وحدت نیوز(کراچی) اٹھارہ اکتوبر کو منعقدہ شہدائے راہ ولایت کانفرنس غدیرسے تمسک کی تجدید کرے گی، گلگت، پشاور اور کوئٹہ میں ملت جعفریہ کے بے گناہ افراد کا قتل عام ایک سوچی سمجھی سازش کا حصہ ہے، حکمرانوں نے اپنی ناکامی پر پردہ ڈالنے کے لئے ملک میں دہشت گردی کا بازار گرم کر رکھا ہے۔ محرم الحرام میں جلوس وعزاداری کے خلاف کسی سازش کو برداشت نہیں کریں گے،ہم اپنا سب کچھ عزاداری کی بقاء کی خاطر قربان کر سکتے ہیں ، لیکن عزاداری کو کسی چیز پر قربان نہیں کر سکتے ، راولپنڈی سانحے کے تدارک کیلئے حکومت اور قومی ادارے پیشگی حکمت عملی مرتب کریں روٹ  کی  تبدیلی،  جلوسوں کی بندش، عزاداری کی محدودی کا خواب دیکھنے والے احمقوں کی جنت میں رہتےہیں۔ ان خیالات کا اظہار مجلس وحدت مسلمین پاکستان کے مرکزی ڈپٹی سیکرٹری جنرل اور اسلامی نظریاتی کونسل کے رکن علامہ امین شہیدی نے اپنے حالیہ دورہ کراچی کے موقع پر گلشن حدید ، پپری گوٹھ، آثار قدیمہ چوکنڈی، فیوچر کالونی اور جعفرطیار سوسائٹی میں منعقدہ جشن غدیر کے مختلف عوامی اجتماعات اور شہدائے واہ ولایت عوامی رابطہ مہم سے خطاب کرتے ہوئے کیا، اس موقع پر ایم ڈبلیوایم ضلع ملیر کے سیکریٹری جنرل احسن عباس رضوی ، ضلعی ڈپٹی سیکریٹری جنرل ثمر زیدی، سعید رضااور اسد زیدی، حسن عباس اور ڈاکٹرحسن جعفر بھی موجود تھے ۔

مسجد حسنین جعفر طیار سوسائٹی میں اجتماع سے خطاب کرتے ہوئےعلامہ امین شہیدی نے کہا کہ ملک بھر میں دہشت گردوں کو فری ہینڈ دیا گیا ہے جبکہ دوسری جانب پرامن اور محب وطن لوگوں کو ہراساں کرنے، اُن کیخلاف بےبنیاد مقدمات قائم کرنے اور پابند سلاسل کرنے کا عمل جاری ہے ہم وطن کے اندر دہشت گردی اور بے گناہوں کے قتل کو حرام سمجھتے ہیں۔ دنیا بھر میں ایک مخصوص تکفیری گروہ اسلام کی بدنامی اور مسلمانوں کے لئے رسوائی کا سبب بن رہا ہے آج امام کعبہ کو بھی ان تکفیریوں کیخلاف اعلان کرنا پڑا کہ اس گروہ کا اسلام کیساتھ کوئی تعلق نہیں۔ انہوں نے کہا کہ ملک میں دیرپا امن اور رواداری کیلئے انتہا پسندوں کیخلاف گھیرا تنگ کرنا ہو گا، بصورت دیگر یہ انتہا پسند تکفیری گروہ کی جانب سے خانہ جنگی کو کوئی نہیں روک سکے گا۔ علامہ امین شہیدی نے کہا کہ انشاءاللہ فیصل آباد اور لاہور میں منعقدہ عوامی اجتماعات ملت اسلامیہ پاکستان کے لئے دہشت گردوں، لٹیروں اور خاندانی اقتدار سے نجات کا باعث بنیں گے۔

انہوں نے مذید کہا کہ محرم الحرام کی آمد پر ہی عزاداری کے خلاف سازشوں کی بو آنا شروع ہو چکی ہے، آزادانہ مذہبی رسومات کی ادائیگی ملت جعفریہ کا آئینی، قانونی ، جمہوری اور اخلاقی حق ہےجسے کسی صورت کوئی نہیں چھین سکتا، گذشتہ برس راجہ بازار راولپنڈی میں ہونے والے اندھوناک سانحے کے تدارک کیلئے سکیورٹی اداروں ، لائسنسداروں اور قومی تنظیموں کو پیشگی طور پر مشترکہ حکمت عملی مرتب کرنا ہوگی، ہم کسی صورت عزاداری سید الشہداء علیہ السلام پر کوئی قدغن برداشت نہیں کریں گے۔

