وحدت نیوز(خیبرپختونخوا) مجلس وحدت مسلمین شعبہ تنظیم سازی کے وفد نے مرکزی سیکرٹری تنظیم سازی یعقوب حسینی کی سربراہی میں ضلع ہنگو، کوہاٹ، پشاور، نوشہرہ  اورکزئی ایجنسی اورکرم ایجنسی  کے دورہ جات کئے، علی رضا طوری اور صوبائی سیکرٹری تنظیم سازی علامہ وحید عباس کاظمی بھی وفد میں شامل تھے۔ وفد نے ضلع ہنگو کے دورہ کے موقع پر مدرسہ جامعتہ العسکریہ میں ایم ڈبلیو ایم خیبر پختونخوا کے سابق سیکرٹری جنرل علامہ سبیل حسن مظاہری سے ملاقات کی، اس موقع پر ہنگو کے حالات اور تنظیمی امور پر گفتگو ہوئی، علاوہ ازیں وفد نے کوہاٹ کا دورہ کیا، جہاں ایم ڈبلیو ایم کوہاٹ کے سیکرٹری جنرل حاجی علی داد خان سے ملاقات کی، وفد نے دورہ پشاور کے موقع پر صوبائی آفس مسئول ارشاد حسین بنگش سے ملاقات کی، جبکہ دورہ نوشہرہ کے دوران سیکرٹری جنرل اورنگزیب جعفری سے ملاقات کی۔ وفد نے اورکزئی ایجنسی کا بھی دورہ کیا، جہاں کلایہ اور کوریز میں علمائے کرام اور عمائدین سے بھی ملاقاتیں ہوئی، جبکہ کرم ایجنسی میں دورے کے موقع پر مدرسہ جامعہ امام خامنہ ای کے پرنسپل علامہ سید عابد حسین الحسینی ، علمائے اہل بیت ؑ کے ذمہ داران،تحریک حسینی کے مسئولین سے ملاقاتوں کے علاوہ شہید قائد علامہ عارف حسین الحسینی کے مزار پر حاضری دی گئی اور فاتحہ خوانی کی گئی۔

وحدت نیوز(پشاور) مجلس وحدت مسلمین خیبر پختونخوا کے رہنماء ارشاد حسین بنگش نے لیڈی ریڈنگ اسپتال پشاورمیں یوم عاشورہ کے موقع پراورکزئی ایجنسی میں بم دھماکہ کے باعث زخمی ہونے والے افراد کی عیادت کی، اس موقع پر ان کا کہنا تھا کہ اورکزئی ایجنسی میں عرصہ دراز سے امن و امان کا مسئلہ چلا آرہا ہے، جبکہ پولیٹیکل انتظامیہ ایجنسی میں امن قائم کرنے میں یکسر ناکام ہے، ان کا کہنا تھا کہ یوم عاشورہ کو بے گناہ عزاداروں کو بربریت کا نشانہ بنایا گیا، جبکہ انتظامیہ کی جانب سے اس واقعہ کے بعد کسی قسم کی کارروائی عمل میں نہیں لائی گئی، جو کہ پولیٹکل انتظامیہ کی کارکردگی پر سوالیہ نشان ہے، ان کا مزید کہنا تھا کہ اورکزئی ایجنسی میں بھی شمالی وزیرستان طرز پر آپریشن کی ضرورت ہے، تاکہ دہشتگردوں کا قلع قمع کیا جاسکے، پولیٹیکل انتظامیہ اورکزئی ایجنسی کو بھی فوری طور پر تبدیل کیا جائے۔

وحدت نیوز(اورکزئی ایجنسی) مجلس وحدت مسلمین اورکزئی ایجنسی کے سیکرٹری جنرل علامہ مصطفیٰ بہشتی نے اعلان کیا ہے کہ شہید قائد علامہ سید عارف حسین الحسینی (رح) کی 26ویں برسی 3 اگست کو بھرپور انداز میں منائی جائی گی۔ ان خیالات کا اظہار انہوں نے اورکزئی ایجنسی کے علاقہ کلایہ میں منعقدہ ایک تنظیمی اجلاس سے خطاب کرتے ہوئے کیا۔ ان کا کہنا تھا کہ 3 اگست کو انہتائی شان و شوکت سے برسی قائد شہید علامہ سید عارف حسین الحسینی (رح) کا پروگرام منعقد کیا جائے گا، جس میں 10 اگست کو کوہاٹ میں ’’یوم عزم وفائے حسین (ع)‘‘ کے عنوان سے منعقد ہونے والے عظیم الشان اجتماع کے حوالے سے عوامی شرکت کو اجاگر کیا جائے گا۔ علامہ مصطفیٰ بہشتی کا مزید کہنا تھا کہ 10 اگست کے اجتماع کی تیاریاں جاری ہیں، اور 3 اگست کا پروگرام اس حوالے سے زمینہ سازی کا کام سرانجام دے گا۔

