو بے گناہوں کا قتل عام کررہے ہیں۔حکومت نے مکمل طور پر دہشت گردوں کے آگے سرینڈر کر دیا ہے، لاہور میں مجلس وحدت مسلمین پنجاب کے صوبائی سیکرٹریٹ میں ہنگامی پریس کانفرنس سے خطاب کرتے ہوئےانہوں نے کہا کہ پنجاب حکومت راولپنڈی میں دہشت گردوں کے خلاف اقدامات کرنے کی بجائے شیعہ پڑھنے لکھے نوجوانوں، بزرگوں کو بلا جواز گرفتار اور ان پر بربریت کرنے میں لگی ہے۔
علامہ راجہ ناصر عباس جعفری کا کہنا تھا کہ موجودہ حکومت کو حق حکمرانی کا کوئی جواز نہیں۔ شہباز شریف وزیر اعلیٰ پنجاب نہیں وزیرِ خارجہ لگتے ہیں۔ راولپنڈی میں چہلم امام حسین پر کوئی قد غن لگانے کی کوشش کی تو پورے پاکستان سے ردِ عمل آئیگا۔دہشت گردوں اور انکے سرپرستوں کو مکمل تحفظ دیا جا رہا ہے۔ راولپنڈی دھماکہ تکفیری ٹولے کی سازش ہے۔ ان دہشت گردوں کیخلاف عملی قدم نہ اٹھا یا گیا تو ملک میں خانہ جنگی دورکی بات نہیں۔ ہزاروں پاکستانیوں کے قاتلوں سے مذاکرات آئین پاکستان اور اسلامی قوانین کی سراسر خلاف ورزی ہے۔ شہداء پاکستان کے وارثان کے زخموں پر نمک پاشی نہ کی جائے۔ ان کا کہنا تھا کہ کالعدم دہشت گرد جماعتوں کے کارکنان دہشت گردوں کے لئے سراغ رسانی کا کام کرتے ہیں۔ پاکستان کی شاہراہوں پر پُر تشدد مظاہرے کئے گئے۔ تکفیری نعرے لگے ۔لاہور میں ضابطہ اخلاق کی دھجیاں اڑائیں گئیں۔کیا لاہور کی انتظامیہ نے تکفیریوں کیخلاف کوئی ایکشن لیا۔؟لاہور سمیت ملک بھر میں ہمارے شہید علامہ ناصر عباس کی شہادت پر 18گھنٹے پر امن احتجاج ہوا نہ کسی کیخلاف نعرے لگے نہ قانون کو ہاتھ میں لینے کی کوشش کی گئی۔ ہماری امن پسندی کا جرم ہے کہ ہمیں دیوار سے لگانے کی سازش ہو رہی ہے۔راولپنڈی بم دھماکے کے ملزمان وہی سوچ و فکر کے حامل لوگ ہیں جو سانحہ عاشور پر فساد پھیلانے میں ملوث تھے۔ ان تکفیریوں کو سڑکوں پر شرابی، ڈاکو، رہزنوں کے گذرنے پر کوئی مخالف نہیں نواسہ رسول اور میلاد کے جلوسوں سے تکلیف ہے۔
وحدت نیوز(راولپنڈی) مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی نے گریسی لائن میں مجلس عزاء کے دوران ہونے والے بم دھماکے کے زخمیوں کی مقامی اسپتال میں عیادت کی اور زخمیوں کے اہل خانہ کو حوصلہ دیا ، اس موقع پر موجود میڈیا کے نمائندوں سے گفتگو کر تے ہو ئے علامہ امین شہیدی کا کہنا تھا کہ دہشت گرد تواتر کے ساتھ مکتب تشیع کو نشانہ بنا رہا ہے ، کبھی ٹارگٹ کلنگ تو کبھی خودکش حملوں کے ذریعے ہمارا متحان لینے کی کوشش کی جارہی ہے ، ہم نے پہلے بھی دو ٹوک الفاظ میںواضح کیا تھا پھر دوبارہ کر رہے ہیں کہ ، یہ بم دھماکے اور ٹارگٹ کلنگ کے واقعات ہمارے حوصلوں کو پست نہیں کر سکتے ، ہم کسی صورت عزاداری سید الشہداء علیہ السلام پر کوئی سمجھوتہ نہیں کریں گے، یہ عزاداری ہمارے قومی بقاء اور سلامتی کی ضامن ہے، ایک مرتبہ پھر میں وفاقی اور پنجاب حکومت کو متنبہ کر تا ہوں کہ ہوش کے ناخن لو دہشت گردوں سے آہنی ہاتھوں سے نمٹناوقت کی اہم ضرورت ہے ، مذاکرات کا راگ الاپنا بند کیا جائے ، عوام کی جان ومال کا تحفظ مذاکرات سے نہیں بلکے دہشت گردوں کے خلاف آپریشن سے مشروط ہے۔
وحدت نیوز(لاہور) مجلس وحدت مسلمین پنجاب کے ترجمان مظاہر شگری نے پشاور میں امریکی قونصلیٹ کی گاڑی سے دھماکہ خیز مواد بر آمد ہونے پر اظہار خیال کرتے ہوئے کہا ہے کہ سی آئی اے کے ایجنٹ ملک میں تخریب کاری کی وارداتوں میں ملوث ہیں جبکہ حکمرانوں اور قانون نافذ کرنے والے اداروں نے آنکھیں بند کر رکھی ہیں، دھماکہ خیز مواد کی برآمدگی لمحہ فکریہ ہے، وطن عزیز میں فرقہ وارانہ فسادات کروانے کے لئے دشمن قوتیں متحرک ہیں، اگر حکومت نے ان سازشوں کا قلع قمع نہ کیا تو شدید نقصان ہو گا۔ انہوں نے کہا کہ ارکان سینیٹ کی جانب سے ڈرون حملوں کو پاکستان کیلئے مفید قرار دینے والے یہ مت بھولیں کہ وہ امریکی سینیٹ کے نہیں بلکہ پاکستان کی سینیٹ کے رکن ہیں اور انہیں پاکستان کے مفاد میں بات کرنی چاہئے۔ انہوں نے کہا کہ امریکہ کھلم کھلاڈرون حملوں کے ذریعے ملکی حدود کی خلاف ورزی کر رہا ہے اور حملوں میں خواتین، معصوم بچوں کو شہید کر رہا ہے، امریکی نام نہاد جنگ نے ملکی معیشت کو 100 ارب ڈالر سے زائد کا نقصان پہنچایا اور 50 ہزار بے گناہ افراد کو نگل لیا ہے، ایک طرف امریکہ افغانستان سے انخلاء چاہتا ہے تو دوسری طرف وہ اپنی شکست کا بدلہ پاکستان سے لینا چاہتا ہے۔ ضرورت اس امر کی ہے کہ حکمران ہوش کے ناخن لیں اور فی الفور اس جنگ کو خیرباد کہہ دیں۔
وحدت نیوز(گوجرہ) مجلس وحدت مسلمین کے زیر اہتمام گوجرہ میں احتجاجی ریلی نکالی گئی۔ علامہ علی محمد شاکری نے مظاہرین سے خطاب کرتے ہوئے مطالبہ کیا کہ علامہ ناصرعباس کے قاتلوں کو گرفتار کیا جائے۔ ریلی کی قیادت ایم ڈبلیوایم کے تحصیل صدر سید امیرعلی شاہ اور ڈاکٹر آغا اسد علی نے کی۔ ریلی مختلف بازاروں سے ہوتی ہوئی چوک ملکانوالہ گوجرہ پہنچ کر احتجاجی جلسہ میں تبدیل ہو گئی۔ مظاہرے کے شرکا سے سید امیر علی شاہ اور ڈاکٹر آغا اسد علی سمیت دیگر مقررین نے خطاب کرتے ہوئے دہشت گردی کی پرزور مذمت کی اور حکومت سے مطالبہ کیا کہ فوری طور پر علامہ ناصر عباس کے قاتلوں کو گرفتار کر کے قرار واقعی سزا دی جائے تاکہ آئندہ کوئی بھی دہشت گرد کسی مسلمان کو قتل کرنے کی جرات نہ کرے۔ اس موقع پرپولیس کی بھاری نفری تعینات رہی۔
