وحدت نیوز(اسلام آباد) انقلاب مارچ کے راستے میں رکاوٹیں ڈالنے کے باوجود حکومت ناکام ہو چکی ہے، خیابان سہروردی میں لاکھوں افراد کی موجودگی اس بات کی غماز ہے کہ حکومت ربڑ سٹیمپ سے زیادہ کسی چیز کا نام نہیں ہے ، شیعہ سنی مسلمانان پاکستان نے کراچی سے کشمیر تک اپنی مسلّمہ قیادت کی کال پر لبیک کہتے ہوئے نکل کر ثابت کر دیا کہ اس ملک میں شیعہ سنی مسئلہ نہیں ، شیعہ بھی مظلوم ہیں ،سنی بھی مظلوم ہیں، اپنے دور کے ظالموں کے خلاف متحد ہو کر انقلاب کی راہ ہموار کر دی ہے، ان خیالات کا اظہار سیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی نے یہاں اسلام آبادمیں انقلاب مارچ دھرنے کے شرکاء سے خطاب کرتے ہوئے کیا۔

انہوں نے کہا کہ ہم نے ہمیشہ کہا کہ اس ملک میں شیعہ سنی کوئی مسئلہ نہیں آج ہم نے اکٹھے نکل کر اپنے عمل سے بتا دیا کہ ہم ایک تھے، ہیں اور رہیں گے،آج دشمن حیران و انگشت بدندان ہے کہ ہم نے اپنا سرمایا ، اپنی طاقت، اپنی ساری توانایاں شیعہ سنی محبان وطن کو جدا کرنے میں لگائیں تھیں، مگر آج یہ پھر سے ایک ہوگئے ہیں، جو کہ انہیں برداشت نہیں۔

علامہ تصور جوادی نے کہا کہ اس ملک کو محمد علیؒ نے بنایا تھا، اب محمد ؐو علیؑ کے ماننے والے ہی ملکر بچائیں گے، انہوں نے کہا کہ ہم سلام پیش کرتے ہیں قائد وحدت علامہ راجہ ناصر عباس جعفری کو، ڈاکٹر طاہر القادری کو، صاحبزادہ حامد رضا کو کہ جنہوں نے امت محمدیؐ کو اکٹھا کر کے ایک پلیٹ فارم سے ان کے حقوق کے لیئے آواز اٹھائی۔آج وہ تمام اندرونی وبیرونی قوتیں دیکھ لیں کہ ملک کے وفادار بیٹے ملکی آئیں وقانون کی حکمرانی اورملکی بقاسالمیت کی جدوجہد میں اکٹھے ہوچکے ہیں ، انہوں نے کہا کہ وہ کشمیر کی سرزمین سے اپنے قافلے کے ساتھ اس لئے آئے ہیں کہ جو پیغام بھی ہماری قیادت دے گی ہم اسے کشمیر کے کونے کونے تک پہنچائیں گے، ا نہوں نے کہا کہ کشمیر سے آنے والا قافلہ پنی ماؤں ، بہنوں ، بیٹیوں ساتھ میں آنے والے بھائیوں ، شیعہ سنی محب وطن قوم کو سلام پیش کرنے آیا ہے کہ تم نے طاغوتی و استعماری نظام سے مقابلے کے لیئے اپنے گھر بار کو چھوڑا ، کشمیر کے باسی تمہارے ساتھ مکمل اظہار یکجہتی کرتے ہیں۔کرپٹ اور بے رحم حکمران اب زیادہ دیر ٹکنے والے نہیں ، انہیں جلد ان کے منطقی انجام تک پہنچائیں گے، مجلس وحدت مسلمین، پاکستان عوامی تحریک، سنی اتحاد کونسل و دیگر اتحادی جماعتوں کے قائدین کی جرأت و بہادری پر کارکنان و عوام نازاں ہیں۔

تفصیلات کے مطابق علامہ تصور جوادی ایک بہت بڑے قافلے کے ساتھ پیڈال میں داخل ہوئے تو پاکستان عوامی تحریک، مجلس وحدت مسلمین، سنی اتحاد کونسل ،مسلم لیگ قائد اعظم اوردیگر جماعتوں کے کارکنان نے ان کا پرجوش استقبال کیا وہ مجلس وحدت مسلمین پاکستان کے کیمپ میں کارکنوں کے ساتھ موجود رہے جہاں آنے والے مہمانان کا خیرمقدم کرتے رہے اس موقع پر کشمیر کابینہ اور اضلاع کے عہدیداران بھی ان کے ہمراہ موجود تھے۔انہوں نے اس موقع پر میڈیا کے نمائندگان سے گفتگو کرتے ہوئے کہا اسلام آباد آج تحریر اسکوائر کامنظر پیش کررہا ہے حکمرانوں کو نوشتہ دیور پڑھ لینا چاہیے عوامی سیلاب کے آگے طاقت کے استعمال سے بندنہیں باندھے جا سکتے آوازخلق کو نقارہ خدا سمجھتے ہوئے حکمرانوں کو باعزت گھر جانا چاہیے۔

