The Latest
وحدت نیوز(لاہور)مجلس وحدت مسلمین پاکستان ضلع لاہور اور وحدت یوتھ پاکستان کے باہمی اشتراک سے نادار فیملیز کو عید کی خوشیوں میں شامل کرنے کا احسن اقدام مجلس وحدت مسلمین ضلع لاہور اور وحدت یوتھ پاکستان نے ملکر ان فیملیز کے لئے جو عید فطر کے پر مسرت موقعہ پر ناداری کی وجہ سے اپنے بچوں کے پریشان حال تھے ،ان کو خوشیوں میں شامل کرنے کے لئے ایک احسن اقدام اٹھایا ہے اور ان فیملیز میں ملبوسات کے جوڑے ،جوتے اور بچوں کے لئے مخصوص پیک بنا کر تقسیم کیے ہیں ۔
مجلس وحدت مسلمین پنجاب کے صوبائی سیکرٹریٹ میں ضلعی صدر مجلس وحدت مسلمین ضلع لاہور جناب نجم عباس خان اور ضلعی صدر مجلس وحدت مسلمین پاکستان یوتھ ونگ ضلع لاہور جناب نقی حیدر نے عیدی کا خریدا گیا سامان فیملیز میں تقسیم کیا ۔ جناب نقی مھدی جنرل سیکرٹری مجلس وحدت مسلمین پاکستان ضلع لاہور ،جناب آفتاب علی ہاشمی سنیئر ضلعی صدر مجلس وحدت مسلمین ضلع لاہور ،جناب رانا کاظم علی نائب صدر مجلس وحدت مسلمین پاکستان ضلع لاہور اور جناب سید فخر حسنین رضوی ایڈووکیٹ ضلعی صدر مجلس وحدت مسلمین پاکستان ضلع لاہور عزاداری ونگ بھی اس موقعہ پر موجود تھے ۔
وحدت نیوز(لاہور) مجلس وحدت مسلمین شعبہ خواتین کی مرکزی صدر سیدہ معصومہ نقوی نے عید الفطر کے پر مسرت موقع پر اپنے پیغام میں کہا کہ رمضان کا مقصد مسلمان کے اندر تقویٰ کی صفت پیدا کرنا ہےاور ایک مہینے میں ایسی تربیت حاصل کرنا ہے جس کا اثر سال کے باقی دنوں میں بھی نظر آئے، عید کا مقصد بے جا خوشی اور خرافات نہیں بلکہ یہ دن خدا کے شکر و عبادت اور اپنے خالق سے اپنا تعلق مضبوط بنانے کادن ہے۔
ان کا کہنا تھا یہ اسلامی تہوار درصل اجتماعیت کا مظہر اور باہمی اتحاد و یکجہتی کی علامت ہے عید الفطر کے موقع پر مسلمانوں پر خدا کی طرف سے یہ ذمہ داری عائد ہے کہ اپنی خوشیوں میں تمام عزیز و اقرباء ،دوست احباب کے ساتھ ساتھ معاشرے کے غریب طبقے کا خیال رکھیں اپنی خوشیوں میں انھیں ہرگز نظر انداز مت کریں۔
ان کا کہنا تھا اس وقت دنیا کے ہر درد دل رکھنے والے باضمیر مسلمان پر غم کی کیفیت طاری ہے فلسطین میں ہمارے مسلمان بہن بھائی اسرائیلی حارحیت کا نشانہ بنایاجا رہے ہیں ، ہزاروں معصوم بچوں کی شہادتوں سے دل خون کے آنسو رو رہا ہے رسول خدا صل اللہ علیہ وآلہ وسلم کی حدیث کے مطابق تمام امت مسلمہ جسد واحد کی طرح ہے جس کا ایک حصہ تکلیف میں ہو تو باقی جسم بھی اس درد اور اذیت کو محسوس کرتا ہے فلسطینی ماوں بہنوں اور بچوں کے ساتھ اظہار یکجہتی کرتے ہوئے عید سادگی سے منائیں اور ان کے حق میں دعا کریں ان شاء اللہ کہ ظہور امام زمان عج کے ساتھ کل مستضعفین و مظلومین کو غلبہ و قوت عطا ہوگی ۔
