وحدت نیوز ( سکردو) مرکزی ڈپٹی سیکرٹری جنرل برادر ناصر عباس شیرازی کی ماورائے قانون گرفتاری کے خلاف جوانان وحدت کیساتھ علمائے کرام اور تنظیمی رہنماؤں کی نشست ہوئی. اس موقع پر برادران سے گفتگو کرتے ہوئے صوبائی ڈپٹی سیکریٹری جنرل علامہ احمد علی نوری نے کہا کہ ملک عزیز کے لئے ہماری قربانیوں کا یہ صلہ دیا جا رہا ہے کہ ہمارے نڈر اور بے باک نوجوان قیادت کی آزادی کو سلب کرکے دن دیہاڑے اٹھایا گیا اور ریاست خاموش لاچارگی کی تصویر بنی ہوئی ہے. اس موقع پر صوبائی و ضلعی رہنماؤں شیخ علی محمد کریمی،برادرمیثم کاظم، مولانا فدا حسین عابدی و دیگر نے بھی گفتگو کی،قائد وحدت علامہ راجہ  ناصر عباس جعفری صاحب کے حکم پر بروقت لبیک کہنے کیلئے جوانوں کی ذہن سازی اور ان کو آمادہ رکھنے کے حوالے سے مجلس وحدت مسلمین کے آفس سکردو میں درجنوں جوانوں کے ساتھ نشست میں اس بات کا اعادہ کیا گیا کہ ہم وطن کی سربلندی کیلئے ہر صف اول میں اپنا کردار ادا کرتے رہیں گے, لیکن ریاستی اداروں کو بھی اپنی پیشہ ورانہ امور کو درست سمت میں انجام دیتے ہوئے کرپٹ اور متعصب سیاسی لوگوں کی غلامی سے اجتناب کرنا ہوگا، پنجاب کے متعصب وزیر اعلیٰ جس کے تعلقات ہمیشہ سگے کالعدم دہشت گرد جماعتوں سے رہی کی شیعہ دشمنی کی پرزور الفاظ میں مذمت کی گئی اور ان کو لگام دیتے ہوئے ہائی کورٹ کے حکم پر ناصر شیرازی کو جلد بازیاب کرنے کا مطالبہ کیا گیا۔

وحدت نیوز (اسکردو) مجلس وحدت مسلمین شعبہ تربیت کے مرکزی سیکریٹری علامہ اعجاز حسین بہشتی کا جامع مسجد کچورا سکردو میں خطاب کرتے ہوئے کہنا تھا کہ سکردو میں مشکوک سرگرمیاں باعث تشویش ہے لہذا انتظامیہ یہاں کی پرامن فضا کو مدنظر رکھتے ہوئے سیکورٹی کی صورت حال کو بہتر بنائیں خصوصا باہر سے آنے والے افراد پر کڑی نظر رکھیں جو یہاں تبلیغات، کاروبار و سیر و تفریح کے نام پر آتے ہیں اور بلتستان کے امن امان و ثقافت کو تباہ کرنا چاہتے ہیں۔ چوں سی پیک معاہدہ کے بعد دشمنوں کو گلگت بلتستان کی پرامن فضا ہضم نہیں ہو رہی ہے ہم کسی کو اجازت نہیں دیں گے کی وہ یہاں کے امن و امان کو خراب کریں لیکن حکومت سے بھی کہنا چاہتے ہیں کی وہ جی بی کے آئینی و قانونی حقوق کو غصب نہ کریں اور ملک دشمن عناصر کو موقع نہیں دیں کی وہ یہاں انتشار پھیلائیں ۔آئینی و صوبائی حقوق ہمارا حق ہے جس کو دینے میں جتنی دیر کرینگے اتنی ہی مشکلات جنم لے سکتے ہیں۔ ملکی حالات پر گفتگو کرتے ہوئے علامہ اعجاز حسین بہشتی  کا کہنا تھا کہ حکومت و دیگر زمہ دار ادارے بے گناہ  لاپتہ نوجوانوں کو جلد از جلد رہا کریں اور ہمیں بتایا جائے کہ ان کو کس جرم میں اور کس قانون کے تحت گھروں سے لاپتہ کیا گیا ہے ۔  میں سلام پیش کرتا ہوں مجاہد عالم دین علامہ حسن ظفر نقوی، علامہ احمد اقبال اور دیگر علماء و بزرگان کا جنہوں نے بےگناہ شیعہ لاپتہ جوانوں کی رہائی کے لئے رضاکارانہ طور پر گرفتاریاں پیش کی اور جیل بھرو تحریک کا آغاز کیا ہے۔

