وحدت نیوز(گلگت) گلگت بلتستان میں خطرناک حد تک کرونا کے پھیلاؤ میں صوبائی حکومت کا ہاتھ ہے ۔ شروع دن سے لاک ڈاؤن میں سختی اور باہر سے آنے والوں کو روک دیا جاتا تو آج گلگت بلتستان کرونا فری علاقہ قرار پاتا لیکن صوبائی حکومت نے کرونا پر سیاست کے علاوہ کوئی عملی قدم نہیں اٹھایا ۔ بسین اور محمد آباد میں کرونا ہسپتال تو قائم کئے لیکن ان ہسپتالوں میں مطلوبہ سہولتیں مہیا نہیں کی گئیں ۔ پی ایچ کیو ہسپتال پر مریضوں کا دباءو بڑھ رہا ہے اور یہاں بھی ڈاکٹرز اورپیرامیڈیکل سٹاف کو ضروری حفاظتی سامان کی عدم فراہمی سے ڈاکٹرز اور پیرامیڈیکس کا عملہ خود کرونا کی زد میں آگئے ہیں ۔

مجلس وحدت مسلمین گلگت بلتستان کے ترجمان محمدالیاس صدیقی نے کہا کہ حکومت کرونا سے نمٹنے میں بری طرح ناکام ہوچکی ہے ۔ جس طرح سے کرونا گلگت بلتستان کے عوام پر حملہ آور ہے اس کی تمام تر ذمہ حکومت وقت پر عائد ہوتی ہے ۔ انتظامیہ عوامی اجتماعات پر پابندی لگانے میں ناکام رہی جس کی وجہ سے وبا پھیلتی چلی گئی اور آج اس خطرناک وبا سے کوئی شخص محفوظ نہیں رہا ہے ۔ انہوں نے کہا کہ حکومت نے جن ہسپتالوں کو کرونا ہسپتال ڈیکلیئر کیا وہاں نہ تو آکسیجن فراہم کیا ہے اور نہ ہی وینٹلیٹرز کی مطلوبہ تعداد فراہم کیا ۔ کرونا کے مشتبہ مریضوں کی ٹیسٹ رپورٹس آنے میں ہفتے لگادیئے جاتے ہیں ۔ ہسپتالوں کا عملہ احتجاج کرتے کرتے تھک چکا ہے لیکن حکومت کے کانوں میں جوں تک نہ رینگی ۔ ماہرین صحت کے بروقت انتباہ کے باوجود اقدامات نہ کرنے سے لیگی حکومت کی عوام دشمنی کھل کر سامنے آچکی ہے ۔

 انہوں نے کہاکہ اب بھی وقت ہے حکومت اپنے اقتدار کے دن پورے کرنے کی بجائے عوام کو ریلیف دینے پر غور کرے ۔ جن ہسپتالوں کو کرونا کے مریضوں کیلئے مختص کیا ہے وہاں ٹیسٹ لیب اور دیگر سازوسامان سے آراستہ کیا جائے ۔ ٹیسٹ رپورٹس میں تیزی لاکر متعلقہ علاقوں کو سیل کرکے وبا کے پھیلاءو کو کم کیا جاسکتا ہے ۔ انہوں نے عوام سے بھی اپیل کی کہ وہ روزگار کی بجائے اپنی جان کی فکر کریں ا ور ماہرین صحت کے بتائے ہوئے احتیاطی تدابیر پر سختی سے عمل کرکے اپنی اور دوسروں کی قیمتی جانوں کے تحفظ کویقینی بنائیں ۔ انہوں نے مزید کہا کہ مجلس وحدت مسلمین گرینڈ ہیلتھ الائنس کے مطالبات کی بھرپور حمایت کرتی ہے ۔

وحدت نیوز(گلگت)حکومت کی ناقص منصوبہ بندی کی وجہ سے گلگت شہر میں کرونا خطرناک حد تک پھیل چکا ہے ۔ محکمہ صحت کے مجرمانہ غفلت کے نتیجے میں پرونشل ہیڈکوارٹر ہسپتال میں ڈاکٹرز،پیرامیڈیکل سٹاف کے ساتھ ساتھ دیگر مریض بھی رسک پر ہیں ۔ کرونا کے مریضوں کیلئے بنائے گئے ہسپتالوں کو مزید فعال کرکے مشتبہ مریضوں کی بھی ان ہسپتالوں میں علاج معالجے کو یقینی بنایاجائے ۔

مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ جس تیزی کے ساتھ گلگت بلتستان میں کرونا پھیل رہا ہے اس سے لگتا ہے کہ حکومت نے اپنی ذمہ داری کو عوام کے رحم وکرم پر چھوڑا ہے ۔ گلگت بلتستان حکومت کی کرونا ٹیسٹنگ میں سست رفتاری کے نتیجے میں کرونا کا پھیلاءو خطرناک حد پہنچ چکا ہے ۔ مشتبہ مریضوں کے ٹیسٹ رپورٹ آنے تک کرونا سے متاثر فرد کئی لوگوں کو کرونا ٹرانسفر کرچکا ہوتاہے ۔ مشتبہ مریضوں کے ٹیسٹ رپورٹ آنے کا انتظار کئے بغیر کرونٹائن کرکے دوسروں کو متاثر ہونے سے بچایا جاسکتا ہے لیکن نہ جانے حکومت عوام کو کس چیز کی سزا دے رہی ہے ۔