وحدت نیوز(اسلام آباد) مجلس وحدت مسلمین کے سربراہ و سینیٹرعلامہ راجہ ناصر عباس جعفری نے قوم کو عید الفطر کی مبارکباد دیتے ہوئے کہا ہے کہ پوری قوم عید کی خوشیاں مناتے ہوئے فلسطین اور کشمیر کے مسلمانوں کے مصائب ضرور یاد کرے اور عید کے اجتماعات میں خصوصی طور پر اِن معصوم اور بے گناہوں کے حق میں دعا کریں۔
علامہ راجہ ناصر عباس جعفری نے کہا کہ عید کی خوشی منانا حکم رسول پاکﷺ ہے لیکن جب ہم مظلوم کشمیریوں بالخصوص فلسطینیوں پرکفار کے مظالم دیکھتے ہیں تو کلیجہ پھٹتا ہے۔ چونکہ اُمہ کے بیشتر حکمران صرف تماشائی بنے ہوئے ہیں اِس لئے اللہ تعالیٰ سے دعا ہے کہ اپنا خصوصی کرم فرمائے تاکہ یہ مظلوم آزاد فضائوں میں سانس لے سکیں۔
وحدت نیوز(اسلام آباد)سربراہ مجلس وحدت مسلمین پاکستان و نومنتخب سینیٹر علامہ راجہ ناصرعباس جعفری نے اپنے ٹوئٹر پیغام میں کہا ہے کہ ایوان بالا میں میری حمایت کرنے پر پاکستان تحریک انصاف کے بانی چیئرمین عمران خان اور سنی اتحاد کونسل کے سربراہ صاحبزادہ حامد رضا کا تہہ دل سے ممنون ہوں۔
انہوں نے کہا کہ وطن عزیز میں آئین کی بالادستی ، قومی وقار کی سربلندی، داخلی خودمختاری ، آزاد خارجہ پالیسی اور تکفیریت کے خاتمے کے لیے ہمارا یہ اتحاد ثمر آور ثابت ہو گا۔مادر وطن کی حقیقی آزادی کے لیے ہمارے اصولی موقف کی گونج اب ایوان بالا میں بھی سنائی دے گی۔
وحدت نیوز(اسلام آباد)مجلس وحدت مسلمین پاکستان کے سربراہ سینیٹرعلامہ راجا ناصر عباس جعفری نے کہا ہے کہ گرینڈ اپوزیشن الائنس کی جانب سے عید کے بعد جلسے اور ریلیاں ہوں گی، ہم اپنا حق حاصل کریں گے۔
حلف اٹھانے کے بعدپارلیمنٹ ہاؤس اسلام آباد میں میڈیا سے گفتگو کرتے ہوئے سینیٹر علامہ راجا ناصر عباس نے کہا کہ آج پھر ایک بدعت کی گئی سینٹ مکمل نہیں تھی اور سینٹ کی کاروائی چلائی گئی عمران خان کو غیر قانونی طور پر جیل میں رکھا گیا ہے۔
جولوگ چور دروازے سے اقتدار میں آتے ہیں وہ ملک کے خیرخواہ نہیں ہو سکتے۔ ایک مستحکم حکومت کو گرا کر ملک کو ناکام لوگوں کے ہاتھوں میں سونپ دینا ملک کو دانستہ طور پر تباہی کی طرف دھکیلنے کی کوشش ہے۔ عید کے موقع پر پاکستانی قوم کے یہ پیغام دینا چاہتا ہوں کہ مایوس اور ناامید کبھی نہ ہونا۔ ملک میں جاری لاقانونیت اور ناانصافی کے خلاف میدان میں موجود رہنا ہے۔