وحدت نیوز(سکردو) اسکردو میں منعقدہ امریکہ مردہ باد ریلی سے خطاب کرتے ہوئے مقررین نے کہا کہ امریکہ نے مسلمانوں کو بالعموم اور پاکستان کے لیے بالخصوص اپنا چہرہ واضح کردیا، انہوں نے واضح کیا ہے کہ یہود و نصاریٰ کبھی بھی مسلمانوں کے دوست نہیں ہوسکتے۔ پاکستانی قوم اور پاکستانی افواج نے دہشت گردی کے خلاف جنگ میں سب سے زیادہ قربانیاں دیں ہیں، لہٰذا عالمی دہشتگرد امریکہ پاکستان کے خلاف سازشیں کررہا ہے۔ ان خیالات کا اظہار مجلس وحدت مسلمین گلگت بلتستان کے سیکرٹری جنرل آغا علی رضوی نے اسکردو میں ’’امریکہ مردہ باد ریلی‘‘ سے خطاب کرتے ہوئے کیا۔ امریکی صدر ڈونلڈ ٹرمپ کے پاکستان مخالف بیان کے بعد مجلس وحدت مسلمین پاکستان کے سیکرٹری جنرل علامہ راجہ ناصر عباس جعفری نے ملک گیر’’یوم مردہ باد امریکہ ‘‘ کا اعلان کیا تھا۔ اسی سلسلے میں اسکردو میں ایک عظیم الشان احتجاجی ریلی کا انعقاد ایم ڈبلیو ایم جی بی کے سربراہ آغا علی رضوی کی قیادت میں منعقد ہوا۔ ریلی شرکاء کے امریکہ مخالف نعروں سے اسکردو شہر گونجتا رہا۔

 احتجاجی ریلی سے خطاب کرتے ہوئے آغا علی رضوی نے کہا کہ القاعدہ، داعش، طالبان اور اسامہ بن لادن جیسے دہشتگردوں کی سرپرستی امریکہ ہی کرتا رہا ہے، امریکہ ہی ان دہشگردوں کو اسلحہ دیتا رہا ہے۔ انہوں نے مزید کہا کہ سانحہ راولپنڈی 2013ء کے بارے میں آئی ایس پی آر کے حالیہ انکشافات سے واضح ہوا ہے کہ یہاں کوئی شیعہ سنی مسئلہ نہیں بلکہ ایک دہشت گرد گروہ ہے، جو اپنے بیرونی آقاوؤں کے اشاروں پر ملک میں فرقہ واریت پھیلانے کی سازش کر رہے ہیں۔ اس موقع پر خطاب کرتے ہوئے ایم ڈبلیو ایم اسکردو کے سیکرٹری جنرل شیخ فدا علی ذیشان نے کہا کہ پاکستانی قوم اپنے دشمنوں کے خلاف متحد ہیں۔ پاکستان ایٹمی قوت ہے، پاکستان خطے کا طاقتور ملک ہے جسے میلی آنکھ سے نہیں دیکھ سکتا۔ اس موقع پر خطاب کرتے ہوئے انہوں نے کہا کہ حفیظ اور ناشاد اسکردو روڈ اور دیگر مسائل پر مسلسل جھوٹ بول رہے ہیں۔ اسکردو روڈ کی تعمیر کے حوالے سے تاریخ پر تاریخ دینے کے باوجود اب تک کام شروع نہیں ہوا۔ ان جھوٹے اعلانات پر وزیراعلٰی اور سپیکر کو نااہل قرار دینا چاہیے۔ اس موقع پر ریلی سے شیخ الیاس، آئی ایس او کے صدر اطہر موسوی اور دیگر نے بھی خطاب کیا۔

