وحدت نیوز(کوئٹہ) مجلس وحدت مسلمین کے رکن شوریٰ عالی اور سابق وزیر قانون بلوچستان آغا سید محمد رضا کی گاڑی پرا یف سی اور پولیس کے اہلکاروں کی فائرنگ اور پتھراؤ ، آغا رضا کے محافظوں سمیت ایم ڈبلوایم کے رہنما علی، لیاقت قبلہ، محمد رضا اور ماسٹر یونس زخمی ، الحمد اللہ آغا رضا اس واقعے میں محفوظ رہے ۔

تفصیلات کے مطابق یہ واقعہ اسوقت پیش آیا جب آغا رضا مغربی بائی پاس پر موجود تھے اور احتجاجی جوانوں کو پرامن رہنے کی تلقین کررہے تھےکہ اسی دورا ن دوجانب سے پولیس اور ایف سی اہلکاروں نے ٹریفک کھول دیا اور پھر یک د م شدید پتھراؤاور فائرنگ شروع کردی ۔

متعدد گولیاں آغا رضا کے گاڑی میں پیوست ہوئیں ، خدا کے فضل وکرم سے آغا رضا اور ان کے ساتھی محفوظ رہے ، بعض دوست معمولی زخمی ہوئے ہیں ۔

آغا رضا نے وحدت نیوز سے گفتگو کرتے ہوئے کہا کہ الحمد اللہ میں مکمل محفوظ ہوں اور دیگر دوست بھی، انہوں نے کہا کہ یہ کارروائی ایک منظم پلاننگ کا شاخسانہ ظاہر ہوتی ہے ۔ علاقائی امن کو تباہ وبرباد کرنے کیلئے فرقہ وارانہ منافرت کو ہوا د ی جارہی ہے ۔

وحدت نیوز (کوئٹہ)  مجلس وحدت مسلمین کوئٹہ ڈویژن کے زیر اہتمام اجتماعی شادیوں کی 12ویں شاندارتقریب کا انعقاد کیا گیا، کل 14 جوڑوں کی اجتماعی شادی کی تقریب منعقد کی گئی جس میں 10اہل تشیع اور 4اہل سنت جوڑے شامل تھے، ایم ڈبلیوایم کوئٹہ ڈویژن کی جانب سے جاری بیان میں کہاگیاہے کہ دور حاضر میں مہنگائی، بے روزگاری بے جا اور غلط رسومات کیوجہ سے خصوصا" تنگ دست اور متوسط طبقے سے تعلق رکھنے والے نوجوانوں کیلئے بر وقت شادی خانہ آبادی بے حد مشکل ہو چکا ہیں۔بروقت شادی بیاہ نہ ہونے کیوجہ سے اکثر نوجوان پریشانی کے شکار ہو کر مختلف نفسیاتی امراض کے شکار یو جاتے ہیں ۔

بیان میں کہاگیاکہ نوجوانوں کی اسی فطری ضرورت اور مالی مشکلات کے پیش نظر مجلس وحدت مسلمین کوئٹہ نے مخیر حضرات کے تعاون سے ایم ڈبلیو ایم پاکستان کے مرکزی رہنما علامہ سید ہاشم موسوی ،سابق وزیر قانون سید محمد رضا ،سیکریٹری جنرل کربلائی رجب علی، ڈپٹی سیکریٹری جنرل کامران حسین، معاون سکریٹری جنرل سید عباس اور پوری کابینہ ممبران بزرگوں اور مخلص ورکروں کی کوششوں سے حسب روایت اس سال بھی 14 جوڑوں کی اجتماعی شادیاں منعقد ہوئی جس میں اہل تشیع کے علاوہ برادران اہل سنت کے بھی 4 جوڑے بھی شامل تھے ۔

اس اجتماعی شادیوں کے تسلسل سے اب تک 150 جوڑے سے زائد نوجوان خوشحال زندگی گزار رہےہیں جن کا تعلق نہ صرف اہل تشیع بلکہ مخلتف قبائل اور اقلیتی برادری سے بھی ہیں،ایسے اقدامات کا مقصد نوجوان نسل کو شادی میں حائل رکاوٹوں اور مشکلات میں آسانیاں پیدا کرنا ہے۔مجلس وحدت مسلمین پاکستان کوئٹہ ڈویژن گذشتہ کئی سالوں سے اجتماعی شادیوں کا انعقاد کرتی آئی ہے جس سے برادار اقوام میں مذہبی ھم آہنگی اور برادرانہ تعلقات کو فروغ ملا ہے۔

