وحدت نیوز(اسلام آباد) سربراہ مجلس وحدت مسلمین علامہ راجہ ناصر عباس کے اعلان کے مطابق گٹی داس بابو سرٹاپ بس حادثے کے زخمیوں میں فی کس 50 ہزاروپے تقسیم کر دیئے گئے۔ اس موقع پر علامہ اقبال بہشتی رکن شوری عالی ، مرکزی سیکرٹری تعلیم ایم ڈبلیو ایم نثارفیضی اورمرکزی ڈپٹی میڈیا سیکریٹری مظاہر حسین شگری نے زخمیوں میں رقوم تقسیم کیں ۔

گزشتہ دنوں گٹی داس بابو سرٹاپ بس حادثے میں شدید زخمی ہونے والوں کو سی ایم ایچ راولپنڈی لایا گیا تھا جن کی عیادت کے موقع پر علامہ راجہ ناصر عباس جعفری نے مجلس وحدت مسلمین گلگت بلتستان کے سیکرٹری جنرل علامہ سید علی رضوی کی جانب سے زخمیوں کے لئے فی کس 50 ہزار روپے امداد کا اعلان کیا تھا ۔

وحدت نیوز(گلگت) سیکرٹری جنرل مجلس وحدت مسلمین گلگت بلتستان آغا سید علی رضوی کی سربراہی میں ایم ڈبلیو ایم گلگت بلتستان کے وفد نے نو منتخب صوبائی صدر پاکستان تحریک انصاف گلگت بلتستان سید جعفر شاہ کے ساتھ ملاقات کی ۔آغا علی رضوی نے جعفرشاہ کو پی ٹی آئی گلگت بلتستان کا صدر منتخب ہونے پر مبارک پیش کی ۔

دونوں رہنماؤں کے درمیان ملاقات میں گلگت بلتستان کے حقوق کے لئے ملکر کام کرنے اور علاقے کی تعمیر و ترقی میں، سیاسی اخلاقی اقدار کی پاسداری کرنے اور مختلف ایشوز پر اصولی موقف اپنانے پر اتفاق کیا۔جعفرشاہ نے ایم ڈبلیوایم کے وفد کا آمد پر شکریہ اداکیا۔وفد میں ایم ڈبلیوایم کے رہنماغلام عباس، الیاس صدیقی ،عارف قمبری ، الیاس موسوی ودیگر بھی شامل تھے ۔

وحدت نیوز(سکردو) نامور مجاہد ومبارزعالم دین سید علی رضوی آئندہ تین سال کیلئےمجلس وحدت مسلمین گلگت بلتستان کے سکریٹری جنرل منتخب ہو گئے۔ سید علی رضوی اس سے پہلے بھی سکریٹری جنرل کے عہدے پر کام کر رہے تھے انہیں ان کی شاندار کارکردگی کی بنا پر دوبارہ تین سال کیلئے سکریٹری جنرل منتخب کر دیا گیا۔ سکریٹری جنرل کے انتخاب کیلئے باقاعدہ  پولنگ ہوئی، جس میں تمام اضلاع سے پارٹی کے ایک ایک ذمہ دار نے حصہ لیا اور اپنے حق رائے دہی کا استعمال کیا، پارٹی کے مرکزی سکریٹری جنرل علامہ راجہ ناصر عباس جعفری نے پریس کانفرنس کے دوران سکریٹری جنرل کے انتخاب کا اعلان کیا، راجہ ناصر عباس جعفری نے کہا کہ سید علی رضوی اتحاد بین المسلمین کے عظیم داعی ہیں، انہوں پچھلے تین سال کے دوران جماعت کی مضبوطی کے ساتھ ساتھ اتحاد امت کیلئے بھی بڑے کام کئے انہیں، ان کی کارکردگی پر مذید تین سال کیلئے جماعت کا سکریٹری جنرل منتخب کر لیا گیا ہے، امید ہے کہ آغا علی رضوی پہلے سے زیادہ موثر طریقے سے جماعت کی ترقی کیلئے کام کریں گے اور تمام مسالک کے علمائے کرام اور عوام کو ایک پلیٹ فارم پر جمع کر کے موثر طریقے سے عوامی حقوق کی جنگ لڑیں گے۔