وحدت نیوز(مانٹرنگ ڈیسک) اسکردو سے تعلق رکھنے والا پاکستان کا پہلا کوہ پیماء جس نے آکسیجن کے بغیر ماونٹ ایورسٹ پر پاکستان کا پرچم لہزایا، دنیا کی چھ بلند ترین چوٹیاں سر کیں اور تین ورلڈ ریکارڈ بنائے، آج بے بسی کی تصویر بنا راولپنڈی کے ہسپتال میں کسی مسیحا کی امداد کا منتظر ہے۔ حکومتی امداد کے بغیر اپنی مدد آپ کے تحت بغیر آکسیجن کے دنیا کی بلند ترین چوٹی کو اپنے عزم و ہمت اور جواں مردی سے پاوں تلے روندنے والا وطن کا یہ شیر دل سپوت آج کینسر کے مرض میں مبتلا، شدید مالی مشکلات سے دوچار، زندگی کی بازی لڑنے میں مصروف ہے۔ وفاقی اور صوبائی حکومت نے انکے علاج کے لئے زبانی دعویٰ تو کیا ہے لیکن عملی طور پر تاحال کوئی پیش رفت نہیں ہوسکی ہے۔ حسن سدپارا کا تعلق اسکردو کے نواحی گاوں سدپارا سے ہے اور غریب خاندان کے چشم و چراغ ہیں۔ انہوں نے ماونٹ ایورسٹ سمیت دنیا کی چھ اونچی چوٹیاں سر کرکے سبز ہلالی پرچم لہرا کر پاکستانیوں کا سر فخر سے بلند کیا تھا، لیکن اس عظیم قومی ہیرو کی خدمات کو سراہتے ہوئے انکے علاج کے لئے کوئی تیار نہیں۔ دوسری طرف حسن سدپارہ کے پاس اتنی مالی وسعت نہیں کہ وہ اس مہلک مرض کا علاج کروا سکے۔ حکومت پاکستان کو چاہیے کہ انکی خدمات کو سراہتے ہوئے فوری طور پر انکے علاج معالجے کا مناسب انتظام کرے۔

وحدت نیوز(سکردو) آل پارٹیز ایکشن کمیٹی کے اراکین خطے کے مسائل کے حل اور حقوق کے تحفظ کیلئے مشترکہ لائحہ عمل بنانے پر متفق ہوگئے۔ ایکشن کمیٹی کا ہنگامی اجلاس امامیہ ہال اسکردو میں منعقد ہوا، جس میں ایم ڈبلیو ایم کے صوبائی سیکرٹری جنرل سید علی رضوی،  انجمن امامیہ کے صدر شیخ محمد علی مظفری، نائب صدر سید باقر الحسینی اہلسنت والجماعت کے نامور عالم دین حافظ بلال زبیری، انجمن صوفیہ نور بخشیہ کے عالم دین محمد صادق صدیقی، انجمن نور بخشیہ امامیہ کے عالم دین مولانا اسحاق ثاقب، اسلامی تحریک کے رہنماء غلام شہزاد آغا، پیپلز پارٹی کے رہنماء محمد بشیر، تحریک انصاف کے رہنماء محمد علی دلشاد، بلتستان یوتھ الائنس کے صدر ساجد شاکری اور دیگر سیاسی، مذہبی جماعتوں کے رہنماوں نے شرکت کی۔ اجلاس میں گلگت بلتستان کی آئینی حیثیت، سی پیک، گلگت اسکردو روڈ، ٹیکسیز، اسکردو کرگل روڈ سمیت دیگر مسائل زیر بحث لائے گئے اور ان مسائل کے حل کے لئے مشترکہ طور پر لائحہ عمل بنانے کا فیصلہ کیا گیا۔ کمیٹی نے متفقہ طور پر غلام شہزاد آغا کو کوارڈینیٹر مقرر کر دیا۔ اجلاس میں آئینی حیثیت کے تعین، گلگت اسکردو روڈ کی تعمیر میں غیر معمولی تاخیر اور سی پیک میں گلگت بلتستان کو حصہ نہ دینے پر شدید احتجاج کیا گیا۔

ایم ڈبلیو ایم جی بی کے سیکرٹری جنرل و آل پارٹیز ایکشن کمیٹی بلتستان کے سربراہ سید علی رضوی نے کہا کہ حکومت ہمیں دیوار سے لگا رہی ہے اور حکومت ہمارے مسائل کے حل میں لیت و لعل سے کام لے رہی ہے۔ وہ آئینی حقوق کی فراہمی اور اسکردو روڈ کی تعمیر میں ہرگز سنجیدہ نہیں ہے۔ سی پیک میں گلگت بلتستان کیلئے کوئی منصوبہ نہیں ہے لیکن حکومت کے اہلکار دعویٰ کر رہے ہیں کہ سی پیک میں گلگت بلتستان کو اربوں روپے ملیں گے۔ انہوں نے کہا کہ تجارتی اور سیاحتی مقاصد کے لئے جب دیگر سرحدیں کھولی جاسکتی ہیں تو کرگل اسکردو روڈ کیوں نہیں کھولا جا رہا ہے۔ انہوں نے کہا کہ جب تک آئینی حقوق نہیں دیئے جائیں گے تب تک کوئی ٹیکس نہیں دیں گے۔ ہماری کسی جماعت سے کوئی دشمنی نہیں ہے، ہم حقوق غصب کرنے پر حکومت کے خلاف ہیں۔انجمن امامیہ کے صدر شیخ محمد علی مظفری نے کہا کہ مشترکہ مفادات کے تحفظ کے لئے تمام سیاسی مذہبی جماعتوں کو متحد ہو کر کوششیں کرنا ہوں گی۔

