پورے ملک میں عوام گھروں سے باہرنکلیں اور احتجاج کریں کوئٹہ سے اپیل 
علامہ راجہ ناصر عباس جعفری نے کوئٹہ دھرنے سے خطاب میں اپیل کرتے ہوئے کہا کہ پورے ملک کی مظلوم عوام خاص کر ملت تشیع پاکستان اور بالخصوص مجلس وحدت مسلمین کے کارکنوں سے اپیل کرتا ہوں وہ گھروں سے باہر نکلیں اور اس قتل عام کے خلاف احتجاج کریں 
علامہ راجہ ناصر عباس جعفری جو کہ آج صبح ایک اعلی رکنی وفد کے ہمراہ کوئٹہ تشریف لے آئے تھے نے گذشتہ روز سے 86جنازوں کے ساتھ سخت سردی میں دھرنا لگائے ہوئے مرد وزن کے اجتماع میں شرکت کی اور اپنے خطاب میں کہا کہ پورا ملک آپ کے ساتھ ہے ہر شریف انسان آپ کے ساتھ ہے ،اس وحشیانہ قتل عام اور بربریت پر ہر انسان دکھی ہے لیکن جن کو کسی قسم کا دکھ نہیں وہ یہاں کی حکومت ہے 
انہوں نے کہا کہ خون جمادینے والی اس سردی میں آپ کے اس دھرنے نے ،آپ کی استقامت نے ،آپ کے حوصلے نے ،آپ کی شجاعت نے ہر باضمیر انسان کو دنیا بھر میں جھنجوڑاہے ۔جب تک مطالبات پورے نہیں ہوتے اس دھرنے کو جاری رہنا چاہیے ،ہم ان نالائق اور بزدل حکمرانوں کو ایوانوں میں گھسنے نہیں دینگے ،یہ ہمارے صبر وحوصلے کا امتحان لے رہے ہیں ،یہ لٹیرے،یہ بدعنوان اتنے قتل عام کے باوجود ٹس سے مس نہیں۔

دھرنا اپ ڈیڈ
ٌکوئٹہ میں حکومت کی برطرفی اور فوج کے کنٹرول تک دھرنا جاری رہے گا
مجلس وحدت مسلمین پاکستان کے مرکزی سربراہ بھی دھرنے میں پہنچ رہے ہیں
آج ملک کے دوسرے شہروں میں بھی دھرنے متوقع ہیں
لندن ہائے کمیشن آف پاکستان کے سامنے سینکڑوں پاکستانی ہم وطنوں نے کوئٹہ دھرنے کی حمایت میں دھرنا لگا یا ہوا ہے مختلف افراد سے ہمارے نمایندے کی گفتگو کے دوران دھرنے کے شرکا کا کہناہے کہ جبتک کوئٹہ کا دھرنا ختم نہیں ہوتا ہائے کمیشن کا سامنے بھی دھرنا ختم نہیں ہوگا ،شرکا کا کہنا ہے کہ کوئٹہ میں فوری طور پر حکومت کو مستعفی ہونا چاہیے