وحدت نیوز(اسلام آباد) پاکستان عوامی تحریک ، مجلس وحدت مسلمین ، سنی اتحاد کونسل اور مسلم لیگ ق کے انقلاب مارچ کے شرکاء اسلام آباد پہنچ گئے   ہیں ،چودہ اگست کو ماڈل ٹاون لاہور سے شروع ہونے والاانقلاب مارچ چالیس گھنٹےکی طویل مصافت اور شدید سفری مشکلات کے بعدشہراقتدارمیں داخل ہوگیا ہے،ہزاروں    بسوں، کاروں اور موٹر سائیکلوں پر نکلنے والے قافلے میں لاکھوں پر جوش کارکن پارٹی پرچم لہراتے اور نعرہ بازی بھی کرتے رہے۔اسلام آباد کے داخلی کھناپل کے مقام پر ایم ڈبلیوایم راولپنڈی اسلام آباد کے کارکنان نے شرکائے انقلاب مارچ خصوصاً  مجلس وحدت مسلمین کے سربراہ علامہ ناصر عباس جعفری  کا پرتپاک استقبال کیا،اس موقع پر مجلس وحدت مسلمین پاکستان کے مرکزی رہنما علامہ شفقت شیرازی، علامہ احمد اقبال، علام اعجاز بہشتی، علامہ عبد الخالق اسدی، ناصر شیرازی، فضل عباس ، نثا رفیضی اور مہدی عابدی بھی موجود تھے ، استقبالیہ کیمپ سے مسلسل قافلوں کی آمد پر انہیں خوش آمدید کہا گیااور ان پر پھولوں کی پتیاں بھی نچھاور کی گئیں ۔

انقلاب مارچ کے قائدین کو زیرو پوائنٹ پر جلسہ کرنے کی اجازت مل گئی ہے۔ ڈاکٹرطاہر القادری کہتے ہیں کہ ضمانت دیتے ہیں کہ ملک میں مارشل لاء نہیں لگ سکتا۔ لاہور سے شروع ہونے والے انقلاب مارچ کے شرکاء کا گوجرانوالہ، گجرات، کھاریاں، سرائے عالمگیر اور جہلم پہنچنے پر شاندار استقبال کیا گیا۔ازان فجرسے قبل   وزیر آباد کے مقام پر ایم ڈبلیوایم کےسینکڑوں  کارکنان نے شرکائے انقلاب مارچ کا فقید المثال استقبال کیا، گجرات میں چناب پل پر مسلم لیگ (ق) کی مقامی قیادت اور کارکنوں نے شرکاء میں کھانا بھی تقسیم کیا۔علامہ ناصر عباس جعفری نے مرکزی رہنماوں کے ہمراہ گجرات کی مقامی مسجدمیں نماز فجر ادا کی، ڈاکٹر طاہر القادری کا وقفے وقفے سے ہونے والا خطاب کارکنوں کا جوش و خروش بڑھاتا رہا۔ کھاریاں میں علامہ ناصر عباس جعفری،  صاحبزادہ حامد رضااور چوہدری پرویز الہی کے ہمراہ ناشتے کے بعد  میڈیا سے گفتگو کرتے ہوئے طاہر القادری کا کہنا تھا کہ عوامی تحریک کا انقلاب مارچ مکمل طور پر آئینی اور پُرامن ہے۔ حکمرانوں نے جو کیا کیا وہ آئینی ہے۔؟ ضمانت دیتے ہیں کہ ملک میں مارشل لاء نہیں لگ سکتا۔ حکومت کی جانب سے  عوامی تحریک کو زیرو پوائنٹ پر جلسے کی اجازت دے دی گئی ہے۔