حافظ بلال زبیری نے کہا کہ ہم حقوق کی جنگ سے ہرگز پیچھے نہیں ہٹیں گے، جب تک حقوق نہیں ملیں گے گھروں میں واپس نہیں جائیں گے۔ حکومت ہمارے مسائل حل کرنے کی بجائے ان میں اضافہ کر رہی ہے۔ غلام شہزاد آغا نے کہا کہ بلتستان کو حقوق سے محروم رکھنے کے لئے بڑی سطح پر کوششیں ہو رہی ہیں۔ ایک لابی بلتستان دشمنی پر مبنی کام کر رہی ہے اور ہمارے حقوق غصب کر رہی ہے، ہم اس لابی کو ہرگز معاف نہیں کریں گے۔ ہم اپنے حقوق کے تحفظ کے لئے کسی بھی سطح پر جانے کے لئے تیار ہیں۔ مولانا صادق، مولانا اسحاق ثاقب، محمد بشیر، محمد علی دلشاد اور دیگر نے کہا کہ حکومت ہمارے ساتھ سوتیلی ماں جیسا سلوک کر رہی ہے، ہم زیادتیاں اور ناانصافیاں برداشت نہیں کریں گے۔ مسائل کے حل کی حکومت سے کوئی توقع نہیں ہے، ہم بالکل ناامید ہو کر رہ گئے ہیں۔

وحدت نیوز (سکردو) مجلس وحدت مسلمین پاکستان بلتستان ڈویژن کے دفتر سے جاری ایک بیان میں ڈویژنل سیکریٹری امور سیاسیات محمدعلی نے کہا ہے کہ گلگت بلتستان کے وقار پر اور عزت پر کشمیری قیادت کے حملے اور ہرزہ سرائی پر پاکستان مسلم لیگ نون کے صوبائی حکمرانوں کی خاموشی سوالیہ نشان ہے۔ وزیراعلٰی گلگت بلتستان اخبارات میں بیانات داغتے نہیں تھکتے اور زمین آسمان کے قلابے ملاتے نظر آتے ہیں، لیکن کشمیری قیادت کی جانب سے گلگت بلتستان کی خود مختاری پر یکے بعد دیگرے حملوں پر وزیراعلٰی موصوف مکمل خاموش نظر آتے ہیں۔ وزیراعلٰی گلگت بلتستان قوم کو واضح کر دیں کہ وہ بھی کشمیریوں کی پیروی کرتے ہوئے ہندوستان کے موقف کی تائید کریں گے یا گلگت بلتستان کے بائیس لاکھ عوام کی ترجمانی کریں گے۔ اتنا طویل عرصہ انکا خاموش رہنا بہت سارے سوالات کو جنم دینے کا باعث بنتا ہے۔

انہوں نے مزید کہا ہےکہ وزیراعلٰی گلگت بلتستان کے سابقہ جو نظریات تھے اور گلگت بلتستان کے حوالے سے جو رائے رکھتے تھے، امید ہے خطے کے لئے نہ سہی اپنی حکومت کی ہی خاطر اس میں تبدیلی لانے کی کوشش کی ہوگی اور گلگت بلتستان کو پاکستان کا حصہ سمجھتے ہونگے اور ساتھ ہی ساتھ کشمیری قیادت کی جانب سے گلگت بلتستان کو پاکستان کا آئینی حصہ نہ بنانے اور کشمیر کا حصہ سمجھنے کی بے منطق باتوں کو رد کریں گے اور واضح کر دیں گے کہ وہ گلگت بلتستان کے ترجمان ہیں۔ اگر وزیراعلٰی گلگت بلتستان میں ایسا موقف بیان کیا جو نہ تین میں ہو نہ تیرہ میں تو ایسی صورت میں عوام خاموش نہیں رہیں گے۔ گلگت بلتستان کے عوام ان سے واضح اور دو ٹوک موقف چاہتے ہیں اور ایک عرصے سے منتظر ہیں۔