انہوں نے کہا کہ مشتبہ مریضوں کو جنرل ہسپتالوں سے دور رکھا جائے لیکن محکمہ صحت ہسپتالوں کو ضروری سازوسامان کی فراہمی اور انتظامی معاملات کو درست انداز میں چلانے سے قاصرہے ۔ کرونا میں مبتلا مشتبہ مریضوں کو جنرل وارڈ اور ونٹی لیٹرز میں رکھا جارہا ہے جس کی وجہ سے پیرامیڈیکل سٹاف اور ڈاکٹرز بھی تیزی سے کرونا میں مبتلا ہورہے ہیں ۔ انہوں نے کہا کہ بہتر حکمت عملی سے کرونا کے پھیلاءو کو نہ روکا گیا تو صورتحال خطرناک حد تک جاسکتی ہے ۔ ارباب اختیار کو چاہئے کہ وہ اس حساس مسئلے کو سنجیدہ لیکر کوئی مناسب حل نکالے ۔ انہوں نے عوام الناس سے اپیل کی وہ افواہوں کی زد میں آکر اس خطرناک بیماری کو ہلکا نہ لیں اور اپنی جان کی حفاظت کو یقینی بنائیں ۔

وحدت نیوز(گلگت)مجلس وحدت مسلمین گلگت بلتستان کے ترجمان و سابق چیئرمین بلدیہ گلگت محمد الیاس صدیقی نے کہا ہے کہ ایک طرف کرونا وائرس کی وجہ سے پورے جی بی میں لاک ڈاؤن ہے، مگر لاک ڈاؤن کی آڑ میں کرپشن اور من پسند لوگوں کو نوازنے کا سلسلہ جاری ہے، گذشتہ روز محکمہ برقیات میں من پسند ٹھیکیداروں کو پری کرکے 43 کروڑ کا ٹھیکہ 64 کروڑ میں دیا گیا ہے جبکہ محکمہ ورکس میں بھی اسی طرح من پسند لوگوں کو نوازنے کی تیاریاں ہو رہی ہیں۔ چیف سیکرٹری صورتحال کا نوٹس لیں اور مذکورہ ٹھیکوں کے ٹینڈر کو منسوخ کریں۔ انہوں نے میڈیا سے گفتگو کرتے ہوئے کہا کہ ایک طرف حکمران فنڈز کمی کا رونا روتے ہیں تو دوسری طرف من پسند لوگوں کو نوازنے کیلئے کروڑوں کے ٹھیکے دیئے جا رہے ہیں۔

انہوں نے کہا کہ حکمران اپنی دو ماہ کی باقی مدت میں کرپشن کے ذریعے زیادہ سے زیادہ پیسے بٹورنے کے چکر میں ہیں، جبکہ عوام صحت کی سہولیات نہ ہونے کی وجہ سے دوسرے اضلاع سے علاج کی غرض سے گلگت کا رخ کر رہے ہیں، گلگت کے ہسپتالوں کی حالت بھی انتہائی خراب ہے۔ انہوں نے کہا کہ صوبائی حکومت گلگت شہر اور دیگر اضلاع کے ہسپتالوں کی حالت زار بہتر بنانے کی بجائے پلوں کا ٹینڈر کروا رہی ہے۔ انہوں نے کہا کہ حکمرانوں کی ترجیحات میں عوام کو صحت کی سہولیات فراہم کرنا شامل ہی نہیں بلکہ حکمران ترجیحات میں زیادہ زیادہ مال بنانا ہے۔

وحدت نیوز (گلگت) کرونا وائرس سے ملک بھر میں ہنگامی حالات ہیں ،وزیر اعلیٰ گلگت بلتستان گن پوائنٹ پر اپنی من پسند سکیموں کو منظور کروانے کیلئے دفاتر کو اوپن کرکے میٹنگز کروارہا ہے۔چیف سیکرٹری گلگت بلتستان اور سیکرٹری پلاننگ فرمائشی پروگرامز سے باز آجائیں ورنہ حالات کی پرواہ کئے بغیر عوام کو سڑکوں پر لایا جائیگا۔