ان شا اللہ وہ دن دور نہیں جب ملک میں قانون و آئین کی بالادستی ہو گی۔ نوجوانوں کا جرات مندانہ اور منصفانہ کردار ملکی ترقی کے لیے انتہائی اہم ہے۔ آج سینٹ کے انتخابات کے موقع پر سب سے افسوسناک صورتحال جو دیکھنے میں آئی وہ کے پی کے کی عدم شمولیت تھی۔الیکشن کمیشن نے خیبر پختونخواہ میں الیکشن رکوا دیے۔ یہ عجیب الیکشن کمیشن ہے جو انتخابات میں التوا کی کوشش میں لگا رہتا ہے اور اگر انتخابات چارو ناچار ہو جائیں تو پھر ان کے نتائج اپنی مرضی کے جاری کردیتا ہے۔
یہ ادارہ اپنی پیشہ وارانہ ذمہ داریاں ادا نہیں کر سکا۔غیر آئینی اقدامات ملک کی سلامتی اور قوم کے ساتھ ظلم ہے۔جو ادارے آئین کی پاسداری نہیں کرتے ان کے خلاف آواز بلند کرنا عوام کا حق ہے۔ ملک میں بہت جلد عوامی اجتماعات کا سلسلہ شروع کیا جائے گا ۔ ہم ان کا تعاقب کریں گے جنہوں نے اس ملک کو اندھیروں کی راہ پر دھکیل دیا ہے۔
انہوں نے کہا کہ سینیٹ وفاق کی نمائندگی کرتا ہے، آج سینیٹ نامکمل تھا، الیکشن کمیشن نے خیبرپختونخوا میں سینیٹ انتخابات نہیں کرائے۔ ان کا مزید کہنا تھا کہ الیکشن کمیشن اپنی ذمہ داریاں ادا کرنے میں ناکام ہوا۔
وحدت نیوز(جیکب آباد)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے 60 ضرورت مند بچوں میں عید کے کپڑے تقسیم کئے۔ عید گفٹ تقسیم کرنے کے موقع پر گفتگو کرتے ہوئے علامہ مقصود علی ڈومکی نے کہا کہ بڑھتی ہوئی مہنگائی غربت افلاس بے روز گاری نے غریب سے خوشیاں چھین لی ہیں حکمران طبقے کو عوام کے مسائل سے کوئی دلچسپی نہیں ملک کی 40 فیصد آبادی خط غربت سے نیچے زندگی گزار رہی ہے۔ ہر گزرتے دن کے ساتھ امیر امیر تر ہو رہے ہیں اراکین اسمبلی وزراء اور مشیروں کی دولت میں اضافہ ہو رہا ہے جبکہ غریب دو وقت کی روٹی کے لئے ترس رہا ہے۔ حکومت کی جانب سے غربت کے خاتمے کے لئے کوئی سنجیدہ اقدامات نہیں کئے جا رہے۔
انہوں نے کہا کہ صاحب حیثیت اھل خیر کو چاہیے کہ وہ معاشرے کے غریب اور پسماندہ طبقات کو اپنی عید کی خوشیوں میں شریک کریں۔ جو لوگ غربت و افلاس کے سبب عید نہیں منا سکتے ہمیں انہیں اپنی خوشیوں میں شامل کرنا چاہیے۔ ہم معاشرے کے غریب طبقات کی خدمت کو اپنے لئے اعزاز سمجھتے ہیں۔انہوں نے کہا کہ عید الفطر کے موقع پر ہم اپنے غزہ فلسطین کے مظلوم بھائیوں بہنوں اور بچوں کو یاد کرتے ہیں جو گذشتہ 6 ماہ سے اسرائیلی جارحیت کا شکار ہیں۔ ہم اپنی عید الفطر کو مظلومین غزہ کے نام سے منسوب کرتے ہیں۔