وحدت نیوز(لاہور) سانحہ ماڈل ٹاؤن کے شہداء کا لہوابھی تک خشک نہیں ہوا۔حکمران دوسری دفعہ مقتل گاہ سجانے کی تیاری کر رہے ہیں۔سانحہ ماڈل ٹاؤن کے شہداء کی ایف آئی آر ابھی تک درج نہیں ہوئی۔جبکہ دوسری طرف علامہ ڈاکٹر طاہر القادری کی تقریر کو متنازعہ بنا کر جھوٹے مقدمات درج کیے جا رہے ہیں اس کی جتنی بھی مذمت کی جائے کم ہے۔پر امن احتجاج عوام کا بنیادی حق ہے اور نہتے پر امن عوام کو ہراساں کرنے والوں نے کشمیر پر مسلط،غاصب انڈین آرمی کو بھی پیچھے چھوڑ دیا ہے۔ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے خواتین ونگ کے اجلاس سے خطاب کرتے ہوئے کیا۔انہوں نے کہا کہ انقلاب مارچ کو ایسے اوچھے ہتھکنڈوں سے نہیں روکا جا سکتا۔ہم پنجاب حکومت کی طرف سے ظلم اور بربریت کی صورت میں گلگت بلتستان سے لیکر کراچی اور گوادر کے ساحل تک سڑکوں اور چوراہوں پر دھرنے دیں گیاور پورا پاکستان جام کر کے بند کردیں گے۔

علامہ راجہ ناصر عباس جعفری نے کہا کہ جمہوریت کے نام پر بدترین آمرانہ رویہ اپنایا جا رہا ہے۔جو جمہوریت کے ماتھے پر کلنک کا ٹیکہ ہے علامہ طاہر القادری اوریوم شہداء میں شمولیت کے لیے آنے والوں کو کسی بھی قسم کے نقصان کا ذمہ دار موجودہ حکمران ہوں گے۔دہشت گردوں اور ان کے سپورٹروں کے پیسوں کے بے دریغ استعمال سے اقتدار پر قابض ہونے والوں کے دن گنے جا چکے ہیں ۔استحصالی نظام کے خاتمے تک پاکستانی عوام چین سے نہیں بیٹھیں گے۔چینیوٹ،جھنگ،فیصل آباد، ملتان، بہاولنگر، سرگودھااور پنجاب کے کئی اضلاع میں چادر اورچاردیواری کے تقدس کو پامال کرتے ہوئے ہمارے کارکنوں کے گھروں پر چھاپے جاری ہیں پنجاب حکومت ہوش کے ناخن لیں۔اور عوام کے درمیان تصادم کا منصوبہ ترک کرے۔پنجاب پولیس عوام کے خلاف ظلم اور بربریت سے اجتناب کرے۔کیونکہ یہ پولیس ریاست کے ملازم ہیں نہ کہ شریف فیملی کے۔یوم شہداء پر ہمارے کارکنان شریک ہوں حکومت یوم شہداء سے پہلے انقلاب مارچ کے لیے مجبور نہ کرے۔

وحدت نیوز(لاہور)علامہ ڈاکٹر طاہرالقادری کاوحدت ہاؤس لاہور میں علامہ ناصرعباس جعفری کے ہمراہ پریس کانفرنس سے خطاب میں کہنا تھا کہ انقلاب مارچ کے لیے مجلس وحدت مسلمین بھی مشترکہ جدوجہد میں شامل ہے اور ایم ڈبلیو ایم کے کارکن انقلاب مارچ میں ہر اول دستہ ثابت ہوں گے۔موجودہ حکومت جوآئین اور قانون کی پاسداری اور جمہوریت کا راگ الاپتی ہے اور عوام کو قانون کا سہارا لینے کا درس دیتی ہے مگرملک میں کہیں بھی کوئی بھی ادارہ محفوظ نظر نہیں آتا انہوں نے کہاکہ دس اگست کو یوم شہداء منا رہے ہیں جہاں دعا اور قرآن خوانی ہوگی۔دس اگست کو یوم شہدائکے موقع پر ایک پتہ بھی نہیں ٹوٹے گا۔اگر حکمرانوں نے غیر جمہوری اور غیر اخلاقی ہتھکنڈوں کے ذریعے روکنے کی کوشش کی تو انقلابی قوم جاتی امراء جا کر یوم شہداء منائیں گے ،ڈاکٹرطاہر القادری نے کہا کہ حکومت نے اضلاع کے ڈی سی اوز اور ڈی پی اوز کو ہدایات کی ہے کہ ٹرانسپورٹر سے بسوں کی چابیاں، ڈرئیوروں کے لائیسنس اور روٹ پرمٹ لے کر ضبط کر رہے ہیں رہے ہیں اور جن ٹرانسپورٹرز نے بیانے لیے تھے وہ واپس کرائے جا رہے ہیں ایسے اوچھے ہتھکنڈوں سے ان کی بوکھلاہٹ کا اندزہ بخوبی لگایا جاسکتا ہے ڈیڑھ ماہ سے زائد کا عرصہ گذر گیا مگرسانحہ ماڈل ٹاؤن کی ایف آئی آردرج نہ ہوسکی اس فرسودہ نظام میں رہتے ہوئے عوام کو انصاف ملنا ممکن نہیں ہمارا مشن ایسے فرسودہ نظام کو بدلنا ہے اور یہ پاکستان کے 18 کروڑ عوام کی خواہش بھی ہے انہوں نے کہا کہ اب ظالموں پر پرچے درج ہوں گے اور ظلم کرنے پر برابر بدلہ لیا جائے گا۔انہوں نے وزیر اعلیٰ پنجاب کو مخاطب کرتے ہوئے کہا کہ تمہاری ٹانگوں اوردل دماغ میں قوت نہیں رہی اب تم ملک سے باگ نہیں سکو گے۔

