وحدت نیوز(اسلام آباد)مرکزی صدر مجلس علمائے شیعہ پاکستان علامہ سید حسنین عباس گردیزی نےاپنے ایک بیان میں ملک بھر کے علماء ، آئمہ مساجد و جمعہ والجماعت سے اپیل کی ہے کہ اس سال ماہ مبارک رمضان شدید مہنگائی کے دور میں آرہا ہے، حکمرانوں نے عوام کو ریلیف دینے کیلئے کوئی ٹھوس حکمت عملی مرتب نہیں کی۔

انہوں نے مزید کہا کہ مہنگائی بے روزگاری کے سبب سفید پوش خاندانوں اور روزہ داروں کی مشکلات کے پیش نظر ہم سب کی ذمہ داری بڑھ گئی ہے۔ علماء و خطباء مخیرین کے ساتھ مل کر پریشان حال مسلمانوں کیلئے ماہ خدا میں سحری اور افطاری کو یقینی بنائیں اور مستحقین کیلئے عطیہ ضرور کریں۔