وحدت نیوز(سکردو) مجلس وحدت مسلمین پاکستان گلگت بلتستان کے سیکرٹری جنرل آغا علی رضوی نے کہا ہے کہ اسرائیل مسلسل اپنے منطقی انجام کی طرف بڑھ رہا ہے۔ فلسطین کی مزاحمتی تحریکوں اور غیور فلسطینی عوام نے نہ صرف اسرائیل کی طاقت کو چور چور کرکے رکھ دیا بلکہ عملی طور پر انکا گھیرا تنگ کر دیا ہے۔ مشرق وسطی میں نیل کی ساحل سے لے کر فرات تک اپنی سرحد کو توسیع دینے کے خواہاں اسرائیل ابھی اپنے وجود کو خطرے میں دیکھ کر شدید بوکھلاہٹ کا شکار ہو جاتا ہے۔ ایک طرف حزب اللہ لبنان، ایک طرف شام کی غیرت مند فوج اور اندر سے فلسطین کی مزاحمتی تحریکیں اسرائیل کے لیے خطرہ کی گھنٹی بن چکی ہے۔ آغا علی رضوی نے کہا ہے کہ اسرائیل اور امریکہ اسوقت عالم انسانیت کے لیے ناسور ہے۔ عرب ممالک بلخصوص سعودی عرب کا اسرائیل کے ساتھ جاری رویہ عالم انسانیت کے ساتھ خیانت ہے۔ سعودی عرب سنچری ڈیل کے ذریعے یروشلم کو اسرائیل کا دارلحکومت بنانے اور فلسطینی عوام کو مزید اپنے وطن سے بے دخل کرنے کے گھناونے جرم میں برابر کے شریک ہے۔

انہوں نے کہا کہ پاکستان ایک اسلامی ریاست ہونے کے ناطے اور قائد اعظم کے رہنمائی کے مطابق اسرائیل کو تسلیم کرنا یا کسی بھی سطح پر اسرائیل سے سفارتی تعلقات قائم کرنا نظریہ پاکستان کے ساتھ غداری ہے۔ اگر کسی بھی سطح پر اسرائیل کے ساتھ تعلقات استوار کرنے کی کوشش کی گئی تو پاکستان کے عوام حکمرانوں کا گھیرا تنگ کرکے رکھ دیں گے۔ پاکستان کے حریت پسند عوام کے دل فلسطینیوں کے ساتھ دھڑکتا ہے۔ انہوں نے کہا کہ فلسطین کی آزادی کے لیے پاکستان کے حکمرانوں کو بیانات سے ہٹ کر علمی طور پر جدوجہد کرنی چاہیے۔ انہوں نے مزید کہا کہ فلسطین کے حوالے سے ایران، لبنان اور شام کے علاوہ دیگر تمام اسلامی ممالک کا رویہ شرمناک اور خیانت پر مبنی ہے۔ اگر عالم اسلام متحد ہو جائے تو اسرائیل کو صفحہ ہستی سے مٹنے میں دیر نہیں گے گی۔ انہوں نے کہا کہ فلسطین کی طرح بلتستان کے عوام کو بھی اپنی زمینوں سے بے دخل کرنے کی کوشش ہو رہی ہے۔

وحدت نیوز(سکردو) گلگت میں تحریک حمایت مظلومین گلگت بلتستان کے رہنماوں کی احتجاجی گرفتاری پر مجلس وحدت مسلمین گلگت بلتستان کے سیکرٹری جنرل علامہ آغاعلی رضوی کی سربراہی میں ہنگامی اجلاس کا انعقاد اسکردو میں ہوا۔ اجلاس میں تحریک حمایت مظلومین کی چارٹر آف ڈیمانڈ پر فوری طور پر عمل کرنے کا مطالبہ کیا گیا ۔ اس اجلاس سے خطاب کرتے ہوئے آغا علی رضوی نے کہا کہ تحریک حمایت مظلومین گلگت بلتستان کا مطالبہ پورے گلگت بلتستان کا مطالبہ ہے ، قبل اس کے کہ جیلوں میں جگہ کم پڑ جائے ارباب اقتدار کو فوری طور اقدامات اٹھانے چاہیے۔