وحدت نیوز(راولپنڈی) راولپنڈی کی گریسی لائن میں موٹر سائیکل سوار خودکش حملہ آور نے امام بارگاہ میں گھسنے کی کوشش کی، تاہم ناکامی پر خود کو دھماکے سے اڑا دیا، دھماکے کے نتیجے میں ایس ایچ او سمیت 4 افراد جاں بحق اور تیرہ زخمی ہوگئے۔ راولپنڈی کی گریسی لائن میں واقع امام بارگاہ اثنا عشری کے قریب خودکش حملہ رات پونے دس بجے کیا گیا، دھماکہ اتنا شدید تھا کہ آس پاس کھڑی کئی گاڑیاں اور موٹر سائیکلیں مکمل طور پر تباہ ہوگئیں، سی پی او راولپنڈی کا کہنا ہے کہ خودکش حملہ آور موٹر سائیکل پر سوار تھا جس نے امام بارگاہ میں داخل ہونے کی کوشش کی، تاہم سکیورٹی پر مامور اہل کاروں نے اسے روکا تو اس نے خود کو دھماکے سے اڑا دیا۔ دھماکے میں جاں بحق اور زخمی ہونے والوں کو بے نظیر بھٹو ہاسپٹل پہنچایا گیا، زخمیوں میں ائیر پورٹ تھانے کے ایس ایچ او سمیت پانچ پولیس اہل کار بھی شامل ہیں، دھماکے کے بعد پولیس اور حساس اداروں نے علاقے کو گھیرے میں لے لیا اور تحقیقات کا آغاز کر دیا ہے۔
دیگر ذرائع کے ایک بار پھر راولپنڈی کو دہشتگردوں نے نشانہ بنا ڈالا، گریسی لین میں امام بارگاہ کے قریب دھماکے میں خودکش حملہ آور نے خود کو اڑا لیا، جس میں پولیس سب انسپکٹر سمیت چار افراد جاں بحق اور سولہ سے زائد زخمی ہوگئے۔ وزیر داخلہ نے واقعہ کی رپورٹ طلب کر لی۔ راولپنڈی میں تھانہ ائیرپورٹ کی حدود میں واقع گریسی لین میں امام بارگاہ میں مجلس جاری تھی کہ موٹر سائیکل سوار دہشت گرد امام بارگاہ سے ملحق پارکنگ میں پہنچا۔ پولیس اہلکاروں نے جب اسکی تلاشی لینا شروع کی تو اچانک اس نے خود کو دھماکہ خیز مواد کو اڑا دیا۔ دھماکے کے فوراً بعد جائے وقوع پر افراتفری مچ گئی۔ سکیورٹی سخت تھی جس کے باعث خودکش حملہ آور اپنے ہدف تک نہ پہنچ سکا۔ وہاں موجود سب انسپکٹر امانت سمیت تین افراد جاں بحق جبکہ سولہ زخمی ہوئے۔ زخمیوں میں تھانہ ائیرپورٹ کے ایس ایچ او سمیت چھ پولیس اہلکار بھی شامل ہیں۔ زخمیوں کو فوری طور پر بینظیر اسپتال منتقل کیا گیا۔ جہاں کچھ زخمیوں کی حالت تشویشناک بتائی جاتی ہے۔
راولپنڈی کے تمام اسپتالوں میں ایمرجنسی نافذ کر دی گئی۔ دھماکے کے بعد قانون نافذ کرنے والوں اور بم ڈسپوزل اسکواڈ نے علاقے کو گھیرے میں لے لیا۔ گریسی لین راولپنڈی کے انتہائی حساس علاقوں میں شمار ہوتا ہے جہاں حساس اداروں کے دفاتر کی موجودگی کے باعث عام دنوں میں بھی کوئی عام شخص داخل نہیں ہوسکتا۔ سی سی پی او راولپنڈی کا کہنا ہے کہ گریسی لین میں خودکش حملہ آور موٹر سائیکل پر سوار تھا، پولیس اہلکاروں نے موٹر سائیکل سوار کو روکا لیکن اس نے خود کو دھماکے سے اڑالیا۔ وزیراعظم، صدر، وزیراعلٰی پنجاب شہباز شریف، شیخ رشید، خورشید شاہ، الطاف حسین اور عمران خان سمیت متعدد سیاسی اور مذہبی رہنماوٴں نے واقعہ کی شدید الفاظ میں مذمت کی اور کہا کہ عوام اپنی صفوں میں اتحاد برقرار رکھیں۔ دوسری جانب وزیر داخلہ نے واقعہ کی رپورٹ طلب کر لی ہے۔ دھماکے کے بعد ایئرپورٹ، پی ایف بیس اور دیگر حساس علاقوں میں سکیورٹی ہائی الرٹ کر دی گئی ہے۔
وحدت نیوز(اسلام آباد) سانحہ عاشورہ راولپنڈی کے بعد پورے پنجاب خصوصاً لاہور میں فرقہ واریت کو شدت سے ہوا دی جا رہی ہے، پنجاب حکومت جانتے بوجھتے دہشت گردوں کے خلاف کسی بھی کاروائی سے گریزاں ہے ، اس کے دہشت گرد حملے ہمیں حق و صداقت کی راہ سے نہیں ہٹا سکتے ، علامہ ناصر عباس کی شہادت عزاداری کا نقصان ہے ، شہید کے اہل خانہ کے غم میں برابر کے شریک ہیں ۔ان خیالات کا اظہار مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی نے وحدت ہائوس اسلام آباد سےجاری اپنے تعزیتی بیان میں کیا ۔
ان کا کہنا تھا کہ حکومت مسلسل دہشت گرد حملوں کے باوجود دہشت گردوں کے خلاف کسی ٹھوس کاروائی سے اجتناب کر رہی ہے ، ہم نے واضح اور دو ٹوک الفاظ میں وفاقی اور صوبائی حکومت کو آگاہ کیا ہے کہ عزاداری سید الشہدا ء کے خلاف کسی بھی سازش کو ملت جعفریہ کسی صورت قبول نہیں کر ے گی ، عزاداری اور میلاد البنی (ص) کے جلوس شیعہ سنی محب وطن عوام کا بنیادی آئینی حق ہے ، حکومت مذہبی مقدسات کو محدود کر نے کے بجائے دہشت گردوں کے گرد گھیرا تنگ کرے ، لاہور جیسے پر امن شہر میں ٹارگٹ کلنگ کے واقعات میں اضافہ باعث تشویش ہے ، علامہ ناصر عباس کے قتل کی ذمہ دار سراسر پنجاب حکومت ہے ، جو ان دہشت گردوں کی پشت پناہی میں مصروف ہے ۔
وحدت نیوز(اسلام آباد) ملک کے ممتاز خطیب اور ذاکر اہل بیت (ع)شہید علامہ ناصرعباس کی مظلومانہ شہادت کے بعد مجلس وحدت مسلمین کے زیر اہتمام نیشنل پریس کلب کے باہر احتجاجی مظاہرے کے اختتام پر شہید کی یاد میں چراغاں کیا گیا ، اس موقع پر مجلس وحدت مسلمین کت رہنما علامہ علی شیر انصاری،علامہ چوہدری ضیغم عباس اور انجمن جانثاران اہل بیت (ع)کے روح رواں مسعود حیدر سمیت خواتین اور بچوں کی بڑی تعداد بھی موجود تھی ، شرکا ء نے چراغاں کے موقع پر اس عزم کا اعادہ کیا کے جب تک جسم میں خون کا ایک قطرہ بھی باقی ہے ہم شہدائے راہ ولایت کے راستہ کو زندہ رکھیں گے ۔