وحدت نیوز(اوکزئی ایجنسی) سانحہ تفتان کے خلاف مجلس وحدت مسلمین کے زیر اہتمام اورکزئی ایجنسی میں احتجاجی ریلی نکالی گئی، قبل ازیں مدرسہ انوارال اہلبیت (ع) کے زیر اہتمام احتجاجی جلسہ منعقد ہوا، جس میں ایجنسی بھر سے لوگ شریک ہوئے۔ ایم ڈبلیوایم مانی خیل یونٹ کے زیر اہتمام مانی خیل امام بارگاہ سے کلایہ بازار تک احتجاجی ریلی نکالی گئی، جس میں حکومت کے خلاف شدید نعرہ بازی کی گئی۔ اس موقع پر مجلس وحدت مسلمین اورکزئی ایجنسی کے سیکرٹری جنرل اور پرنسپل مدرسہ انوار ال اہلبیت (ع) علامہ مصطفیٰ بہشتی نے کہا کہ افسوس کے ساتھ کہنا پڑتا ہے کہ حکومت کی طرف سے سانحہ تفتان میں ملوث عناصر کے خلاف کوئی کارروائی عمل میں نہیں لائی گئی اور نہ ہی شہداء کے لواحقین کیلئے مالی معاوضے کا اعلان ہوا۔ ان کا کہنا تھا کہ اس سے معلوم ہوتا ہے کہ ہمارے حکمران کس قدر نااہل اور بے کار ہیں، انہیں حکومت چلانے کا طریقہ ہی نہیں آتا، ہم اس عظیم اجتماع کے ذریعے مطالبہ کرتے ہیں کہ حکومت شہداء کے لئے مالی معاوضے کا اعلان کرے اور زائرین کے لئے راستے کو محفوظ بنانے کے لئے اقدامات کرے۔ ان کا کہنا تھا کہ ہم یہ بھی مطالبہ کرتے ہیں کہ زائرین کی مشکلات کو ختم کیا جائے، ان کے ساتھ ناروا سلوک برداشت نہیں کیا جائے گا۔ اس موقع پر علامہ سید اعوان علی شاہ، علامہ باقر حسین منتظری، علامہ جواد حسین اور دیگر نے بھی خطاب کیا اور سانحہ تفتان کی شدید مذمت کرتے ہوئے شہدا کے لواحقین سے اظہار ہمدردی کیا۔

وحدت نیوز(کوہاٹ)ّ مجلس وحدت مسلمین خیبر پختونخوا کے الیکشن کے بعد باقاعدہ طور پر تنظیمی سرگرمیوں کا آغاز کر دیا گیا ہے، نومنتخب صوبائی سیکرٹری جنرل علامہ سید سبطین حسین الحسینی نے 12 جنوری 2014ء کو جامعہ شہید علامہ عارف الحسینی میں اپنے انتخاب کے بعد اس عزم کا اظہار کیا تھا کہ صوبہ خیبر پختونخوا میں مخصوص حالات کے باوجود ملت کی خلوص دل کیساتھ خدمت کرتے ہوئے مجلس وحدت مسلمین کو یہاں بھی ایک فعال ترین تنظیم کے طور پر متعارف کرانے میں اپنا بھرپور کردار ادا کریں گے۔ اسی جذبہ کے تحت انہوں نے تنظیمی دورہ جات کا آغاز کیا، اور پہلے مرحلہ میں کوہاٹ، ہنگو اور اورکزئی ایجنسی کا دورہ کیا، اس موقع پر علامہ مصطفیٰ بہشتی، علامہ سید زاہد علی اور صوبائی آفس مسئول ارشاد حسین بنگش بھی ان کے ہمراہ تھے۔

اپنے چار روزہ دورے کے دوران وفد سب سے اورکزئی کے علاقہ حسین آباد گیا، جہاں مقامی عمائدین کی جانب سے ایک نشست کا اہتمام کیا گیا، جہاں بڑی تعداد میں موجود لوگوں کو مجلس وحدت مسلمین کے اغراض و مقاصد، اہداف اور ملک بھر میں تنظیم کی کارکردگی کے حوالے سے آگاہ کیا گیا، نشست میں مقامی عمائدین، اہم شخصیات اور عوام نے ایم ڈبلیو ایم کا خیرمقدم کرتے ہوئے اپنی جانب سے ہر قسم کے تعاون کی یقین دہانی کرائی۔ بعدازاں وفد نے اورکزئی ایجنسی کے علاقہ کوریز کا دورہ کیا، جہاں مقامی افراد نے وفد کا بھرپور استقبال کیا، جہاں علامہ سبطین حسینی اور علامہ مصطفیٰ بہشتی نے اجتماع سے خطاب کیا۔ اس موقع پر مقامی عمائدین نے ایم ڈبلیو ایم کے وفد کا شکریہ ادا کیا، اور اپنی خدمات پیش کرتے ہوئے کہا کہ آج سرزمین کوریز پر شہید علامہ عارف الحسینی کی یاد تازہ ہو گئی، ہم مجلس وحدت مسلمین کو مضبوط بنانے کیلئے ہر قربانی پیش کریں گے۔

