وحدت نیوز(ملتان) مجلس وحدت مسلمین کے وفدنے مرکزی ڈپٹی سیکریٹری جنرل سید ناصرعباس شیرازی ایڈوکیٹ کی سربراہی میں آئی ایس او کے سابق مرکزی صدر اور معروف قانون دان یافث نوید ہاشمی ایڈوکیٹ کے اہل خانہ سے ملتان میں انکی رہائش گاہ پر ملاقات کی اور انہیں سربراہ ایم ڈبلیوایم علامہ راجہ ناصرعباس کا خصوصی پیغام پہنچایا اور ایم ڈبلیوایم کی جانب سے مکمل تعاون کی یقین دہانی کروائی۔ اس موقع پر ایم ڈبلیوایم جنوبی پنجاب کے پولیٹیکل سیکریٹری انجینئر مہر سخاوت علی ،ضلعی سیکریٹری جنرل ملتان وجاہت علی مرزا اور دیگر بھی ان کے ہمراہ موجود تھے۔
ناصر شیرازی نے اپنے دورہ ملتان کے دوران ہائی کورٹ بار ملتان کے عہدیداران،رکن قومی اسمبلی ملک عامر ڈوگر اور چیف وہپ پی ٹی آئی سے ملاقات بھی کی اور یافث ہاشمی جلد بازیابی کیلئے تمام ممکنہ اقدامات پر تفصیلی بات چیت اور مشاورت کی۔بعد ازاں انہوں نے جامع مسجد گلگشت کالونی میں نماز جمعہ کے اجتماع اور آئی ایس او اور ایم ڈبلیوایم کے تحت پریس کلب پر جاری احتجاجی دھرنے کے شرکاء سے خطاب کرتے ہوئے کہاکہ یافث ہاشمی کا وفاقی دارالحکومت سے اغواء باعث تشویش اور قابل مذمت ہے۔
انہوں نے مزید کہا کہ وطن کے محب وطن بیٹوں کا یوں لاپتہ کیا جانا کسی صورت آئینی وقانونی اقدام نہیں ۔ہزاروں قربانیوں کے باوجود ملت جعفریہ کے فعال اور متحرک رہنماؤں کا ماورائے عدالت جبری گمشدہ کیا جانا انسانی حقوق کے عالمی قوانین کی رو سے قومی جرم ہے۔ہم یافث ہاشمی کی باحفاظت بازیابی کیلئے اپنی تمام تر صلاحتیں بروئے کار لارہے ہیں ۔امید ہے انشاءاللہ بحق اسیران کربلا ع یافث ہاشمی جلد آپ کے درمیان ہوں گے۔