وحدت نیوز(کراچی) کراچی واٹر اینڈ سیوریج بورڈ کے چیف انجینئر امداد حسین مگسی نے مجلس وحدت مسلمین کی دعو ت پر جعفرطیار سوسائٹی کا دورہ کیا، اس موقع پر ان کے ہمراہ اسسٹنٹ چیف انجینئر اختر باجوہ، ایکس سی این ملیر اشرف صدیقی اور دیگر مطالقہ حکام بھی موجود تھے، واٹر بورڈکے حکام نے ایم ڈبلیوایم کے ضلعی سیکریٹری جنرل احسن عباس رضوی سے  وحدت ہاوس میں ملاقات کی اور بعد ازاں جعفر طیار سوسائٹی میں مکینوں کو درپیش نکاسی آب کے مسائل اور سیوریج کے گندے پانی کے ڈھیر کا جائزہ لیا،اس موقع پر گفتگو کرتے ہوئے احسن عباس رضوی کا کہنا تھا کہ بار بار توجہ مبذول کروانے کے باوجود سرکاری حکام جعفر طیار کے عوام کو درپیش صفائی ستھرائی کے مسائل حل کرنے میں یکسر تعاون نہیں کر رہے ، مسلسل متعصبانہ رویہ اہلیان جعفر طیا ر کے اندر غم و غصے کے جذبات کو پروان چڑھنے کا سبب بن رہا ہے، اہل محلہ سیوریج کے پانی کی ناقص نکاسی کے باعث ذہنی اذیت اور اضطراب میں مبتلا ہوچکے ہیں ، کئی مرتبہ علاقہ مکینوں نے اپنی مدد آپ کے تحت صفائی ستھرائی کے کام انجام دلوائے لیکن اس کے باوجود مسائل جوں کے توں ہیں ، انہوں نے واٹر بورڈ کے حکام سے مذید کہا کہ آپ کا ڈپارٹمنٹ پوری سوسائٹی کاایک گرینڈ سروے کرے اور جہاں جہاں لائن کی تبدیلی کا عمل ضروری ہے اسے جلد مکمل کیا جائے، واٹر بورڈ کے چیف انجینئر امداد مگسی نے مطالقہ ذمہ داران کو ہدایات جاری کیں کے سیوریج کے پانی کی مکمل نکاسی تک آپریشن جاری رکھا جائے، واٹر بورڈ حکام نے شمائل ہومز میں سیوریج کے گندے پانی سے متاثرہ مکینوں سے ملاقات بھی کی اور ان کے مسائل کے جلد حل کی یقین دہانی بھی کروائی ، اس موقع پر ایم ڈبلیوایم کے رہنماحسن عباس، اسد علی ، مختار امام ، نقی زیدی ، عارف رضااور دیگر بھی موجود تھے۔

وحدت نیوز (کراچی) مجلس وحدت مسلمین ضلع ملیر اور کراچی واٹر اینڈ سیوریج بورڈ کی مشترکہ کاوشوں سے ملیر میں صفائی مہم کا آغاز ہوگیا ہے، ایم ڈبلیوایم ضلع ملیر کے سیکریٹری جنرل احسن عباس رضوی نے اپنی زیر نگرانی صفائی ستھرائی اور سیوریج لائنوں کی صفائی کے کام کا آغاز کروایا، اس موقع پر ایم ڈبلیوایم ضلع ملیر کی کابینہ کے اراکین اور جعفر طیار یونٹ کے ذمہ داران بھی موجود تھے، صفائی مہم کے پہلے مرحلے میں بلاک سیوریج لائنوں کو کلیئر کرنے کا کام مکمل کیا جائے گاجبکہ بعد اذاں ٹوٹی ہوئی اور بلاک لائنوں کی تبدیلی کے کام کا آغاز کیا جائے گا، اس مرحلے کی  کراچی واٹر اینڈ بورڈ کے ایم ڈی قطب الدین شیخ اور چیف انجینئر کراچی واٹر اینڈ بورڈ بورڈ امداد مگسی خصوص نگرانی کر رہے ہیں ، کئی ماہ سے کھڑے گندے پانی کی نکاسی کے کام کے آغاز پر علاقہ مکینوں نے مسرت کا اظہار کیا ہے اور صفائی مہم کے آغاز پر ایم ڈبلیوایم اور واٹر بورڈ کی کاوشوں کو سراہا ہے۔