وحدت نیوز(ملتان) شہید علامہ ناصر عباس کو ہزاروں عقیدت مندوں اور سوگواروں کی موجودگی میں آہوں، سسکیوں کے ساتھ درگاہ شاہ شمس تبریز میں سپرد خاک کر دیا گیا، سخت سردی اور دھند کے باوجود ان کے سفر آخرت میں شیعہ علما کرام، عمائدین شہر اور شیعہ مکاتب فکر سے تعلق رکھنے والے افراد کی بڑی تعداد شریک ہوئی۔ اس موقع پر کئی رقت آمیز مناظر بھی دیکھنے میں آئے، لوگ ایک دوسرے کو گلے لگا کر پرسہ دیتے رہے۔ نماز جنازہ اور تدفین کے موقع پر سیکورٹی کے سخت انتظامات کئے گئے تھے، لاہور سے ان کی میت پہلے ملتان چونگی نمبر 9 لائی گئی، جہاں ہزاروں مظاہرین 9 گھنٹے سے دھرنا دیئے بیٹھے تھے۔ احتجاجی دھرنے کے بعد علامہ ناصر عباس کا جسد خاکی شمس آباد میں واقع ان کے گھر لایا گیا۔ اس سے قبل علامہ ناصر عباس کی نماز جنازہ لاہور میں گورنر ہاوٴس کے باہر ادا کی گئی، نماز جنازہ سے قبل ہزاروں افراد نے دھرنا دیا اور قاتلوں کی گرفتاری کا مطالبہ کیا، علامہ ناصر عباس کو اتوار کی رات لاہور کے علاقے شادمان میں ایک مجلس عزا میں شرکت کے بعد واپسی پر ایف سی کالج کے نزدیک فائرنگ کرکے قتل کر دیا گیا تھا۔
دیگر ذرائع کے مطابق لاہور میں فائرنگ سے جاں بحق ہونے والے تحریک نفاذ فقہ جعفریہ کے رہنما علامہ ناصر عباس کو ہزاروں سوگواروں کی موجودگی میں درگاہ شمس تبریز میں سپرد خاک کر دیا گیا۔ اس سے قبل ان کی نماز جنازہ شاہ شمس تبریز کے مزار کے احاطے ہی میں ادا کی گئی تھی۔ قبل ازیں علامہ ناصر عباس کی میت ملتان پہنچی تو عزاداروں نے میت کو گھیرے میں لے لیا اور چونگی نمبر نو پر احتجاجی دھرنا دیا اور ماتم کیا۔ ان کا مطالبہ تھا کہ واقعے کے ذمہ داروں کو کیفر کردارتک پہنچایا جائے۔ احتجاجی دھرنا 9 گھنٹے سے زائد وقت تک جاری رہا، جس کے بعد علامہ ناصر عباس کی میت شمس آباد میں واقع ان کی رہائش گاہ لے جائی گئی۔
وحدت نیوز(کراچی) معروف ذاکر اہل بیت (ع)شہید علامہ ناصر عباس کی مظلومانہ شہادت کے بعد سندھ کے دارلحکومت کراچی میں مجلس وحدت مسلمین پاکستان کی جانب سے امام باررگاہ شہدائے کربلا خیرالعمل انچولی روڈ سے ایک بڑی ماتمی ریلی نکالی گئی جو شاہرائے پاکستان پہنچ کر اختتام پذیر ہوئیں، ریلی کی قیادت ایم ڈبلیو ایم کے مرکزی ،صوبائی ، ڈویژنل اور ضلعی قائدین نے کی ، شرکائے ریلی نے نوحہ خوانی و سینہ زنی کرتے ہوئے علامہ ناصر عباس ملتانی کی مظلومانہ شہادت پر گہرے دکھ اور صدمے کا اظہار کیا ، شرکائے ریلی سے خطاب کرتے ہوئے مقررین کا کہنا تھا کہ پنجاب کے صوبائی دارلحکومت لاہور میں علامہ ناصر عباس ملتانی کا بہیمانہ قتل صوبائی حکومت اور سیکورٹی اداروں کی کارکردگی پر سوالیہ نشان ہے ۔کراچی کے دیگر علاقوں انچولی سوسائٹی، ملیر جعفر طیار سمیت دیگر مقامات پر احتجاجی مظاہرے کئے گئے ،احتجاجی مظاہروں میں ہزاروں کی تعداد میں لوگوں نے شرکت کی مظاہرین نے شیعہ رہنما علامہ ناصر عباس ملتانی کے بہیمانہ قتل کی شدید مذمت کرتے ہوئے حکومت سے مطالبہ کیا کہ علامہ ناصر عباس کے قاتلوں کو فی الفور گرفتار کیا جائے۔