وحدت نیوز(اسلام آباد)شیعہ علماء کونسل پاکستان کے مرکزی نائب صدر علامہ عارف حسین واحدی نے اسلام آباد میں نومنتخب سینیٹر مجلس وحدت مسلمین پاکستان کے چیئرمین علامہ راجہ ناصر عباس جعفری سے ان کی رہائشگاہ پر ملاقات کی اور ان کو ایوان بالا میں پہنچنے پر مبارکباد پیش کی۔ دونوں راہنماؤں کے درمیان وطن عزیز کی سیاسی و مذہبی صورتحال پر تفصیل سے گفتگو ہوئی۔
وحدت نیوز(کوئٹہ)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا ہے کہ تکفیری سوچ کی حامل کالعدم دہشت گرد تنظیم وطن عزیز پاکستان میں امن و رواداری کے خلاف سرگرم عمل ہے۔ نیشنل ایکشن پلان کے تحت کالعدم تنظیم کی سرگرمیوں کو روکا جائے۔ ان خیالات کا اظہار انہوں نے دیگر رہنماؤں کے ہمراہ جیکب آباد میں وفد کی صورت میں ایس ایس پی سید سلیم شاہ سے ملاقات کے موقع پر گفتگو کرتے ہوئے کیا۔ وفد میں عزاداری کونسل کے چیئرمین سید غلام شبیر نقوی، ایم ڈبلیو ایم ضلع جیکب آباد کے صدر نذیر حسین جعفری، وحدت یوتھ کے صدر سید کامران علی شاہ، ایم ڈبلیو ایم ٹھل کے رہنماء مقدم غلام یاسین برڑو، تحصیل صدر غلام حیدر برڑو سید واجد علی شاہ و دیگر شامل تھے۔
اس موقع پر گفتگو کرتے ہوئے علامہ مقصود علی ڈومکی نے کہا کہ جیکب آباد ضلع میں مختلف مکاتب فکر کے درمیان باہمی احترام، ہم آہنگی اور رواداری کی فضا قائم ہے۔ محرم و صفر ہو یا ربیع الاول تمام مکاتب فکر کے لوگ مل کر رسول اللہ صلی اللہ علیہ وآلہ وسلم اور نواسہ رسول حضرت امام حسین علیہ السلام کی یاد مناتے ہیں۔ مگر کچھ شرپسند عناصر اور کالعدم دہشت گرد تنظیمیں فرقہ وارانہ منافرت اور نفرتوں کو ہوا دیتی ہیں۔ لہٰذا کالعدم تکفیری دہشت گرد گروہ کی شرانگیز سرگرمیوں پر کڑی نظر رکھنے کی ضرورت ہے۔ جنہوں نے 2015 میں شب عاشور کو عزاداری کے جلوس پر حملہ کرکے 29 معصوم انسانوں کو شہید کر دیا۔
انہوں نے کہا کہ تکفیری سوچ کی حامل کالعدم دہشت گرد تنظیم وطن عزیز پاکستان میں امن و رواداری کے خلاف سرگرم عمل ہے۔ نیشنل ایکشن پلان کے تحت کالعدم تنظیم کی سرگرمیوں کو روکا جائے۔ انہوں نے کہا کہ ضلع میں قیام امن کے لئے ہمارا انتظامیہ کے ساتھ مکمل تعاون ہوگا۔ اس موقع پر سید غلام شبیر نقوی اور نذیر حسین جعفری نے ضلع میں بعض مسائل کی نشاندہی کی۔ ملاقات میں مساجد امام بارگاہوں اور مدارس کی سیکیورٹی اور نماز عید کے اجتماعات کی سیکیورٹی پر بھی گفتگو ہوئی۔ اس موقع پر ایس ایس پی سید سلیم شاہ نے وفد کے تعاون کا شکریہ ادا کرتے ہوئے کہا کہ پولیس آپ کے تعاون کی قدر کرتی ہے اور ہمیں باہمی تعاون سے ضلع میں امن و امان قائم رکھنا ہے۔
