وحدت نیوز(کراچی)مجلس وحدت مسلمین پاکستان صوبہ سندھ کے رہنما سید علی حسین نقوی نے کہا ہے کہ سندھ میں بلدیاتی انتخابات کے پہلے مرحلے میں الیکشن کمیشن کی جانب سے بدانتظامی اور بدنظمی بلدیاتی انتخابات کے نتائج کی صحت کو مشکوک بنانے کیلئے کافی ہے، اگر الیکشن کمیشن کی بلدیاتی انتخابات کرانے کی مکمل تیاری نہیں تھی تو انتخابات کرانے کی اتنی جلدی کیوں تھی۔ میڈیا کو جاری کردہ اپنے بیان میں رہنما ایم ڈبلیو ایم نے کہا کہ انتخابی عمل میں بدنظمی الیکشن کمیشن کی غیر جانبداری پر ایک سوالیہ نشان ہے۔
علی حسین نقوی نے کہا کہ کسی حلقے میں بیلٹ پیپرز نہیں تو کہیں غیر تربیت یافتہ عملے کی ناتجربہ کاری کی وجہ سے ووٹ کاسٹ نہیں ہو پائے، سندھ کی وڈیرہ شاہی انتخابات پر بری طرح مسلط ہے اور اپنی مرضی کے نتائج مرتب کئے جانے کے قوی امکانات موجود ہیں، ہم اس بدترین بدنظمی کی شدید الفاظ میں مذمت کرتے ہیں اور اس پورے انتخابی عمل کو مسترد کرتے ہیں۔