اجتماعی شادیوں میں شریک تمام جوڑوں کو مختصر جہیز بھی دیئے گئے ۔ جس میں ایک عدد فریج، واشنگ مشین، سلائی مشین، چولہا، کمبل اور کیچن کا سامان ظروف وغیرہ شامل ہیں ۔ایم ڈبلیو ایم پاکستان کے مرکزی رہنما امام جمعہ کوئٹہ علامہ سید ہاشم موسوی، سابق وزیر قانون سید محمد رضا اور تقریب کے مہمان خصوصی جناب ڈاکٹر عبدالمالک کاسی نے خطاب کیا خطاب کرتے ہوئے کہا کہ عوام الناس سے اپیل کرتے ہیں کہ نوجوانوں کی خانہ آبادی میں حائل رکاوٹوں بے جا رسومات کے خاتمے کیلئے سب مل کر نئی نسل کی شادی خانہ آبادی میں آسانیاں پیدا کریں،ایم ڈبلیوایم کی جانب سے بلاتفریق اجتماعی شادیوں کا انعقاد قابل تحسین اقدام ہے ۔

وحدت نیوز (کوئٹہ)  مجلس وحدت مسلمین شعبہ خواتین کوئٹہ ڈویژن کے زیر اہتمام نیچاری امام بارگاہ میں جشن ولادت امام مہدی عج کا انعقادکیا گیا، جشن کی تقریب سے ایم ڈبلیوایم کے مرکزی ڈپٹی سیکریٹری جنرل علامہ سید احمد اقبال رضوی اور صوبائی وزیر قانون و پارلیمانی امور آغا سید محمد رضا نے خطاب کیا،رہنمائوں نے کہا کہ امام مہدی ؑ کا وجود مقدس عالم بشریت کیلئے مرکز امید ہے، دور حاضرمیں امت مسلمہ کی تمام تر مشکلات کا حل ظہور حضرت حجت عج میں مضمر ہے۔

وحدت نیوز(کراچی) مجلس وحدت مسلمین کراچی ڈویژن کی جانب سے ایم ڈبلیوایم کے رہنما اور وزیر قانون وپارلیمانی امور حکومت بلوچستان آغا سید محمد رضاکے اعزازمیں صوبائی سیکریٹریٹ سولجر بازارکراچی میں تقریب عشائیہ کا اہتمام کیاگیا، اس موقع پر ایم ڈبلیوایم کے مرکزی ڈپٹی سیکریٹری جنرل علامہ سید احمد اقبال رضوی، سنی اتحاد کونسل کے مرکزی رہنما اور صاحبزادہ حامد رضا کے چھوٹے بھائی صاحبزادہ حسین رضا ، ایم ڈبلیوایم کراچی ڈویژن کے سیکریٹری جنرل علامہ صادق جعفری، علامہ مبشرحسن، صوبائی رہنماناصرحسینی ، علامہ اظہر حسین نقوی، علامہ نشان حیدر،علامہ احسان دانش ، میر تقی ظفر، احسن عباس رضوی ، تمام اضلاع کے سیکریٹری جنرل صاحبان اور دیگر رہنما موجود تھے، اس موقع پر آغارضا کی گزشتہ ماہ انتقال کرجانے والی مرحومہ ہمشیرہ محترمہ اور شہدائے ملت جعفریہ کے ایصال ثواب کیلئے فاتحہ خوانی بھی کی گئی۔

وحدت نیوز(مانٹرنگ ڈیسک/ سبی) صوبائی وزیر لائیو اسٹاک و جنگلات آغا سید محمد رضا نے کہا ہے کہ ڈرائنگ رومز میں بیٹھ کر اداروں کی کارکردگی کو بہتر نہیں بنایا جاسکتا ہے صوبائی حکومت کرپشن کے خاتمہ اور عوام تک سروسز کی فراہمی کے لیے کوشاں ہے،لائیواسٹاک کے فروغ ہی سے ہماری معیشت میں بہتر تبدیلی آسکتی ہے ،قدرتی چراگاہیں خشک سالی کے باعث ختم ہوتی جارہی ہیں،گوشت و دودھ سمیت پولٹری پیداوار میں اضافہ کے لیے لائیواسٹاک کے ماہرین و ڈاکٹرزہمہ وقت مصروف عمل ہیں بلوچستان ناڑی ماسٹر جیسے جانور وں سے یقینانہ صرف صوبہ بلکہ ملک بھر سے گوشت کی کمی کا مسئلہ ختم ہو سکتا ہے،جانوروں کی ایران اور افغانستان اسمگلنگ کو روکنے کے لیے وزارت داخلہ کو ثمری بھیجی جائے گی، گرین بلوچستان پیکج کے تحت صوبہ بھر میں 15لاکھ سے زائد درخت اور پودئے لگانے کی مہم کا آغاز کردیا گیاہے،ماحولیاتی تبدیلی میں عوام میں شعور و آگاہی پھیلانے کی ضرورت ہے ان خیالات کا اظہارانہوں نے سبی کے ایک روزہ دورہ کے دوران ڈیری فارم ،بیف اینڈ ریسرچ سینٹر ،اسٹیڈیم ،گھوڑا ہسپتال ،جنگلات نرسری کے معائنہ کے موقع پر صحافیوں سے بات چیت میں کیا۔

