وحدت نیوز (کراچی) مجلس وحدت مسلمین صوبہ سندھ کے سیکرٹری جنرل علامہ مختارامامی نے ایم ڈبلیو ایم حیدر آباد کے سیکرٹری فلاح و بہبور امداد جعفری کے قتل پر گہرے غم و غصے کا اظہار کرتے ہوئے کہا کہ خیبر پختونخواہ اور اور حید ر آباد میں دہشت گردی کی یکے بعد دیگرکاروائیاں ظاہر کر رہی ہیں کہ ملک دشمن عناصر پر حکومت کی گرفت پھر کمزور ہوتی جا رہی ہے۔حکومت اپنا سارا زور کرپشن کے عالمی الزامات کو رد کرنے پر لگانے میں مصروف ہے جبکہ قانون نافذ کرنے والے اداروں کو سیاسی انتقام کے لیے استعمال کیا جا رہا ہے۔عدم تحفظ کی اس فضا کے باعث حکومت اپنا اعتماد کھو چکی ہے۔آئے روز قیمتی انسانی جانوں کا ضیاع حکومتی بے حسی نا اہلی ہے۔خیبر پختونخواہ میں پی ٹی آئی کی حکومت نے ٹارگٹ کلنگ کی روک تھام کے لیے موثر لائحہ عمل کا اعلان نہ کیا تو پھر ہمیں نئی سیاسی حکمت عملی پر غور کرنا پڑے گا۔
انہوں نے مطالبہ کیا کہ گزشتہ ایک ہفتے کے دوران دہشت گردی کی بھینٹ چڑھنے والی بے گناہوں کے قتل میں ملوث مجرمان کو فوری گرفتار کیا جائے۔وحدت مسلمین حیدر آباد کے فعال عہدیدار کو تشدد کا نشانہ بنا کر قتل کیے جانے کے پس پردہ محرکات کو جلد از جلد منظر عام پر لایا جائے۔دریں اثناء ایم ڈبلیو ایم صوبائی سیکرٹری جنرل علامہ مختار امامی سمیت دیگر رہنماؤں نے ایم ڈبلیو ایم حیدرآباد کے سیکریٹری فلاح و بہبود برادر امداد جعفری کی گھر سے تشدد زدہ نعش ملنے پر تشویش کا اظہار کر تے ہوئے واقعہ کی شدید الفاظ میں مذمت کی ہے۔رہنماؤں کا کہناتھا کہ امداد جعفری تنظیم کے مخلص و فعال رہنما تھے دہشتگردی کے اس واقعے کی جتنی مذمت کی جائے کم ہے ۔علامہ مختارا مامی نے امداد جعفری کے قتل میں ملوث سفاک دہشتگردوں کی فوری گرفتاری اوروفاقی و صوبائی حکومت سمیت ریاستی اداروں سے امداد جعفری کے قتل کے خلاف اعلیٰ تحقیقات اور ملزمان کی جلد از گرفتاری کامطالبہ کیا۔
وحدت نیوز (اسلام آباد) مجلس وحدت مسلمین ضلع حیدر آباد کے سیکریٹری فلاح وبہبود امدادعلی جعفری کے بہیمانہ قتل پرمجلس وحدت مسلمین کے مرکزی سیکریٹری جنرل علامہ راجہ ناصر عباس جعفری ، اراکین مرکزی کابینہ ، صوبائی سیکریٹری جنرل ، صوبائی کابینہ اور ملک بھر سے تنظیمی ذمہ داران نے افسوس کا اظہار کیا ہےمرحوم کی بلندی درجات کی دعاکی ہے، مرکزی سیکریٹریٹ سے جاری اپنے ایک تعزیتی بیان میں سربراہ مجلس وحدت مسلمین پاکستان علامہ راجہ ناصرعباس جعفری نے مرحوم ومغفورامدادعلی جعفری کے اہل خانہ ، عزیز واقارب، ضلعی سیکرٹری جنرل رحمٰن رضا ایڈووکیٹ اور تمام تنظیمی دوستوں کی خدمت میں تعزیت کا اظہا رکرتے ہوئے کہا کہ مرحوم ایک انتھک کارکن اور قومی دردکے حامل شخصیت تھے، ان کے پر اسرارقتل پر ایم ڈبلیوایم تشویش کا اظہار اور مذمت کرتی ہے ، ہمارا قانون نافذ کرنے والے اداروں سے مطالبہ ہے کہ اس قتل کے پیچھے چھپے تمام محرکات کا جائزہ لیتے ہوئے فوری تفتیش کا آغاز کیا جائے اور قاتلوں کو جلد ازجلد گرفتار کرکے قرارواقعی سزادی جائے ۔
وحدت نیوز(حیدرآباد)مجلس وحدت مسلمین حیدر آباد کے سیکرٹری فلاح و بہبود برادر امدادعلی جعفری کو انکے گھر سادات کالونی حیدر آباد میں نامعلوم افراد نے قتل کردیا۔ ایم ڈبلیو ایم کے ترجمان کے مطابق امداد جعفری انتہائی فعال اور شفیق دوست تھے، وہ سندھ حکومت کے اعلیٰ افسر ہونے کے باوجود ملی و قومی امور میں انتہائی فعال تھے۔ ذرائع کے مطابق آج صبح امداد جعفری کی تشدد زدہ نعش گھر سے ملی، جسکے مطابق انکی گردن اور جسم پہ تشدد کے شدید نشان تھے۔ تاہم قتل کی وجہ اور قاتل کے بارے میں ابھی معلوم نہیں ہوسکا جبکہ پولیس اسکی تحقیقات کررہی ہے،پوسٹ مارٹم کے بعد لاش ورثاءکے حوالے کردی گئی ہے، مرحوم کی نماز جنازہ مرکزی امامیہ ٹرسٹ لطیف آباد میں اداکی گئی،جس میں مرحوم کے پسماندگان سمیت اہل علاقہ اور ایم ڈبلیوایم کے رہنمائوں نے شرکت کی،جب کہ تدفین رات گئے قبرستان وادی حسینؑ میں عمل میں آئی۔
