وحدت نیوز(جعفرآباد) تین جمادی الثانی خاتون جنت حضرت بی بی فاطمۃ الزہراء سلام اللہ علیہا کے یوم شہادت کے موقع پر منعقدہ مجلس عزا سے خطاب کرتے ہوئے ایم ڈبلیو ایم بلوچستان کے سیکریٹری جنرل علامہ مقصود علی ڈومکی نے کہا ہے کہ خاتون جنت (س) کی حیات طیبہ قیامت تک صنف نسواں کے لئے نمونہ عمل ہے۔ آپ (س) سیرت و کردار میں رسول اکرم (ص) کی شبیہہ تھیں۔ آپ (س) کے دامن عصمت میں جن عظیم شخصیات نے تربیت پائی وہ انسانیت کے عظیم رہبر و رہنما اور محسن قرار پائے۔ انہوں نے کہا کہ مسلم خواتین کو مغربی ثقافتی یلغار سے متاثر ہونے کی بجائے حضرت فاطمہ زہراء کے نقش قدم پر چلنا ہوگا۔ جنہوں نے عبودیت الہی، شرم و حیا، عفت و پاک دامنی اور اعلیٰ انسانی اقدار کا درس دیا۔ ہم ان کے نقش قدم پر چل کر دنیا و آخرت میں سرخرو ہو سکتے ہیں۔