اس موقع پر بنوں دھماکہ میں شہید ہونے والے فوجی جوان شعیب حسین کے ایصال ثواب کیلئے مجلس عزاء کا اہتمام کیا گیا، جس سے علامہ سبطین حسینی نے خطاب کیا۔ وفد بعدازاں شہید شعیب حسین کے گھر حاضر ہوا، جہاں شہید کے والد گرامی سمیت دیگر لواحقین سے ملاقات کی اور شہید کی خدمات کو خراج تحسین پیش کیا۔ ایم ڈبلیو ایم کے مسئولین نے اورکزئی ایجنسی سے ہنگو کی طرف سفر کیا، اور وہاں سب سے پہلے شیعہ علماء کونسل ضلع ہنگو کے رہنماء علامہ منصف علی اور علامہ اصحاب علی کے والد مرحوم کی تعزیت کیلئے ان سے ملاقات کی۔ اس کے بعد وفد استرزئی گیا، جہاں شیعہ علماء کونسل ضلع ہنگو کے رہنماء علامہ حمید امامی، علامہ نبی حسین اور سیاسی شخصیت حاجی اسماعیل سے ملاقات کی۔

مجلس وحدت مسلمین کے رہنماوں نے پھر لدی خیل کا رخ کیا، جہاں علامہ سید نور آغا اور علامہ جبار سے ملاقات کی، اور ہنگو میں تنظیم کو فعال بنانے کے حوالے سے تفصیلی گفتگو کی۔ علاوہ ازیں وفد نے ہنگو کی معروف دینی درس گاہ جامعہ العسکریہ کا دورہ کیا، جہاں علامہ عامر شمسی سے ملاقات کی۔ جس کے بعد رئیسان میں علامہ باقر حسین اور تحریک جعفریہ کے سابق سینئر رہنماء سعید حسین جبکہ پاس کلے میں علامہ ارشاد علی اور انشاد علی سے ملاقاتیں کیں۔ وفد نے ضلع کوہاٹ کے علاقہ ہادی زئی کا بھی دورہ کیا، جہاں بزرگ عالم دین علامہ اعوان علی شاہ، وحدت کونسل کے رہنماء علامہ سیدین اور علامہ میر حسن کیساتھ تنظیمی امور کے حوالے سے نشستیں کیں، اور باہمی تعاون کو فروغ دیتے ہوئے ملت تشیع کی خدمت کرنے پر بات چیت ہوئی۔

وفد نے اپنے اس دورے کے دوران علی زئی میں اسوہ پبلک اسکول کے مدرس علامہ سجاد حسین، اسکول کے سٹاف اور بچوں سے ملاقات کی، اس موقع پر علامہ سید سبطین الحسینی نے اسکول کے بچوں سے خطاب کیا، بعدازاں علامہ قیصر عباس سے کوہاٹ کے علاقہ شیرکوٹ میں ملاقات کی گئی، پھر وفد نے کوہاٹ ہی کے علاقہ چکر کوٹ کا دورہ کیا، جس کے بعد وفد نے علامہ سید مجتبیٰ حسین الحسینی سمیت مختلف شیعہ عمائدین اور شخصیات سے ملاقاتیں کیں اور تنظیمی امور پر تفصیلی گفتگو کی گئی۔ مجلس وحدت مسلمین خیبر پختونخوا کے وفد کے اورکزئی ایجنسی، ضلع ہنگو اور کوہاٹ کے چار روزہ دورہ کو مقامی افراد، علمائے کرام اور عمائدین کی جانب سے سراہا گیا۔

وحدت نیوز(اورکزئی ایجنسی) مجلس وحدت مسلمین اورکزئی ایجنسی کے ایک وفد نے مختلف علاقوں کے دورہ جات اور شیعہ عمائدین سے ملاقاتیں کیں۔ ایم ڈبلیو ایم اورکزئی ایجنسی کے سیکرٹری جنرل علامہ مصطفیٰ بہشتی نے ’’وحدت نیوز‘‘ کو بتایا کہ انہوں نے ایک وفد کے ہمراہ اورکزئی کے علاقہ کوریز اور حسین آباد کے دورہ جات کئے، اس موقع پر ڈپٹی سیکرٹری جنرل گلشن علی، علامہ معاذ، جنان استاد، عظیم خان، میجر (ر) سراج اور نقاب علی شامل تھے۔ مجلس وحدت مسلمین کے وفد نے اپنے اس دورہ کے دوران خیال دین، ملک شباب حسین، ملک نور اکبر، حاجی سردار خان سے ملاقات کی۔ ان عمائدین نے مجلس وحدت مسلمین کی بھرپور حمایت کا اعلان کرتے ہوئے ہر قسم کے تعاون کی یقین دہانی کرائی۔ ان کا کہنا تھا کہ ہمیں جو ذمہ داری سونپی جائے ہم نبھانے کیلئے تیار ہیں۔ ایم ڈبلیو ایم کے وفد نے حسین آباد کا بھی دورہ کیا، اور علامہ رفیق اور دیگر سے ملاقاتین کیں، اس موقع پر علامہ مصطفیٰ بہشتی نے مجلس وحدت مسلمین کے قیام کے اغراض و مقاصد اور اہداف سے آگاہ کیا۔