مجلس وحدت مسلمین گلگت بلتستان کے ترجمان محمد الیاس صدیقی نے اپنے ایک بیان میں کہا ہے کہ کرونا کی وجہ سے اہل علاقہ بدترین ذہنی اذیت سے گزر رہے ہیں اور معاشرے کا ہرشخص پریشان ہے تمام سرکاری محکموں کے عملے کوچھٹی پر بھیجا گیا ہے صرف ان محکموں کو چھٹی نہیں جن کا اس بحران میں رول ہے۔ایسے حالات میں وزیر اعلیٰ گلگت بلتستان گن پوائنٹ پر ڈی ڈبلیو پی DWP کا اجلاس بلاکر اپنے من پسند سکیموں کو پاس کروانا چاہتا ہے جو کہ انتہائی زیادتی ہے۔چیف سیکرٹری گلگت بلتستان ریاست کا ملازم ہے نہ کہ وزیر اعلیٰ کا،وہ ان غیر قانونی احکامات کو ماننے سے انکار کرے ۔جب تک ملک اس وباء کے بحران سے نہیں نکل آتا تب تک ادارے اپنی تمام تر توانائیاں اس بحران سے نکلنے کیلئے استعمال میں لائیں۔

وحدت نیوز(گلگت) شہید کرنل مجیب الرحمن جیسے گلگت بلتستان کے بہادر سپوت پر پوری قوم کو فخر ہے۔پاک سرزمین کے دفاع کیلئے گلگت بلتستان کے بہادر جوانوں نے خوہ وہ اندرون ملک دہشت گردہوں یا سرحدوں پر بیرونی جارحیت قربانیاں دے کر مثال قائم کی ہے۔مجلس وحدت مسلمین گلگت بلتستان اس عظیم سپوت کی شہادت پر لواحقین کے غم میں برابر کی شریک ہے اور دعا کرتے ہیں کہ ورثاء کو خدا صبر جمیل عطا کرے۔

مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ ریٹائرڈڈی آئی جی میر افضل صاحب کے فرزندکرنل مجیب الرحمن کی شہادت سے سے نہ صرف ان کے اہل خانہ کا نقصان ہوا ہے بلکہ یہ نقصان پورے گلگت بلتستان کا نقصان ہے۔آج پوری قوم اپنے ایک عظیم سرمائے سے محروم ہوئی اور شہید ایک انتہائی ملنسار اور قومی جذبے سے سرشار تھا اور جب بھی گلگت بلتستان کے کسی بھی فرد کو ان کی مدد کی ضرورت ہوئی انہوں نے بڑھ چڑھ کر مدد کی ہے اور ان کی خدمات کو ہمیشہ یادرکھا جائے گا۔خداوند تعا لی کے حضور دعا گو ہیں کہ اللہ تعالیٰ شہید کو اپنے جوار رحمت میں جگہ عنایت فرمائے اور لواحقین کو صبر جمیل عطا فرمائے اور پاک سرزمین کے تمام سرحدوں کے محافظوں کو اپنے حفظ وامان میں رکھے۔

وحدت نیوز(گلگت) مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ شاہراہ قراقرم کو ٹول بنا کر جی بی کے باسیوں کو بلیک میل کرنے کا سلسلہ بند کیا جائے۔ ایک اغوا کار کی گرفتاری پر شاہراہ کو بلاک کر کے ایک کمیونٹی کو سنگین نتائج کی دھمکیاں دینے والے شخص پر انسداد دہشت گردی ایکٹ کے تحت مقدمہ درج کیا جائے اور قرار واقعی سزا دی جائے۔

 ایک بیان میں الیاس صدیقی کا کہنا تھا کہ ایک مجرم کا دوسرے مجرم کی رہائی کیلئے کھلے عام لوگوں کو بغاوت پر اکسانا اور شاہراہ قراقرم کو بلاک کرنے نیز سنگین نتائج کی دھمکیاں دینا ریاستی رٹ کو چیلنج کرنے کے مترادف ہے۔ مجرم کی دھمکی آمیز ویڈیو سوشل میڈیا پر وائرل ہو چکی ہے جبکہ پیمرا خاموش تماشائی بنا ہوا ہے۔

 انہوں نے کہا کہ شاہراہ قراقرم جی بی کے عوام کیلئے غیر محفوظ ہے، کبھی لوگوں کو بسوں سے اتار کر قتل کیا جاتا ہے تو کبھی گاڑیاں روک کر لوٹا جا رہا ہے اور اب تک درجنوں واقعات رونما ہو چکے ہیں اور کسی واقعہ کے مجرموں کو گرفتار نہیں کیا گیا۔ جب کبھی ایسے مجرم قانون کے شکنجے میں آتے ہیں تو ان کے ساتھی گھیراؤ جلاؤ اور سنگین نتائج کی کھلے عام دھمکیاں دے کر بلیک میل کیا جاتا ہے جو کہ انتہائی تشویشناک ہے۔

انہوں نے کہا کہ ایک اغواکار جس نے غذر سے دو جوانوں کو اغوا کروایا جس کی گرفتاری پر شاہراہ قراقرم کو بند کر کے رہائی کا مطالبہ اور ایک کمیونٹی کا نام لیکر دھمکی دینا حکومتی رٹ کو چیلنج کرنے کے مترادف ہے۔ حکومت فی الفور دھمکی دینے والے شخص کو گرفتار کر کے قرار واقعی سزا دے۔