 اس موقع پر ڈائریکٹر لائیواسٹاک ڈاکٹر عتیق الرحمان شیرازی،ڈپٹی ڈائریکٹر ڈاکٹر جان محمد صافی،بیف اینڈ ریسرچ سینٹر کے سپرٹنڈنت ڈاکٹر عبدالصبور کاکڑ،ڈاکٹر عزیز عثمانی،ڈائریکٹر جنرل جنگلات ضیغم احمد ،کنزرویٹر جنگلات زاہد رند و دیگر بھی موجود تھے قبل ازیں صوبائی وزیر کو بیف اینڈ ریسرچ سینٹر کے سپرٹنڈنٹ ڈاکٹر صبور کاکڑ نے بلوچستان ناڑی ماسٹر نسل کے معرض وجود کے حوالے سے کی جانے والی سائنسی تحقیق اور بلوچستان ناڑی ماسٹر کی افادیت کے بارے میں تفصیلاً بریفنگ بھی دی ،اس موقع پر صوبائی وزیرلائیو اسٹاک و جنگلات آغا سیدمحمدرضا  نے کہا کہ کرپشن ہمارئے معاشرئے کی جڑوں میں سرعیت کر چکا ہے اور معاشرئے سے کرپشن کا خاتمہ کیئے بغیر بہتری لانا ناممکن ہے انہوں نے کہا کہ ڈرائنگ رومز اور ائیر کنڈیشنڈ کمروں میں بیٹھ کر اداروں کی کارکردگی کو بہتر نہیں بنایا جاسکتا ہے اس کے لیے اداروں کی مانیٹرنگ ناگزیر ہے اور اسی سلسلے میں سبی کا دورہ کیا ہے تاکہ محکمہ کی کارکردگی کو بہتر بنایا جاسکے اور پروڈکشن میں بھی خاطر خواہ اضافہ کیا جاسکے۔

 انہوں نے کہا کہ آسٹریلیا کے ڈراؤٹ ماسٹر اور بلوچستان کی بھاگناڑی کے کامیاب کراس تجربے کے بعد بلوچستان ناڑی ماسٹر یقیناًگوشت کی پیداوار میں اہمیت کا حامل جانور ہے اور اس نسل کو پال کر نہ صرف بلوچستان بلکہ ملک بھر سے گوشت کی کمی جیسے مسئلے کو حل کیا جاسکتا ہے بلکہ ہم اس قابل ہیں کہ بیرون ممالک بھی گوشت کو ایکسپورٹ کرکے اپنے زرمبادلہ میں اضافہ کرسکتے ہیں انہوں نے کہا کہ ملک بھر کے لائیو اسٹاک کا 48.1فیصد بلوچستان پروڈویوس کرتا ہے اور لائیواسٹاک کے فروغ کے لیے مزید اقدامات اٹھائے جارہے ہیں ۔

انہوں نے کہا کہ قدرتی چراگاہیں خشک سالی کی وجہ سے ختم ہوتی جارہی ہیں جس کا منفی اثر یقیناًمالداری کے شعبہ پر پڑ رہا ہے انہوں نے مزید کہا کہ صوبائی حکومت نے گرین بلوچستان پیکج کے تحت صوبہ بھر میں15لاکھ سے زائد درخت اور پودے لگانے کی قومی مہم کا آغاز کیا ہے تاکہ صوبے کے ماحول میں تغیراتی تبدیلی لائی جاسکے انہوں نے کہا کہ ماحولیاتی تبدیلی کے لیے میڈیا کو بھی چاہیے کہ وہ عوام میں شعور و آگاہی پھیلائے اور اگر ایک گھر ایک پودا لگا یا جائے تو ہم ماحولیاتی آلودگی کو کنٹرول کرسکتے ہیں۔