وحدت نیوز(کراچی) مجلس وحدت مسلمین کراچی، ضلع ملیر کے وفد نے سیکریٹری جنرل سید احسن عباس رضوی کی سربراہی میں چیف انجینئر کراچی واٹر اینڈ سیوریج بورڈامداد مگسی سے ان کے دفتر میں ملاقات کی ، اس موقع پر سابق کونسلر یوسی 5سید علی عباس عابدی، سابق ممبر مینیجنگ کمیٹی جعفر طیا رسوسائٹی سجاد اکبر زیدی اور عارف رضابھی ان کے ہمراہ موجود تھے، رہنماوں نے چیف انجینئر واٹر بورڈ امداد مگسی سےضلع ملیر خصوصاً جعفرطیا رسوسائٹی میں نکاسی آب کی ابتر صورتحال پر تفصیلی بات چیت کی اور علاقہ مکینوں کو درپیش مسائل سے بھی آگاہ کیا، رہنماوں نے حالیہ دنوں جعفرطیار ،محبت نگر، لیاقت اسکوائر، شادمان ٹاون اور ایف ساوتھ میں کھڑے گندے پانی کی تصاویر بھی فراہم کی، جس پر امداد مگسی نےشدید تشویش اور متعلقہ حکام پر برہمی کا اظہار بھی کیا، انہوں نے وفد کو یقین دہانی کروائی کے واٹر بورڈ ملیر میں نکاسی آب کے ناقص انتظامات کا فوری نوٹس لے گا ، انہوں نے متعلقہ حکام کو ہدایات جاری کیں کہ  جلد از جلد سیوریج کی ابتر صورتحال کو بہتر بنانے کے لئے ہنگامی بنیادوں پر اقدامات کیئے جائیں ۔ انہوں نے بذات خود متاثرہ علاقوں کا دورہ کرنے کی یقین دہانی بھی کروائی۔

وحدت نیوز(کراچی) مجلس وحدت مسلمین ضلع ملیر کے شعبہ ویلفیئرخیرالعمل فاونڈیشن کی جانب سے سالہائے گذشتہ کی طرح امسال بھی مستحقین و محرومین کی امداد کے لئے راشن پیک کی تقسیم کا عمل الحمد اللہ وحدت ہاوس ملیر میں مکمل کر لیا گیا ، اس سلسلے میں کل 106ضرورت مند خاندانوں کو راشن بیگ تقسیم کیئےگے،ان راشن بیگ کا کل تخمینہ تقریباً  2,00,000دو لاکھ روپئےہے،اس موقع پرپیش امام مرکزی مسجد مولانا ذوالفقار جعفری نے خصوصی دعوت پر وحدت ہاوس آکر مستحقین میں راشن تقسیم کیا ، اس موقع پر ایم ڈبلیوایم ضلع ملیر کے سیکریٹری جنرل سید احسن عباس رضوی، ڈپٹی سیکریٹری جنرل ثمر عباس ، سیکریٹری فلاح و بہبود اسد علی زیدی، سیکریٹری اطلاعات سید محمد جعفر ، سیکریٹری روابط سعید رضا ، سیکریٹری مالیات شیراز زیدی، سیکریٹری نشرواشاعت مختار منگی و دیگر بھی موجود تھے،یہ راشن بیگ ضلع ملیر کے مختلف علاقوں کے مستحق افراد میں بلاتفریق تقسیم کئے گئے ہیں جن میں اہل سنت برادران بھی شامل ہیں ۔

اس موقع پر گفتگو کرتے ہوئے مولانا ذوالفقار جعفری کا کہنا تھا کہ مستضعف و محروم طبقے کی مدد کرناکار انبیاءو آئمہ ہے، مجلس وحدت کی عوامی خدمت ہی اس کا طرہ امتیاز ہے،انسانیت کی خدمت اور مسلسل میدان میں حاضری ہی کسی جماعت کی کامیابی اور مقبولیت کی ضمانت ہوتی ہے، البتہ تنظیمی اور سیاسی امور میں قرب خدا کوملحوض خاطر رکھنا واجب ہے، علامہ ذوالفقار جعفری نےایم ڈبلیوایم کی اس کاوش کو خوب سراہا اور اپنے تعاون کا بھی یقین دلایا۔

ضلعی سیکریٹری جنرل احسن رضوی نے علامہ ذوالفقار جعفری کوخیر العمل فاونڈیشن ضلع ملیرکی فلاحی سرگرمیوں پر تفصیلی بریفنگ دیتے ہوئے کہا کہ خدا وند متعال کا شکر ہے کہ اس نے ہمیں دکھی انسانیت کی خدمت کی توفیق دی،ورنہ ہم اس عظیم فریضے کی انجام دہی کی استطاعت ہی نہیں رکھتے، خدا کا لطف جاری رہا تو  انسانی خدمت کا سفر جاری رہے گا ،ان کا کہنا تھا کہ ہم اپنے مجاہد و مخلص قائدین کی اتباء کر تے ہوئے معاشرے کے ہر میدان میں بر وقت موجود رہنے کو نعمت خدا وندی قرار دیتے ہیں ، انہوں نے مذید کہا کہ خیر العمل فاونڈیشن(ایم ڈبلیوایم ضلع ملیر ) مستحق افراد میں راشن کی تقسیم اور  مختلف عناوین یعنی اسکول فیس، کالج فیس، ایڈمیشن فیس، کرایہ، شادی اور نقد امداد کا سلسلہ سارا سال جاری رکھتا ہے، گذشتہ سال کیئے جانے والے فلاحی کاموں کا کل تخمینہ 3.25لاکھ روپے ہے، یہ تمام امور خیریہ آپ مومنین اور مسلمین کے تعاون سے ہی ممکن ہیں ، خیر العمل فاونڈیشن دکھی انسانیت کی خدمت کے اس سفر میں آپ صاحبان استطاعت کے تعاون کی طلبگار ہے۔