 تحریک مظلومین کا مطالبہ گلگت بلتستان کے ہر فرد کا مطالبہ ہے۔ چارٹر میں مطالبہ کیا گیا ہے کہ سپریم کورٹ آف پاکستان کے حالیہ فیصلے کے مطابق گلگت بلتستان کے عوام کو تمام تر بنیادی انسانی حقوق دئیے جائیں اور سپریم اپیلٹ کورٹ،چیف کورٹ کے ججز کی تعیناتی کے حوالے سے غیر قانونی طریقے ختم کرکے جوڈیشل کمیشن کے تحت ججز کی تعیناتی عمل میں لائی جائے اور چیف الیکشن کمشنر کی تعیناتی میرٹ کی بنیاد پر عمل میں لائی جائے۔

انہوں نے کہا کہ تحریک حمایت مظلومین کا یہ مطالبہ بھی پورے گلگت بلتستان کے عوام کا مطالبہ ہے کہ خطے کی زمین اور جنگلات پر عوام کا حق تسلیم کیا جائے اور خالصہ سرکار کے نام پر ناجائز قبضے کا سلسلہ ختم کیا جائے۔اسی طرح اپوزیشن لیڈر کی گرفتاری  عوامی مینڈیٹ کی توہین لہذا انہیں فوری طور پر رہا کیا جائے۔ انہوں نے کہا کہ سانحہ 13اکتوبر 2005ء کی جوڈیشنل انکوائری منظر عام پر لائی جائے۔

آغا علی رضوی نے کہا کہ تحریک حمایت مظلومین گلگت بلتستان کے ان تمام مطالبات کی بھرپور حمایت کرتے ہیں اور پورے خطے میں ان مطالبات کی بازگشت سنائی دیں گے۔ انہوں نے کہا کہ خطے کے عوام تیار اور آمادہ رہیں حکومتی مظالم اور غیر قانونی ہتھکنڈے حد سے گزر گئے ہیں۔

وحدت نیوز(سکردو) مجلس وحدت مسلمین بلتستان اور گلگت بلتستان یوتھ الائنس کی جانب سے ملک بھرمیں جاری شیعہ جوانوں کی جبری گمشدگیوں کے خلاف اور کراچی میں جاری دھرنے کے شرکاء سے اظہار یکجہتی کے لئے یاد گار شہداء سکردو پر علامتی دھرنادیا گیا اور احتجاج کیا گیا ۔

علامتی احتجاجی دھرنےسے سیکریٹری جنرل ایم ڈبلیوایم گلگت بلتستان اور مجاہد عالم دین آغا سید علی رضوی ، چیئرمین گلگت بلتستان یوتھ الائنس شیخ حسن جوہری، سیکرٹری جنرل ایم ڈبلیو ایم ضلع سکردو شیخ فدا ذیشان،صدر آئی ایس او بلتستان ڈویژن برادر موسی علی اور دیگر رہنماؤں سے خطاب کیا ۔

مقررین نے کہاکہ کراچی میں شیعہ لاپتہ افراد کے اہل خانہ کےاحتجاجی دھرنے کی مکمل حمایت کا اعلان کرتے ہیں۔ ریاستی ادارے گناہ گاروں کو عدالتوں میں پیش کریں اور بے گناہوں کو رہا کریں۔ جبری گمشدگیاں آئین پاکستان کی سراسر خلاف ورزی ہے ۔

اگر خانوادہ اسیران ملت جعفریہ کے مطالبات تسلیم نا ہوئے تو علامتی احتجاجی دھرنے مستقل دھرنوں میں تبدیل ہوجائیں گے اور یہ سلسلہ پوری ملک میں پھیل جائے گا۔