وحدت نیوز (اسلام آباد) پاکستان عوامی تحریک کے سیکرٹری جنرل خرم نواز گنڈاپور نے مجلس وحدت مسلمین پاکستان کے احتجاجی بھوک ہڑتالی کیمپ میں ایم ڈبلیو ایم کے سربراہ علامہ راجہ ناصر عباس جعفری سے ملاقات کی اور اپنی جماعت کی جانب سے مکمل حمایت کا اعلان کیا۔ انہوں نے کہا کہ ایم ڈبلیو ایم نے حکمرانوں کے ظلم کے خلاف ہمیشہ آواز بلند کی ہے۔ ملک میں جاری دہشت گردی، لاقانونیت اور ریاستی اداروں کی بربریت کے خلاف جنگ میں مجلس وحدت مسلمین تنہا نہیں بلکہ پوری قوم اس کے ساتھ کھڑی ہیں۔ پاکستان عوامی تحریک کے سربراہ علامہ طاہر القادری نے اپنے پیغام میں مکمل حمایت کا اعلان کیا ہے۔ سانحہ ماڈل ٹاؤن کے بعد جس طرح علامہ ناصر عباس ہمارے ہم قدم رہے، اسی طرح ہماری بھی انہیں بھرپور حمایت حاصل رہے گی۔ انہوں نے کہا کہ مجلس وحدت مسلمین ملت تشیع کی نمائندہ مذہبی و سیاسی جماعت ہے اور ان کی طرف سے کئے جانے والے مطالبات ملک و قوم کے مفاد میں ہیں۔
مجلس وحدت مسلمین کے سربراہ علامہ ناصر عباس جعفری نے خرم نواز گنداپور کا شکریہ ادا کرتے ہوئے کہا ہے کہ حکومت مکمل طور پر بےحس اور عوام کے جان و مال کے تحفظ سے سبکدوش ہوچکی ہے۔ علامہ ناصر عباس کا کہنا تھا کہ ملک کے حکمران ظلم و بربریت کی علامت بن چکے ہیں۔ موجودہ حکومت میں شیعہ نسل کشی میں جو شدت آئی ہے، وہ حکومت اور دہشت گردوں کے سہولت کاروں کے درمیان گہرے روابط کا نتیجہ ہے۔ نیشنل ایکشن پلان کو سہولت کاروں کے خلاف استعمال کرنے کی بجائے ان مسلمانوں کے خلاف استعمال کیا جا رہا ہے، جو رسول ﷺ اور آل رسول ﷺ کا ذکر کرتے ہیں، قانون و انصاف کو حکمرانوں نے گھر کی لونڈی سمجھ رکھا ہے۔ منصفانہ نظام کے قیام اور ملک دشمن عناصر کی بیخ کنی کے لئے پوری قوم کو مل کر آواز بلند کرنا ہوگی۔
وحدت نیوز(سکردو) مجلس وحدت مسلمین پاکستان گلگت بلتستان کےرکن اسمبلی کاچو امتیاز حیدرخان نے اپنے ایک بیان میں کہا ہے کہ گلگت بلتستان میں دہشتگرد عناصر کو کھلی چھٹی ملی ہوئی ہے اور حکمران جماعت سیاسی انتقام میں مصروف ہے۔ گزشتہ رات چلاس تھانے پر دہشتگردوں کا منظم حملہ، داریل سے ایس سی او کے انجینئرز کا اغوا حالیہ حکومت کی کارکردگی پر سوالیہ نشان اور کسی طوفان کا پیش خیمہ ہے۔ گلگت بلتستان میں بڑے پیمانے پر دہشتگردی کے واقعات رونما ہو سکتے ہیں اس کے لیے عوام بلخصوص حساس اور ریاستی اداروں کو ہشیار رہنے کی ضرورت ہے۔ گزشتہ رات پولیس کی بروقت کارروائی لائق تحسین ہے اور امید کرتے ہیں کہ پولیس اسی طرح چوکنا رہے گی۔ موجودہ حکومت سے دہشتگردوں کے خلاف آپریشن کرنے اور دہشتگردی سے خطے کو پاک کرنے کا مطالبہ کرنا عبث ہے کیونکہ اس حکومت کے نزدیک دہشتگردی کی تعریف ہی دوسری ہے۔ ان کے نزدیک مخالف سیاسی جماعت اور مخالف نظریے کے حامل لوگ اسی تعریف پر پورا اترتے ہیں جبکہ وہ خود دہشتگردوں کے سامنے جاکر ہاتھ جوڑ رہے ہوتے ہیں اور ان سے امن کی بھیک مانگتے ہیں۔
کاچوامتیاز نے کہا کہ وزیراعلٰی گلگت بلتستان یا تو دیدہ و دانستہ دہشتگرد عناصر کو کھلی چھٹی دے رکھی ہے یا وہ اس غلط فہمی کا شکار ہے کہ امن بھیک مانگنے سے نصیب ہوتا ہے۔ امن کے لیے قربانی درکار ہوتی ہے اور دہشتگردی کو طاقت کے ذریعے ہی ختم کیا جا سکتا ہے۔ دہشتگردی کے حوالے سے وزیراعلٰی گلگت بلتستان کا لہجہ مختلف ضلعوں میں مختلف ہو جاتا ہے۔ موجودہ صوبائی حکومت دہشتگردوں کے خلاف سخت اقدامات اٹھانے کی پوزیشن میں نہیں ہے۔ ہم پاکستان آرمی، فورس کمانڈر، آئی جی پی، سکیورٹی فورسز اور حساس اداروں سے مطالبہ کرتے ہیں کہ حکومتی تیور کو دیکھے بنا دہشتگردوں کے خلاف حکمت عملی تیار کرکے کارروائی شروع کرے۔ بلخصوص شاہراہ قراقرم اور حساس مقامات کی سکیورٹی میں اضافہ کرے۔ اگر صوبائی حکومت کی طرف دیکھتے رہے تو ممکن ہے معاملہ ہاتھ سے نکل جائے اور پچھتاوے سے سوا کچھ بھی ہاتھ نہ آئے۔