انہوں نے کہا شریف برادران نے ملک میں دہشت گردی کرانے کی انتہا کر دی ملک کا کوئی ایسا حصہ نہیں جہاں لاشیں نہ گرائی گئیں ہوں کوئٹہ اور گلگت بلتستان میں شیعہ نسل کشی کی گئی اپنے پیاروں کی لاشوں کو لئے لوگوں کو کئی دن تک سڑکوں پر بیٹھنا پڑاان حکمرانوں کے دور میں روزانہ سو سو لاشیں گرتی رہیں مگریہ بے حس ٹس سے مس نہیں ہوئے۔اب ان ظالموں کوشہدائے ماڈل اور شہدائے ملت جعفریہ کے قاتلوں کے خون کا حساب دینا ہو گا،انہوں نے کہا کہ اکتیس اگست سے پہلے حکومت ختم ہو جائے گی سانحہ ماڈل ٹاؤن میں قتل و غارت کا حکم وزیر اعلیٰ شہاز شریف نے دیا تھا اب ملک میں کسی کوتکفیر کے نام پر دہشت گردی کی اجازت نہیں دی جائے گی، کسی مسلک کو کافر نہیں کہا جائے گا اور تکفیریت کو سنگین جرم قرار دیا جائے گا ، آئین میں ترمیم کرکے سخت قانون سازی کریں گے،گلگت بلتستان کے عوام کو خوشخبری ہے کہ اْن کومکمل آئینی حقوق دے کر ملک کا پانچواں صوبہ بنایا جائے گا۔ڈاکٹر طاہرالقادری کا کہنا تھا کہ مڈٹرم الیکشن حکومت کا ایجنڈا ہے غریب عوام کا ایجنڈا انقلاب ہے اور انقلاب آکر ہی رہے گا۔۔پریس کانفرنس میں مسلم لیگ قائد اعظم کے صدر چوہدری شجاعت حسین،علامہ محمد امین شہیدی،صاحبزادہ حامد رضابھی موجود تھے۔

وحدت نیوز(لاہور) پاکستان عوامی تحریک کے سربراہ ڈاکٹر طاہر القادری پہلی مرتبہ مجلس وحدت مسلمین کا شکریہ ادا کرنے کیلئے صوبائی دفتر لاہور میں آئیں گے۔ اس موقع پر مسلم لیگ قاف کے سربراہ چوہدری شجاعت حسین، چوہدری پرویز الٰہی اور سنی اتحاد کونسل کے سربراہ صاحبزادہ حامد رضا بھی ان کے ہمراہ ہونگے۔ تمام جماعتوں کے رہنماوں کی علامہ ناصرعباس جعفری اور ان کی سیاسی ٹیم سے ملاقات بھی ہوگی اور بعد ازان دن اڑھائی بجے ایک پریس کانفرنس کی جائیگی، جس میں آئندہ کے لائحہ عمل کا اعلان کیا جائیگا، ذرائع کے مطابق انقلاب مارچ سے قبل اس ہنگامی پریس کانفرنس کو انتہائی اہمیت کا حامل قرار دیا جا رہا ہے۔