وحدت نیوز (کوئٹہ) وزیراعلٰی بلوچستان میر عبدالقدوس بزنجو کی زیر صدارت صوبائی کابینہ کا اجلاس وزیراعلٰی ہاؤس کوئٹہ میں منعقد ہوا۔ اجلاس میں ایجنڈے میں شامل مختلف امور کا جائزہ لیتے ہوئے ان کی منظوری دی گئی۔ کابینہ نے صوبے کے دور دراز علاقوں میں استاتذہ کی کمی کو فوری طور پر دور کرنے کے لئے کنٹریکٹ بنیادوں پر استاتذہ کی تعیناتی کی منظوری دی اور صوبائی کابینہ نے متعلقہ محکمے کو ہدایت کی کہ بھرتی کے نظام میں میرٹ اور شفافیت کو مقدم رکھا جائے۔ کابینہ نے ہدایت کی کے ایم پی اے فنڈز سے تعمیر شدہ پرائمری سکولوں کے ایس این ایز کو بھی فوری طور پر منظور کیا جائے، تاکہ تعمیر ہونے کے فوراً بعد وہاں تدریسی عمل کو شروع کیا جاسکے۔ صوبائی کابینہ نے صوبے میں سرمایہ کاری کے فروغ کے لئے پہلی بار پبلک پرائیوٹ پارٹنرشپ ایکٹ کی منظوری بھی دی، جس سے صوبے میں مختلف شعبوں میں سرکاری اور نجی شراکت داری سے صوبے میں ترقی آئے گی۔ صوبائی کابینہ نے سوئی ٹاؤن میں پینے کا صاف پانی مہیا کرنے کے منصوبے کی منظوری دے دی، تاکہ سوئی ٹاؤن کے ایک لاکھ سے زائد آبادی کو پینے کا صاف پانی میسر ہو۔ کابینہ نے صوبے میں معذور افراد کو خود کفیل اور کار آمد شہری بنانے کے لئے خصوصی فنڈز قائم کرنے کا فیصلہ کیا۔ کابینہ نے شہری دفاع کو ڈویژنل سطح پر پھیلانے اور ان کے دفاتر قائم کرنے کی منظوری بھی دی۔

کابینہ کو متعلقہ سیکرٹری نے صوبے میں گندم کی موجودہ اسٹاک کے حوالے سے بریفنگ دی اور موجودہ اسٹاک کو فوری طو پر سبسڈی ریٹ پر فلور ملز کو دینے کی منظوری دے دی۔ کابینہ نے گوادر جوڈیشل کمپلیکس کی تعمیر کے پی سی ون کی منظوری دی۔ اجلاس سے خطاب کرتے ہوئے وزیراعلٰی نے کہا کہ ہم نے پہلے ہی بہت وقت ضائع کیا ہے، ہمیں تیزی سے کام کرنا ہوگا۔ عوام کا پیسہ اور وسائل عوام پر خرچ ہونے چاہئیں۔ اس سلسلے میں تمام محکمے اپنی کارکردگی میں بہتری لاکر عوام کو تبدیلی کا احساس دلائیں۔ اجلاس میں مجلس وحدت مسلمین سے تعلق رکھنے والے صوبائی وزیر قانون وپارلیمانی امورآغا سید محمد رضا  سمیت  صوبائی وزراء میر سرفراز بگٹی، میر عاصم کرد گیلو، سردار سرفراز چاکر ڈومکی، شیخ جعفر خان مندوخیل، عبدالماجد ابڑو، طاہر محمود خان، میرعامر رند، حاجی غلام دستگیر بادینی، محمد آکبر آسکانی، منظور کاکڑ، پرنس احمد علی، میر ضیاء لانگو، ڈاکٹر رقیہ سعید ہاشمی، محترمہ راحت جمالی، وزیراعلٰی کے مشیر کہدہ بابر، اراکین اسمبلی، میر حمل کلمتی چیف سیکرٹری بلوچستان اورنگزیب حق، ایڈیشنل چیف سیکرٹری (منصوبہ بندی و ترقیات) نصیب اللہ بازئی، سیکرٹری خزانہ، سیکرٹری قانون، سیکرٹری مواصلات اور دیگر متعلقہ حکام شریک ہوئے۔