کوئٹہ میں قتل عام اور لانگ مارچ کے بارے میں سربراہ مجلس وحدت مسلمین پاکستان کی سربراہی میں مجلس وحدت مسلمین پاکستان کی ہنگامی اہم پریس کانفرنس
محترم صحافی حضرات!
السلام علیکم! آپ کے شکر گزار ہیں کہ آپ یہاں تشریف لائے اور ہمیں موقع دیا کہ اپنی آواز آپ کے ذریعے حکمرانوں اور پاکستان کے مظلوم عوام تک پہنچا سکیں۔ آپ جانتے ہیں کہ ہمارا ملک مسلسل ناامنی کے دور سے گزر رہا ہے۔ یہاں ہر قسم کے بحران جنم لے چکے ہیں، جیسے کہ سیاسی بحران، معاشی بحران، انرجی کا بحران اور امن کا بحران بھی ہے۔ کل کا دن پاکستان کے عوام کے لیے ایک انتہائی بدقسمت دن تھا، جس میں سینکڑوں بے گناہ، پاکستان سے محبت کرنے والے پاکستانی اور مسلمان مارے گئے اور کچھ زخمی ہوئے۔ سوات میں حملہ ہوا اور وہاں پر بھی کچھ بے گناہ مارے گئے، کراچی میں بے گناہ مارے گئے اور پھر کوئٹہ کے اندر تین دھماکے ہوئے جن میں باچا خان روڈ پر، علمدار روڈ پر دو دھماکے کیے گئے جس میں ایک سو سے زائد بے گناہ مسلمان شہید ہوئے اور ڈیڑھ سو سے زائد مسلمان زخمی ہوئے۔ اس ساری صورتحال کے باوجود ہم دیکھتے ہیں کہ ہمارے حکمران جن کی گزشتہ 5 سالہ کارکردگی سے پتہ چلتا ہے کہ اتنے نالائق، مجرم اور بے حس حکمران کل کراچی میں جمع تھے اور اپنی کرسی و اقتدار کے کھیل میں مصروف تھے لیکن ان کو اتنی فرصت میسر نہ آسکی کہ یہ قاتلوں کے خلاف کوئی اقدام اٹھاتے۔

کوئٹہ میں ایک ہی دن چار بم دھماکوں میں سو کے قریب افراد کی شہادت پر سربراہ مجلس وحدت مسلمین پاکستان علامہ راجہ ناصر عباس جعفری نے ان افسوس اور دکھ کے ساتھ کہا کہ 
انا للہ و انا الیہ راجعون 
کوئٹہ میں رونما ہونے والے انتہائی دل خراش سانحوں سے اس وقت حکمران طبقے کے علاوہ پوری قوم کا دل خون کے آنسو رو رہا ہے 
بلوچستان خاص کر کوئٹہ میں شیعہ نسل کشی کا اصلی سبب وہاں کا انتہائی نااہل عجوبہ وزیر اعلی ہے ،یہ اس صوبے اور یہاں کی عوام کی انتہائی بدقسمتی یا پھر وفاقی حکومت کی جانب سے ظلم و ستم ہے کہ اس مظلوم صوبے کے مظلوم عوام پر ایک ایسے شخص کو مسلط کیا گیا ہے جسے نہ اپنا ہوش رہتا ہے اور نہ اپنے اطراف کا ۔انہوں نے علمدار روڈ اور باچاخان رود پر بم دھماکوں کی مذمت کرتے ہوئے کہا کہ یہ بات طے ہے کہ کوئٹہ کی سرزمین پر گرنے والے بے گناہوں کے خون کا ہر قطرہ ایک طرف جہاں عوام کی مظلومیت کو بیان کرتا ہے وہیں پر تاریخ کے اوراق کو حکمرانوں کے ظلم و ستم سے بھی بھر لیتا ہے ۔اس قدر قتل عام کے باوجود چین کی نیند سونے والے وزیر اعلی ٰ کو ایک منٹ بھی اس کرسی پر بیٹھنے کا حق نہیں اس فورا ہٹادیا جانا چاہیے ۔
ہم افواج پاکستان اور اہم محب وطن قومی ذمہ دار اداروں سے اپیل کرتے ہیں کہ وہ ملک کے تمام ان حصوں میں فورا آپریشن شروع کریں جہاں ملک دشمن دہشت گرد موجود ہیں ۔انہوں نے مزید کہا ملکی سرحدوں پر بھارتی فوج افواج پاکستان پر حملہ کرتیں ہیں اور اسی وقت بھارتی ایجنٹ کوئٹہ سوات میں محب وطن پاکستانی بے گناہ عوام کو نشانہ بناتے ہیں 

انہوں نے کہا کہ کوئٹہ کے اس المناک واقعے پر تین دن سوگ منایا جائے گا ۔جبکہ ایک سوال کے جواب پر سربراہ مجلس وحدت مسلمین پاکستان نے کہا کہ آئندہ کا لائحہ عمل کل اعلان کیا جائے گا