وحدت نیوز(کراچی) دہشت گرد اپنی مضموم سازشوں کے زریعے اسلام و پاکستان کو عالمی سطح پر داغ دار کر نے کی کوشش کر رہے ہیں ، دہشت گردی کسی صورت میں بھی ہوقابل مذمت ہے، کراچی ایئر پورٹ حملہ پاکستان کے دفاع پر حملہ تھا،موجودہ حکومت نے بلوچستان کے رئیسانی کا انجام بھول چکی ہے، سانحہ تفتان زائرین کے راستے کی رکاوٹ نہیں بن سکتا، ریاست نہ فقط طالبان بلکے ان کے خیر خواہوں کے خلاف بھی آپریشن کلین اپ کرے، ان خیالات کا اظہار مجلس وحدت مسلمین کراچی، ضلع ملیر کے سیکریٹری جنرل سید احسن عباس رضوی نے اسٹار گیٹ شاہراہ فیصل پر سانحہ کراچی ایئر پورٹ اور سانحہ تفتان کے شہداء سے تجدید عہد کے لئے کیئے گئے چراغاں کے موقع پر شرکاء سے خطاب کرتے ہوئے کیا۔

ان کا کہنا تھا کہ دنیا بھر خصوصاًپاکستان میں دہشت گردی سیاسی پشت پناہی میں جاری ہے، کراچی میں ٹارگٹ کلنگ ہویا اسلام آباد، لاہور،پشاور ،، فاٹا، گلگت ، کوئٹہ تفتان، مستونگ ، ڈیرہ اسماعیل خان اور دیگر شہروں میں خودکش حملے تمام کے پیچھے کوئی نہ کوئی سیاسی یا مذہبی قوت پشت پناہ نظر آئی ہے، پاکستان کے عوام کی آنکھوں میں نام نہاد مذہبی و سیاسی راہ زن دھول جھونک کر گمراہ کر تے ہیں ، بے گناہ شہریوں کے قتل عام میں کوئی خفیہ ہاتھ نہیں ، بلکہ بہت سارے جانے پہنچانے ہاتھ ملوث ہیں ، ریاستی اداروں کی ذمہ داری ہے کہ ٹریک رکارٹ چیک کریں اور دہشت گرد وں کے ساتھ ساتھ ان کے اسٹریجٹک پارٹنرز کے خلاف بھی فیصلہ کن کاروائی عمل میں لائیں ، ان کا مذید کہنا تھا کہ کراچی ایئر پورٹ سانحہ سکیورٹی اداروں کی نا اہلی سے زیادہ دہشت گردوں کے سیاسی و مذہبی پشت پناہوں کی منافقانہ سیاست کا نتیجہ ہے۔انہوں نے کہا کہ ہماری چودہ سو سالہ تاریخ ہماری شجاعت اور استقامت کی گواہ ہے، ہم دیواروں میں زندہ چنے گئے، اعضاء کاٹے گئے، پس زندان گئے لیکن زیارات آئمہ اطہار علیہ السلام سے دستبردار نہیں ہوئے ، ایک سانحہ تفتان کیا ہزار سانحہ تفتان اور ہو جائیں ہم در اہل بیت علیہ السلام سے کنارہ کش نہیں ہو سکتے ۔

اس موقع پر ایم ڈبلیوایم کراچی کے رہنما حسن ، ہاشمی ، علامہ علی انور،سید علی حسین نقوی اورانجینئررضا نقوی سمیت ثمر عباس زیدی، حسن عباس،ناظم حسین ،زمان رضوی ، پولیس اور رینجرز کے حکام بالخصوص شہدائے کراچی ایئر پورٹ کے ورثاء بھی موجود تھے۔ شرکاء نے شہداء کی یاد میں چراغ روشن کیئے اور شہداء کی عظیم قربانیوں پر انہیں خراج تحسین پیش کیا۔ اس موقع پر اسٹار گیٹ کو چاروں اطراف سے پولیس نے مکمل حصار میں لیا ہوا تھا جبکہ دونوں اطراف کی سڑکیں ٹریفک کے لئے مکمل طور پر بند تھیں ۔