احتجاجی مظاہروں سے مجلس وحدت مسلمین پاکستان کے رہنماؤں مولانا اعجاز بہشتی، مولانا صادق رضا تقوی، مولانا علی انور جعفری،مولانا ذوالفقار جعفری، سید علی حسین نقوی، احسن عباس ، حسن ہاشمی اور رضا نقوی سمیت دیگر نے خطاب کیا۔انچولی میں منعقدہ احتجاجی مظاہرے سے خطاب کرتے ہوئے مجلس وحدت مسلمین پاکستان کے مرکزی رہنماعلامہ اعجاز بہشتی اور کراچی کے سیکرٹری جنرل برادر حسن ہاشمی نے کہا کہ حکومت دہشت گردوں سے خوفزدہ ہونے کی بجائے دہشت گردوں سے آہنی ہاتھوں سے نمٹے اور لاہور میں شہید ئے جانیو الے معروف ذاکر اہلبیت ؑ علامہ ناصر عباس کے قتل میں ملوث تکفیری سوچ کے حامل مدارس کے دہشت گردوں کو فی الفور گرفتار کرے اور منظر عام پر لائے۔مسجد حسنین ملیر جعفر طیار سوسائٹی سے نکالی جانے والی احتجاجی ریلی سے خطاب کرتے ہوئے مجلس وحدت مسلمین ضلع ملیر کے سیکریٹری جنرل احسن عباس ، مولانا ذوالفقار جعفری اور ثمر رضا کاکہنا تھا کہ حکومت اور ریاستی ادارے دہشتگردو ں کی پشت پناہی کرنا چھوڑ دیں اور پاکستان کے شہریوں کی جان ومال کی حفاظت کو یقینی بنائیں، ان کاکہنا تھا کہ ملک میں موجود تکفیری سوچ کی اقلیت پر مشتمل مدارس میں موجود خطر ناک دہشت گردوں کے خلاف کاروائی کی جائے اور دہشت گردوں کی آماجگاہ مدارس کے خلاف کاروائی عمل میں لائی جائے، انہوں نے مزید کہا کہ وفاقی حکومت اور صوبائی حکومتیں نصاب تعلیم مین سے دہشت گردانہ مواد کا خاتمہ یقینی بنائیں اور ملک کو امن کا گہواراہ بنانے میں اپنا عملی کردار ادا کریں۔مظاہروں میں خطاب کرتے ہوئے مجلس وحدت مسلمین کے رہنمائوں نے کہا کہ علامہ ناصر عباس کے قتل میں ملک دشمن اور اسلام دشمن قوتیں ملوث ہیں جو ملک کے عدم استحکام کرنے کی گھنانی سازش کر رہے ہیں، انکاکہنا تھا کہ پاکستان بنانے میں ملت جعفریہ نے قربانیاں پیش کی تھیں تاہم ملک کے استحکام کی خاطر کسی بھی قسم کی قربانی سے دریغ نہیں کیا جائے گا ، انہوں نے مزید کہا کہ اگر کوئی یہی سمجھتا ہے کہ ملت جعفریہ کو دیوار سے لگا دیا جائے گا تو یہ اس کی بھول ہے ، ملت جعفریہ کے خلاف سازش در اصل اسلام اور پاکستان کے خلاف سازش ہے ، حکومت اور ریاستی اداروں کو متنبہ کرتے ہیں کہ ملت جعفریہ کے خلاف سازشوں کا سلسلہ بند کیا جائے اور دہشت گردوں کی سرپرستی چھوڑ کر دہشت گردوں کے خلاف کاروائی کی جائے۔اس موقع پر شرکا نے مردہ باد امریکہ، اسرائیل نا منظور اور دہشت گردی نا منظور اور علامہ ناصر عباس کے قتل کی مذمت پر مبنی نعرے لگائے۔