وحدت نیوز(اسلام آباد) سربراہ مجلس وحدت مسلمین پاکستان علامہ راجہ ناصرعباس جعفری نے بحیثیت سینیٹر ایوان بالا میں حلف اٹھا لیا۔علامہ راجہ ناصرعباس سمیت 43 نومنتخب سینیٹرز نے حلف اٹھایا ، پریزائیڈنگ افسر اسحاق ڈار نے نو منتخب سینیٹرزسے حلف لے لیا۔
تفصیلات کے مطابق سینیٹ کا اجلاس سیکرٹری سینیٹ قاسم صمد خان کی زیر صدارت ہوا، سیکرٹری سینیٹ قاسم صمد خان نے نومنتخب اراکین کو ایوان میں خوش آمدید کہا۔
جس کے بعد سیکرٹری سینیٹ نےایوان کی کارروائی اسحاق ڈار کے حوالے کر دی اور سینیٹر اسحاق ڈار نے پریزائیڈنگ افسرکی نشست سنبھال لی۔
حلف اٹھانے والوں میں چیئرمین ایم ڈبلیوایم سینیٹرعلامہ راجہ ناصرعباس جعفری سمیت سینیٹرانوشہ رحمان ، سینیٹر انوار الحق کاکڑ ، سینیٹرمحسن نقوی ، سینیٹر عبدالقدوس بزنجو ، سینیٹر عبد الشکور ، دوستین خان ڈومکی ، سینیٹر یوسف رضاگیلانی ، سینیٹر احد چیمہ سمیت دیگر شامل تھے۔
حلف اٹھانے کے بعد نومنتخب سینیٹرز نے رول آف ممبرز پر دستخط کا آغازکیا، نومنتخب سینیٹرز حروف تہجی کی ترتیب سے رول آف ممبرز پر دستخط کیئے۔
واضح رہے کہ علامہ راجہ ناصرعباس جعفری کے سینیٹر منتخب ہونے پر ملک وبیرون ملک سے مختلف شخصیات کی جانب سے مبارکباد کا سلسلہ جاری ہے جبکہ مختلف سیاسی ومذہبی شخصیات نے علامہ راجہ ناصرعباس جعفری سے ان کی رہائش گاہ پر ملاقاتیں بھی کی ہیں ۔
وحدت نیوز(گلگت)گلگت بلتستان اسمبلی میں قائد حزب اختلاف محمد کاظم میثم نے صوبائی حکومت اور سکیورٹی اداروں کو سکیورٹی سے متعلق خط لکھ دیا۔ خط میں بشام میں چائنیز پر دہشتگردی کے حملے کے بعد گلگت بلتستان کی سکیورٹی پر تحفظات اور خدشات کا اظہار کیا ہے۔ خط میں سکیورٹی خدشات، تحفظات سے آگاہی اور راہ حل بھی تجویز کی گئی ہے۔
خطے کی سکیورٹی کو یقینی بنانے کے لیے وفاق سے تعاون طلب کرنے کے علاوہ جامع پلان بھی تجویز کی گئی۔ سی پیک، دیامر ڈیم پر کام کرنے والے چائنیز انجینئررز اور کالونی، اہم سرکاری تنصیبات و مقامات، حساس مقامات، عوامی اجتماعات، مذہبی اور سیاسی شخصیات کی سکیورٹی یقینی بنانے کا مطالبہ بھی کیا گیا ہے۔
خط میں سکیورٹی انتظامات کو بہتر بنانے کے لیے جدید ٹیکنالوجی سے استفادہ کرنے کی تجویز دی گئی ہے۔ واضح رہے کہ اپوزیشن لیڈر نے سانحہ ہڈور سے قبل بھی سکیورٹی اداروں کو سکیورٹی خدشات کا اظہار کیا تھا جس کو حکومت نے سنجیدہ نہیں لیا تھا۔ اس سے قبل اپوزیشن لیڈر نے جی بی میں دہشتگرد جماعتوں کی موجودگی کے شواہد بھی فراہم کیے تھے جس کے قلع قمع کے کیے کوئی اقدام نہیں اٹھایا گیا۔ کے کے ایچ پر اب تک ہونے والے درجنوں سانحات کے مجرموں کو تاحال سزا نہ ہونے سے عوام میں بھی تشویش پائی جاتی ہے۔