وحدت نیوز(لاہور) انقلاب مارچ پاکستان کے بیروزگاری،مہنگائی،لاقانونیت،بدامنی اور سیاسی اشرافیہ کے ہاتھوں یرغمال عوام کے لئے نوید سحر ثابت ہوگا، پاکستان پربرسوں سے مسلط خاندانی سیاست وسیاسی فرعونوں کے اقتدار کے خاتمے کا وقت قریب آ پہنچاہے، اب اس ملک پر عوام کی حکمرانی ہو گی،پنجاب حکومت نے ایم ڈبلیوایم کے خلاف کریک ڈاون کا آغاز کر دیا ہے، مقتل اور جیل ہمارے نزدیک کوئی معنی نہیں رکھتے ، پاکستان کو سعودی کالونی بنانے کا شریف برادران کا خواب شرمندہ تعبیر نہیں ہوگا، ان خیالات کا اظہار مجلس وحدت مسلمین کے سربراہ علامہ راجہ ناصر عباس جعفری نے پاکستان عوامی تحریک کے سربراہ علامہ ڈاکٹر طاہرالقادری اور چوہدری برادران سے منہاج سیکرٹریٹ پر انقلاب مارچ کے حوالے سے بلائے گئے مشاورتی اجلاس کے بعد صوبائی سیکرٹریٹ مجلس وحدت مسلمین پنجاب میں صوبائی کابینہ کے اراکین و علما کے اجلاس سے خطاب کرتے ہوئے کیا ۔

اُن کا کہنا تھا کہ مجلس وحدت مسلمین اس کرپٹ اور استحصالی نظام کیخلاف بھر پور عوامی جدوجہد کریگی پاکستان کے عوام آج غربت،فاقہ کشی کے ہاتھوں خود کشی کرنے پر مجبور ہیں دہشت گردوں کے ہاتھوں کراچی سمیت ملک بھر میں لوگوں کے گھر اُجڑ رہے ہیں ،طالبان کیخلاف پاک فوج نے ایکشن لیا حکمران تو ان کے اتحادی تھے ان نااہل قابض حکمرانوں نے عوام کو دہشت گردوں کے رحم و کرم پر چھوڑدیا ہے اور ملک کو آئی ایم ایف کے ہاتھوں گروی رکھا جارہا ہے طبقاتی نظام نے سسٹم کو کھوکھلاکردیا آج پاکستان کے اندر اسی طبقاتی نظام تعلیم کے نتیجہ میں ملکی اہم اداروں میں اشرافیہ ہی مسلط ہیںعلامہ راجہ ناصر عباس کا کہنا تھا کہ اب پاکستانی عوام ملکی سلامتی وبقا اور پاکستان کو دینا کا مثالی ملک بنانے کیلئے جلد ان معاشی قارونوں،سیاسی فرعونوں اور مذہبی بلعم بعوروں کیخلاف علم بغاوت بلند کریگی اور انشااللہ ہم قائد کے پاکستان کو لٹیروں ، جاگیرداروں، وڈیروں سے آزاد کرا کر ہی دم لیں گے۔

انہوں نے مذید کہا کہ ڈاکٹر طاہر القادری کی انقلابی اصلاحاتی تحریک کی حمایت کو جرم قرار دے کر ن لیگ نے حکومتی مشنری ایم ڈبلیوایم کے خلاف استعمال کرنا شروع کر دی ہے، ہمارے بے گناہ کارکنان کو گرفتار و ہراساں کیا جارہا ہے، لیکن یہ حربے ہمیں حقوق کے حصول کی جدوجہد سے دستبردار نہیں کر سکتے ، ہم اس انقلابی موومنٹ کا ہر اول دستہ ثابت ہونگے، ظلم ، استبداد، دہشت گردی ، کرپشن اور استحصالی سسٹم سے تنگ عوام پاکستان بھرمیں سڑکوں پر نکلنے کی تیاری کریں چند روز کی زحمت ہمیں ان ظالم و جابر حکمرانوں سے ہمیشہ کے لئے نجات دلوادے گی۔

 علامہ راجہ ناصر عباس جعفری نے مجلس وحدت مسلمین پاکستان کے مرکزی کابینہ اور پنجاب کے صوبائی شوریٰ کا ہنگامی اجلاس 03 اگست کو لاہور میں طلب کر لیا ہے جس میں انقلاب مارچ کے حوالے سے اہم فیصلے کیے جائیں گے علامہ راجہ ناصر عباس جعفری نے انقلاب مارچ میں حکومتی رکاوٹ کی صورت میں متنبہ کرتے ہوئے اعلان کیا کہ پرامن عوام کو اپنی آئینی و قانونی حقوق کی جدو جہد سے روکا گیا تو ملک بھر کے شاہراہوں اور چوراہوں پر دھرنے دیے جائیں ملک بھر میں عوام پر کسی قسم کے تشدد یا ہراساں کرنے کی صورت میں پیش آنے والے واقعے کی ذمہ دار اس صوبے کی حکومت اور وفاقی حکمران ہونگے ۔